Sak 61

A Zezi sãooga biribl zĩn sẽn tara

A ZEZI, a Pɩɛɛre, a Zak la a Zã ra ka be ye, tõe tɩ b ra bee Hermo Tãngẽ wã. Rẽ sasa, karen-biis a taabã yõd n paama zu-loɛɛga. A Zezi sẽn lebg n wa bal la a sẽn yã tɩ bũmb n ka lebd be. Neb wʋsg n da gũbg a karen-biisã, tɩ gʋlsdbã ra wẽed no-koeemd ne-ba. Neba sẽn yã a Zezi wã ling-b-la wʋsg tɩ b ra zoet n na n tɩ pʋʋs-a. A sok-b lame: “Yaa bõe yell la yãmb gomd ne bãmba?”

Rao n yi kʋʋngã sʋk n kolg n yĩgimd a Zezi taoor n yeel-a: “Karensaamba, mam waa ne m biig yãmb taoore, zĩn ninga sẽn maand ned t’a lebg muka sẽn tar-a. A sẽn yõkd yẽnda zĩig ninga fãa, a lubda yẽ tẽnga, t’a tɩre tɩ tãntãmpuud yit biiga noorẽ, la a wãbda a yẽna. La mam kosa yãmb karen-biisa tɩ b rig zĩnã, la bãmb ka tõog ye.”

Karen-biisã sẽn ka tõog n sãoog biigã, wõnda gʋlsdbã ra tika rẽ n yaand-ba. Yaa wakat kãng yellã sẽn wa n wɩngã bal la a Zezi wa-yã. A yeelame: “Zãmaan kãngã neba sẽn ka tẽebo, mam na n kaoosa ne yãmb wakat a wãna? Mam na n maana sũ-mar ne yãmb wakat a wãna?”

Wõnda yaa neba fãa sẽn da be be wã la a Zezi yeel woto. La sik kae tɩ sẽn yɩɩd fãa yaa gʋlsdbã sẽn da namsd a karen-biisã la a ra gomd ne ye. Rẽ poore, a Zezi yeela biigã wɛɛngẽ woto: “Bɩ y tall-a n wa mam nengẽ.” La biigã sẽn da wa n wat a Zezi nengẽ wã, zĩn ning sẽn da tar-a wã fabg-a-la tẽnga, n kɩt t’a yĩngã vɩg wʋsgo. Biigã ra gãeeme n bilimdẽ t’a noorã yit tãntãmpuudu.

A Zezi sokame: “Bõn-kãng yõka yẽ ra-bʋre?”

T’a baaba wã leoke: “Yẽ sẽn yaa bi-bilf wakate. La naoor wʋsgo zĩnã lubda yẽnda bugum ne koom pʋga n dat n sãam-a.” Rẽ poore biigã ba leb n bõosame: “Yãmb sã n tõe n maan bũmbu, bɩ y zoe tõnd nimbãanega n sõng-do.”

Tõe tɩ biigã baaba ra baooda sõngr hal sẽn na maan yʋʋma. La masã a Zezi karen-biisã sẽn ka tõog n sãoog a biigã, a yɩɩrã leb n paasame menga. A Zezi ra neeme tɩ rao wã ra ka mi a sẽn na n kẽẽ n paam sõngr ye. A gesa rẽ, n yeel-a woto n keng a pɛlga: “Bõe tɩ fo yetẽ tɩ yãmb sã n tõe? Bũmb fãa tõeeme ne ned ninga fãa sẽn tẽeda.”

Dẽ zĩig pʋgẽ biigã baaba kelmame n yeel a Zezi: “Mam tẽedame, bɩ y paas mam tẽeba t’a paoodame.”

A Zezi sẽn ne tɩ neba ra zoet n wat n gũmdame wã a zaba zĩna, n yeel-a: “Zĩn ninga sẽn maand ned t’a lebg muk ne wʋnga, mam yeta foo tɩ f yi n bas biigã n da leb n kẽ-a yɛs ye.” Zĩna sẽn da wa n yitã, a leb n kɩtame tɩ biigã kelem, la a maan tɩ biigã yĩng vɩg wʋsgo. Rẽ poore, biigã ra gãee sɩɩ, hal tɩ neba wʋsg ra sɩng n ‘yetẽ t’a kiimi.’ La a Zezi gãda biigã nug t’a yiki.

A Zezi sẽn da wa n tʋm a karen-biisã pĩnd tɩ b tɩ moonã, b rag n diga zĩn dãmba. Rẽ n so masã tɩ b sẽn wa n kẽ zakẽ, karen-biisã soka a Zezi woto: “Yaa bõe tɩ tõnd ka tõog n dig zĩn kãngã?”

