GES-⁠Y nebã sẽn yaand raoã. Yãmb mi-⁠a lame bɩ? A yʋʋr la a Zeremi. A yaa Wẽnnaam no-​rɛɛsa.

Rĩm a Zozɩas sẽn sɩng bõn-​naandsã sãoongã poor bilf bala, a Zeova yãka a Zeremi n kɩt t’a lebg a no-​rɛɛsa. A Zeremi ra tagsdame t’a paooda wʋsgo. La a Zeova yeelame t’a na n sõng-⁠a lame.

A Zeremi yeela Israɛll nebã tɩ b bas b tʋʋm-​wẽnsã. A yeel-⁠b lame tɩ tẽns a taabã nebã wẽnnaam dãmb yaa ziri wẽnnaam dãmba. Israɛll neb wʋsg ra basa Wẽnnaam a Zeova waoogre, n waoogd bõn-​naandse. A Zeremi sẽn yeel nebã tɩ Wẽnnaam na n sɩbg-⁠b-⁠la b tʋʋm-​wẽnsã yĩngã, b yaal-⁠a lame.

Yʋʋm wʋsg loogr poore, a Zozɩas kiime. La kiis a tãab poore, a biig a Zozakim n deeg naamã. A Zeremi ra ket n yeta nebã tɩ b sã n pa bas b tʋʋm-​wẽnsã, Zerizalɛm na n sãamame. La maan-​kʋʋdbã yõk-⁠a lame n yeel t’a sã n pa sĩnd fãa, b na n kʋ-⁠a lame. Maan-​kʋʋdbã yeela Israɛll nanambsã yaa: ‘A Zeremi segda ne kũum, bala a goma tõnd tẽngã wẽnga.’

Bõe la a Zeremi na n maan masã? A pa zoe rabeem ye. A yeela b fãa yaa: ‘Yaa a Zeova n tʋm maam tɩ m wa togs gom-​kãensã. Yãmb sã n ka bas y tʋʋm-​wẽnsã, a Zeova na n sãama Zerizalɛm. La bãng-⁠y tɩ yãmb sã n kʋ maam, yaa bʋʋm soab la y kʋ-​yã.’

Nanambsã pa kʋ a Zeremi ye, la Israɛll nebã pa bas b tʋʋm-​wẽnsã ye. Kaoosg zugẽ, Babilon rĩm a Nebukadnezaar wa n zaba ne Zerizalɛm n tõoge. A kɩtame tɩ Israɛll nebã lebg a yembse. A talla bãmb wʋsg n kẽng Babilon. Sã n da yaa yãmb la sãamb wa n yõk n tall n kẽng tẽng a to, y sũur pa na n sãam sɩda?

RĨM a Nebukadnezaar wa n talla Israɛll neb nins fãa sẽn karem n zãagã n kẽng Babilon. Rẽ poore, a tũusa kom-​bɩɩs nins sẽn da be nin-​kãens sʋk n yaa rasãmb la b tar yamã. Kom-​dibli a naas nins yãmb sẽn ne fotã zugã bee b sẽn tũus-⁠b rãmbã sʋka. A ye yʋʋr la a Daniɛlle, la Babilon nebã pʋda a tãabã tɩ Sadrak, Mesak la Abɛdnego.

A Nebukadnezaar kɩtame tɩ b na n zãms kom-​dibli wã na-​zakẽ wã tʋʋm yʋʋm a tãabo. Zãmsgã poore, a na n yãka neb nins sẽn tar yam n yɩɩdã tɩ b sõngd-⁠a n welgd a soolmã zu-​loeese. Rĩmã da ratame me tɩ kom-​dibli wã tar laafɩ la b tar pãnga. Rẽ n so t’a yeel a sõgen dãmbã tɩ b kɩt tɩ kom-​dibli wã rɩt yẽ ne a zakã rãmb sẽn dɩt rɩ-​nood ninsã.

La ges-⁠y a Daniɛll sẽn gomd ne a Nebukadnezaar sõgen dãmbã naab a Aspenaz. Yãmb mii a sẽn yet bũmb ning bɩ? A yeta a Aspenaz t’a pa rat n dɩ na-​yirã rɩ-​noodã ye. La a Aspenaz yeelame yaa: ‘Mam zoeta rĩmã. Yaa yẽ n kõ noor n wilg yãmb sẽn na n dɩ la y yũ bũmb ninga. A sã n wa mik tɩ y faagame n ka ta kom-​bɩɩs a taabã, a tõe n kʋʋ maam.’

La a Daniɛll tɩ yãa ned ning a Aspenaz sẽn da yãk t’a get bãmb b naasã yellã n yeel-⁠a yaa: ‘Maan-⁠y sugr la y kõ tõnd zẽ-vãad rɩɩb bal tɩ d rɩ, la ko-​zaalg tɩ d yũ rasem piiga. Rasem piiga sã n ta, bɩ y mak tõnd ne kom-​bɩɩs nins sẽn dɩt na-​yirã rɩɩbã n gese.’

Gũudã sakame, la rasem piigã sẽn wa n ta, b yãame t’a Daniɛll ne a zo-​rãmb a tãabã yaa neeb n nob n yɩɩd kom-​bɩɩs a taabã fãa sẽn dɩt na-​yirã rɩ-​noodã. Woto, gũudã basame tɩ b rɩt zẽ-vãadã rɩɩb bal n pa rɩt na-​yirã rɩ-​noodã ye.

Yʋʋm a tãabã sẽn wa n ta, b peega kom-​dibli wã fãa n kẽng rĩm a Nebukadnezaar nengẽ. A sẽn sõs ne-​bã poore, a ka yã kom-​bɩɩsã ned ba a ye yam sẽn ta a Daniɛll ne a zo-​rãmb a tãabã ye. Rẽ n so t’a kɩt tɩ b pa na-​zakẽ wã n sõngd-⁠a. Rĩmã sã n da sok a Daniɛll, a Sadrak, a Mesak la a Abɛdnego bũmbu, bɩ a sã n da yeel-⁠b tɩ b welg yelle, a mikdame tɩ b yamã la b bãngrã ra yɩɩda Babilon bãngdbã fãa rẽnd naoor piiga.