Sak 98

Karen-biisã wẽe no-koeemd a Zezi kũumã sẽn wa n kolgdẽ

A ZEZI ne a karen-biisã ra pẽe Zʋrdẽ Kʋɩlgã. B yii Peere babgã n dʋʋg kʋɩlgã n kẽ Zide. Neb wʋsg me n da tũud-b n debd yʋʋmd 33 Pakã, sẽn da ket sẽn zems rasem a yopoe balã.

A Zezi n da lʋɩɩ a karen-biisã taoor n kẽnda, la a Zezi raoodã ling-b lame. Tẽeg-y tɩ semen a wãn sẽn looge, a Lazaar sẽn da ki t’a Zezi ra segend n na n yi Peere n kẽng Zide wã, a Toma ra yeela a taabã: “Wa-y tɩ d kẽng n tɩ naag[-a] n ki.” Tẽeg-y me t’a Zezi sẽn vʋʋg a Lazaarã poore, Sãnedrẽ wã ra magdame n na n kɩt tɩ b kʋ a Zezi. Ka lingr tɩ rabeem ra tar karen-biisã b sẽn leb n kẽed Zide masã wã ye.

Sẽn na yɩl n segl karen-biisã bũmb ning sẽn gũud-bã yĩngã, a Zezi peeg-b-la kɛɛng n yeel-ba: “Gese, tõnd dabda Zerizalɛm, la b na n ninga Ninsaal Biiga maan-kʋʋdba kãsem dãmba ne gʋlsdba nusẽ. La b na n kaoo bãmb bʋʋd tɩ yɩ kũum n ning bãmb bu-zẽms nusẽ tɩ b yaal bãmba, la b tʋbs bãmb kolkoodo, la b pãb bãmb ne kalwaase, la b na n kʋʋ bãmba, la rasem a tãab raare, b na n vʋʋgame.”

Yaa naoor a tãab-n-soab la woto a sẽn gom ne a karen-biisã a kũumã la a vʋʋgrã yell kiis a wãn pʋgẽ bala. La baa ne b sẽn da kelgd-a wã, b ra ka wʋmd a goamã võor ye. Tõeeme tɩ rẽ yaa b sẽn da tẽed tɩ b na n lebs n lugla Israɛll Rĩungã tẽng zugã, tɩ b ra gũud n na n wa paam ziir la waoogr Kirist tẽng zug Rĩung pʋgẽ wã.

A Salome sẽn yaa tʋm-tʋmdb a Zak ne a Zã ma wã ra bee sẽn debd-b Pakã sʋka. A Zezi boola nin-kãensã tɩ “raop sẽn wẽnd wa sa-kɛlenga,” la yaa vẽeneg tɩ yaa b sẽn da yaa zɩ-kaeedem dãmbã yĩnga. Bãmba b yiibã rag n magda b yamẽ n dat naam zĩis Kirist Rĩungã pʋgẽ, la b ra togsa b ma wã b sũur tʋlsem. Masã b ma wã wa n wõgemda a Zezi taoore, n na n kos a Zezi bũmb a kambã yĩnga.

T’a Zezi sok-a: “[Fo] rata bõe?”

Tɩ b ma wã leoke: “Bɩ y kõ noor tɩ mam komdibli kãensa a yiiba a yembr zĩnd y rɩtgo t’a to zĩnd y goabga yãmb [Rĩungã] pʋgẽ.”

A Zezi bãnga kosgã sẽn yitẽ, n yeel a Zak ne a Zã yaa: “Yãmb ka mi y sẽn kot bũmb ninga ye. Yãmb tõe n yũu bõn-yũudl ninga mam sẽn na n yũ wã bɩ?”

Tɩ b leok tɩ: “Tõnd tõeeme.” A Zezi ra nan togs-b lame tɩ b na n nams-a-la nams-bɛɛg n wa baas n kʋ-a. Ne rẽ fãa, wõnda b rag n ka wʋm a sẽn yeel t’a tara ‘bõn-yũudl’ n segend n na n yũ wã võor ye.

