Sak 17

A Zezi zãmsa a Nikodɛm

A ZEZI sẽn da wa n be Paka kibsẽ yʋʋmd 30 wã, a maana yel-soalem wʋsgo. Rẽ kɩtame tɩ neb wʋsg tẽ-a. A Nikodɛm ra yaa Zʋɩf rãmbã bʋ-kaoodb sul-kãseng b sẽn boond tɩ Sãnedrẽ wã neda. A Zezi zãmsgã yamleoog kẽe-a-la wʋsg t’a ra rat n bãng n paase. Rẽ n so t’a kẽng a Zezi nengẽ yʋngo. La tõe t’a maana woto, sẽn na yɩl tɩ neb ra wa yã-a tɩ wa lebg yʋ-sãang n kõ yẽ, taoor dãmb a taabã nifẽ ye.

A Nikodɛm yeelame: “Karensaamba, tõnd miimi tɩ yãmb yaa karen-saam-kãseng sẽn yit Wẽnnaam nengẽ, tɩ bõe, ned ka tõe n maan bõn-bãn kãsems nins yãmb sẽn maandã, a sã n ka Wẽnnaam sẽn be ne a soab ye.” A Zezi leoka a Nikodɛm n yeel-a tɩ ned sã n dat n kẽ Wẽnnaam Rĩungã pʋgẽ, rɩlla a paam “dogem paalga.”

La wãn to la ned paamd rogem paalga? “Yẽ tõe n le kẽe a ma pʋgẽ n dog bɩ?” Woto la a Nikodɛm sok-yã.

Ayo, rogem paalgã võor ka woto ye. A Zezi wilgame tɩ ‘ned sã n ka rog ne koom la ne vʋʋsem sõngo, a ka tõe n kẽ Wẽnnaam Rĩungẽ ye.’ A Zezi da reega lisg tɩ vʋʋsem sõng sig a zugu. Yaa woto la a ra rog ‘ne koom la ne vʋʋsem.’ Vʋʋsem sõngã sigb dag n naaga ne togs-kãngã sẽn yi saasẽ wã: “Ada yaa mam Bi-nongre mam sẽn nong ne m sũur fãa zãnga.” Woto Wẽnnaam da togsdame t’a paama biribl ne vʋʋsem sõng zaeeb maasem, sẽn saagd n na n wa kẽ saasẽ Rĩungã pʋgẽ. Kaoosg zugẽ, yʋʋmd 33, neb a taab me n da na n paam vʋʋsem sõngã, tɩ ne woto bɩ b paam dogem paalg n lebg Wẽnnaam komdibli sẽn paam dogem vʋʋsem sõng pʋgẽ.

La Wẽnnaam Biribl sẽn ka wõnd a taabã tʋʋmd tara yõod wʋsgo. A Zezi togsa a Nikodɛm woto: “A wa a Moiiz sẽn zẽk waafa weooga pʋgẽ wã woto me a yaa tɩlae tɩ b zẽk Ninsaal Biigã, tɩ ned ninga fãa sẽn tẽed bãmba paam vɩɩm sẽn ka sɛta.” Sɩda, Israɛll nebã wag-toosã sẽn da kɛ weooga pʋgẽ wã ra segd n nak n gesa zũud waafã n da wa ki ye. Woto me, ninsaalbã fãa segd n tẽe Wẽnnaam Biriblã n paam fãagr ne kũumã yembdo.

Rẽ poore a Zezi gom n tadga nonglem ning Wẽnnaam sẽn wilg yel-kãngã pʋgẽ wã zugu, n yeel a Nikodɛm: “Wẽnnaam nonga dũniyã hal tɩ b kõ b Biiga sẽn ka to, tɩ ned ninga fãa sẽn tẽed yẽ kõn sãam ye, la a na paam vɩɩm sẽn ka sɛtã.” A Zezi tʋʋmdã sɩngr kiis a yoob la woto. La masã, Zerizalɛm be, a wilga vẽeneg tɩ yaa ne yẽ maasem la Wẽnnaam na n fãag ãdem-biisã.

A Zezi leb n yeela a Nikodɛm: “Dẽ yĩnga, Wẽnnaam ka tʋm b Biiga dũniyã zug tɩ b kao dũniyã bʋʋd ye.” Woto rat n yeelame tɩ b ka tʋm-a t’a wa ning ãdem-biisã taale, n sãam-b ye. La wa a Zezi sẽn yeelã, b tʋm-a-la sẽn na yɩl tɩ “dũniyã fãa paam fãagre, [yẽ] maasem yĩnga.”

A Nikodɛm zoee rabeem, n tũ yʋng n wa a Zezi nengẽ. Dẽ, zemsame t’a Zezi baas a goamã woto: “La bʋʋd kãng yaa tɩ vẽenem [sẽn makd a Zezi vɩɩma ne a zamsgã] waa dũniyã zugu, la neba nonga likã n yɩɩd vẽenem, bãmb tʋʋma sẽn yaa wẽnsa yĩnga. Tɩ bõe, ned ninga fãa sẽn maand wẽnga, a kisgda vẽenem, la a ka wat vẽenemẽ t’a tʋʋma puk ye. La ned ninga sẽn maand sɩda, a wata vẽenemẽ, tɩ vẽenemã wilg t’a maana a tʋʋma Wẽnnaam yĩnga.” Zã 2:23–3:21; Matɩe 3:16, 17; Tʋʋma 2:1-4; Sõdbo 21:9.

▪ Bõe n wa ne a Nikodɛm a Zezi nengẽ, la bõe yĩng t’a wa yʋngo?

