Sak 20

Yel-solemd a yiib-n-soab Kana

A ZEZI moona wʋsg Zide, n yi be masã n leb a ba-yirã. La a ka leb yir n na n tɩ vʋʋs ye. Yaa sẽn na yɩl n moon wʋsg n yɩɩg meng Galile, sẽn yaa tẽng ning a sẽn bɩẽ wã. La a Zezi karen-biisã sẽn da sõmb n pa ne-a wã, b leba b mens zagsẽ n tɩ tʋmd b pĩnd tʋʋma.

Koe-bʋg la a Zezi ra sɩng moonego? Koe-kãngã: “Wẽnnaam soolem kolgame. Bɩ y tek yam n bas y yel-wẽna n tẽ koe-noogo.” La neba yel-manesem yɩɩ wãn-wãna? Galile nebã reega a Zezi sõma. B fãa ra waoogda a Zezi. La waoog-kãng pa a sẽn taas koɛɛg ningã yĩng ye. Sẽn yɩɩd fãa, yaa bãmb wʋsg sẽn da zĩnd Zerizalɛm Pakã sasa n yã yel-soalmã a sẽn maanã yĩngã.

Wõnda a Zezi sɩnga a Galile mooneg tʋʋm-kãsengã Kana. Tõe tɩ y tẽrame tɩ Kana be, a Zezi ra kɩtame tɩ koom lebg rãam kãadem kibsẽ, a sẽn da wa n yi Zide n lebdẽ wã. La so-kãngã, Rĩm a Herood Ãntipas tʋm-tʋmd kãseng a yembr biig n da gãe ne bã-kɛgenga. Nin-kãng soabã wʋmame t’a Zezi yii Zide n wa Kana. Dẽ, a yii a yirã hal Kapɛrnawom n na n wa yã a Zezi. Ne sũ-sãanga, rao wã bõosa a Zezi woto: ‘Wa-y tao-tao tɩ m biiga nan ka ki ye.’

A Zezi leok-a-la woto: ‘Lebg n kuili. F biriblã sãoogame.’ A Herood tʋm-tʋmdã tẽeme, n lebg n dɩk sor n kuiisẽ. A tek n sega a sõgen-dãmba, sẽn da yãgd n na n wa togs-a t’a biigã sãoogame! Dẽ la a sok-ba: “Wakat bʋg la a sɩng n sãooge?”

Tɩ b leok tɩ ‘zaamẽ wĩntoogo.’

Tʋm-tʋmdã bãngame tɩ yaa wakat ning a Zezi sẽn da yeel-a t’a ‘biriblã sãoogame’ wã bal kɛpɩ. Rẽ poore, raoã ne a zaka rãmb fãa lebga Kiristã karen-biisi.

Kana paama zu-no-kãsenga. Naoor a yiibu, a Zezi sẽn yi Zide n ta paalem a maana yel-solemd be. La yaa vẽeneg tɩ hal tɩ ta wakat kãnga, pa yel-solem kãensã bal la a Zezi maanẽ ye. Baasg zãnga, yel-solem kãens tara yõodo, bala b wilgdame t’a lebg n waa Galile.

Masã a Zezi ra rebda a yirã Nazarɛte. Bõe n da gũud-a be? Zã 4:43-54; Mark 1:14, 15; Luk 4:14, 15.

▪ A Zezi sẽn lebg n wa Galile wã, bõe la a karen-biisã maan-yã, la wãn to la nebã reeg-a?

▪ Yel-solem bʋg la a Zezi maan-yã, la rẽ kɩtame tɩ neb nins a sẽn sõng woto wã maan bõe?

▪ Wãn-wãn la a Zezi kõ Kana zu-no-kãsenga?