Baasg zãnga, a Zezi togs-b lame: “Yaa sɩda yãmb na n yũu bõn-yũudl ninga mam sẽn na n yũ wã, la tɩ zĩnd mam dɩtgo walla mam goabga yõ wã ka be ne maam tɩ kõ ye, la mam Ba sẽn bĩng zĩ-kãng neb nins yĩnga na paam-a.”

Tʋm-tʋmdb piig a taabã wa n bãnga bũmb ning a Zak la a Zã sẽn kosã, tɩ b sũyã yiki. Pĩnda tʋm-tʋmdba ra zoe n wẽe no-koeemd n dat n bãng ned ning sẽn yaa kãseng n yɩɩda. Tõe t’a Zak ne a Zã n da lʋɩ taoor no-koeem kãng pʋgẽ. Kos-kãngã b sẽn leb n maanã wilgdame tɩ b ka tũ saglg ning a Zezi sẽn da kõ yel-kãngã zugã ye. Zu-bʋko, b naam tʋlsmã ra ket n tara pãng wʋsgo.

Dẽ a Zezi boola tʋm-tʋmdb 12 wã, sẽn na yɩl n welg yel-kãngã la sũ-pa-noaang ning rẽ sẽn wa ne wã. A sagl-b-la ne nonglem woto: “Yãmb mi tɩ soolem toɛy-toɛya nanambs maanda bãmb pãnga, la tɩ nin-kãsems soo bãmba. A kõn yɩ woto yãmb sʋk ye. La ned ninga fãa sẽn dat n yɩ yãmb nin-kãsenga, bɩ a yɩ yãmb sõangda. La ned ninga fãa sẽn dat n yɩ yãmb kãsma bɩ yẽ yɩ yãmb yamba.”

A Zezi kõo mak-sõng b sẽn segd n tũ, a sẽn wilg tɩ: “Yaa woto yĩng la Ninsaal Biiga wa-yã. Bãmb ka wa tɩ neb sõng bãmb ye, b waame n na n sõng nebã, la kõ b vɩɩm tɩ yao neb wʋsg yĩnga.” A Zezi zoe n sõnga neb a taabã, la sẽn paase, a na n leb n kii ãdem-biisã yĩnga! Karen-biisã me segd n talla Kiristã yam n tʋlg n tʋm n sõng neb a taabã n da baood tɩ neb tʋmd n kõt-b ye. B leb n pa segd n tʋll n yɩ taoor dãmba, n baood naam zĩis ye. Matɩe 20:17-28; Mark 3:17; 9:33-37; 10:32-45; Luk 18:31-34; Zã 11:16.

▪ Bõe yĩng tɩ rabeem ra tar karen-biisã masã?

▪ Wãn to la a Zezi segl a karen-biisã bũmb ning sẽn gũud-bã yĩnga?

▪ Bõe la b kos a Zezi, la tʋm-tʋmdbã manesem yɩɩ wãn-wãna?

▪ Wãn to la a Zezi welg yell ning sẽn da be tʋm-tʋmdbã sʋkã?

Sak 99

A Zezi zãmsa neb Zeriko

PA KAOOS la a Zezi ne neb kʋʋngã sẽn da togd sor ne-a wã ta Zeriko ye. Zeriko ne Zerizalɛm ra yaa daar a ye kẽnde. Wõnda Zeriko ra yaa galʋ-tẽng sẽn tar babs a yiibu: Pĩnd Zʋɩf rãmbã tẽn-kʋdrã ne Rom dãmbã tẽn-paalgã, tɩ b ra zãr ne taab kɩlometr la pʋɩ-sʋka. Kʋʋngã sẽn da wa n yit tẽn-kʋdrẽ wã n kẽed tẽn-paalgẽ wã, bõos rãmb a yiib sẽn yaa zoens n wʋm b rãamdã. Bõaas a yembr yʋʋr la a Bartime.

A Bartime ne a tũud-n-taagã sẽn bãng tɩ ra ya a Zezi n loogdã, b sɩngame n kaasd woto: “Zusoaba sẽn ya a Davɩɩd Biiga, zoe-y tõnd nimbãanega!” Kʋʋngã zab-b lame, n yeel-b tɩ b sĩndi. La b maneg n zẽka b koees n paas n tall kaasg woto: “Zusoaba sẽn ya a Davɩɩd Biiga, zoe-y tõnd nimbãanega.”

