Sak 63

A Zezi remsa a tʋm-tʋmdbã ne sagls n paase

A ZEZI ne a tʋm-tʋmdbã sẽn da be zak pʋgẽ Kapɛrnawomã wakate, b goma tʋm-tʋmdbã sẽn da wẽed no-koeemd n dat n bãng ãnd soab la kãseng n yɩɩdã yelle. La bũmb a to yell me la b gom-yã. Tõeeme tɩ yaa b sẽn da wa n lebd Kapɛrnawom t’a Zezi ra ka be ne-bã wakat la bõn-kãng maan-yã. Tʋm-tʋmd a Zã togsame: “Tõnd yãa rao a yembre t’a rigd zĩn dãmb ne yãmb yʋʋre, la tõnd ka bas-a ye, a sẽn ka tũud tõnda yĩnga.”

Wõnda a Zã ra getame tɩ yaa tʋm-tʋmdbã bal la b kõ sor tɩ b sãoog neba. Dẽ a ra tagsdame tɩ rao wã sẽn ka be bãmb sʋkã, a sẽn maand yel-soalmã ka zems ye.

La a Zezi sagl-b-la woto: “Da gɩdg-y yẽnda ye, tɩ bõe, ned ka be sẽn na n maan bõn-bãnd ne mam yʋʋre n wẽneg n sãbs maam tao-tao ye. Ned sã n ka kɩɩsd tõndo, yẽ yaa tõnd dẽnda. Ned sã n kõ yãmb koom tɩ y yũ mam yʋʋra yĩnga, yãmb sẽn yaa Kirist neba yĩnga, mam yeta yãmb sɩda, a kõn kong keoor ye.”

Ra ka tɩlae tɩ rao wã meng wa pʋgd a Zezi, n wilg t’a ya a Zezi karen-biig ye. B ra nan ka lugl kiris-neb tigingã ye. Dẽ, a sẽn da ka be ne bãmb sullã ka rat n yeel t’a bee tiging a to pʋgẽ ye. Rao wã sɩd ra tẽeda a Zezi yʋʋrã, tɩ rẽ kɩt t’a tõog n dig zĩn dãmba. Sã n yaa ne a Zezi a sẽn maana zemsa ne keoore, la a wilg t’a sɩd na n paam-a lame me.

La yaa wãn to yẽ, tʋm-tʋmdbã goam la b manesem sã n da kɩtẽ tɩ rao wã lʋɩ tẽebã wɛɛngẽ? Yel-kãngã ra yɩtẽ-la wẽng wʋsgo! A Zezi yeelame: “Ned sã n maan kom-bõoneg kãens sẽn tẽed maama ned a ye t’a lʋɩ, a yaa neer n yɩɩda ne yẽ soaba b sã n dag n loe a kokor ne pĩig kug-bedre n lob-a ko-kãsenga pʋgẽ.”

A Zezi yeelame t’a tʋm-tʋmdbã segd n laka b mens ne bũmb ning fãa sẽn tõe n kɩt tɩ b lʋɩ tẽebã wɛɛngẽ, baa bõn-kãng sã n tara yõod wʋsg ne-f wa nugu, karga, bɩ nifu. F sẽn na n kong bõn-kãensã n tõog n kẽ Wẽnnaam Rĩungã pʋgẽ, n são f sẽn na n gãd-b kãn-kãe tɩ b lob-f Zeyɛn pʋgẽ (sẽn yaa tãmpʋʋr sẽn dɩt bugum sẽn pẽ Zerizalɛm), sẽn makd wakat sẽn kõn sa sãoongã.

A Zezi leb n keooga neba woto: “Bɩ y gũusi n da paoog kom-kãensa ned a yembr ye. Tɩ bõe, mam yeta yãmba tɩ daar fãa [saasẽ] bãmb malɛk rãmba geta mam Ba sẽn be [saasẽ] nenga.” Rẽ poore, a rɩka makr n wilg ‘kom-bõoneg kãensã’ yõod sẽn ta zĩig ninga, n gom rao sẽn da tar piis koabg t’a ye menem yelle. A Zezi wilgame tɩ rao wã na n basa 99 wã n tɩ bao sẽn menem-a wã, t’a sã n yã-a bɩ a na n maan sũ-noog pe-yɛngã yĩng n yɩɩd 99 wã. Dẽ a Zezi yeela woto n baase: “Woto me yãmb Ba sẽn be [saasẽ wã] ka rat tɩ kom-bõoneg kãens ned a yembr sãam ye.”

