Sak 11

A Zã segenda sorã

YƲƲM 17 la woto a Zezi sẽn zĩnd wẽnd-doogẽ wã n da sogsd karen-saam dãmbã. Wakat kãng t’a ra tara yʋʋm 12. Masã ra yaa yʋʋmd 29 sɩngr poor bilfu, la neba fãa la bal ra gomda a Zezi yagen-taag a Zã yelle. A Zã ra moonda Zʋrdẽ Kʋɩlgã babg fãa pʋgẽ.

A Zã mengã yalẽ wã la a goamã ra lingda neba wʋsgo. A futa wʋga ne yʋgemd kõbdo, la a ra sẽbga a sɛɛg ne gãongo. Sʋy la sɩɩd n da ya a rɩɩbo. La koe-bʋg la a ra togsda? Koɛɛga la woto: “Tek-y yam n kos sugri, tɩ [saasẽ Rĩungã] kolgame.”

Koe-kãngã kɩtame tɩ neba rat n bãng n paase. Neb wʋsg yãame tɩ b tog n teka yam n kos sugri. Woto rat n yeelame tɩ b toeem b manesmã la b bas b pĩnd vɩ-yookã. Dẽ, neb wʋsg yii Zʋrdẽ babgã la Zerizalɛm meng n wa a Zã nengẽ t’a lisd-b Zʋrdẽ Kʋɩlgã koom pʋgẽ. Bõe yĩnga?

Ned sã n da reeg a Zã lisgã, wilgdame t’a soabã teka yam n kos sugri, yel-wẽnã a sẽn maan n kɩɩs Wẽnnaam Tõogã kaoolã yĩnga. Dẽ Fariziẽ rãmbã la Sadiseẽ rãmbã kẽer waa a Zã nengẽ Zʋrdẽ kʋɩlgẽ wã, t’a ning-b taale. A yeel-b lame: “Yãmb wag-toos buudu. . . . Bɩ y wom biis sẽn zems wa ned sẽn tek yam n kos sugri, la y ra tags t’a Abrahaam sẽn yaa yãmb ba wã sekame ye. Tɩ bõe, mam yeta yãmba tɩ Wẽnnaam tõe n dɩka kug kãensã n kɩt tɩ b lebg a Abrahaam kamba. La lar bee tɩɩs yẽgẽ masã, tɩɩg ninga fãa sẽn ka wom bi-sõama, b na n keeg-a lame n lob bugum pʋgẽ.”

Neb wʋsg ra wata a Zã nengẽ. Rẽ kɩtame tɩ Zʋɩf rãmbã tʋm maan-kʋʋdb la Levi neb a nengẽ. B tɩ sok-a lame: “Yãmb yaa ãnda?”

A Zã wilgame: ‘Mam ka Kirist ye.’

B le sok-a lame, “Dẽ, yaa bõe? Yãmb ya a Eli bɩ?”

T’a leoke: “Mam ka a Eli ye.”

‘Yãmb yaa Wẽnnaam no-rɛɛsã bɩ?’

“Ayo.”

La b pẽdg n sokame: “Yãmb la a bõe, tɩ d sã n kẽng bɩ d tɩ togs neb nins sẽn tʋm tõndã. Yãmb boonda y meng t’a bõe?”

A wilga woto: “Mam yaa ned ninga koɛɛg sẽn kelemd weoogẽ n yetẽ: ‘Bɩ y maneg Zusoaba sor tɩ yɩ tɩrg wa Wẽnnaam no-rɛɛs a Ezai sẽn da yeelã.’”

Rẽ n so tɩ b tʋll n bãng woto: “Dẽ, yãmb sã n ka Kirist walla a Eli walla Wẽnnaam no-rɛɛsa, yaa bõe tɩ yãmb lisd neba?”

T’a Zã leoke: “Mam lisda nebã koom pʋgẽ, la ned a ye n be yãmb sʋka, tɩ yãmb ka mi-a ye, yaa bãmb n pʋgend maam.”

