Sak a 7

Ãds bagb n wa n na n ges a Zezi

ÃDS bagb n yi yaang n wa. Nin-kãensã yetame tɩ b tõe n bilga ãdsã kẽnd võore. B zĩnda bãmb sẽn beẽ wã n yã ãd-paalga. B tũu ãdgã sor kɩlometr kobs n wa Zerizalɛm.

Ãds bagbã taa Zerizalɛm n soke: “Zʋɩf rãmba rĩma b sẽn doga bee yɛ? Tɩ bõe, tõnd yãa bãmb ãdg yaanga, la tõnd waame n na n waoog bãmba.”

Rĩm a Herood sẽn be Zerizalɛmã sẽn wʋm dẽ wã, a sũur sãama wʋsgo. Rẽ n so t’a bool maan-kʋʋdbã kãsem dãmb n sok-b Kiristã sẽn da segd n dogẽ zĩig ninga. B tika Wẽnnaam Gomdã zug n leok woto: “Yaa . . . Betlehɛm.” Dẽ a Herood boola ãds bagbã n yeel-ba: “Bɩ y kẽng n bãng biiga yell neere, la yãmb sã n yã biigã, bɩ y leb n wa togs maam, tɩ mam me tõe n kẽng n tɩ waoog-a.” La togs sɩda a Herood ra ratame n bãng biigã sẽn beẽ n tɩ kʋ-a!

Ãds bagbã sẽn yi be wã, yel-sãang n maane. Ãdgã bãmb sẽn da zĩnd yaang n yã wã bee bãmb taoor n teesdẽ tɩ b pʋgd-a. Yaa vẽeneg tɩ ãd-kãngã ka ãd-zaalg ye. Yaa ãdg b sẽn maan tɩ puki, sẽn na yɩl t’a wilg-b sore. Ãds bagbã talla ãdgã pʋgb hal t’a wa yals zak ning a Zozɛf ne a Maari sẽn da beẽ wã zug bal tã.

Ãds bagbã taame n kẽ zakẽ wã n yã a Maari ne a biigã. B sẽn yã a Zezi wã b wõgemdame n waoog-a, la b yiis sãnem la tɩdar b kordẽ n kõ-a. Rẽ poore b ra segendame n na n leb a Herood nengẽ n tɩ togs-a biigã sẽn beẽ, tɩ Wẽnnaam keoog-b zãmsd pʋgẽ tɩ b ra kẽng ye. Yaa rẽ n so tɩ b tũ sor a to n lebg n kuili.

Yãmb tagsdame tɩ yaa ãnda n kɩt tɩ ãdgã puk yĩngr n kẽnd n wilgd ãds bagbã sore? Tẽeg-y tɩ b sẽn yi yirã ãdgã ka tall-b n yak Betlehɛm ye. La a reng n tall-b lame n kẽng Zerizalɛm tɩ b tɩ yã Rĩm a Heroode. Rĩm a Herood me yaool n da rat n kʋʋ biigã. La sɩd me a ra na n kʋẽ-la a Zezi. Yaa Wẽnnaam sẽn kẽes a toog n keoog ãds bagba tɩ b ra tɩ togs-a a Zezi sẽn beẽ wã n gɩdg rẽ. Ra yaa Wẽnnaam bɛ a Sʋɩtãan sẽn da rat n kʋ a Zezi wã n kɩt tɩ ãdgã puki. A tũnuga ne ãd-kãngã sẽn na yɩl n pids a raabã. Matɩe 2:1-12; Miise 5:1.

▪ Bõe n wilgd tɩ ãdgã ãds bagbã sẽn yã wã ka ãd-zaalga?

▪ Zĩ-bʋg la ãds bagbã tɩ yã a Zezi?

▪ Bõe yĩng tɩ d tõe n yeel tɩ ya a Sʋɩtãan n kɩt tɩ ãdgã puk sẽn na yɩl t’a wilg ãds bagbã sore?

Sak a 8

B põsanin-toaaga

A ZOZƐF neka a Maari n na n togs kɩba-yãgdem. A Zeova malɛkã vẽnega a meng ne-a n yeel-a woto: “Yik n dɩk biiga ne a ma n zoe n kẽng Ezipt, zĩnd be hal tɩ m le wa gom ne-fo; tɩ bõe, Herood na n baoo biigã n kʋ.”

Tao-tao bala, b tãabã fãa zoeeme. La b zug sɩd yɩɩ noogo, bala a Herood bãngame tɩ ãds bagbã belg-a lame n yi tẽngã. Tẽeg-y tɩ bagbã sã n da yã a Zezi b ra segd n lebg n tɩ togsa a Heroode. Dẽ, a Herood sũurã puugame, t’a kõ noor tɩ b kʋ komdibli nins fãa sẽn tar yʋʋm a yiib la sẽn ka ta woto wã Betlehɛm la a soolmã fãa pʋgẽ. La a maana rẽ sẽn na yɩl n paam a Zezi n kʋ. Ãds bagbã sẽn yi yaangã ra togsa a Herood a Zezi rogmã sẽn yɩ wakat ning sẽnẽ. Yaa rẽ zug la a sẽn tik n yãk komdibli nins b sẽn segd n kʋ wã yʋʋma.

Kom-peelsã kʋʋb sɩd yɩɩ yel-beed menga! A Herood sodaasã ra kẽeda zagsã ne pãnga, tɩ b sã n yã biribl fãa bɩ b fãsg-a a ma wã nugẽ. D ka mi kom-peels sõor b sẽn kʋ ye. La b ma rãmbã yãbr la b wiisg pidsa Biiblã bãngr-gomd Wẽnnaam no-rɛɛs a Zeremi sẽn togse.

Wakat kãng t’a Zozɛf ne a zaka rãmb ra zoe n kẽng n tɩ bee Ezipti. La yʋng a yembre, a Zeova malɛkã leb n vẽnega a meng ne a Zozɛf zãmsd pʋgẽ n yeel-a: “Yik n dɩk biigã ne a ma n kẽng Israɛll; tɩ bõe, neb nins sẽn da baood biigã n na n kʋ wã, kiimi.” Dẽ a Zozɛf ne a zaka rãmb fãa leba b ba-yirã. Woto pidsa Biiblã bãngr-gomd a to, sẽn yet tɩ b na n boola Wẽnnaam biriblã t’a yi Eziptã.

A Zozɛf ra bee Betlehɛm, Zide soolmã pʋgẽ. Yaa be la a sẽn yi n zoe n kẽng Eziptã. La wõnda a ra rat n leb n tɩ zĩnda Zide. La a wʋmame t’a Herood biig a Arkelaus sẽn yaa wẽnem soabã n dɩt naam Zide. Dẽ, zãmsd a to pʋgẽ Wẽnnaam keoog-a lame tɩ be zĩndg yaa yelle. Dẽ a Zozɛf ne a zaka rãmb kẽnga rɩtg babgo, n tɩ zĩnd Nazarɛt sẽn be Galile soolmẽ wã. Yaa zĩ-kãng sẽn zãr ne Zʋɩf rãmbã tũudum nif zĩigã la a Zezi bɩ-yã. Matɩe 2:13-23; Zeremi 31:15; Oze 11:1, NW.

▪ Ãds bagbã sẽn ka lebg n wa Rĩm a Herood nengẽ wã, yaa yel-be-bʋg la a maan-yã, la wãn to la b kogl a Zezi?

▪ Bõe yĩng t’a Zozɛf ka zĩnd Betlehɛm a sẽn wa n yi Ezipt n lebgã?

▪ Biiblã bãngr-gom-bʋs n pids wakat kãngã pʋgẽ?