Sak 22

A boola karen-biis a naase

B MAKAME n na n kʋ a Zezi a ba-yirã Nazarɛte. Rẽ poore a kẽnga Kapɛrnawom sẽn be Galile Mogrã noorã. Woto pidsda a Ezai bãngr-gomd a to. Bãngr-gom-kãng da reng n togsame tɩ Galile neb nins sẽn be Mogrã noorã ra na n yãa vẽenem kãsenga.

A Zezi sẽn da wa n ket n moond Rĩungã koɛɛg sẽn kõt vẽenemã, a yãa a karen-biis a naase. Bãmb rag n tũuda a Zezi, la b sẽn da yi Zide n lebg tɛkã, b ra leb n tɩ tʋmda b zĩm yẽeb tʋʋma. La wõnda a Zezi ra baood-b lame, bala masã a ra rata sõngdb sẽn be ne-a wakat fãa. Woto, a ra tõe n zãms-b lame tɩ b kẽng taoor ne tʋʋmdã yẽ loogr poore.

A Zezi ra kẽndame n yɛgd mogrã noore, n yã a Sɩmo Pɩɛɛr la a tũud-n-taasã sẽn pɛgd b zĩm-gãmba. Dẽ a bʋʋg-b lame. A kẽe a Pɩɛɛr koom koglgã pʋgẽ, n yeel-a t’a zãag ne mogrã noore. B sẽn zãag bilfu, a Zezi zĩnda koglgã pʋgẽ n sɩng n zãmsd kʋʋngã sẽn be mogrã noorã.

Rẽ poore a Zezi yeela a Pɩɛɛre: “Kẽng-y kooma sʋk n tɩ lob y zĩm-gãmbã n yõg zĩma.”

A Pɩɛɛr leokame: “Karen-saamba, tõnd tʋma yʋnga tɛka n ka tol n yõk bũmb ye. La baasgo yãmb sẽn yeelã, mam na n loba zĩm-gãmbrã.”

B sẽn lob zĩm gãmba wã, b yõga zĩma wʋsg hal tɩ zĩm gãmba wã sɩng pãrsgo. Tao-tao bala, b kamsa b tũud-n-taas sẽn be koom-koglg a to sẽn pẽ be pʋgẽ tɩ b wa sõng-ba. Pa kaoos la koom kogend a yiibã pid ne zĩm n dat n bõr ye. A Pɩɛɛr sẽn yã rẽ a wõgemda a Zezi taoor n yeele: “Zusoaba, bas-y maam tɩ mam yaa yel-wẽn soaba.”

Dẽ a Zezi leokame: “Da zoe rabeem ye. Sẽn sɩng masã, fo na n yɩɩ mam neb baooda.”

A Zezi boola a Pɩɛɛr ba-biig a Ãnder me. A yeel-b-la woto: “Tũ-y maam, la mam na maan yãmb tɩ y yɩ mam neba baoodba.” A Zezi leb n boola b tʋmd-n-taas a Zak ne a Zã sẽn ya a Zebede kambã. Zĩig pʋgẽ bala bãmb me sakame n pʋg-a. Dẽ bãmba b naasã fãa basa zĩma yẽeb n lebg a Zezi pipi karen-biis a naas nins sẽn sɩng n tũud-a wakat fãa wã. Luk 5:1-11; Matɩe 4:13-22; Mark 1:16-20; Ezai 8:23; 9:1.

▪ Bõe yĩng t’a Zezi bool a karen-biisã tɩ b pʋg-a, la bãmb la bʋse?

▪ Yel-solem bʋg n yɛɛs a Pɩɛɛre?

▪ Tʋʋm bʋg la a Zezi kos a karen-biisã tɩ b maane?

Sak 23

A Zezi maana yel-soalem a taab Kapɛrnawom

A ZEZI boola a karen-biis a naase, a Pɩɛɛre, a Ãndere, a Zak, la a Zã. Vʋʋsg daar ning sẽn pʋgl rẽ wã poore, b tũu taab n kẽng Kapɛrnawom karen-doog a yembr pʋgẽ. Be a Zezi sɩngame n zãmsd nebã. La rẽ linga neba wʋsgo, bala a ra zãmsda bãmb wala ned sẽn tar tõogo, la ka wala bãmb gʋlsdbã ye.

Vʋʋsg ra-kãngã, ned zĩn sẽn tar n da be be. A wa n zẽka a koɛɛg n yeele: “Zezi sẽn yi Nazarɛt, yãmb toor bee ne tõnd bɩ? Yãmb waame n na n sãam tõnd la? Mam bãnga yãmb sẽn ya a soaba. Yãmb yaa Wẽnnaam Pʋ-peelem Soaba.”

Sɩd-sɩda, zĩn ning sẽn da tar dao wã ya a Sʋɩtãan malɛk a yembre. A Zezi zaba zĩna, n yeel-a: “Sĩndi, yi n bas rao wã.”

Zĩna kɩtame tɩ rao wã yĩng rigimd la a kelem a koɛɛgã tɛk fãa. La zĩna yiimi n bas rao wã n ka maan-a bũmb ye. Woto linga neba fãa. “Bõn-kãngã yaa bõe?” Woto la b fãa sok-yã. “B tara noor hal tɩ zĩn dãmb nins sẽn yaa rẽgda sakd bãmba.” Yel-kãngã kɩbar saaga soolmã fãa pʋgẽ.

A Zezi ne a karen-biisã yii karen-doogẽ wã n kẽng a Sɩmo Pɩɛɛr yirã. B tɩ yãame t’a Pɩɛɛr pagã ma gãe ne bã-kɛgeng t’a yĩngã wɩng wʋsgo. Dẽ b kosa a Zezi woto: ‘D bõos tɩ f sõng-a.’ T’a Zezi kolg n gãd a nugã, n yik-a. Zĩig pʋgẽ wã a bãagã sãoogame, t’a sɩng n na n segl rɩɩb n kõ-ba!

Wĩndgã kõom poore, neba sɩngame n yit zĩig fãa ne b bãad dãmb n wat a Pɩɛɛr zakẽ wã. Ka ne ka wã bal tɩ tẽngã neb fãa wa n tigma zakã noore! La a Zezi sãooga bãad dãmbã bãas toɛ-toɛy fãa. A tol n diga zĩn dãmb meng tɩ b yi n bas neba. Zĩn dãmbã sã n da bas ned n yita, b kaasda woto: “Yãmb yaa Wẽnnaam Biiga!” La a Zezi ra zabd-b lame, n ka basd tɩ b gom ye, bala zĩn dãmbã ra miimi tɩ yẽ la Kiristã. Mark 1:21-34; Luk 4:31-41; Matɩe 8:14-17.

▪ Vʋʋsg daar ning sẽn pʋgl a Zezi sẽn bool a karen-biis a naasã poore, bõe n maan karen-doogẽ wã?

▪ A Zezi sẽn yi karen-doogẽ wã yɛ la a kẽng-yã, la yel-solem bʋg la a maan be?

▪ Baraar zaabre bõe n maane?