Israɛll nebã sẽn da yaa yembs n be Babilonnã, b paama zu-​loees wʋsgo, b sẽn da tũud Wẽnnaamã yĩnga. B loba a Sadrak, a Mesak la a Abɛdnego bugum pʋgẽ, la Wẽnnaam fãag-⁠b lame. Meed ne Pɛrs rãmbã sẽn wa n zab n deeg Babilonnã poore, b loba a Daniɛll gɩgma bokẽ, la Wẽnnaam muma gɩgma wã noy tɩ b ka wãb-⁠a ye.

Israɛll nebã sẽn kẽng yembd Babilonnã yʋʋm 70 poore, Pɛrs naab a Sirus wa n yiis-⁠b-⁠la yembdã n bas-⁠b tɩ b leb b ba-​yirã. B sẽn ta Zerizalɛmmã, pipi b reng n sɩngame n na n me a Zeova roogã. La pa yã n kaoos la bɛɛb wa n na n gɩdg-⁠b ye. Kɩtame tɩ b sẽn leb Zerizalɛmmã, maana yʋʋm 22 tɩ b yaool n na n tõog n me wẽnd-​doogã n sa.

Rẽ poore, a Ɛsdras na n wa kẽnga Zerizalɛm n tɩ maneg wẽnd-​doogã. Yaa wẽnd-​doogã sẽn me n sa tɩ yʋʋm 47 la a Ɛsdras na n maan dẽ. Yʋʋm 13 rẽ poore, a Nehemi tɩ sõngame n lebs n me Zerizalɛm lalsã sẽn da lʋɩyã. Dẽnd babg a nu wã gomda yɛl sẽn zĩnd yʋʋm koabg la pis-⁠nu la a yiib pʋgẽ.

YÃMB ket n tẽra a Daniɛll zo-​rãmb a tãab nins sẽn da naag-⁠a n zãgs tɩ b kõn dɩ na-​yirã rɩɩbã yell bɩ? Babilon nebã pʋd-⁠b lame t’a Sadrak, a Mesak la a Abɛdnego. Ges-⁠y foto wã. B pa sak n na n wõgemd bõn-​naandg ning sẽn yaa wokã taoor wa neb a taabã ye. Yãmb mii sẽn yaa bũmb ning yĩng bɩ? D karem tɩ d na bãnge.

Yãmb ket n tẽrã noy piig nins a Zeova sẽn da gʋlsã yell bɩ? Pipi noorã yeta woto: ‘Ra pʋʋs wẽnnaam dãmb a taab ye, sã n ka maam bala.’ Yaa a Sadrak, a Mesak la a Abɛdnego sẽn dat n sak no-​kãngã wã yĩng la b sẽn pa wõgemdã. B tũu no-​kãngã, baa ne a tũubã sẽn da pa nana wã.

Babilon naab a Nebukadnezaar boola tẽngã nin-​kãsemsã fãa tɩ b wa wõgemd n pʋʋs bõn-​naandg ning a sẽn kɩt tɩ b maanã. A yeela nebã yaa: ‘Yãmb sã n wʋm bard la wɩɩs peebgo, la kʋn ne pendes la ruuds wẽebo, ne tõn-​tõog peebg la yʋʋm teed buud fãa rãamde, bɩ y wõgemd n waoog sãnem bõn-​naandgã. La ned ninga sẽn ka sak n wõgemd n pʋʋs-⁠a, b na n lob-⁠a-⁠la wʋng sẽn wɩng wʋsg pʋgẽ.’ Nebã fãa sakame la a Sadrak, a Mesak ne a Abɛdnego pa sak ye.

B sẽn wa n yeel naab a Nebukadnezaar t’a Sadrak, a Mesak la a Abɛdnego pa sak n wõgemdã, a sũurã yika wʋsg ne-⁠ba. A kɩtame tɩ b tall-⁠b n wa yẽ taoore. A pa sɩbg-⁠b zĩig pʋgẽ ye. A yeel-⁠b lame tɩ b lebg n kẽng n tɩ wõgemd tɩ nan ket n maasa. La kom-​bɩɩs a tãabã teega a Zeova. B yeela a Nebukadnezaar yaa: ‘Tõnd Wẽnnaamã tõnd sẽn waoogdã na n fãaga tõndo. La baa a sã n ka fãag-⁠do, bɩ y bãng tɩ tõnd ka na n wõgemd sãnem bõn-​naandg ningã yãmb sẽn luglã taoor ye.’

A Nebukadnezaar sẽn wʋm gom-​kãensã wã, a sũurã maneg n puugame n paase. Wʋng n da pẽ be t’a yeel tɩ b wɩng wʋngã naoor a yopoe n yɩɩd b sẽn da mi n wɩngd-⁠a to-⁠to wã. Rẽ poore, a kɩtame tɩ sodaas sẽn tar pãng wʋsg sẽb a Sadrak, a Mesak la a Abɛdnego n lob wʋngã pʋgẽ. La wʋngã ra wɩnga wʋsg hal tɩ bugmã walem kʋ sodaasã. La bõe n paam a Sadrak ne a Mesak la a Abɛdnego, b sẽn lob-⁠b bugmã pʋgẽ wã?

Rĩmã gesa wʋngã pʋgẽ, la a sẽn yã bũmb ningã yɛɛs-⁠a-⁠la wʋsgo. A soka nebã yaa: ‘Ka neb a tãab la tõnd sẽn sẽb n lob bugmẽ wã wɛ?’

Tɩ nebã leok tɩ n-⁠ye.

La a yeelame yaa: ‘Mam nee neb a naas sẽn kẽnd bugmã pʋgẽ, tɩ bũmb ka sẽb-⁠ba, la bugmã me ka rɩt-⁠b ye. La naas-⁠n-​soabã wẽnda malɛka.’ Rĩmã kolga wʋngã noor n yeel yaa: ‘Sadrak, Mesak, Abɛdnego! Yãmb yaa Wẽnnaam sẽn ka to wã sõgen dãmba. Yi-⁠y n wa-⁠y ka.’

A Sadrak ne a Mesak la a Abɛdnego yii bugmã pʋgẽ, la nebã fãa yãame tɩ baa fʋɩ ka maan-⁠b ye. Rĩmã yeelame yaa: ‘Bɩ a Sadrak ne a Mesak la a Abɛdnego Wẽnnaamã paam pẽgre. A tʋma a malɛkã t’a wa fãag-⁠ba, bala b ka sak n wõgemd n waoog wẽnnaam a to tɩ ka bãmb Wẽnnaamã ye.’

Kiba-​kãngã wilgdame tɩ d segd n saka a Zeova wakat fãa.