A Zezi wilgame tɩ yaa b tẽeb kaalmã yĩnga, n leok woto: “Bõn-kãng ka yita, a sã n ka ne pʋʋsg ye.” Vẽenega ra yaa tɩlae tɩ b reng n segle, n tõog n dig zĩn kãngã sẽn tar pãng wʋsgã. B ra segd n talla tẽeb sẽn tar pãnga, la b leb n pʋʋs n kos Wẽnnaam sõngre.

Rẽ poore a Zezi paasame: “Mam yeta yãmb sɩda tɩ yãmb sã n da tar tẽeb wa siil bila, yãmb sã n yeel tãng kãngã t’a serg n kẽng ka sẽnẽ, a na serge. La bũmb kõn zĩnd yãmb sẽn kõn tõog ye.” Ad tẽeb sɩd tar tõog wʋsgo!

Yel-gɩdgdɩ la zu-loees tõe n beeme tɩ b tõogr bɩ b yiisg yaa toog wala tãn-bedr sɩd-sɩd viigri, tɩ bõn-kãens yaool n gɩdgd tõnd bɩʋʋng a Zeova balengã pʋgẽ. Baasg zãnga, a Zezi wilgdame tɩ tõnd sã n tall tẽeb d sũyã pʋsẽ, la d rɩlgd-a, a na n wa bɩ n taame, n kɩt tɩ d tõog yel-gɩdgdɩ la zu-loees sẽn wõnd tãense. Mark 9:14-29; Matɩe 17:19, 20; Luk 9:37-43.

▪ A Zezi sẽn wa n yi Hermo Tãngẽ wã n lebgã, yel-bʋg la a seg-yã?

▪ Bõe la a Zezi yeel n keng biigã zĩna sẽn da tarã ba raoodo?

▪ Bõe yĩng tɩ karen-biisã ka tõog n dig zĩna n yiisi?

▪ A Zezi wilgame tɩ tẽeb pãng tõe n taa zĩ-bʋgo?

Sak 62

A Zezi zãmsa neba sik-m-mengã wɛɛngẽ

A ZEZI sãooga biig zĩn sẽn da tar Filip Sezaare wã babgẽ. Rẽ poore, a Zezi ra ratame n leb Kapɛrnawom. La a ratame tɩ sorã zug bɩ ned ra naag yẽ ne a karen-biisã ye. Rẽ yaa sẽn na yɩl n segl-b n paas a kũumã yĩnga la sẽn na yɩl tɩ b bãng bũmb ning b sẽn segd n maan rẽ poore. A wilg-b-la woto: “B na n zãmba Ninsaal Biiga n kõ neb tɩ b kʋ, la rasem a tãab daare b na n vʋʋgame.”

A Zezi zoe n goma bõn-kãngã yell pĩnda. Sẽn paase, a tʋm-tʋmdb a tãab sɩd yãa a tedgrã, tɩ b gom a “loogrã” yell wakat kãnga. Ne rẽ fãa, a karen-biisã ra ket n ka wʋmd yel-kãngã võor ye. Baa bãmb ned ba a yembr sẽn ka mak n na n kɩɩs tɩ b na n kʋ-a lame wa a Pɩɛɛr sẽn da maanã, b ra yɛɛsdame n ka le rat n sok-a yel-kãngã wɛɛngẽ ye.

B wa n baas n taa Kapɛrnawom, sẽn da lebg wala sik zĩig a Zezi tʋʋmdã sasa wã. Tẽn-kãng leb n ya a Pɩɛɛr la tʋm-tʋmdb wʋsg a taab ba-yiri. Beenẽ, neb nins sẽn deesd wẽn-doogã yaoodã waa a Pɩɛɛr nengẽ. Tõeeme tɩ yaa b sẽn dat n wilg t’a Zezi kɩɩsa noor neba sẽn minim n tũudẽ wã la b sẽn sok woto wã: “Yãmb karen-saamba ka yaood Wẽnnaam doog yaood la?”

T’a Pɩɛɛr leoke: “Bãmb yaoodame sẽ.”

Tõe tɩ yaa rẽ poor bilf bal la a Zezi ta zakẽ wã. La a bãnga bũmb ning sẽn maanã. Dẽ, sẽn deng meng t’a Pɩɛɛr togs-a yellã, a Zezi sokame: “Sɩmo, fo tagsg yaa bõe? Dũniyã rĩm dãmba reegda yaood ãnda rãmb nengẽ? Bãmb meng kamba nengẽ bɩ, bɩ yaa sãamba nengẽ?”

T’a Pɩɛɛr leok tɩ “yaa sãamba nengẽ.”

