Sak 24

A Zezi tẽng zug waoongã võore

A ZEZI ne a karen-biisã sẽn zĩnd Kapɛrnawomã raarã, tʋʋm wʋsg la b maan-yã. Baraar zaabre, Kapɛrnawom nebã talla b bãad dãmb fãa n wa t’a Zezi sãoog-ba. A Zezi ka tõog n paam vɩʋʋg a meng yĩng ye.

Masã wã ra yaa vẽk-n-beoogã yibeoog pĩnda. A Zezi yii a yembr n loog tɩ zĩigã ra nan ket n yaa libsgu. A kẽnga zĩig ned sẽn ka beẽ, sẽn na yɩl n tõog n pʋʋs a Ba wã. A Zezi ka zĩnd a yembr n kaoos ye, bala a Pɩɛɛr ne neb a taabã sẽn wa n bãng t’a loogame wã, b yii a baoobo.

B sẽn wa n yã a Zezi wã, a Pɩɛɛr yeelame: “Neba fãa baooda yãmba.” Kapɛrnawom nebã ra ratame t’a Zezi pa ne bãmba. B ra sɩd tara mi-beoog a Zezi sẽn maan bũmb ning n kõ-bã yĩnga! La sẽn yɩɩd fãa, a Zezi waa tẽng zug n na n sãoog neb ne yel-soalem bal bɩ? Bõe la a yeel rẽ wɛɛngẽ?

Biiblã kɩbar a yembr togsame t’a Zezi leoka woto: “Wa-y tɩ d kẽng tẽn-kɩrems tɩ m tɩ moon koɛɛg beenẽ me. Yaa rẽ yĩng la mam wa-yã.” Neba ra bõosdame t’a Zezi pa be, la a yeel-b lame: “Yaa tɩlae tɩ mam moon Wẽnnaam [Rĩungã] Koe-noog tẽns a taab me; tɩ bõe, b tʋma maam bõn-kãng yĩnga.”

N-ye, sẽn yɩɩd fãa, a Zezi waa tẽng zug n na n moon Wẽnnaam Rĩungã, sẽn na n pek a Ba wã yʋʋre, la a welg ãdem-biisã zu-loees fãa wakat fãa yĩnga. Baasg zãnga, a Zezi sãooga nebã ne yel-solemd sẽn na yɩl tɩ yɩ kaset sẽn wilgd tɩ Wẽnnaam n tʋm-a. Yʋʋm kobs sẽn looge, a Moiiz me ra maana yel-soalem sẽn na yɩl n wilg t’a yaa Wẽnnaam sõgna.

Masã, a Zezi karen-biis a naasã tũ-a lame, a sẽn wa n yi Kapɛrnawom n na n tɩ moon tẽns a taabã. Bãmb b naasã ya a Pɩɛɛr ne a ba-biig a Ãndere, n paas a Zã ne a ba-biig a Zake. Tẽeg-y tɩ yaa semen ning sẽn loogã bal la a Zezi rag n bool-b tɩ b wa lebg a pipi tʋmd-n-taas sẽn tũud-a wakat fãa.

A Zezi ne a karen-biis a naasã mooneg Galile sɩd woma biis wʋsgo! Togs sɩda, yɛl nins a sẽn maanã kɩbar saagame n ta Siiri soolmã fãa menga. Neb kʋʋng sẽn yit Galile, Zide, la Zʋrdẽ Kʋɩlgã rʋʋnd n da tũud a Zezi ne a karen-biisã. Mark 1:35-39; Luk 4:42, 43; Matɩe 4:23-25; Yikri 4:1-9, 30, 31.

▪ Daar ning a Zezi sẽn tall tʋʋm wʋsg Kapɛrnawomã, vẽk-n-beoog yibeoogo bõe n maane?

▪ Bõe yĩng tɩ b tʋm a Zezi tẽng zugu, la bõe yĩng t’a maan yel-soalmã?

▪ A Zezi sẽn da wa n moond Galile wã, ãnd dãmb n da yãagd-a, la nebã manesem yɩɩ wãn-wãn ne bũmb nins a Zezi sẽn maanã?

