Sak 15

A Zezi pipi yel-solemde

A ÃNDERE, a Pɩɛɛre, a Zã, a Filipi, a Natanayɛlle, la a Zak sẽn lebg a Zezi pipi karen-biis yɩ tɩ zaamẽ bɩ rabɩtẽ la woto. Masã b ra kuiisa b yiy Galile soolmẽ, bãmb fãa sẽn yitẽ wã. B ra rebda Kana, sẽn ya a Natanayɛll tẽngã. Kana ra bee tãensã sẽn ka zãr ne Nazarɛtã babgẽ. Nazarɛt me la a Zezi bɩ-yã. B ra bool-b-la kãadem kibsẽ Kana.

A Zezi ma wã me ra waa kãadmã kibsẽ. A Maari ra yaa pʋg-paalã ne sɩdã buud neb zoa. Rẽ, wõnda a Maari ra bee be n sõngd n kɩt zãma wã sẽn wa kibsẽ wã rɩɩbo. Woto, pa kaoos la a bãng tɩ bũmb n paoog ye, t’a togs a Zezi: “Bãmb ka le tar dãam ye.”

A Maari sẽn yeel woto wã, yaa wala a ra sagenda a Zezi t’a maan bũmb n sõng ne rãamã sẽn paoogã. La pipi wã a Zezi ra ka rat n sak ye. “Yaa bõe tɩ f togsd maam?” woto la a sok-yã. A Zezi yaa Rĩm ning Wẽnnaam sẽn yãkã. Pa a roagdb la a zo-rãmb n segd n wilg-a tʋʋm nins a sẽn segd n maana ye. Woto, a Maari talla yam n bas yɛlã a biigã nugẽ, n yeel rɩ-kɩtbã woto: “Bãmb sẽn yeel yãmb tɩ y maan bũmb ninga fãa bɩ y maane.”

Kug ko-yũus a yoob n da be be. Ko-yũug fãa ra tõe n deega litr 40. A Zezi yeela rɩ-kɩtbã tɩ b “sui ko-yũ-kãensa ne koom tɩ pidi.” Tɩ rɩ-kɩtbã pids b fãa wɩla. T’a Zezi yeel-ba: “Bɩ y toog masã n tall n tɩ kõ sẽn get-a rɩɩba yellã.”

Rãamã sõmblem linga sẽn get-a rɩɩbã yellã, bala a ra ka mi tɩ yaa ne yel-solemd la b maan-a ye. Dẽ, a boola pʋg-paalã sɩdã n yeel-a: “Neba fãa kõta rã-noog kibsa sɩngr tɩ neba sã n yũ wʋsg bɩ b yaool n kõ rãam sẽn ka ta pĩnda. La yãmb basa rã-nooga hal tɩ ta masã.”

Ra ya a Zezi pipi yel-solemd la woto. La a karen-bi-paalsã sẽn yã rẽ wã kenga b tẽebã hal wʋsgo. Rẽ poore, a Zezi ne a ma wã n paas a ma-biisã kẽnga Kapɛrnawom, sẽn pẽ Galile Mogrã. Zã 2:1-12.

▪ A Zezi koe-moonegã tʋʋmdã sasa bʋg la kãadem kibsã zĩnd Kana?

▪ Bõe yĩng t’a Zezi ra ka rat n sak a ma wã saglga?

▪ Yel-solem bʋg la a Zezi maan-yã, la rẽ talla pãn-bʋg neb a taabã zutu?

Sak 16

A Zezi talla yẽesem a Zeova balengã pʋgẽ

A ZEZI ma-biis sẽn ya a Maari komdibli a taab ra ya a Zake, a Zozɛf, a Sɩmo, la a Zida. Bãmbã ne a Zezi n paas a karen-biisã ra rɩka sor n debd Kapɛrnawom, sẽn pẽ Galile Mogrã. La tõe tɩ b sẽn wa n debdã, b teka yir Nazarɛt t’a zaka rãmb wʋk teed nins b sẽn na n wa rat kẽndã yĩnga.

