GES-⁠Y wall sẽn sigd a Zezi zugu. A Zezi tara yʋʋm pis-​tã masã. Rao ning sẽn yas koomã pʋgẽ ne-⁠a wã yaa a Zã. Tõnd zoe n goma a Zã yelle. Yãmb ket n tẽra a Maari sẽn wa n kẽng n tɩ ges a Elizabɛt tɩ biig ning sẽn da be a Elizabɛt pʋgẽ wã sũur yɩ noog t’a virsã bɩ? Biigã yaa a Zã. La bõe la a Zã ne a Zezi sẽn maand masã wã?

A Zã lisa a Zezi Zʋrdẽ kʋɩlgã pʋgẽ. Ned sã n na n deeg lisgu, b lisda a soabã koomã pʋgẽ, la b wẽneg n yiis-⁠a. A Zã sẽn da lisd nebã koomẽ wã yĩnga, b ra boond-⁠a lame t’a Zãmbatiisi. La bõe yĩng t’a Zã lis a Zezi?

Yaa a Zezi meng n wa n bõos a Zã t’a lis-⁠a. A Zã lisda neb nins sẽn dat n wilg Wẽnnaam tɩ b kota sugri, b sẽn maan yel-​wẽnã yĩnga. La a Zezi me maana yel-​wẽnd n dat n kos sugr bɩ? Ayo, a Zezi zɩ n maan yel-​wẽnd ye. Bala yaa Wẽnnaam meng biiga. Dẽnd yaa bũmb a to yĩng la a sẽn kos a Zã t’a lis-⁠a wã.

Nand t’a Zezi tɩ yã a Zã n bõos-⁠a t’a lis-⁠a, a ra yaa ra-​wãada. A ra maanda taabl dãmb ne goeelse. A Maari sɩd a Zozɛf n da zãms-⁠a, bala a ra yaa ra-​wãada. La a Zeova ra pa tʋm a bi-​riblã tẽng zug t’a wa yɩ ra-​wãad ye. A ra kõ-a-⁠la tʋʋmd a to. Wakat ra taame masã t’a Zezi segd n sɩng a tʋʋmdã. Dẽnd sẽn na yɩl n wilg nebã t’a na n sɩnga a ba wã sẽn tʋm-⁠a t’a wa maan bũmb ningã maaneg masã, a kosa a Zã t’a lis-⁠a. Wẽnnaam sũur yɩɩ noog bɩ?

N-⁠ye, bala a Zezi sẽn puk koomẽ wã poore, koɛɛg n yi saasẽ n yeel yaa: ‘Ad-⁠a yaa mam Bi-​nongre, mam sẽn nong ne m sũur fãa.’ Sẽn paase, maana wa saasã pakame tɩ wall ning yãmb sẽn ne fotã zugã sigd a Zezi zugu. La pa wall sɩd-​sɩd ye. Yaa Wẽnnaam vʋʋsem sõngã.

A Zezi lisgã poore, a kẽnga weoogẽ wã n tɩ pa be a yembr rasem pis-​naase, bala a da rat n tagsa bũmb wʋsg yelle. La a Sʋɩtãan wa n bʋʋg-⁠a-⁠la beenẽ. Naoor a tãabo, a Sʋɩtãan makame n na n kɩt t’a Zezi maan bũmb sẽn kɩɩsd Wẽnnaam noore, la a Zezi pa tol n sak ye.

Rẽ poore, a Zezi lebgame n kuusẽ n tek n seg neba, la nin-​kãens lebga a pipi karen-​biisi. Bãmb kẽer yʋy la woto: A Ãndere, a Pɩɛɛre (b sẽn boond me t’a Sɩmo), a Filipi, a Natanayɛlle (b sẽn boond me t’a Bartelemi). A Zezi ne a karen-⁠bi-​paalsã kẽnga Galile. B sẽn ta Galile wã, b kẽnga a Natanayɛll tẽngẽ wã Kana. Beenẽ, a Zezi kẽnga kãadem kibs a ye sẽn yɩ kãsenga. A maana a pipi yel-​solemdã beenẽ. Yãmb mii a sẽn maan bũmb ning bɩ? A kɩtame tɩ koom lebg rãam.

YÃMB sẽn get a Zezi foto kãngã zugã a sũurã ka puug sɩda? Yãmb mii bũmb ning sẽn kɩt t’a sũurã puugã bɩ? Rap nins sẽn be wẽnd-​doogã pʋgẽ wã yaa neb sẽn nong ligd wʋsgo. B rat n wẽga neb nins sẽn wat n na n pʋʋs Wẽnnaamã n paam ligd wʋsgo.

Yãmb nee lolsã ne piisã la marwalã bɩ? Rapã koosda rũm-​kãensã wẽnd-​doogẽ wã. Yaa bõe yĩnga? Bala Israɛll nebã rata wal la rũms n maan maoong n kõ Wẽnnaam.

Wẽnnaam noor a ye n wilgd tɩ Israɛll ned sã n maan yel-​wẽnde, a segd n maana maoong n kõ Wẽnnaam n kos sugri. Israɛll nebã ra tara wakat a taab me n segd n maand maando. La yɛ la nebã ra tõe n paam rũms n maan maoong n kõ Wẽnnaam?

Israɛll neb kẽer n da gʋʋnd wal la rũmsi. Dẽnd bãmb ra tõe n yãka rẽ n maan maand n kõ Wẽnnaam. La neb wʋsg ra pa tar rũms ye. Kẽer me sẽn da vɩ zĩig ningã zãra wʋsg ne Zerizalɛm, tɩ b ka tõe n tall b rũmsã hal be n wa Zerizalɛm ye. Yaa rẽ yĩng la nebã sẽn da wat wẽnd-​doogẽ wã n daad rũmsã. La rapã ra koosda b rũmsã toogo. B ra wẽgda nebã. Sẽn paas menga, b ra pa segd n koosd wẽnd-​doogẽ wã ye.

Yaa rẽ n puug a Zezi sũurã. Rẽ n so t’a tus rapã taabl dãmb n lubi, n sãeeg b ligdã tẽnga. A rɩka wĩ n maan kalwaas n dig rũmsã fãa n yiis wẽnd-​doogẽ wã. A yeela neb nins sẽn da koosd marwalã yaa: ‘Yiis-⁠y bõn-​kãensã ka. Da maan-⁠y mam Ba wã roog tɩ lebg teed koosg zĩig ye.’

A Zezi karen-​biis kẽer n da tũud-⁠a. B sẽn yã a sẽn maan bũmb ningã ling-⁠b lame. La b tẽega Biiblã sẽn gomd Wẽnnaam bi-​riblã yell n yet tɩ ‘Wẽnnaam doogã nonglem na n soog-⁠a-⁠la zãngã.’

A Zezi sẽn wa Zerizalɛm n na n maan Pakã, a maana yel-​soalem wʋsg me. Rẽ poore, a yii Zide n na n leb Galile. La a tek n yalsa Samari. Bɩ d ges bũmb ning sẽn maan be.