Sak 25

A Zezi zoee wãoor nimbãanega

A ZEZI ne a karen-biisã da rebda tẽng-tẽng Galile soolmẽ wã. Bõn-kãsems nins a sẽn maanã kɩbar saaga soolmã pʋgẽ. Rao sẽn yaa wãoor n zĩnd tẽng a yembrẽ n wʋm a tʋʋmã kɩbare. A Luk sẽn yaa logtorã bilga raoã sẽn yaa to-to n yeel t’a “pida ne wãoodo.” (NW ) Bã-wẽng kãngã sã n wa paam pãng wʋsgo, a rɩta yĩngã bilf-bilfu. Dẽ kɩtame tɩ wão-kãngã ra be nimbãaneg pʋgẽ.

A Zezi sẽn ta tẽngẽ wã, wãoorã waa a nengẽ. Wẽnnaam Tõoga ra yetame tɩ wãoor ra segd n zẽka a koɛɛg n keoog nebã woto: “Rẽgdo! Rẽgdo!” Woto, neba ra ka na n kolg-a wʋsg tɩ bãagã wa long-b ye. Wãoorã wõgemdame n fõgen a neng tẽng n bõos a Zezi woto: “Zusoaba, yãmb sã n data, yãmb tõe n maaga maam tɩ m yɩ yɩlemde.”

Ad ra-kãngã sɩd tall tẽeb tɛkẽ ne a Zezi! La ad bãagã me sɩd yaal-a-la wʋsgo! Bõe la a Zezi na n maane? Sã n da yaa yãmba, bõe la y ra na n maane? Rao wã nimbãaneg yõka a Zezi, t’a tẽeg a nug n sɩɩs-a n yeele: “Mam datame. Bɩ f paam f menga n yɩ yɩlemde.” Zĩig pʋgẽ wã rao wã wãood saame.

Rẽ yĩnga yãmb ka rat tɩ ned sẽn zoet neb nimbãaneg woto yɩ y rĩm sɩda? A Zezi sẽn maan wãoorã to-to wã kõta tõnd bas-m-yam t’a sã n wa rɩt a Rĩungã naam, Biiblã bãngr-gom-kãngã na n paama pidsgu: “Far soaba ne nimbãan ned nimbãaneg tara yẽnda, la yẽ na n fãaga nimbãan dãmba vɩɩm.” N-ye, wakat kãnga a Zezi na n maana bũmb ning a sẽn tʋll ne a sũur fãa n sõng neb nins fãa sẽn namsdã.

A Zezi sẽn da nan pa sãoog wãoorã menga, a tʋʋmdã kɩtame tɩ zĩig fãa b ra gomd a yelle. Masã a Zezi kõo nedã a sẽn sãoogã noor n yeel-a: “Gũus f menga n da togs ned tɩ bũmb ye.” Woto pidsa a Ezai bãngr-gomde. Rẽ poore a yeela rao wã: “Bɩ f kẽng maan-kʋʋda nengẽ tɩ b ges foom, la f kõ bũmb nins a Moiiz sẽn da togsã f menga manegr yĩnga, t’a yɩ kaset neba yĩnga.”

La rao wã sũur yɩɩ noog wʋsg hal t’a ka tõog n sĩnd yel-solemdã ye. A loogame, n sɩng n togsd kɩbarã zĩig fãa. Wõnda woto kɩtame tɩ neb wʋsg ra baood a Zezi n na n yã, hal t’a ra ka le tõe n kẽ tẽngẽ neba fãa nifẽ ye. Woto yĩnga, a Zezi ra tɩ bee zĩig ned ba a yembr sẽn ka beẽ. La neba ra yita zĩig fãa n wat n na n kelg-a la b paam b bãas sãoogre. Luk 5:12-16; Mark 1:40-45; Matɩe 8:2-4; Maankʋʋre 13:45; 14:10-13; Yɩɩl Sõamyã 72:13; Ezai 42:1, 2.

▪ Bõe la wãood maand neda, la wãoor da segd n keooga neba wãn-wãna?

▪ Bõe la wãoor kos a Zezi, la bõe la a Zezi sẽn maanã zãmsd tõndo?

▪ Wãn to la rao ning sẽn paam sãoogrã pa tũ a Zezi noore, la rẽ waa ne bõe?