A ZOZƖAS sẽn wa n na n sɩng naamã rɩɩb Zida ne Bẽnzame buudã zugã t’a ra tara yʋʋm a nii bala. Ad a ra paood ne naamã koe! Yaa rẽ yĩng la sẽn yɩ tɩlae tɩ kãsemb sõng-⁠a sɩngrẽ wã.

A Zozɩas sẽn deeg naamã tɩ yʋʋm a yopoe, a sɩngame n na n bao n bãng a Zeova sõma n paase. A rɩka rĩm a Davɩɩde, ne a Zozafat la a Ezekɩas mak-​sõngã. A Zozɩas sẽn da wa n ket n yaa biiga, a tʋma raood tʋʋma.

Maana yʋʋm wʋsg tɩ Israɛll neb wʋsg ra tʋmd tʋʋm-​wẽns hal tɩ looge. B ra pʋʋsda ziri wẽnnaam dãmba, la b wõgemded n pʋʋsd bõn-​naandse. Rẽ n so t’a Zozɩas ne a nebã yik n na n menes ziri tũudmã tẽngã pʋgẽ. Yɩɩ tʋʋm-​kãsenga, bala nebã wʋsg ra pʋʋsda ziri wẽnnaam dãmba. Yãmb pa ne a Zozɩas ne a nebã sẽn pãbd bõn-​naandsã n wãad sɩda?

Rẽ poore, a Zozɩas yãka rap a tãab tɩ b na n ges a Zeova roogã manegr yelle. Nebã loba ligd tɩ b kõ rapã tɩ b tall n tʋm tʋʋmdã. Wẽnd-​doogã manegr wakate, maan-​kʋʋdb kãsem a Hilkiya yãa sebr be n dɩke. Yaa sebr sẽn tar yõod wʋsgo. Yaa Tõog ning a Zeova sẽn da kɩt t’a Moiiz gʋls hal sẽn kaoosã. A ra menema hal yʋʋm wʋsgo.

B talla Tõogã n tɩ wilg a Zozɩase, t’a yeel tɩ b karem t’a kelge. B sẽn wa n karemdẽ wã, a Zozɩas yãame tɩ nin-​buiidã ra pa le tũud a Zeova noyã ye. Wa yãmb sẽn ne foto wã zugã, a sũurã sãama hal wʋsg t’a pãrg a fuugã. A yeelame yaa: ‘A Zeova sũur yika wʋsg ne tõndo, d yaab rãmbã sẽn pa sak seb-​kãngã goamã n maan wa b sẽn gʋlsã yĩnga.’

A Zozɩas yeela maan-​kʋʋdb kãsem a Hilkiya t’a bao n bãng a Zeova sẽn na n maan-⁠b bũmb ning masã. A Hilkiya kẽnga no-​rɛɛs-​poak a Hulda nengẽ n tɩ sok-⁠a. A Hulda yeelame tɩ b tɩ togs a Zozɩas t’a Zeova yeela woto: ‘Mam na n kɩtame tɩ toog paam Zerizalɛm ne a nebã. Bala bãmb pʋʋsa ziri wẽnnaam dãmba, la tẽngã me pida ne tʋʋm-​wẽnse. La foom a Zozɩas maana sẽn yaa sõma. Dẽnd yaa fo kũumã poor la m na n kɩt tɩ toogã paam nebã.’

GES-⁠Y nebã sẽn yaand raoã. Yãmb mi-⁠a lame bɩ? A yʋʋr la a Zeremi. A yaa Wẽnnaam no-​rɛɛsa.

Rĩm a Zozɩas sẽn sɩng bõn-​naandsã sãoongã poor bilf bala, a Zeova yãka a Zeremi n kɩt t’a lebg a no-​rɛɛsa. A Zeremi ra tagsdame t’a paooda wʋsgo. La a Zeova yeelame t’a na n sõng-⁠a lame.

A Zeremi yeela Israɛll nebã tɩ b bas b tʋʋm-​wẽnsã. A yeel-⁠b lame tɩ tẽns a taabã nebã wẽnnaam dãmb yaa ziri wẽnnaam dãmba. Israɛll neb wʋsg ra basa Wẽnnaam a Zeova waoogre, n waoogd bõn-​naandse. A Zeremi sẽn yeel nebã tɩ Wẽnnaam na n sɩbg-⁠b-⁠la b tʋʋm-​wẽnsã yĩngã, b yaal-⁠a lame.

Yʋʋm wʋsg loogr poore, a Zozɩas kiime. La kiis a tãab poore, a biig a Zozakim n deeg naamã. A Zeremi ra ket n yeta nebã tɩ b sã n pa bas b tʋʋm-​wẽnsã, Zerizalɛm na n sãamame. La maan-​kʋʋdbã yõk-⁠a lame n yeel t’a sã n pa sĩnd fãa, b na n kʋ-⁠a lame. Maan-​kʋʋdbã yeela Israɛll nanambsã yaa: ‘A Zeremi segda ne kũum, bala a goma tõnd tẽngã wẽnga.’

Bõe la a Zeremi na n maan masã? A pa zoe rabeem ye. A yeela b fãa yaa: ‘Yaa a Zeova n tʋm maam tɩ m wa togs gom-​kãensã. Yãmb sã n ka bas y tʋʋm-​wẽnsã, a Zeova na n sãama Zerizalɛm. La bãng-⁠y tɩ yãmb sã n kʋ maam, yaa bʋʋm soab la y kʋ-​yã.’

Nanambsã pa kʋ a Zeremi ye, la Israɛll nebã pa bas b tʋʋm-​wẽnsã ye. Kaoosg zugẽ, Babilon rĩm a Nebukadnezaar wa n zaba ne Zerizalɛm n tõoge. A kɩtame tɩ Israɛll nebã lebg a yembse. A talla bãmb wʋsg n kẽng Babilon. Sã n da yaa yãmb la sãamb wa n yõk n tall n kẽng tẽng a to, y sũur pa na n sãam sɩda?