Tõeeme tɩ no-koeemdã a tʋm-tʋmdbã sẽn wẽ ne taabã ra ket n bee a Zezi yamẽ, t’a yeele: “Bɩ yãmb yɩ wa yamsem, n zĩnd ne taab ne laafɩ.” Rɩɩb sã n yaa pada tɩ b ning yamsem nooma noor n yɩɩda. Dẽ, makr wɛɛngẽ, ned goam sã n tar yamsem noom, kɩtdame t’a sẽn yetã sakr yaa nana n yɩɩda. D sã n tar yamsem a woto, na n sõngame tɩ laafɩ ket n beẽ.

La ninsaalbã sẽn ka zems zãngã yĩngã, wakat-wakate, mo-yõs na n zĩndame. A Zezi leb n kõo sagls sẽn na n sõng-d tɩ d welg-ba. A yeelame: “Fo ba-biig sã n maan yel-wẽna, kẽng n togs-a a kongra foo ne yẽ sʋk bala. La a sã n kelg fo goama, fo paama f ba-biiga.” La a soabã sã n pa kelge, a Zezi sagendame tɩ b “bao ned a ye bɩ a yiib n paas f meng tɩ yella fãa paam manegre ne kaset dãmb a yiibu walla a tãab kaseto.”

A Zezi yeelame tɩ yaa b sẽn na n maan yel-kãensã fãa t’a soabã pa kelg la b yaoond n dɩk yellã n togs tigingã, sẽn dat n yeel tɩ tigingã yel-gɛtb sẽn tar tõog n na n kao bʋʋdã. Yel-wẽn-maandã sã n ka sak sard ning bãmb sẽn dɩkã, a Zezi yeelame tɩ “bɩ f ges-a wa ned sẽn ka pʋʋsd Wẽnnaam la a wa yõor yaood dɛɛgda.”

Yel-gɛtbã sã n wa rɩkd sard woto, b segd n tũu a Zeova Gomdã noy sõma. Woto, b sã n mik tɩ ned tara taale, bɩ t’a zemsa ne sɩbgre, rẽ t’a soabã bʋʋd ‘zoe n loee saasẽ.’ La b sã n “lok dũniyã zugu,” sẽn dat n yeel tɩ b mikame t’a soabã ka tar taale, na n yɩɩ sẽn da zoe n ‘lok saasẽ.’ A Zezi yeelame tɩ bʋ-kaoor a woto pʋgẽ, “zĩig ninga neb a yiibu bɩ a tãab sẽn tigim taab ne mam yʋʋre, mam bee bãmb sʋka.” Matɩe 18:6-20; Mark 9:38-50; Luk 9:49, 50.

▪ Bõe yĩng t’a Zezi wakatã, ra ka tɩlae tɩ neba mens wa pʋgd-a?

▪ Bi-bilf lubr tẽebã wɛɛngẽ yaa wẽng n ta zĩ-bʋgo, la wãn to la a Zezi rɩk makr n bilg kom-bõoneg kãensã yõod sẽn ta zĩig ninga?

▪ Wõnda bõe n kɩt t’a Zezi sagl tʋm-tʋmdbã tɩ b tall yamsem b mensẽ?

▪ ‘Loeesã’ la ‘lokrã’ võor yaa bõe?

Sak 64

Zãmsg sugr kũunã wɛɛngẽ

YAA wala a Zezi ne karen-biisã ra ket n bee zakã pʋgẽ Kapɛrnawom. A ra sõsda ne a karen-biisã n wilgd-b b sẽn segd n welg yɛl to-to saam-biis sʋka. Dẽ a Pɩɛɛr sokame: “Zusoaba, naoor a wãn la mam ba-biig na n beeg maam tɩ m kõ-a sugri?” Zʋɩf rãmbã tũudum karen-saam dãmb ra yetame tɩ b kõ sugr hal tɩ ta naoor a tãabo. Dẽ, tõeeme t’a Pɩɛɛr tagsame tɩ yẽ sã n yeel tɩ “hal tɩ ta naoor a yopoe,” yẽ me yaa n maoome.

La sõd sugr kũun sõorã meng yaa wẽnga. A Zezi remsa a Pɩɛɛr tagsgã n yeele: “M pa yet tɩ naoor a yopoe bal ye, yaa naoor pisopoe la a yopoe.” (Sebr Sõngo) A Zezi ra wilgdame t’a Pɩɛɛr sẽn na n kõ a saam-biigã sugrã ka segd n tall sõor ye.

