YÃMB mii bi-​pɛɛlg ning sẽn be fotã zugã yʋʋr bɩ? A yʋʋr la a Zezi. A Maari rog-⁠a-⁠la rũms roogẽ, n gãneg-⁠a bõensã la rũms a taabã rɩɩb koglg pʋgẽ. La bõe yĩng t’a Zozɛf ne a Maari be rũms roogẽ? Pagbã yaool n pa rogd rũms rotẽ ye, bɩ bõe?

Ad bũmb ning sẽn kɩt tɩ b wa be ka wã. Rom naab a Sezaar Ogust ra yiisa noor n wilg tɩ ned kam fãa segd n kẽnga a sẽn dog zĩig ningã n tɩ kɩt tɩ b gʋls a yʋʋrã sebr zugu. A Zozɛf sẽn dog Betlehɛmmã yĩnga, yẽ ne a Maari kẽnga be. La b sẽn ta wã, zĩig ka be n na n gãand ye. Yaa rẽ yĩng la b sẽn be rũms roogẽ wã. Yaa baraar me la a Maari sẽn dog a Zezi wã. La baa fʋɩ pa tar a Zezi ye.

Yãmb nee pe-​kɩɩmbã sẽn wat n na n ges a Zezi wã bɩ? B ra bee weoogẽ wã ne yʋng n gũud b piisã, tɩ vẽenem yãg n bui-⁠ba. Ra yaa malɛk n sigi. Pe-​kɩɩmbã yɛɛsa wʋsgo, la malɛkã yeel-⁠b lame yaa: ‘Da zoe-⁠y rabeem ye. Mam waame n na n togs yãmb koe-​noogo. Zusoabã sẽn yaa Kiristã roga Betlehɛm rũndã. A na n fãaga nebã. Yãmb na n yã-a lame t’a vil ne peend n gãe rũms rɩɩb koglgẽ.’ La wakat kãng bala, malɛgs wʋsg n puk n sɩng Wẽnnaam pẽgre. Pe-​kɩɩmbã kẽnga Betlehɛm tao-​tao n na n tɩ ges a Zezi. La b sɩd yã-a lame.

Yãmb mii bũmb ning sẽn kɩt t’a Zezi pa wa kamb a taabã bɩ? Yãmb mii a sẽn sɩd yaa ned ning bɩ? Tẽeg-⁠y tɩ seb-​kãngã sɩngrẽ wã, d ra goma Wẽnnaam pipi biigã yelle. Yẽ n sõng a Zeova n naan saasã ne tẽngã la bũmb a taabã fãa. Bi-​kãng yaa a Zezi.

A Zeova maana yel-​solemde, n dɩk a biigã vɩɩm n ning a Maari pʋgẽ wã. Biigã zĩnda be n bɩ wa kom-​peels a taabã sẽn bɩt b ma rãmbã pʋsẽ to-⁠to n yaool n dogã. La bi-​kãngã yaa Wẽnnaam biiga. A Zezi roga rũms roogẽ Betlehɛm. Dẽnd masã, yãmb mii bũmb ning sẽn kɩt tɩ malɛgsã sũur da noomẽ b sẽn wa n na n togs nebã t’a Zezi rogame wã.

YÃMB nee ãdgã sẽn yãgdã bɩ? Rap nins yãmb sẽn ne fotã zugã yita yaanga. Yaa neb sẽn get ãdsã n togsd yɛlã võore. B yãa ãdgã n pʋgda, n tẽed t’a na n tall-⁠b lame n kẽng nin-​kãseng nengẽ.

Rapã wa n taa Zerizalɛm n sok tɩ biig ning sẽn na n wa lebg Zʋɩf rãmbã rĩma bee yɛ? Yaa Israɛll nebã la b sẽn boond tɩ Zʋɩf rãmbã. Rapã leb n yeelame yaa: ‘Tõnd yãa biigã ãdgã tõnd sẽn wa n be yaangã, la tõnd waame n na n waoog-⁠a.’

A Herood sẽn yaa Zerizalɛm rĩmã sẽn wʋm dẽ wã, a sũurã sãamame. A ra pa rat tɩ ned a to lebg rĩm n deeg yẽ zĩigã ye. A boola maan-​kʋʋdbã kãsem dãmb n sok n ges biig ning sẽn na n wa lebg Zʋɩf rãmbã rĩmã sẽn segd n dog zĩig ninga. B yeel-⁠a lame tɩ Biiblã wilgame tɩ yaa Betlehɛm.

Rẽ poore, a Herood boola rap nins sẽn yi yaangã n yeel-⁠b yaa: ‘Bɩ y kẽng n tɩ bao biigã, la yãmb sã n yã-a bɩ y lebg n wa togs maam, tɩ mam me na n kẽng n tɩ waoog-⁠a lame.’ La a Herood yaool n da rat n bãnga biigã sẽn be zĩig ningã bal n tɩ kʋ-⁠a.

Rapã sẽn wa n yi Zerizalɛmmã, ãdg ning sẽn yãgdã ye pukame. Rapã pʋga ãdgã hal n tɩ ta Betlehɛm tɩ ãdgã tɩ yals biigã sẽn da be roog ning pʋgẽ wã zugu. Rapã sẽn kẽ roogẽ wã, b yãa a Maari ne a Zezi. B zãa kũun n wa kõ a Zezi. La rapã gũs n zãmsame, la zãmsdã pʋgẽ a Zeova yeel-⁠b lame tɩ b pa segd n lebg n kẽng a Herood nengẽ ye. Rẽ n so tɩ b tũ sor a to n leb bãmb tẽngẽ wã.

A Herood sẽn bãng tɩ rap nins sẽn yi yaangã lebg n kulame n pa tũ yẽ nengẽ wã, a sũurã puuga wʋsgo. A yeelame tɩ b tɩ kʋ kom-​dibli nins fãa sẽn be Betlehɛm n tar yʋʋm a yiib la sẽn ka ta woto wã. La a Zozɛf gãand n zãmsame, la zãmsdã pʋgẽ a Zeova yeel-⁠a lame t’a tall a pagã ne a biigã n zoe n kẽng Ezipti. A sɩd yika ne a zakã rãmb n kẽng be. Kaoosg poore, a Zozɛf sẽn wa n bãng t’a Herood kiime wã, a talla a Maari ne a Zezi n leb Nazarɛte. Yaa be la a Zezi bɩ-​yã.

Sã n yaa ne yãmba, ãnd n kɩt tɩ ãdgã puki? Tẽeg-⁠y tɩ rapã sẽn pʋg ãdgã, b reng n kẽnga Zerizalɛm. Yaa a Sʋɩtãan n da rat n kʋ Wẽnnaam biigã, la a ra miime tɩ Zerizalɛm rĩm a Herood me ra na n baoome n kʋ-⁠a. Rẽ n kɩt t’a maan tɩ ãdgã reng n kẽng Zerizalɛmmã. Dẽnd yaa a Sʋɩtãan n kɩt tɩ ãdgã pukã.