Sak a 3

Sorã sɛgend rogame

A ELIZABƐT rogmã ta n saame. Kiis a tãabã sẽn loogã pʋgẽ, a Maari ra bee ne-a. La wakat ra taame masã t’a Maari ra segd n leb a yir Nazarɛte. Ka la kiis a yoobe yẽ me na n doga bi-pɛɛlga.

A Maari sẽn loogã pa kaoos la a Elizabɛt rog ye. Ad sɩd yɩ sũ-noog menga, a Elizabɛt sẽn dog tɩ yell ka zĩndi, tɩ biigã ne a ma wã fãa be laafɩ wã! A wilga bi-pɛɛlgã a yagsã la roagdbã tɩ bãmb me naag-a n maan sũ-noogo.

Wẽnnaam Tõogã ra yetame tɩ Israɛlle, biribl sã n doge, a rasem a nii zugẽ, b tog n kẽes-a-la bãongo. Baraare, zo-rãmb la roagdb n wa n na n ges biigã. Nin-kãens yeelame tɩ b segd n pʋda biigã a ba wã yʋʋre, sẽn dat n yeel t’a Zakari. La a Elizabɛt yeelame: “Ayo, pʋd-y-yã a yʋʋr t’a Zã.” Tẽeg-y tɩ yaa yʋ-kãng la malɛk a Gabriyɛll sẽn da yeel tɩ b segd n kõo biigã.

La b zo-rãmbã zãgsa rẽ n yeele: “Fo roagdba ned ba a ye ka tar yʋ-kãng ye.” Dẽ, b tũnuga ne bilsg n sok ba wã yʋʋr ning a sẽn dat tɩ b pʋd biigã. A Zakari kosa walg n gʋls t’ “a yʋʋr la a Zã,” la yɩɩ lingr wʋsg ne neba fãa.

Wakat kãng bala a Zakari zɩlemdã laka ne yel-solemde. Tẽeg-y tɩ malɛkã sẽn da wa n togs-a t’a Elizabɛt na n paama biig t’a pa tẽ wã, a lebga muka. Rẽ, a Zakari sẽn gomã, yagsã fãa yɛɛsame n yeele: “Bi-kãngã na n yɩɩ bõe biiga?”

Dẽ, a Zakari pida ne vʋʋsem sõng n sɩng n yet ne sũ-noogo: “Pẽgr Zusoaba sẽn yaa Israɛll Wẽnnaam, bãmb sẽn wa n fãag b neba yĩnga. La bãmb kõo tõnd Fãagd sẽn yaa kãsenga sẽn yi bãmb tʋm-tʋmd a Davɩɩd buud sʋka.” Yaa vẽeneg tɩ ‘Fãagd sẽn yaa Kãseng’ kãng yaa Soaal a Zezi sẽn na n dogã. A Zakari yeelame tɩ ne yẽ maasem “tõnd na n paama fãagr d bɛɛbã nugẽ, la [Wẽnnaam] na n kõo tõnd pãng tɩ d sak bãmb tɩ rabeem kaẽ ye, la d kẽn bãmb taoor daar fãa ne sõmblem la tɩrlem d yõor tɛka.”

Rẽ poore, a Zakari reng n togsa woto a biribl a Zã wɛɛngẽ: “La biiga, b na n boola foom tɩ Sẽn-ka-to no-rɛɛsa. Tɩ bõe, fo na n denga Zusoaba taoore n maneg bãmb soɛyã. N vẽneg bãmb neba ne b fãagra sẽn wat ne b yel-wẽna sugra yelle. Yaa tõnd Wẽnnaam nimbãan-zoeera yĩng la b kɩt tɩ vẽenem sẽn wẽnd wĩntoog yi yĩngri n wa tõnd nengẽ n kõ neb nins sẽn be lik ne kũum maasmẽ wã vẽenem, la a wilg tõnd tɩ d tũ laafɩ sore.”

Wakat kãng t’a Maari ra zoe n taa a yir Nazarɛte. La a ra ket n pa kul sɩd ye. La neba sã n wa mik t’a tara pʋga, bõe n na n paam-a? Luk 1:56-80; Maankʋʋre 12:2, 3.

▪ A Zã ra kẽema a Zezi ne kiis a wãna?