Sak 21

A Zezi kẽnga Nazarɛt karen-doogẽ

A ZEZI sẽn da wa n lebg n wa Nazarɛtã, tẽngã neb ra yaa kɩr-kɩr n dat n yã-a. A Zezi sẽn kẽng a Zã nengẽ n na n tɩ reeg lisgã yɩɩda yʋʋmd bilfu. Sẽn deng wakat kãnga, neba ra mii a Zezi wala ra-wãada. La masã zĩig fãa neba mii a Zezi wala yel-soalem maanda. Tẽngã rãmb me ra yãgdame n dat t’a maan yel-solem-kãens kẽer me be.

Tʋlsem kãng yãngame n paas meng b sẽn yã t’a rebd tẽngã karen-doogẽ wã, wa a sẽn da minim n maandẽ wã. Karengã wakate, a wa n yikame n na n karem, tɩ b kɩs-a no-rɛɛs a Ezai seb-pindmã. A karma zĩig ning b sẽn gomd a Zeova vʋʋsem sẽn zae a soabã yellã. Tõnd rũndã Biibl dãmbã pʋsẽ zĩ-kãng yaa sak 61 wã.

A karma nin-kãng soabã sẽn na n moon koɛɛg tɩ yembs paam fãagrã, tɩ zoens paam b ninã, la a Zeova bark wakatã wɛɛngẽ. Rẽ poore, a rɩka seb-pindmã n lebs tʋm-tʋmdã la a zĩndi. Neba fãa ra get-a-la kuii. Dẽ a Zezi gomame n kaoos bilfu, la a wilg woto: ‘Gʋlsg sõng kãngã yãmb sẽn wʋm masã wã pidsa rũndã.’

A Zezi ‘bark goamã’ linga neba wʋsg tɩ b yeele: “Ka a Zozɛf biiga la woto la?” La a Zezi ra miimi tɩ b ratame t’a maan yel-soalma. Rẽ n so t’a paase: “Mam mi tɩ yãmb na wẽ maam yel-bũn-kãngã: Tɩpa, sãoog f menga. La yãmb na n yeela maam yaa: ‘Bũmb nins tõnd sẽn wʋm tɩ yãmb maan Kapɛrnawom, bɩ y maan bõn-kãens yãmb meng tẽngẽ ka me.’ ” Wõnda Nazarɛt nebã ra tagsdame tɩ ned kõn gãng a yir dãmb n tɩ tɩpd kɛɛng rãmb ye. Rẽ n so tɩ b ra tagsdẽ t’a Zezi paoog-b lame.

A Zezi bãnga b tagsgã, n togs yell a woto buud sẽn zĩnd pĩnda. A yeelame tɩ pʋg-kõap wʋsg n da be Israɛll a Eli wakatã, la b ka tʋm-a pʋg-kõ-kãens ba a yembr nengẽ ye. Yaa pʋg-kõor sẽn pa Israɛll ned nengẽ la a kẽng-yã. Beenẽ, a maana yel-solemd n fãag yõyã. Sẽn paase, a Elize wakatẽ me, wãoobã ra waoogame, la ya a Naama sẽn yaa Siiri nedã bal la a sãoog-yã.

A Zezi goama sẽn wilgd tɩ sẽn da be-b karen-doogẽ wã yaa rat-m-yembr la ka-tẽeb rãmbã ning-b-la taale, tɩ b sũyã puug tɩ b yik n veo-a n yi tẽngã kɩrenga. Nazarɛt yaa tẽng sẽn be tãng zugu. B talla a Zezi n ta tãngã geemd noore, n dat n tus-a n lub tẽngre. La a Zezi põsame n loog tɩ bũmb ka maan-a ye. Luk 4:16-30; 1 Rĩm dãmba 17:8-16; 2 Rĩm dãmba 5:8-14.

▪ Bõe yĩng tɩ Nazarɛte, neba ra yaa kɩr-kɩr n dat n yã a Zezi?

▪ Neba ra tagsda wãn-wãn ne a Zezi sõasgã, la rẽ poore bõe n puug-b sũy wʋsgo?

▪ Bõe la neba mak n na n maan a Zezi?