Sak 13

Makrã a Zezi sẽn paamã kõta tõnd zãmsgo

A ZEZI lisgã reegr poore, Wẽnnaam vʋʋsem sõngã kɩtame t’a kẽng Zide weoogẽ wã. A Zezi lisgẽ wã “yĩngr pakame” n kɩt t’a tõog n tẽeg saasẽ yɛla. Dẽ yɛl wʋsg la a Zezi sɩd ra tar n segd n bʋgs b zutu!

A Zezi maana rasem 40 la yʋnd 40 weoogẽ wã, n pa rɩt baa fɩ ye. La kom yõk-a-la sõma. Dẽ, a Sʋɩtãan kolgame n dat n kʋɩɩb-a, n yeele: “Yãmb sã n yaa Wẽnnaam Biiga, bɩ y kɩt tɩ kug-kãensa lebg buri.” La a Zezi ra miimi tɩ yaa wẽng t’a rɩk a tõogã a sẽn tarã n maan yel-soalem n pids a meng raabo. Woto, a zãgsame t’a kõn bas tɩ b kʋɩɩb-a ye.

La a Sʋɩtãan ka bas tɩ lʋɩ ye. A le mak-a-la ne manesem a to. A yeelame t’a Zezi sã n tar daood bɩ a yi wẽnd-doogã zug n yɩk n lʋɩ tẽng tɩ Wẽnnaam malɛgsã na n kok-a lame. La a Zezi ka sak n maan woto sẽn na yɩl n wilg a meng ye. Ka, a Zezi togsa goam sẽn yit Gʋlsg Sõamyã pʋgẽ n wilg tɩ yaa wẽng tɩ b mak Wẽnnaam woto.

Makr a tãab-n-soabẽ wã, a Sʋɩtãan tũnuga ne yel-solemd n wilg a Zezi dũniyã soolem fãa, la a yeele: “Yãmb sã n sak n wõgemd n waoog maam, mam na kõ yãmb bõn-kãensa fãa.” Ka me, a Zezi pa bas tɩ b kʋɩɩb-a ye. A kell n saka Wẽnnaam.

A Sʋɩtãan sẽn mak n na n kʋɩɩb a Zezi to-to wã zãmsda tõnd t’a Sʋɩtãan ka wẽng tʋlsem wa neb kẽer sẽn tagsdã ye. A yaa ned sẽn sɩd be, la ninsaalbã nif ka tõe n yã-a ye. Yaoolem mak-kãngã a Zezi sẽn paamã leb n wilgdame tɩ dũniyã goosneem dãmb fãa ya a Sʋɩtãan n so. Sã n ka rẽ, b ka tõe n yeel t’a sẽn dɩk-b n kãab a Zezi wã sɩd yaa kʋɩɩbg ye.

Yãmb wee n tagse: A Sʋɩtãan yeelame t’a Zezi sã n da wõgemd n balm-a bala, a ra na n sakame n kõ-a dũniyã soolem fãa. Sʋɩtãanã tõeeme n mak tõnd woto me. A tõeeme n pak soay dũniyã pʋgẽ n kõ-do, sẽn na yɩl tɩ d paam arzɛka, tõogo, bɩ naam. La d na n wilgame tɩ d tara yam, d sã n dɩk togs-n-taar ne a Zezi n sak Wẽnnaam, baa ne makrã sẽn yaa to-to fãa. Matɩe 3:16; 4:1-11; Mark 1:12, 13; Luk 4:1-13.

▪ Wõnda yel-bʋs zut la a Zezi bʋgs-yã, a sẽn da wa n zĩnd weoogẽ wã rasem 40?

▪ Wãn to la a Sʋɩtãan mak a Zezi?

▪ Bõe la a Sʋɩtãan sẽn da rat n kʋɩɩb a Zezi wã tõe n zãms tõndo?

Sak 14

A Zezi pipi karen-biisã

A ZEZI maana rasem 40 weoogẽ wã n yaool n lebg n kẽng a Zã sẽn dag n lis-a wã nengẽ. A Zezi sẽn da wa n kolgdẽ wã, a Zã tees-a lame n yeel neb nins sẽn da be ne yẽ wã woto: “Ad Wẽnnaam Pebila sẽn yiisd dũniyã yel-wẽna. Yaa bãmb la mam sẽn da yeel tɩ rao n pʋgend maam n watẽ la b yɩɩda maamã; tɩ bõe, bãmb denga maam n beẽ.” A Zã ra kẽema a Zezi. La a ra miime t’a Zezi renga yẽ n vɩɩmd wala malɛk saasẽ.

Baasgo, a Zezi sẽn da wa a Zã nengẽ n na n deeg lisg semen a wãn sẽn deng rẽ wã, wõnda a ra ka mi vẽeneg t’a Zezi la Mesi wã ye. A Zã sak n deega woto: “Mam da ka mi bãmb ye la mam waame n na n lis nebã koom pʋgẽ sẽn na yɩlga tɩ Israɛll nebã bãng bãmba.”

