Sak a 9

A Zezi yãadmã

A ZEZI yãadmã wakat tɩ Nazarɛt ra yaa tẽn-bil bala. Nazarɛt ra bee Galile babg ning sẽn yaa tãngã. A ra ka zãr ne Zɩzreyɛl Bãoogã sẽn be rasãndã ye.

A Zozɛf ne a Maari sẽn da wa n tall a Zezi n yi Ezipt n wa wã, tõe t’a tara sẽn zems yʋʋm a yiibu. La wõnda a ra nan pa tar yao ye, la pa kaoos la a Maari rog kamb a taab ye. A Maari ne a Zozɛf sẽn paam kamb ninsã ya a Zak, a Zozɛf, a Sɩmo, ne a Zida, la b roga kompugli me. A Zezi wa n baas n talla ma-biis a yoob bɩ sẽn yɩɩd woto.

A Zezi ra kĩi ne neb a taab me. D zoe n mii a yagen-taag a Zã sẽn be Zide wã. La a Maari ma-bi-poak a yembr yʋʋr sẽn boond t’a Salome n da be Galile pʋgẽ be menga. A Salome ya a Zebede paga. Dẽ, b kamb a yiibã sẽn ya a Zã la a Zakã me ra ya a Zezi yagen-taase. D ka mi a Zezi sã n maana tũud-n-taar wʋsg ne kom-kãensã a yãadmã wakat ye. La kaoosg zugẽ, b wa n lebga a tũud-n-taas n yaa zo-rãmba.

A Zozɛf ra segd n tʋma wʋsg sẽn na yɩl n tõog n zã a zag-kʋʋngã. A ra yaa ra-wãada. A Zozɛf wuba a Zezi wa a meng biiga, rẽ n so tɩ b boond a Zezi tɩ ‘ra-wãadã biigã.’ A Zozɛf zãmsa a Zezi raad wãab me, hal t’a wa bãng tʋʋmdã sõma. Yaa rẽ yĩng la neba sẽn wa n yet kaoosg zugẽ t’a ‘Zezi yaa ra-wãadã.’

A Zozɛf zakã neb vɩɩm tika Wẽnnaam a Zeova balengã zugu. A Zozɛf ne a Maari tũu Wẽnnaam noorã, n kõ b kambã zãmsg tẽebã wɛɛngẽ, ‘b sã n da zĩ b zak pʋgẽ, b sã n da kẽnd sor zugu, b gãandg la b yikr wakate.’ Zʋɩf rãmb karen-doog n da be Nazarɛte. D tõe n kɩsa sɩd t’a Zozɛf ne a zakã rãmb da tʋgd n balemda Wẽnnaam be wakat fãa. La sãmbg sẽn ka be, yaa b sẽn da minim n debd a Zeova roogẽ wã Zerizalɛm n ka vaandẽ wã n da kõt-b sũ-noog n yɩɩda. Matɩe 13:55, 56; 27:56; Mark 15:40; 6:3; Tõodo 6:6-9.

▪ A Zezi ra tara ma-biis sõor sẽn zems a wãna, la bãmb kẽer yʋy la bʋse?

▪ A Zezi yagen-taas a tãab bʋs la neb wʋsg mi?

▪ A Zezi nug-tʋʋmd yɩɩ bõe, la bõe yĩnga?

▪ Zãmsg sẽn tar yõod wʋsg bʋg la a Zozɛf kõ a zaka rãmba?

Sak 10

Zerizalɛm yʋʋmd fãa kẽndã

YƲƲMDÃ wakat ning a Zozɛf zakã rãmb ne b zo-rãmb la b roagdb sẽn kẽngd Zerizalɛm n na n tɩ maan Pakã ra taame. Sorã zãrem ra taa kɩlometr 100. Wala sẽn nong n yaa to-to so-toak a woto buud wakatã, neba fãa ra tara kɩrbo. A Zezi ra tara yʋʋm 12, n da gũud kibsã ne sũ-no-kãsenga.

Ne a Zozɛf la a zakã rãmba, Pakã ka raar a yembr yell ye. B kelld n paa be n maan Bur sẽn ka rabɩll kibsã sẽn dɩkd rasem a yopoe wã. B getame tɩ rẽ me naaga Pakã pʋgẽ. Rẽ kɩtame tɩ so-toakã tõre, kẽnda la lebgrã n paas Zerizalɛm zĩndgã, rɩkd sẽn zems rasem piig la a naase. La so-kãngã, bũmb sẽn tɩ loe ne a Zezi n na n maan tɩ so-toakã kaoos n yɩɩg woto.

Yaa b sẽn da wa n yi Zerizalɛm n lebdẽ wã la b bãng bõn-kãnga. A Zozɛf ne a Maari ra tagsdame t’a Zezi ra bee b zo-rãmbã la b roagdbã sẽn da naag bãmb n togd sorã sʋka. La yʋng sẽn wa n ta tɩ b yals n na n gãande, b ka ne a Zezi ye. Dẽ b sɩngame n baood-a so-togdb a taabã sʋka. La b kell n pa wʋm a kɩbar ye. Dẽ a Zozɛf ne a Maari lebg n kẽnga hal Zerizalɛm n na n tɩ bao-a.

Daar a yembr tõre b bao-a lame n ka yã ye. Vẽk-n-beoogã me woto. B wa n baas n kẽnga wẽnd-doogẽ wã rasem a tãab-n-soabã, n yã-a roog a yembr pʋgẽ t’a zĩ ne Zʋɩf rãmbã karen-saam dãmba, n kelgd-b la a sogsd-b yɛla.

Dẽ a Maari yeela a Zezi: “M biiga, yaa bõe tɩ fo maan tõnd woto? Gese, maam ne f ba ra baooda foom ne sũ-sãoongo.”

B sẽn ka bãng a Zezi sẽn beẽ wã linga-a lame, t’a sok-ba: “Bõe yĩng tɩ yãmb da baood maam? Yãmb da ka mi tɩ mam tog n bee m ba wã roogẽ la?”—Kãab-paalgã Koe-noogo

Sã n yaa ne a Zezi, a roagdbã ra segd n mii a sẽn beẽ. Dẽ a Zezi tũu a roagdbã n kul la a ket n sakd-ba. A Zezi ra kell n bɩtame t’a yama paasdẽ la a paamd Wẽnnaam la nebã pẽgre. N-ye, sẽn sɩng a yãadem tɛka a Zezi kõo mak-sõngo. Bala a ra nonga tẽebã yɛla, la a waoogd a roagdbã. Luk 2:40-52; 22:7.

▪ So-toak bʋg la a Zezi ne a roagdbã ra nong n maandẽ, la so-toakã ra rɩkda rasem a wãna?

▪ A Zezi sẽn da wa n tar yʋʋm 12, bõe n maan so-toakã wakate?

▪ Mak-bʋg la a Zezi kõ rũndã-rũndã kom-bɩɩsã?