▪ Paam “dogem paalga” rat n yeelame tɩ bõe?

▪ Mak-bʋg la a Zezi rɩk n wilg tʋʋmd ning a sẽn na n maan n fãag ãdem-biisã?

▪ B sẽn yeel t’a Zezi ka wa n na n kao dũniyã bʋʋdã rat n yeelame tɩ bõe?

Sak 18

A Zã lebgda bilfu, t’a Zezi lebgd kãsenga

YƲƲMD 30 Pakã loogr poore, a Zezi ne a karen-biisã yii Zerizalɛm. La b ka leb b yiyã Galile ye. B paa Zide babgã n na n lis neba. Yaa yʋʋmd la bal masã a Zã sẽn kõt neba lisgu. La a ra ket n tara karen-biis sẽn tũud-a.

Sɩd-sɩda, a Zezi mengã ra pa kõt neb lisg ye, a kɩtdame t’a karen-biisã lisd nebã. Lisg ning b sẽn da kõta võor yaa yembr ne a Zã lisgã. Lis-kãng ra yaa makr sẽn wilgd tɩ Zʋɩf rãmbã teka yam n kos sugri, yel-wẽna b sẽn maan n kɩɩs Wẽnnaam Tõogã kaoolã yĩnga. La a Zezi vʋʋgrã poore, a kõo a karen-biisã noor tɩ b kõ lisg sẽn tar võor a to. Rũndã-rũndã, kiris-neb lisgã yaa makr sẽn wilgd tɩ ned rɩka a meng n kõ Wẽnnaam a Zeova n na n yɩ a sõgne.

A Zezi tʋʋmdã sɩngr tɛk n tõk wakat kãngã, yẽ ne a Zã ra tʋmda toor-toore. La b fãa ra zãmsda neb nins sẽn tek yam n kos sugrã la b kõt-b lisgu. La a Zã karen-biisã maana sũ-kiir ne a Zezi, n yeel a Zã woto: “Karensaamba, . . . gese, bãmb lisda neba, la neba fãa rabda bãmb nengẽ.”

La a Zã ka maan sũ-kiir ye. A maana sũ-noog ne a Zezi tʋʋmdã sẽn kẽngd taoor sõmã wã, la a ra tʋll me t’a karen-biisã kɩdme. A tẽeg-b-la woto: “Yãmb mens yaa mam kaset dãmba tɩ mam da yeelame tɩ mam ka Kirist ye, la tɩ b tʋma maam tɩ m deng bãmb taoore.” La a rɩka makr sẽn zems sõma n yeele: “Ned ninga sẽn tar pʋg-paalã n yaa yi-kãadma soaba. La yi-kãadma soab tũud-n-taag sẽn yɛs n kelgdẽ, yẽ paamda sũ-noog wʋsgo yi-kãadma soab koɛɛga yĩnga. Woto yĩnga, yõ wã sẽn yaa mam sũ-nooga pidame.”

Kiis a yoob sẽn deng rẽ, a Zã sẽn yaa yi-kãadma soab tũud-n-taagã maana sũ-noog a sẽn wa n wilgd a Zezi a karen-biisã. Karen-bi-kãens lebga neb sẽn saagd n na n wa yɩ Kirist saasẽ pʋg-paalã sull neba. Yaa kiris-neb sẽn zae ne vʋʋsem sõng n segd n zĩnd sull kãng pʋgẽ. A Zã ra ratame tɩ karen-biis nins sẽn be ne yẽ wã pʋg a Zezi. Bala a ratame n segl sor sẽn na yɩl tɩ Kiristã tʋʋmd tõoge. Wa Lisd a Zã sẽn wilgã: “Yaa tɩlae tɩ bãmb yɩ kãseng tɩ mam yɩ bilfu.”

A Zã sẽn ya a Zezi karen-bi-paalgã rag n yaa Lisd a Zã karen-biiga. A gʋlsame n wilg a Zezi sẽn yitẽ, la a tʋʋmdã yõod sẽn yaa to-to ninsaalbã fãagr wɛɛngẽ. A gʋlsa woto: “Ned ninga sẽn yit yĩngra yɩɩda fãa. . . . Ba nonga Biigã n dɩk bũmb fãa n ning b nugẽ. Ned ning sẽn tẽed Biiga tara vɩɩm sẽn ka sɛta. La ned ning sẽn ka tẽed Biiga kõn paam vɩɩm ye, la Wẽnnaam sũur na n yika ne yẽ.”

Lisd a Zã sẽn yeel tɩ yẽ tʋʋmdã na n lebga bilfã poore, pa kaoos la Rĩm a Herood yõk-a ye. A Herood da rɩka a ba-biig a Filip pag a Herodiaad. Dẽ a Zã wilga vẽeneg neba sʋk t’a sẽn maanã ka zems ye. Rẽ n so t’a Herood yõk-a n kẽes roogo. A Zezi sẽn wʋm a Zã yõkrã, a yii Zide ne a karen-biisã n kẽng Galile. Zã 3:22-4:3; Tʋʋma 19:4; Matɩe 28:19; 2 Korẽnt dãmba 11:2; Mark 1:14; 6:17-20.

▪ Sẽn deng a Zezi vʋʋgrã, lisg ning a sẽn kõ a karen-biisã noor tɩ b maanã võor da yaa bõe? La lisg ning b sẽn da kõt a vʋʋgrã poorã võor yaa bõe?

▪ Wãn-wãn la a Zã wilg t’a karen-biisã ka tar bʋʋm n na n yẽgme?

▪ Bõe yĩng tɩ b kẽes a Zã roogo?