KAETO, a Daniɛll bee gɩgma bokẽ! Yaa ãnd n lob a Daniɛll gɩgma kãensã fãa sʋka? Gɩgma wã yaool n pa maand a Daniɛll bũmb ye! Yãmb mii sẽn yaa bũmb ning yĩng bɩ? Bɩ d gese.

Wakat kãng tɩ ra yaa a Darius n dɩt naam Babilon. A ra nonga a Daniɛll wʋsgo, bala a Daniɛll ra yaa nin-​sõng la ned sẽn tar yam. A Darius yãka a Daniɛll t’a yɩ a kug-​zĩidbã taoor soaba. Woto kɩtame tɩ sũ-kiir yõk kug-​zĩidb a taabã, tɩ b sɩɩg taab noor n na n maan a Daniɛll wẽnga.

B kẽnga a Darius nengẽ n tɩ yeel yaa: ‘Tõnd tagsdame tɩ yaa sõma tɩ y yiis noor n wilg tɩ ned sã n pʋʋs Wẽnnaam bɩ ninsaal tɩ ka yãmb rasem 30 pʋgẽ, bɩ b lob-⁠a gɩgma wã bokẽ.’ A Darius ra pa mi bũmb ning sẽn kɩt tɩ nin-​kãensã rat tɩ b yiis no-​kãngã wã ye. La a ra tagsdame tɩ yaa bõn-​sõngo, t’a kɩt tɩ b gʋls noorã. La b sẽn yiis noorã n sa wã, b ra pa le tõe n toeem-⁠a ye.

A Daniɛll sẽn wʋm dẽ wã, a kẽe a roogã pʋgẽ n pʋʋs wa a sẽn da nong n maand daar fãa wã. Nin-​wẽn-​kãensã ra miime t’a Daniɛll pa na n bas n ka pʋʋs a Zeova ye. B sũurã yɩɩ noogo, bala b tẽedame tɩ b sẽn maan sɩlem ning n na n kʋ a Daniɛllã na n tõogame.

Rĩm a Darius sẽn wa n bãng bũmb ning sẽn kɩt tɩ nebã da rat tɩ b yiis noorã, a sũurã sãama wʋsgo. La a sẽn da pa tõe n toeem noorã yĩnga, a kɩtame tɩ b lob a Daniɛll gɩgma wã bokẽ. La a yeela a Daniɛll yaa: ‘Bɩ fo Wẽnnaamã fo sẽn waoogd daar fãa wã fãag-⁠fo.’

A Darius sũurã sãama wʋsg t’a pa tõog n gũs baraar yʋngã ye. Vẽkembeoogã, a wudgame n kẽng gɩgma wã bokẽ. Yãmb pa ne a sẽn lɩkd sɩda? A zẽka a koɛɛg n yeel yaa: ‘Wẽnnaam sẽn vɩ tʋm-​tʋmd a Daniɛlle, fo Wẽnnaamã fo sẽn waoogd daar fãa wã tõog n fãaga foom ne gɩgma wã bɩ?’

La a Daniɛll leoka rĩmã yaa: ‘Mam Wẽnnaamã tʋma a malɛk t’a wa mum gɩgma wã noyã tɩ b ka maan maam bũmb ye.’

Rĩmã sũur yɩɩ noog wʋsgo. A yeelame tɩ b yiis a Daniɛll gɩgma wã bokẽ, la a kɩt tɩ b lob neb nins sẽn da rat n kʋ a Daniɛllã be. La b sẽn lob-⁠b bokã pʋgẽ wã, b ka yã n ta tẽng meng la gɩgma wã zoe n kok-⁠b n kao b kõabã fãa ye.

Rẽ poore, rĩm a Darius kɩtame tɩ b gʋls sebr n yeel a nin-​buiidã woto: ‘Mam kõo noor tɩ nebã fãa zoe a Daniɛll Wẽnnaamã. Wẽnnaam kãng maanda bõn-​bãn ne tʋʋm-​kãsemse. Yaa yẽ n fãag a Daniɛll tɩ gɩgma wã pa wãb-⁠a ye.’

YAA sẽn kolg yʋʋm a yiib masã la Meed ne Pɛrs nebã sẽn wa n zab n deeg Babilonnã. La ges-⁠y-​yã! Israɛll nebã yita Babilon. B maana wãn n paam b mense? Yaa ãnd n bas-⁠b tɩ b loogdẽ?

Yaa Pɛrs naab a Sirus n kõ-b sore. A Zeova ra kɩtame t’a no-​rɛɛs a Ezai togs a Sirus sẽn na n wa maanã t’a nan pa rog meng ye. A Ezai gʋlsa woto: ‘Fo na n maana mam sẽn datã. Kʋɩlensã na n pakame tɩ f tõog n kẽ n deeg tẽngã.’ A Sirus sɩd waa ne a sodaasã n wa reeg Babilon ne yʋngo. Rig-​noyã sẽn da pakã yĩnga, Meed ne Pɛrs nebã tũu be n kẽ tẽngã pʋgẽ.

A Zeova no-​rɛɛs a Ezai ra yeelame me t’a Sirus na n kõo noor tɩ b tɩ lebs n me Zerizalɛm tẽngã ne a wẽnd-​doogã. A Sirus sɩd kõo noor tɩ b maan woto bɩ? N-⁠ye, a yeela Israɛll nebã yaa: ‘Leb-⁠y Zerizalɛm masã n tɩ me yãmb Wẽnnaam a Zeova roogã.’ Wa yãmb sẽn ne fotã zugã, yaa rẽ la Israɛll nebã rebd n na n tɩ maane.

La pa Israɛll neb nins fãa sẽn da be Babilonnã n da tõe n leb Zerizalɛm ye. Sorã yaa wok n ta kɩlometr kobs-​nii, neb wʋsg ra kʋʋlame tɩ kẽer yaa bãad dãmba, tɩ kɩt tɩ b pa tõog ye. Yɛl a taab me n kɩt tɩ neb kẽer pa tũ n kul ye. La a Sirus yeela neb nins sẽn da pa na n tũ n kulã yaa: ‘Bao-⁠y wanzuri ne sãnem la kũun a taab n kõ neb nins sẽn lebd n na n tɩ me Zerizalɛm ne a wẽnd-​doogã.’

B sɩd kõo neb nins sẽn da lebd Zerizalɛmmã kũun wʋsgo. A Sirus me kõ-b-⁠la Wẽnnaam doogã laasã la teed a taab nins fãa rĩm a Nebukadnezaar sẽn da wʋk Zerizalɛm sãoongã wakatã. Dẽnd nebã sẽn wa n lebdẽ wã, b zãa teed wʋsgo.

Kiis a naas poore, Israɛll nebã taa Zerizalɛm. Yʋʋm pis-​yopoe masã la tẽngã sẽn da sãamã, la ned baa a ye ra pa ket be ye. La wala d sẽn na n yã taoorã, Israɛll nebã paama zu-​loeese, baa ne b sẽn da be b ba-​yir masã wã.