Wẽnnaam pʋlma arzãna

FOTO ning yãmb sẽn ne wã wilgda arzãnã sẽn na n yɩ to-⁠to. Na n yɩɩ wa no-​rɛɛs a Ezai sẽn da togsã. Yaa a Zonas kũumã poor bilf bal la a Ezai rog-​yã.

Arzãn yaa zĩig sẽn yaa neere, tɩ tɩɩs la rũms wʋsg be be. Yãmb sẽn get arzãnã sẽn be fotã zugã, tẽegda yãmb bõe? A pa wõnd zĩ-neer ning a Zeova sẽn da maneg n ning a Ãdem ne a Hawa wã sɩda? La rẽ yĩnga tẽngã fãa tõe n wa lebga arzãn bɩ?

A Zeova yeela no-​rɛɛs a Ezai t’a gʋls n wilg arzãnã sẽn na n yɩ to-⁠to. Ad a Ezai sẽn gʋls bũmb ninga: ‘We-​baas ne piis na n tũu taaba. La nag-⁠bi ne gɩgem-​poal na n naaga taab n wãb yamdo, tɩ bi-​bilf kɩɩm-⁠ba. Bi-​sigdg meng na n deema ruruug bok noor tɩ bũmb ka maan-⁠a ye.’

Neb kẽer na n tagsame tɩ woto pa tõe ye. Bala d rog n mikame tɩ zu-​loees beẽ, tɩ kɩt tɩ b tagsdẽ tɩ pa na n tol n sa ye. La yãmb sã n tags n gese, yɛ la Wẽnnaam da ning a Ãdem ne a Hawa?

Wẽnnaam da ning-⁠b-⁠la arzãn pʋgẽ. Yaa b sẽn kɩɩs Wẽnnaam noorã yĩng n kɩt tɩ b kong arzãnã, n kʋʋl la b ki wã. La Wẽnnaam pʋlmame t’a na n kɩtame tɩ neb nins sẽn nong yẽ wã paam bũmb nins a Ãdem ne a Hawa sẽn kongã.

Arzãnã pʋgẽ, wẽng pa na n zĩnd ye. Nebã fãa na n vɩɩmda ne laafɩ la sũ-noogo. Bãas pa na n le zĩnd ye. Nebã na n vɩɩmda wa Wẽnnaam sẽn da rat tɩ b vɩɩmd to-⁠to hal sɩngrẽ wã. D na n wa yãa Wẽnnaam sẽn na n wa maan rẽ fãa to-⁠to.