Dẽ la a Zezi yeel-yã: “Dɩlla zaka kamb pa yaood ye.” (Sebr Sõngo) A Zezi Ba wã la ãndũniyã Naaba, la a leb n ya a Soab ning b sẽn balemd wẽnd-doogẽ wã. Dẽnd sẽn zems ne laloa wã, sɩd ka tɩlae tɩ Wẽnnaam Biriblã yao wẽnd-doogã yaood ye. A Zezi yeelame: “La tɩ tõnd da beeg bãmba, kẽng mogrẽ wã n tɩ lob zĩm lɛooga n yõk zĩif ninga sẽn na n deng n gãd lɛoogã. Yaag a noorã tɩ f na yã ligdi. Dɩk yõ wã n kẽng n tɩ kõ bãmb maam ne fo yĩnga.”

Karen-biisã sẽn lebg n wa Kapɛrnawomã, b tigma taaba, la tõeeme tɩ ya a Pɩɛɛr zakẽ wã. Beenẽ b soka a Zezi woto: “Ãnda n yaa kãseng n yɩɩd [saasẽ Rĩungã] pʋgẽ?” A Zezi bãnga bũmb ning sẽn kɩt tɩ b sok woto wã. Bala a bãnga bũmb ning sẽn zĩnd bãmb ne taab sʋka, wakat ning b sẽn da wa n yi Filip Sezaare n watẽ tɩ b ra pa poorẽ wã. Dẽ la a sok woto: “Yaa bõe poorẽ la yãmb da wẽed no-koeemd ne taab sora zugu?” Yãndã sẽn yõk-ba yĩngã, karen-biisã ra sĩndame, tɩ bõe, b ra wẽeda no-koeemd ne taab n dat n bãng a soab ning sẽn ya a kãseng n yɩɩda.

Sẽn zems yʋʋm a tãab la woto a Zezi sẽn zãmsd-ba, rẽ yĩnga ka bũmb sẽn lingd wʋsgo, tɩ no-koeemd a woto zĩnd karen-biisã sʋk sɩda? Woto wilgdame tɩ ninsaal sẽn pa zems zãngã, n leb n paas a sẽn yit tũudum ning pʋgẽ wã tõe n golma a tagsgã. B wuba karen-biisã Zʋɩf rãmbã tũudum pʋgẽ. Tũudum kãng neba sẽn get n tɩ yɩɩd yaa naam la kãsengo. Sẽn paase, tõeeme t’a Zezi sẽn kãab a Pɩɛɛr Rĩungã “kʋɩlen-biisã,” a tagsdame tɩ yẽ yɩɩda a taabã. Tõeeme t’a Zak ne a Zã me tagsda woto, bala bãmb me paam n maana kaset ne a Zezi tedgrã.

Sẽn ya a soab fãa, a Zezi rɩka makr sẽn tar pãng sẽn na yɩl n dems b tagsgã. A boola biig n yals b sʋka, n mobg-a, n yeele: “Yãmb yam sã n ka tek tɩ yãmb lebg wa kom-bõonego, yãmb kõn kẽ [saasẽ Rĩungẽ wã] ye. Yaa woto yĩnga ned ninga fãa sẽn na n sik a meng wa bi-kãngã, a na n yɩɩ kãseng n yɩɩd [saasẽ Rĩungã] pʋgẽ. La ned ninga fãa sẽn na n deeg bi-bilf a woto mam yʋʋr yĩnga, a reegda maam.”

Ad a Zezi sɩd dems a karen-biisã ne manesem sõng tɛkẽ! A Zezi ka puug a sũur ne-ba, n yeel tɩ b yaa wuk-m-mens rãmba, rat-tɩ-loog rãmba, bɩ rat-taoor rãmb ye. Ayo, sẽn na yɩl n dems a karen-biisã, a rɩka makr ne kom-bõonego. Kom-bõoneg minim n yaa sik-m-mens rãmba, b ka rat-taoor rãmba, la b leb n ka tagsd tɩ b yɩɩda taab me ye. Woto, a Zezi wilgdame t’a karen-biisã segd n bao n talla zʋg-sõma a woto kambã sẽn minim n tarẽ wã. Wa a Zezi sẽn yeel woto n baasã: “Ned ninga sẽn yaa bilf yãmb fãa sʋka, yaa yẽ n yaa kãsenga.” Matɩe 17:22-27; 18:1-5; Mark 9:30-37; Luk 9:43-48.

▪ B sẽn lebg n wa Kapɛrnawomã, zãms-bʋg la a Zezi togs n yɩlem, la wãn to la tʋm-tʋmdbã reeg zãmsgã?

▪ Bõe yĩng tɩ ka tɩlae t’a Zezi yao wẽnd-doogã yaoodo, la bõe yĩng t’a yao-a?

▪ Tõeeme tɩ yaa bõe n wa ne no-koeemdã a Zezi karen-biisã sʋka, la wãn to la a rems-ba?