A Zã leb n wilga a kɛlgdbã bũmb ning sẽn maan a Zezi lisgẽ wã, n togs woto: “Mam yãa [vʋʋsem sõng] sẽn wẽnd wall sẽn yi yĩngri n sigda n paad bãmb zugu. Mam da ka mi bãmb ye, la sẽn tʋm-a maam tɩ m tɩ lis nebã koom pʋgẽ wã yeela maam yaa: ‘Fo sã n yã [vʋʋsem sõng] sẽn sigda n paad ned ninga zugã, yaa yẽ n lisd neba [vʋʋsem sõng] pʋgẽ.’ La mam yãame la m kɩt kaset tɩ bãmb yaa Wẽnnaam Biiga.”

Vẽk-n-beoogã a Zã ra yasa ne a karen-biis a yiibu. A Zezi sẽn da wa n kolgdẽ wã, a Zã leb n yeelame: “Ad Wẽnnaam Pebilã.” A Zã karen-bi-kãensã sẽn wʋm dẽ wã, b pʋga a Zezi. A yembr yʋʋr la a Ãndere. La wõnda karen-biig a to wã yaa ned ning sẽn gʋls-a kɩba-kãngã wã. Yẽ me yʋʋr la a Zã. Kɩbay b sẽn paam wilgdame tɩ Zã kãng me ya a Zezi yagen-taaga. A tog n ya a Maari ma-biig a Salome biiga.

A Zezi wẽnemdame n yã a Ãnder la a Zã sẽn pʋgd-a n sok-ba: “Yãmb baooda bõe?”

Tɩ bãmb me sok a Zezi: “Rabi, yãmb yir bee yɛ?”

La a Zezi leokame: “Wa n ges-y-yã.”

Ra yaa zaabr wakat a naas wẽnde. A Ãnder la a Zã kell n paa ne a Zezi raar-n-kãnga. Rẽ poore, a Ãnder sũurã yɩɩ noog wʋsg hal t’a zoe n tɩ bool a ba-biig a Pɩɛɛre. A togs-a-la woto: ‘Tõnd yãa Mesi wã.’ La a talla a Pɩɛɛr n kẽng a Zezi nengẽ. Wakat kãng me, tõeeme t’a Zã tɩ talla a ba-biig a Zak n wa a Zezi nengẽ. La wa a Zã sẽn minim n maandẽ wã, a pa gom yel-kãngã sẽn tɩ loe ne yẽ mengã yell a sebrã pʋgẽ ye.

Vẽk-n-beoogã, a Zezi yãa a Filipi. A Filip yita Bɛtsayida, sẽn yaa tẽng ning a Ãnder la a Zã me sẽn yitẽ wã. A yeel-a lame: “Wa n tũ maam.”

A Filip me tɩ boola a Natanayɛlle, b sẽn boond me t’a Bartelemi wã. A tɩ yeel-a-la woto: “Tõnd yãa Nazarɛt rao a Zezi sẽn ya a Zozɛf biigã. Yaa bãmb yell la b sẽn da gʋls a Moiiz tõoga ne Wẽnnaam no-rɛɛsdba sɛba pʋsã.” La a Natanayɛll maana sãmbs ne a goama, n soke: “Bõn-sõng tõe n yii Nazarɛt wɛ?”

Dẽ a Filip yeel-a lame: “Bɩ f wa ges wɛ.” B sẽn wa n kolgd a Zezi nengẽ, a Zezi yeela a Natanayɛll wɛɛngẽ woto: “Ad Israɛll ned sẽn ka tar zãmbo.”

T’a Natanayɛll sok-a: “Yãmb bãnga maam yɛ?”

Dẽ a Zezi leokame: “Sẽn deng a Filip sẽn bool foom, fo sẽn da zĩ kankanga tẽngrã, mam yãa foom.”

Woto linga a Natanayɛll, t’a yeele: “Karen-saamba, yãmb yaa Wẽnnaam Biiga, yãmb yaa Israɛll dĩma.”

A Zezi sokame: “Mam sẽn yeel foo tɩ mam yãa foo kankanga tẽngra yĩnga, fo tẽeme?” La a paase: “Fo na n yãa bõn-kãsems sẽn yɩɩd bõn-kãense.” Rẽ poore a kãaba woto: “Sɩd-sɩda yãmb na wa n yã yĩngr sẽn pake tɩ Wẽnnaam malɛk rãmba rʋʋd la b sigd Ninsaal Biiga” nengẽ.

Rẽ poor bilf bala, a Zezi ne a karen-bi-paalsã yii Zʋrdẽ Bãoogẽ wã n kẽng Galile. Zã 1:29-51.

▪ Ãnda rãmb n yɩ a Zezi pipi karen-biisi?

▪ Wãn-wãn la a Pɩɛɛr la a Zã bãng a Zezi?

▪ Bõe n kɩt t’a Natanayɛll kɩs sɩd t’a Zezi yaa Wẽnnaam Biiga?