A Zã segenda sorã, n kɩtdẽ tɩ nebã manegd b sũyã sẽn na yɩl n wa tõog n sak Mesi wã, sẽn na n yɩ Rĩmã. A Zã yeela woto Mesi wã wɛɛngẽ: “Sẽn pʋgenda maam n watẽ wã yɩɩda maam, mam ka zems tɩ zã bãmb neooda ye.” A Zã yeelame menga: ‘Ned ninga sẽn pʋgend maamã yɩɩda maam; tɩ bõe, bãmb denga maam n beẽ.’

A Zã koɛɛgã ra yetame tɩ ‘saasẽ Rĩungã kolgame.’ Woto ra wilgda nebã t’a Zezi Kirist sẽn yaa Rĩm a Zeova sẽn yãkã tʋʋmd sɩngr ra ta n saame. Zã 1:6-8, 15-28; Matɩe 3:1-12; Luk 3:1-18; Tʋʋma 19:4.

▪ A Zã ra yaa nin-bʋg buudu?

▪ Bõe yĩng t’a Zã ra lisd neba?

▪ Bõe yĩng t’a Zã ra tõe n yeel tɩ Rĩungã kolgame?

Sak 12

A Zezi lisgã

A ZÃ sẽn sɩng mooneg kiis a yoob la woto. Masã a Zezi ra tara yʋʋm 30 a sẽn da wa a Zã nengẽ Zʋrdẽ Kʋɩlgẽ wã. Yaa sẽn na n maan bõe? A wa n na n ges-a-la zood yĩng bal bɩ? Bɩ ya a Zã tʋʋmdã sẽn da kẽngd taoor to-to wã bal n pak-a? Ayo, a Zezi waame n na n kos a Zã t’a lis-a.

Zĩig pʋgẽ bala a Zã ka sak ye, n yeel woto: “Yaa maam n tog n wa yãmb nengẽ tɩ y lis maam. La gese, yãmb wata mam nengẽ!” A Zã ra miimi t’a Zezi yaa Wẽnnaam Biribl sẽn ka wõnd a taaba. A Maari sẽn da wa n tar a Zezi pʋg n wa na n ges a Zã ma a Elizabɛtã, a Zã zĩnda a ma wã pʋgẽ meng n virs ne sũ-noogo. Sik kae tɩ kaoosg zugẽ a Zã ma wã togs-a-la rẽ ye. Sẽn paase, tõeeme t’a ra togsa a Zã me tɩ malɛk n wa n togs a Zezi rogmã, la tɩ malɛgs n vẽneg b mens ne rũm-kɩɩmb yʋng ning a sẽn dogã.

Dẽnd a Zezi ka a Zã sãan ye. Sẽn paase, a Zã miimi tɩ lisg ning yẽ sẽn kõt nebã ka a Zezi yĩng ye. Lisg kãngã yaa neb nins sẽn tek yam n kos sugr ne b yel-wẽnã yĩnga. La a Zezi ka tar yel-wẽnd ye. Ne rẽ fãa, ba a Zã sẽn da ka rat n sakã, a Zezi yeelame: “Bɩ y sak t’a yɩ woto masã, tɩ bõe, a zemsame tɩ tõnd pids bũmb nins fãa sẽn yaa tɩrgã.”

Bõe yĩng tɩ zems t’a Zezi reeg lisgu? A Zezi lisgã ka makr sẽn wilgd t’a teka yam n kos sugr ne yel-wẽn ye. La a yaa makr sẽn wilgd t’a waa masã n na n maan a Ba wã raabo. A Zezi ra yaa ra-wãada. La wakat ra taame masã t’a segd n sɩng tʋʋmd ning Wẽnnaam a Zeova sẽn tʋm-a t’a wa maan tẽng zugã. Yãmb tagsdame t’a Zã ra gũudame tɩ bõn-sãang maan a Zezi lisgã wakat bɩ?

