Sak 72

A Zezi tʋma karen-biis 70 wã tɩ b tɩ moone

YƲƲMD 32 wã ra kolga saabo. A Zezi lisgã yʋʋm a tãab la woto. Sẽn pa kaoos pʋgẽ, a Zezi ne a karen-biisã kẽnga Zãn Kibsẽ wã Zerizalɛm, la wõnda b ra ket n ka zãr ne be ye. Sɩda, kiis a yoobã sẽn ketã fãa la bala, a Zezi maana a tʋʋmdã Zide bɩ Zʋrdẽ Kʋɩlgã rʋʋnd sẽn yaa Peere babgã. B segd n moona bab-kãng me.

Yaa sɩd tɩ yʋʋmd 30 Pakã loogr poore, a Zezi rɩka sẽn zems kiis a nii n moon Zide. La Zʋɩf rãmbã sẽn bao n na n kʋ-a be yʋʋmd 31 Pakẽ wã poore, a moona yʋʋmd la pʋɩ-sʋk ning sẽn pʋglã Galile bala. Wakat kãnga a sɩng n zãmsa neb wʋsg tɩ b lebg koe-moondba. La sẽn deng wakat kãnga, a ra ka tar neb sẽn paam zãmsg woto ye. Dẽ masã a kɩtame tɩ b sɩng kaset kũun sẽn yaa kãseng la sẽn na n baas a tʋʋmdã Zide.

A Zezi tũusa karen-biis 70 n tʋm-b yiib-yiib tɩ b tɩ moone. Rẽ kɩtame tɩ ra yaa Rĩungã koe-moondb sul 35 n segl n na n tɩ moone. Bãmb dengame n kẽng tẽns la zĩis nins fãa a Zezi sẽn da geend n na n kẽngẽ wã. La yaa vẽeneg t’a Zezi tʋm-tʋmdbã ra tũud-a lame.

A Zezi ka yeel karen-biis 70 wã tɩ b kẽng karen-dotẽ wã ye, a yeel-b lame tɩ b kẽ neba zagsẽ, n wilg-b woto: “Yãmb sã n na n kẽ yir fãa, bɩ y pʋʋs-b a woto: Bɩ laafɩ zĩnd yi-kãnga pʋga. La laafɩ ned sã n be be, yãmb laafɩ wã na n siga a zugu.” (Kãab-paalgã Koe-noogo) La b koɛɛgã yẽ la bʋgo? “Yeel[-y] bãmb yaa: Wẽnnaam [Rĩungã] kolga yãmba,” woto la a Zezi yeel-yã. Sebr a yembr (Commentaire de Matthew Henry, ãngl.) yeela woto karen-biis 70 wã mooneg wɛɛngẽ: “Wala b zu-soabã, zĩig fãa b sẽn da kẽngẽ, b moona zak-zaka.”

A Zezi sẽn kõ karen-biis 70 wã noy ninsã yaa yembr ne noy nins a sẽn da kõ tʋm-tʋmdb 12 wã a sẽn da wa n tʋm-b tɩ b tɩ gilg n moon Galile sẽn zems yʋʋmd la woto wã. A yeela a karen-biis 70 wã tɩ b bãng tɩ b na n yãa kɩɩsgo, n segl-b tɩ b moon nebã koɛɛgã. Sẽn paas me, a leb n kõ-b-la tõog tɩ b sãoog bãad dãmba. Dẽ, a Zezi sã n da ta zĩ-kãens rẽ poor bilfu, neb wʋsg ra na n yãgdame n dat n yã a soab ning karen-biis sẽn tõe n maan yel-soalem a woto wã.

Karen-biis 70 wã mooneg ne a Zezi sẽn pʋg b nao n ges neb nins b sẽn moonã pa kaoos wʋsg ye. Tao-tao tɩ Rĩungã moondb sul 35 wã lebg n wa a Zezi nengẽ. B yeela woto ne sũ-noogo: “Zusoaba, baa zĩn dãmba sakda tõnd yãmb yʋʋra yĩnga.” Mooneg kɩba-nood a woto sɩd nooga a Zezi sũuri, t’a leok woto: “Mam yãa Sʋɩtãana sẽn yi yĩngri n lʋɩ wa sa-yãgbo. La gese, mam kõo yãmb pãng tɩ y tab wiis ne namse.”

