Wẽnnaam tʋma malɛk a Gabriyɛll pʋg-​sad yʋʋr sẽn boond t’a Maari nengẽ. A yeel-⁠a lame t’a na n doga biig sẽn na n wa lebg rĩm n dɩ naam wakat fãa. La a tog n pʋda biigã yʋʋr t’a Zezi. A Maari rog-⁠a-⁠la rũms roogẽ tɩ pe-​kɩɩmb wa ges-⁠a be. Rap sẽn yit yaang n bao n na n tɩ ges biigã, tɩ ãdg wilg-⁠b sore. D na n bãnga ned ning sẽn kɩt tɩ rapã yã ãdgã, la Wẽnnaam sẽn kogl a Zezi to-⁠to t’a bɛɛbã pa tõog n kʋ-⁠a wã.

Sẽn paase, d na n yãame t’a Zezi sẽn wa n tar yʋʋm 12, a sõsa ne karen-​saam dãmb wẽnd-​doogẽ wã. A sẽn wa n tar yʋʋm 30 a reega lisgu, n sɩng Rĩungã koe-​noog moonego, la a zãmsd nebã wa Wẽnnaam sẽn da tʋm-⁠a t’a wa maanã. A Zezi yãka rap 12 tɩ b lebg a tʋm-​tʋmdba, tɩ b sõngd-⁠a n moond koɛɛgã.

A Zezi maana yel-​soalem wʋsg me. A rɩlga neb kʋʋng ne zĩm bõones a wãn la bur a wãn bala. A sãooga bãad dãmb la a vʋʋg kũ-rãmb menga. Baasgẽ wã, d na n yãa bũmb ning sẽn paam a Zezi a kũumã daare, la b sẽn kʋ-⁠a to-⁠to wã me. A Zezi moona koɛɛgã yʋʋm a tã la pʋɩ-​sʋka. Dẽnd babg a yoobã gomda yɛl sẽn zĩnd yʋʋm 34 la kiis a wãn pʋgẽ yelle.

PƲG-​SAD ning yãmb sẽn ne fotã zugã yʋʋr la a Maari. Yaa Israɛll pʋg-​sad sẽn be Israɛll tẽng a ye sẽn boond tɩ Nazarɛte. Wẽnnaam miime t’a yaa pʋg-​sõngo. Yaa rẽ n so t’a tʋm a malɛk a Gabriyɛll t’a tɩ gom ne-⁠a. Yãmb mii a Gabriyɛll sẽn wa n yeel a Maari bũmb ning bɩ?

A Gabriyɛll yeela a Maari yaa: ‘Mam pʋʋsda foo, bala fo yaa ned Wẽnnaam sẽn ning barka. A Zeova bee ne foom.’ A Maari ra nan zɩ n yã nin-​kãngã ye. A yɛɛsame, bala a ra pa wʋmd a Gabriyɛll goamã võor ye. La a Gabriyɛll yeel-⁠a lame yaa:

‘Maari, da zoe rabeem ye; tɩ bõe, Wẽnnaam ninga foo barka. A na n kɩtame tɩ fo rɩk pʋg n dog biiga, n pʋd a yʋʋr t’a Zezi.’

A Gabriyɛll paasa woto: ‘Biigã na n yɩɩ nin-​kãsenga, la b na n boond-⁠a lame tɩ Wẽnnaam Sẽn-⁠ka-⁠to biiga. A Zeova na n kɩtame t’a lebg rĩm wa a Davɩɩde, la a na n dɩɩ naam wakat fãa, la a naamã ka na n sɛ abada!’

La a Maari soka a Gabriyɛll yaa: ‘Mam na n maana wãn n tõog n dog biig tɩ m nan ka kẽ kãadem la m ka mi raoa?’

A Gabriyɛll yeel-⁠a lame yaa: ‘Wẽnnaam pãngã na n buii foom. Woto yĩnga, b na n boonda biig ning fo sẽn na n dogã tɩ Wẽnnaam biiga. Gese, fo roagd a Elizabɛt me rɩka pʋga. Nebã ra yetame t’a kʋʋlame n pa tõe n le paam biig ye. La a na n doga bi-​ribla. Tɩ bõe, bũmb ka be Wẽnnaam sẽn ka tõe ye.’

Rẽ masã a Maari yeelame yaa: ‘Mam yaa a Zeova tʋm-​tʋmda. Bɩ a kɩt tɩ kell n yɩ wa yãmb sẽn yeelã.’ La malɛka loogame.

A Maari kẽnga tao-​tao n na n tɩ ges a Elizabɛte. A Maari sẽn ta a Elizabɛt nengẽ wã, a Elizabɛt wʋma a koɛɛgã, la biigã sẽn da be a Elizabɛt pʋgẽ wã sũur yɩɩ noog t’a virsi. A Elizabɛt pida ne Wẽnnaam vʋʋsem sõngã, la a yeela a Maari yaa: ‘Wẽnnaam ninga foo bark pagbã fãa sʋka.’ A Maari zĩnda ne a Elizabɛt n kolg kiis a tãab n yaool n lebg n kul Nazarɛte.

A Maari ra segd n kẽe kãadem ne a Zozɛfe. La a Zozɛf sẽn wʋm t’a Maari tara pʋgã, a ra pa rat n kẽ kãadem ne-⁠a yɛs ye. La Wẽnnaam malɛkã yeela a Zozɛf yaa: ‘Kẽ kãadem ne a Maari la f ra zoe rabeem ye. Bala yaa ne Wẽnnaam pãng la a rɩk pʋgã.’ A Zozɛf ne a Maari sɩd kẽe kãadem, n gũud a Zezi rogmã masã.