YÃMB sẽn get a Zezi foto kãngã zugã a sũurã ka puug sɩda? Yãmb mii bũmb ning sẽn kɩt t’a sũurã puugã bɩ? Rap nins sẽn be wẽnd-​doogã pʋgẽ wã yaa neb sẽn nong ligd wʋsgo. B rat n wẽga neb nins sẽn wat n na n pʋʋs Wẽnnaamã n paam ligd wʋsgo.

Yãmb nee lolsã ne piisã la marwalã bɩ? Rapã koosda rũm-​kãensã wẽnd-​doogẽ wã. Yaa bõe yĩnga? Bala Israɛll nebã rata wal la rũms n maan maoong n kõ Wẽnnaam.

Wẽnnaam noor a ye n wilgd tɩ Israɛll ned sã n maan yel-​wẽnde, a segd n maana maoong n kõ Wẽnnaam n kos sugri. Israɛll nebã ra tara wakat a taab me n segd n maand maando. La yɛ la nebã ra tõe n paam rũms n maan maoong n kõ Wẽnnaam?

Israɛll neb kẽer n da gʋʋnd wal la rũmsi. Dẽnd bãmb ra tõe n yãka rẽ n maan maand n kõ Wẽnnaam. La neb wʋsg ra pa tar rũms ye. Kẽer me sẽn da vɩ zĩig ningã zãra wʋsg ne Zerizalɛm, tɩ b ka tõe n tall b rũmsã hal be n wa Zerizalɛm ye. Yaa rẽ yĩng la nebã sẽn da wat wẽnd-​doogẽ wã n daad rũmsã. La rapã ra koosda b rũmsã toogo. B ra wẽgda nebã. Sẽn paas menga, b ra pa segd n koosd wẽnd-​doogẽ wã ye.

Yaa rẽ n puug a Zezi sũurã. Rẽ n so t’a tus rapã taabl dãmb n lubi, n sãeeg b ligdã tẽnga. A rɩka wĩ n maan kalwaas n dig rũmsã fãa n yiis wẽnd-​doogẽ wã. A yeela neb nins sẽn da koosd marwalã yaa: ‘Yiis-⁠y bõn-​kãensã ka. Da maan-⁠y mam Ba wã roog tɩ lebg teed koosg zĩig ye.’

A Zezi karen-​biis kẽer n da tũud-⁠a. B sẽn yã a sẽn maan bũmb ningã ling-⁠b lame. La b tẽega Biiblã sẽn gomd Wẽnnaam bi-​riblã yell n yet tɩ ‘Wẽnnaam doogã nonglem na n soog-⁠a-⁠la zãngã.’

A Zezi sẽn wa Zerizalɛm n na n maan Pakã, a maana yel-​soalem wʋsg me. Rẽ poore, a yii Zide n na n leb Galile. La a tek n yalsa Samari. Bɩ d ges bũmb ning sẽn maan be.

A ZEZI yalsa Samari bulg noor n na n vʋʋse. A karen-​biisã kẽe tẽngã pʋgẽ n na n bao rɩɩbo. Pag ning a Zezi sẽn gomd ne wã waame n na n wi koom. A Zezi yeela pagã yaa: ‘M kota koom n na n yũ.’

La linga pagã wʋsgo. Yãmb mii sẽn yaa bũmb ning yĩng bɩ? Yaa a Zezi sẽn yaa Zʋɩf tɩ yẽ yaa Samari nedã yĩnga. Zʋɩf rãmbã ra kisa Samari nebã. B ra pʋd n pa gomd ne-⁠b meng ye. La a Zezi nonga nebã fãa. A yeela pagã yaa: ‘Fo sã n da mi ned ninga sẽn yet foo tɩ f kõ-a koom t’a yũ wã, fo ra na n kosa yẽ t’a kõ-f koom sẽn kõt vɩɩm.’

La pagã yeel-⁠a lame yaa: ‘M kẽema, bulgã zulmame, la yãmb ka tar bũmb sẽn na n wi koomã ye. Zĩ-bʋg la yãmb na n paam ko-​kãng sẽn kõt vɩɩmã?’

A Zezi leok-⁠a lame yaa: ‘Fo sã n yũ bul-​kãngã koom, ko-​yũud na n le yõka foo. La ned sã n yũ koom ningã mam sẽn na n kõ yẽ wã, a tõe n kɩtame t’a soab vɩɩmd wakat sẽn ka sate.’

Tɩ pagã yeel a Zezi yaa: ‘M kẽema, bɩ y kõ maam ko-​kãng tɩ m yũ, tɩ ko-​yũud ra le tol n yõk-⁠ma, la m da le wat n wiid koom ka ye.’

Pagã ra tẽedame t’a Zezi gomda koom sɩd-​sɩd yelle. La a Zezi ra gomda Wẽnnaam ne a rĩungã bãngr yelle. Bãng-​kãng wõnda koom sẽn kõt vɩɩm, bala a kɩtdame tɩ ned paam vɩɩm sẽn ka sate.

A Zezi yeela pagã yaa: ‘Kẽng n tɩ bool f sɩdã t’a wa ka.’

La pagã yeelame t’a pa tar sɩd ye.

A Zezi yeel-⁠a lame yaa: ‘Fo togsa sɩda, bala fo talla sɩdb a nu, la fo sẽn be ne a soab masã wa ka fo sɩd ye.’

Woto linga pagã, bala a Zezi sẽn yeelã fãa yaa sɩda. La a Zezi maana wãn n bãng rẽ fãa? Yaa Wẽnnaam n tʋm a Zezi tẽngã zugu, la yaa yẽ n wilg-⁠a rẽ fãa. A Zezi karen-​biisã sẽn yi tẽngã pʋgẽ n lebg n wa mik t’a gomd ne Samari pagã, ling-⁠b lame.

Woto fãa wilgda tõnd bõe? T’a Zezi nonga nebã fãa. Tõnd me segd n nonga nebã fãa. Tõnd pa segd n yãk buud a ye neb n yet tɩ b pa sõma ye. A Zezi ratame tɩ nebã fãa bãng Wẽnnaam n wa paam vɩɩm sẽn ka satã. Tõnd me segd n sõnga nebã tɩ b bãng Wẽnnaam.