A Zezi ra miimi tɩ Wẽnnaam Rĩungã naam sɩngr poore, saabã wakate, b ra na n diga a Sʋɩtãan ne a zĩn dãmbã n yiis saasẽ. La masã, sẽn mik tɩ ninsaalb bal tõog n diga zĩn dãmbã kõta bas-m-yam n paas tɩ yel-kãng sẽn watã na n pidsame. Dẽ, a Zezi ra gomda b sẽn na n dig a Sʋɩtãan saasẽ beoog-daarã yell wala bũmb sẽn yaa waaziba. Woto yĩnga, yaa makr wɛɛngẽ la b kõ karen-biis 70 wã tõog tɩ b tab wiis la namse. Baasg zãnga, a Zezi yeelame: “Bɩ y ra paam sũ-noog zĩn dãmba sẽn sakd yãmba yĩng ye. Bɩ y paam sũ-noog yãmb yʋyã sẽn gʋls [saasẽ wã] yĩnga.”

A Zezi sũur yɩɩ noog wʋsgo, t’a pẽg a Ba wã zãma sʋka, a sẽn tũnug ne a sõgen dãmb kãensã sẽn yaa nin-talsã n maan tʋʋm kãsems a woto wã. A wẽnemd n yeela a karen-biisã woto: “Bark bee neb nins sẽn yãt bũmb nins yãmb sẽn yãta zutu. Tɩ bõe, mam yeta yãmba tɩ Wẽnnaam no-rɛɛsdb wʋsg ne dĩm dãmb da rat n yãa bũmb nins yãmb sẽn yãtã, la bãmb ka yã ye, la b ra rat n wʋma bũmb nins yãmb sẽn wʋmdã, la bãmb ka wʋm ye.” Luk 10:1-24; Matɩe 10:1-42; Wilgri 12:7-12.

▪ Yɛ la a Zezi moon pipi yʋʋm a tãabã pʋsẽ, la zĩ-bʋs la a moon yaoolem kiis a yoobã pʋgẽ?

▪ Yɛ la a Zezi yeel a karen-biis 70 wã tɩ b tɩ yã nebã?

▪ Bõe yĩng t’a Zezi yeel t’a zoe n yãa a Sʋɩtãan sẽn yit saasẽ n lʋɩtẽ?

▪ Wãn-wãn to la karen-biis 70 wã tõog n tab wiis la namse?

Sak 73

Samari nin-sõngo

TÕEEME t’a Zezi sẽn da be zĩig ningã ka zãr ne Betani ye. Betani yaa tẽn-bil t’a zãrem ne Zerizalɛm zems kɩlometr a tãabo. A Moiiz Tõogã karen-saamb a yembr n kolg-a n sok-a: “Karensaamba, mam na n maana bõe n paam vɩɩm sẽn ka sɛta?”

A Zezi ra neeme tɩ rao wã sẽn yaa tõog mitã, a sokrã ka sẽn na yɩl n bao n bãng bal ye, la yaa sẽn na yɩl n mak-a. Tõe tɩ tõog mitã ra ratame n paam t’a Zezi leok tɩ zab Zʋɩf rãmbã. Dẽ, a Zezi kɩtame tɩ tõog mitã wilg yẽ meng tagsg vẽenega, n sok-a: “A gʋlsa tõog pʋgẽ tɩ bõe? Yãmb karemda bõe be?”

Tõog mitã leoka ne yam sẽn yaa kãseng menga, n togs Tõodo 6:5 wã ne Maankʋʋre 19:18 wã goama, n yetẽ: “Bɩ f nong Zusoaba fo Wẽnnaam ne f sũur fãa, la ne f sɩɩg fãa, la ne f pãnga fãa, la ne f yam fãa, la f nong [f to] wa f menga.”

T’a Zezi yeel-a: “Yãmb leokrã zemsame. Bɩ y maan woto tɩ y na paam vɩɩm.”

A Zezi leokrã pa ta tõog mitã yam zãng ye. Leokrã ka takɩ wa yẽ sẽn datã ye. A ra ratame t’a Zezi wilg tɩ yẽ tagsgã zemsame, la tɩ woto yĩnga a yaa tɩrg a manesmã ne neb a taabã pʋgẽ. Rẽ n so t’a sok woto: “La m to yaa ãnda sẽ?”—Sebr Sõngo.

Zʋɩf rãmbã ra tagsdame tɩ bãmb “to” yaa b Zʋɩf taag bala, wala Maankʋʋre 19:18 sẽn wõnd rat n yeela bũmb ningã. Sɩda, kaoosg zugẽ menga, tʋm-tʋmd a Pɩɛɛr wa n yeelame: “Yãmb mii [tɩ ka zems ne] Zʋɩf rãmba tõogo tɩ ned sẽn yaa Zʋɩf buud mag ne neb sẽn ka Zʋɩf buudu walla kẽ a zakẽ ye.” Dẽ, tõeeme tɩ tõog mitã ra tagsdame t’a yaa nin-tɩrga, a sã n maand a Zʋɩf taasã bal neere. Bala sã n yaa ne yẽ, sɩd-sɩda, ned sẽn ka Zʋɩf ka f to ye. Tõeeme t’a Zezi karen-biisã me ra tagsda woto.