A Zezi ra tõe n kẽnga taoor ne a tʋʋmdã Kana, Nazarɛte, bɩ zĩig a to Galile tãensẽ wã. La bõe yĩng masã t’a rebd Kapɛrnawom? Bũmb a yembr sẽn kɩt t’a maan dẽ wã yaa Kapɛrnawom sẽn yaa tẽn-kãseng n yɩɩd t’a sẽn be zĩig ningã me le zems n yɩɩdã. Sẽn paase, a Zezi karen-bi-paalsã wʋsg yir ra yaa Kapɛrnawom bɩ sẽn pẽ be. Dẽ a Zezi ra tõe n zãms-b lame tɩ ka yɩ tɩlae tɩ b yi n bas b zags ye.

A Zezi sẽn da wa n be Kapɛrnawom, a maana yel-soalem wʋsgo. Kiis a wãn loogr poore yẽ mengã kõo kaset ne rẽ. La pa kaoos la a Zezi ne a tũud-n-taasã le rɩk sor yɛs ye. B ra le rebda Zerizalɛm n na n tɩ maan yʋʋmd 30 Pakã. Yaa Zerizalɛm la a karen-biisã yã a Zezi manesem a ye, tõe tɩ b ra zɩ n yã rẽ pĩnd ye.

Wẽnnaam Tõogã ra yetame tɩ Israɛll nebã maan rũms maando. Dẽ, sẽn na yɩl tɩ yɛla yɩ nana ne-ba, Zerizalɛm lɛɛbdbã koosda rũms la liuuli maandã yĩnga. La yaa wẽnd-doogã pʋgẽ meng la b ra koosd rũmsã. Sẽn paase, b ra koosda rũmsa toog wʋsg n zãmbd nebã.

A Zezi sũurã yikame t’a rɩk wĩy n maan sãbsg n dig lɛɛbdbã n yiisi. A sãeega ligd tekdbã ligd la a leeb b taabl dãmbã. A tãsa neb nins sẽn koosd walã woto: “Yiis-y bõn-kãens ka. Da maan-y m Ba rooga tɩ yɩ teed koosg roog ye!”

A Zezi karen-biisã sẽn yã rẽ wã, b tẽega bãngr-gomd a yembr sẽn tɩ loe ne Wẽnnaam Biriblã sẽn yete: “Yãmb dooga nonglem n so maam zãnga.” La Zʋɩf rãmbã soka a Zezi yaa: “Yãmb sẽn maand bõn-kãensã y na n wilga tõnd bõe bãnde?” T’a Zezi leok-ba: “Bɩ y sãam Wẽnnaam do-kãngã, la rasem a tãab pʋgẽ mam na le me-a.”

Zʋɩf rãmbã ra tẽedame t’a Zezi gomda wẽnd-doog meng-mengã yelle. Dẽ b soka a Zezi: “B maana yʋʋm pis-naase la a yoobe n me Wẽnnaam do-kãngã. La yãmb tẽedame tɩ yãmb na tõog n me-a rasem a tãab pʋgẽ bɩ?” La a Zezi ra gomda wẽnd-doog a to yelle, sẽn yaa yẽ mengã yĩngã. La yʋʋm a tãab loogr poor a sẽn da wa n vʋʋgã, a karen-biisã tẽega gom-kãngã. Zã 2:12-22; Matɩe 13:55; Luk 4:23.

▪ Kãadem kibsã b sẽn maan Kana wã poore, zĩ-bʋs la a Zezi kẽng-yã?

▪ Bõe yĩng t’a Zezi sũur yiki, la bõe la a maan-yã?

▪ A Zezi karen-biisã sẽn yã a sẽn maand bũmb ningã, tẽeg-b-la bõe?

▪ Bõe la a Zezi yeel “Wẽnnaam do-kãngã” wɛɛngẽ, la bõe la woto rat n yeele?