▪ B sẽn dog a Zã tɩ rab-niinẽ bõe n maane?

▪ Wãn to la Wẽnnaam tẽeg a nin-buiidã yelle?

▪ B reng n togsame t’a Zã na n maana bõe?

Sak a 4

A rɩka pʋg t’a nan pa kul sɩd ye

A MAARI pʋgã kiis a tãab la woto. Tẽeg-y t’a sẽn da wa n dɩk pʋgã paalmã a tɩ zĩnda ne a Elizabɛte. La masã a lebg n waa a yir Nazarɛte. Pa na n kaoos la a tẽngã neb bãng t’a tʋtame ye. Yellã sɩd pak-a lame.

Sẽn yaa wẽng n yɩɩdã yaa b sẽn da sɩʋ a Maari ra-wãad a Zozɛfã. Sẽn paase, a Maari ra miime tɩ tõogã Wẽnnaam sẽn kõ Israɛllã ra yetame tɩ b sã n sɩʋ pag t’a kẽ ne rao a to, b segd n lob-a-la kug n kʋ. A Maari na n maana wãn n togs a Zozɛf a pʋgã võor t’a sak n deege?

A Maari zĩnda sãand weoog n maan kiis a tãabo. Dẽ, d mii vẽeneg t’a Zozɛf ra yãgdame n dat n yã-a. B sẽn wa n yã taabã, a Maari togs-a-la kɩbarã. Tõeeme t’a maana a sẽn tõe fãa n togs a Zozɛf tɩ yaa ne Wẽnnaam vʋʋsem sõng maasem la a sẽn dɩk pʋgã. La yãmb mengã ne tɩ yaa toog ne a Zozɛf t’a sak yel-kãngã.

A Zozɛf miimi t’a Maari tara yʋ-noogo. Sẽn paase, wõnda a nong-a-la wʋsgo. La ne a Maari sẽn yeta fãa, sɩd wõnda vẽeneg tɩ yaa rao n ning-a pʋgã. Baa sẽn yaa to-to, a Zozɛf ra ka rat tɩ b lob-a kug n kʋ, bɩ b ning-a yãnd zãma sʋk ye. Rẽ n so t’a yãk yam n na n kao kãadmã n bas-a tɩ neba ka bãng ye. Rẽ wẽnde, b ra geta pag b sẽn sɩʋ wala a sẽn zoe n kẽ kãadem ne rao wã. Rẽ kɩtame tɩ b sã n wa rat n bas taaba, bɩ b segd n kao kãadmã.

Rẽ poore a Zozɛf kẽe gãaga, la a bʋgsd yel-kãngã zugu. A Zeova malɛkã vẽnega a meng ne-a zãmsd pʋgẽ n yeele: “Da zoe rabeem tɩ peeg fo pag a Maari ye, tɩ bõe, a sẽn tʋtã yaa [vʋʋsem sõng] pʋga. Yẽ na n doga biribla tɩ f pʋd a yʋʋr t’a Zezi. Yaa yẽ n na n fãag a nebã ne b yel-wẽna.”

Ad a Zozɛf sẽn neke, a sũur sɩd yɩ noogo! Tao-tao bala a maana wala malɛkã sẽn yeelã. A peega a Maari n wa a zakẽ. A Zozɛf sẽn maan woto neba nifẽ wã yaa yi-kãadem. Woto wilgda neba t’a Zozɛf ne a Maari kẽe kãadem tɩ zems ne rog-n-mikã. La hal t’a Maari wa rog a Zezi, a Zozɛf pa kẽ ne-a ye.

Ges-y-yã a Maari! A kolga rogem masã, la a Zozɛf zombg-a-la bõanga. Yɛ la b rabda? Bõe yĩng tɩ b togd sore, t’a Maari rogem yaool n ta n sa? Luk 1:39-41, 56; Matɩe 1:18-25; Tõodo 22:23, 24.

▪ A Zozɛf ra tagsda bõe a sẽn bãng t’a Maari tʋtame wã, la bõe yĩnga?

▪ Wãn to la a Zozɛf ra tõe n kao kãadem ne a Maari, tɩ b yaool n da nan pa kẽ kãadem?

▪ Bõe la a Zozɛf la a Maari maan neba nifẽ tɩ b getẽ tɩ yaa yi-kãadem?