BI-​PUGL ning yãmb sẽn ne fotã zugã tara yʋʋm 12. Yaa a Zezi la sẽn gãd a nugã. A ba wã ne a ma wã la sẽn yas be wã. B sũyã yaa noogo. Yãmb mii bũmb ning sẽn kɩt tɩ b sũyã noomẽ wã bɩ?

Bi-​puglã ba wã yʋʋr la a Zairus. A yaa nin-​kãsenga. Daar a yembre, bãag n yõk biigã. A bãagã ra pa sãoogd ye. Ra tara kengr bala. A Zairus ne a pagã ra yɛɛsdame, bala wõnda b biigã rat n kiime. Yaool n yaa b bi-​pugl-yende. Rẽ n kɩt t’a Zairus kẽng n na n tɩ bao a Zezi, bala a wʋmame t’a Zezi maanda yel-​soalma.

A Zairus sẽn wa n yã a Zezi wã, rẽ tɩ neb wʋsg n gũbg-⁠a n wẽdgd taaba. La a Zairus wẽdga nebã n ta a Zezi nengẽ n wõgemd a taoor n yeel yaa: ‘Mam bi-​puglã yĩnsã zabda wʋsgo. Maan sugr la f wa sãoog a bãagã.’ A Zezi yeelame t’a na n tɩ sãooga biigã bãagã.

B sẽn wa n debd a Zairus yirã, nebã ra ket n wẽdgda taaba. Zĩig pʋgẽ bala a Zezi bãngame tɩ ned n sɩɩs-⁠a, bala a pãngã booga bilfu, t’a sok tɩ: ‘Ãnd n sɩɩs maam?’ La yaa ãnd la sẽn sɩɩs-⁠a wã? Yaa pag a ye sẽn da bẽed hal yʋʋm 12. A kolgame n sɩɩs a Zezi fuugã t’a bãagã sãooge.

A Zairus sẽn yã rẽ wã a sũurã yɩɩ noogo, bala a bãngame t’a Zezi tõe n sãooga ned tao-​tao. La ned la b tʋm t’a wa yeel a Zairus yaa: ‘Ra le nams-⁠y a Zezi ye. Yãmb bi-​puglã kiime.’ A Zezi sẽn wʋm dẽ wã, a yeela a Zairus yaa: ‘Da zoe rabeem ye, biigã na n vʋʋgame.’

B sẽn tɩ ta a Zairus zakẽ wã, b mikame tɩ nebã yãbd la b wiisdẽ. La a Zezi yeel-⁠b lame yaa: ‘Ra yãb-⁠y ye. Biigã pa ki ye, a gõeeme.’ La nebã laame la b yaal a Zezi, bala b ra miime tɩ biigã sɩd kiime.

A Zezi peega biigã ba ne a ma, n paas a tʋm-​tʋmdb a tãab n kẽ b sẽn da gãneg biigã roog ningã pʋgẽ. A gãda biigã nug n yeel yaa: ‘Biiga, yiki!’ Wa yãmb sẽn ne fotã zugã, biigã sɩd vʋʋgame n yiki. A sẽn yikã, a sɩnga kẽn menga. Yaa rẽ yĩng la a ba wã ne a ma wã sũurã sẽn noom wʋsgã.

Pa pipi la woto a Zezi sẽn vʋʋg kũum ye. Biiblã wilgame t’a Zezi sẽn vʋʋg ned ning pipi yɩɩ Nayin pʋg-​kõor bi-​ribla. A Zezi vʋʋga a Lazaar sẽn yaa a Mart ne a Maari tão wã me. A Zezi naamã rɩɩb wakate, a na n vʋʋga neb wʋsgo. Woto pa kiba-​noog sɩda?

YEL-​BEED n maane. B kʋʋ a Zãmbatiisi. Rĩm a Herood pag a Herodiaad ra pa nong a Zãmbatiis ye. A maana a sẽn tõe fãa tɩ rĩmã kɩt tɩ b fiuug a Zã zugã.

A Zezi sẽn wʋm dẽ wã, a sũurã sãama wʋsg t’a kẽng weoogẽ wã n tɩ zĩ be a yembre. La neb kʋʋng bʋʋg-​a–la be. A Zezi sẽn yã kʋʋngã, b nimbãanegã yõk-⁠a lame t’a gom Wẽnnaam rĩungã yell ne-⁠b la a sãoog bãad dãmbã.

Zĩ-sobd sẽn wa n ta, a Zezi karen-​biisã kolgame n yeel-⁠a yaa: ‘Zĩ-kãngã yaa weoogo, la zĩigã zoe n zʋʋgame. Bɩ f bas nebã tɩ b loog n kẽng tẽnsã pʋsẽ n tɩ ra rɩɩbo.’

La a Zezi yeel-⁠b lame yaa: ‘Ka tɩlae tɩ b loog ye. Bɩ yãmb mens bao rɩɩb n kõ-b tɩ b rɩ.’ A Zezi wẽnegame n sok a Filip yaa: ‘Yɛ la d tõe n da rɩɩb tɩ sek nin-​kãensã fãa?’

La a Filip leokame yaa: ‘Tõnd sã n dat n da rɩɩb tɩ ned kam fãa tõog n paam baa yaa bilf menga, rẽndame tɩ d yiis ligd wʋsgo.’ T’a Ãndere yeel yaa: ‘Biig n be ka n tar bur a nu ne zĩm a yiib bala. La pa tõe n sek nebã fãa ye.’

La a Zezi yeelame tɩ b kɩt tɩ nebã zĩnd moodẽ wã. A pʋʋsa Wẽnnaam, la a sɩng burã kaoobo. Rẽ poore, a karen-​biisã pʋɩya burã ne zĩmã tɩ nebã fãa paame. Nebã ra yaa rap tus a nu, la pagb ne kamb wʋsgo. B fãa rɩɩme n tɩge, la karen-​biisã wʋka rɩ-​kɛlã n pids pet 12!

A Zezi kɩtame t’a karen-​biisã kẽ koom koglg n na n dʋʋg Galile mogrã. La seb-​kẽeng n yik ne yʋngã tɩ mogrã koom lengd koglgã, tɩ karen-​biisã yɛɛse. Yʋn-​sʋkã sẽn ta, b wa n nee ned sẽn kẽnd koomã zug n watẽ. B sẽn da ka mi sẽn yaa ned ningã yĩnga, b yɛɛsame n kelme.

La a Zezi yeel-⁠b lame yaa: ‘Da zoe-⁠y rabeem ye. Yaa maam.’ La b ket n da pa tẽed ye. Rẽ n so t’a Pɩɛɛr yeel yaa: ‘Zusoaba, sã n sɩd yaa foo, bɩ f kõ maam noor tɩ m kẽn koomã zug n wa fo nengẽ.’ A Zezi yeel-⁠a lame t’a wa. A Pɩɛɛr sɩd yii koglgẽ wã n sɩng koomã zug kẽna. La a wa n yɛɛsame n sɩng bõrbo, t’a Zezi fãag-⁠a.

Daar a to me, a Zezi kõo neb tusa rɩɩb tɩ b rɩ. Baraarã yɩɩ ne bur a yopoe ne zĩm bõones a wãn bala. La seka nebã fãa. A Zezi sẽn da get nebã yell to-⁠to wã pa noom-⁠d sɩda? A sã n wa rɩt a naamã, baa fʋɩ pa na n paoog-⁠d ye.