A Zezi rɩka makr sẽn na yɩl n ning b yamẽ vẽeneg tɩ b tog n yɩɩ sugr kõatba. Kɩbarã tɩ loee ne rĩm sẽn bool a yembs n sok-b a sama. B waa ne yamb a yembr sẽn tar a sam kãsenga: denie 60 000 000. Rao wã ra ka be a sẽn na n maan n tõog n yao sam-kãngã ye. A Zezi wilgame tɩ sẽn yaa woto wã, rĩma kõo noor tɩ b koos rao wã, a pagã, la a kambã n yao samdã.

Dẽ, yambã wõgemda a zusoabã taoor n bõos woto: ‘Maan-y sũ-mar ne maam tɩ m na n yao-y-la y samdã zãnga.’

Rao wã nimbãaneg yõka a zu-soabã t’a bas a sam-kãsengã taale. A Zezi paasame tɩ zu-soabã sẽn maan woto paalem bal la rao wã yi n tɩ yã a yemb-taag sẽn tar a denie 100 samd bala. Rao wã soga a yemb-taagã kokoɛy n wẽoogdẽ t’a vʋʋsmã rat n lebge, n yetẽ: “Yao maam m samde.”

La a yemb-taagã ra ka tar ligdã n na n yao ye. Dẽ a wõgemda a sam-soabã taoore, n yeele: ‘Bɩ y maan sũ-mar ne maam tɩ m na n yao-y-la y samdã.’ La yambã ka nimbãan-zoɛt wa zu-soabã ye, a kɩtame tɩ b kẽes a yemb-taagã bãens roogo.

A Zezi paasame tɩ yembs a taabã sẽn yã yellã b tɩ togsa b zu-soabã. B zu-soabã sũur yikame t’a bool-a, n yeele: “Tʋm-tʋmd wẽnga, mam da basa fo samda fãa taale fo sẽn kos maama yĩnga. A ka zems tɩ fo me zoe fo tʋmd-n-taaga nimbãaneg wa mam sẽn zoe fo nimbãanega bɩ?” Zu-soabã sũur yikame t’a ning yambã sẽn ka tar nimbãan-zoeerã bãens ro-gũudbã nugẽ, hal t’a wa yao a samdã fãa.

Dẽ masã a Zezi yeela woto n baase. “Mam [saasẽ] Ba na n maana yãmb woto, yãmb ned kam fãa sã n ka kõ a ba-biig sugr ne a sũur fãa.”

Ad yaa sugr kũun zãmsg sẽn tar pãnga! Tõnd maana yel-wẽn wʋsg n beeg Wẽnnaam t’a kõ tõnd sugri. D sã n mak rẽ ne yel-wẽn tõnd saam-biig sẽn yaa kiris-ned sẽn tõe n maan n beeg tõndã, saam-biigã yel-wẽn sɩd ka zem fʋɩ ye. Sẽn paase, a Zeova kõo tõnd sugr naoor tusa. Naoor wʋsgo, tõnd pʋd n ka mi tɩ d maana yel-wẽn n beeg-a ye. Rẽ yĩnga, d saam-biigã sẽn beeg tõnd naoor a wãn balã, tõnd me ka tõe n kõ-a sugri, baa d sã n sɩd tara bʋʋm n na n gom sɩda? Wa a Zezi sẽn da yeel a Tãng Zug Zãmsgẽ wã, tẽeg-y tɩ Wẽnnaam na n ‘kõo tõnd sugri tõnd beegra yĩnga, a wa tõnd me sẽn kõt d bɛɛgdba sugrã.’ Matɩe 18:21-35; 6:12; Kolos rãmb 3:13.

▪ Bõe n kɩt t’a Pɩɛɛr sok n na n bãng a sẽn segd n kõ a saam-biig sugr sõor to-to, la bõe yĩng t’a tagsdẽ tɩ yẽ sẽn yet tɩ naoor a yopoe wã, a me yaa n maoome?

▪ Wãn to la manesem ning rĩmã sẽn tall ne a yambã a sẽn kos-a t’a zoe a nimbãanegã yaa toor ne manesem ning yambã sẽn tall ne a yemb-taagã?

▪ A Zezi makrã zãmsda tõnd bõe?