Wãn to la a Zezi ra na n maan n dems a kɛlgdbã tagsg tɩ ka zab-ba? A togsa kɩbare, tõe t’a tɩ loee ne bũmb sẽn sɩd zĩndi. A Zezi wilgame: “[Zʋɩf] a yembr n da yi Zerizalɛm n dabd Zeriko, tɩ fãadb tek n yõk-a n piid a futu la b pogl-a n bas-a t’a rat n ki.”

A Zezi paasame: “La maan-kʋʋd n tũ so-kãnga, la a sẽn yã nedã, a bʋdgame n looge. La Levi ned me sẽn ta zĩ-kãng n yã nedã, a me bʋdgame n looge. La Samari ned n tũ sorã n ta zĩig ninga raoa sẽn be wã, la a sẽn yã rao wã a zoe a nimbãanega.”

Maan-kʋʋdbã la Levit rãmbã sẽn sõngd-bã wʋsg sẽn tʋmd wẽnd-doogẽ wã Zerizalɛmã yir yaa Zeriko, sẽn zems kɩlometr 23 ne Zerizalɛmã. Sor ning sẽn yit Zerizalɛm n debd Zeriko wã yaa sor sẽn sigd zĩig sẽn yaa tãnga, t’a tũubã yaa yelle. Maan-kʋʋdã la Levitã ra segd n sõnga b Zʋɩf taagã sẽn da be toog pʋgẽ wã. La b ka sõng-a ye. La wa n yaa Samari ned n sõng-a. Zʋɩf rãmbã ra kisa Samari nebã hal sõma, tɩ sẽn pa kaoos pʋgẽ meng tɩ b tʋʋs a Zezi tɩ “Samari neda.”

Bõe la Samari nedã maan n sõng Zʋɩfã? A Zezi yeelame: “Yẽ kẽngame n ning kaam ne rãam a poglga zĩisẽ n vil ne pɛɛla n dɩk-a n zombg a bõanga n tall-a n ta sik-zĩigẽ n ges a yelle. La vẽk-n-beoogo, yẽ yãka denie a yiib [rasem a yiib yaood la bala] n kõ sik-zĩiga soaba n yeele: ‘Bɩ y ges a yelle, la yãmb ligd sã n kẽ, mam sã n wa lebgdẽ m na lebs yãmba.’ ”

A Zezi sẽn togs kɩbarã n sa wã, a soka tõog mitã: “Bãmb b tãaba sʋka, sã n yaa ne yãmba, ãnda n ges rao wã sẽn lʋɩ fãadba nusẽ wala a to?”—Sebr Sõngo.

Tõog mitã ra getame tɩ yaa yãnd ne-a t’a yeel tɩ Samari ned maana tʋʋm sõngo. Rẽ n so t’a leok woto bala: “Yaa ned ninga sẽn zoe yẽ nimbãanegã.”

Dẽ a Zezi baasa a goamã n yeele: “Bɩ yãmb me kẽng n maan woto.”

A Zezi sã n da yeelẽ dao wã vẽeneg tɩ ned sẽn ka Zʋɩf ya a to, a ra ka na n sakẽ dẽ yembo, la sẽn paase, tõeeme tɩ nebã sẽn da kelgdã wʋsg ra zĩndẽ rao wã poorẽ n kɩɩs a Zezi. La kɩba-kãngã sẽn tik raasenkam yɛl zutã, wilgame tɩ kɩɩsg ka beẽ, tɩ ned sẽn ka tõnd buud bɩ d tẽng ned me yaa tõnd to. Ad a Zezi sɩd ra mii neb zãmsgo! Luk 10:25-37; Tʋʋma 10:28; Zã 4:9; 8:48.

▪ Sogs-bʋs la tõog mitã sok a Zezi, la yaa vẽeneg t’a bõn-datlã ra yaa bõe?

▪ Sã n yaa ne Zʋɩf rãmbã, f to yaa ãnda, la bõe yĩng tɩ d tõe n yeel t’a Zezi karen-biisã meng ra tagsda woto?

▪ Wãn to la a Zezi tõog tɩ b bãng tagsg ning sẽn zemsã, hal tɩ tõog mitã ka tõog n kɩɩse?