Ad a Zã sẽn togse: “Sẽn tʋm-a maam tɩ m lis neba koom pʋgẽ wã yeela maam yaa: ‘Fo sã n wa yã [vʋʋsem sõngã] sẽn sigda n paad ned ninga zugu, yaa yẽ n lisd nebã [vʋʋsem sõng] pʋgẽ.’ ” Dẽ, a Zã ra gũudame tɩ Wẽnnaam vʋʋsem sõngã sig neb nins a sẽn na n lisã a ye zugu. Woto a Zã yãame t’a Zezi sẽn wa n yi koomẽ wã ‘Wẽnnaam vʋʋsem sõngã siga a Zezi zug wala walle.’ Tõeeme tɩ yel-kãngã sɩd ra ka ling a Zã ye.

La bũmb nins sẽn maan a Zezi lisgẽ wã ka woto tɛk ye. “Yĩngr pakame” n kõ a Zezi. Woto rat n yeelame tɩ bõe? Rat n yeelame t’a Zezi lisgã reegrẽ, a pʋ-tẽerã yokame t’a lebs n tẽeg vɩɩm ning a sẽn da tall saasẽ t’a nan ka wa tẽng zugã. A Zezi tẽega vɩɩm ning a sẽn da tara, a sẽn da wa n yaa Wẽnnaam a Zeova biribl n yaa malɛkã. A tẽega bũmb nins Wẽnnaam sẽn togs-a a sẽn da wa n be saasẽ ne-a wã me.

Sẽn paase, a Zezi lisgã wakate, koɛɛg n yi saasẽ n moon woto: “Ad-a yaa mam Bi-nongre, mam sẽn nong ne m sũur fãa zãnga.” Ãnd koɛɛg la rẽ? A Zezi mengã koɛɛg bɩ? Yaa vẽeneg tɩ pa a Zezi koɛɛg ye! Yaa Wẽnnaam koɛɛga. Woto wilgda vẽeneg t’a Zezi yaa Wẽnnaam Biribla, la a ka Wẽnnaam meng wala neb kẽer sẽn yetã ye.

La a Zezi ra yaa Wẽnnaam biribl sẽn yaa ninsaala, wa pipi ninsaal a Ãdem sẽn da yaa to-to wã. Karen-biig a Luk goma a Zezi lisgã yelle, la rẽ poore a gʋlsa woto: ‘A Zezi sẽn wa n sɩng a tʋʋmdã t’a [ra zemsa] yʋʋm pis-tã. La neba tẽedame t’a ya a Zozɛf biiga, sẽn ya a Heli biiga, . . . sẽn ya a Davɩɩd biiga, . . . sẽn ya a Abrahaam biiga, . . . sẽn ya a Nowe biiga, . . . sẽn ya a Ãdem biiga, sẽn yaa Wẽnnaam biiga.’

A Zezi ra yaa ‘Wẽnnaam biig’ sẽn yaa ninsaal wala a Ãdmã. D sã n ges a vɩɩmã, d mikdame t’a sɩd yaa zãmaan fãa nin-kãseng sẽn ka to wã. La a Zezi lisgẽ wã a paama zems-n-taar paalg ne Wẽnnaam, n lebg Wẽnnaam Biribl sẽn paam vʋʋsem sõng rogem me. Ra yaa wala Wẽnnaam boola a Zezi t’a leb n dʋ saasẽ, a sẽn kɩt t’a sɩng vɩɩm sẽn na n baas ne a meng maoong sẽn na n naf ãdem-biisã sẽn be kũumã yembd pʋgẽ wã. Maoong kãng yɩɩ a sẽn kõ a ninsaal vɩɩmã wakat fãa yĩngã. Matɩe 3:13-17; Luk 3:21-38; 1:34-36, 44; 2:10-14; Zã 1:32-34; Hebre dãmba 10:5-9.

▪ Bõe yĩng t’a Zezi pa a Zã sãanã?

▪ Sẽn mik t’a Zezi ka maan yel-wẽndã, bõe yĩng t’a reeg lisgu?

▪ A Zã sẽn mi bũmb nins a Zezi wɛɛngẽ wã, bõe yĩng tɩ Wẽnnaam vʋʋsem sõngã sẽn sig a Zezi zugã pa ling-a?