A Zezi sẽn wʋm bʋrgã a yalsame. A kosa neb nins sẽn da be ne-a wã tɩ b tɩ bool sẽn kaasd-bã. Nin-kãens kẽnga bõos rãmbã nengẽ n tɩ yeel a yembr woto: “Keng f sũuri, yik tɩ bãmb boonda foom.” Zoangã loba a zugẽ fuugã, n yik tʋp ne sũ-no-kãseng n kẽng a Zezi nengẽ.

T’a Zezi soke: “Yãmb datame tɩ mam maan bõe n kõ yãmba?”

Tɩ zoens a yiibã leoke: “D data d nin pukri.”

Zoensã nimbãaneg yõka a Zezi t’a sɩɩs b ninã. A Mark kɩbarã wilgame t’a Zezi yeela zoang a yembrã: “Kẽnge, fo tẽeb n maag foom.” Zĩig pʋgẽ bõos rãmbã sẽn yaa zoensã paama b nini, la sik kae tɩ b yiibã fãa sɩngame n pẽgd Wẽnnaam ye. Neba fãa sẽn yã bũmb ning sẽn maanã, bãmb me sɩng n pẽgda Wẽnnaam. Zĩig pʋgẽ bala a Bartime ne a tũud-n-taagã sɩnga a Zezi pʋgbo.

A Zezi sẽn da wa n pɩʋʋgd Zeriko wã tɩ kʋʋngã ra yaa kãseng wʋsgo. Ned kam fãa ra rat n yãa ned ning sẽn sãooga zoensã. A Zezi sẽn lebẽ fãa neba da rɩdgd-a lame. Rẽ kɩtame tɩ neb kẽer nif rag n ka tõe n yã-a meng ye. A Zase sẽn da yaa yõor yaood dɛɛsdbã taoor soab Zeriko babgã ra bee nin-kãens sʋka. A sẽn da yaa koɛɛg wʋsgã yĩng kɩtame t’a ra ka tõe n yã a Zezi ye.

Dẽ, a Zase wudgame n deng taoor n tɩ rʋ tɩɩg sẽn da yas sor ning a Zezi sẽn tũudã noore. A ra tõe n zĩnda tɩɩgã zug be n yã bũmb fãa. Kʋʋngã sẽn wa n kolg be wã, a Zezi naka a neng n ges tɩɩgã zug n bool a Zase: “Zase, sig tao-tao, tɩ bõe, mam na n siga fo yir rũnda.” Ne sũ-noogo a Zase siga tɩɩgã zug n kuil tao-tao n tɩ segl n na n deeg sãan-kãngã sẽn zems ne waoogr wʋsgã.

La neba sẽn yã woto wã, b fãa sɩngame n yẽgemdẽ. Sã n yaa ne bãmba ka zems t’a Zezi sig ned a woto yir ye. Bãng-y tɩ ya a Zase sẽn zãmb neb n dɩ b ligd a yõor yaood deesg tʋʋmdã pʋgẽ wã n kɩt t’a lebg rakãagre.

Neb wʋsg pʋga a Zezi n kẽng a Zase zakẽ wã. A Zezi sẽn kẽ wã neba yẽgma woto: “Bãmb kẽngame n tɩ sig rao sẽn yaa yel-wẽn soab yiri.” Baasg zãnga, a Zezi ra neeme t’a Zase yaa ned sẽn tõe n tek yam n kos sugri. Sɩd me a Zezi ra bee bʋʋm, bala a Zase yikame n yeele: “Gese, Zusoaba, mam na n yãka m paoonga pʋɩ-sʋk n kõ naong rãmba, la m sã n da reeg ned bũmb ne pãnga, mam na n lebsa yẽnda naoor a naase.”

A Zase wilgame t’a sɩd teka yam n kos sugri, ne a sẽn na n pʋɩ a paoongã pʋɩ-sʋk naong rãmbã, la ne a sẽn na n dɩk pʋɩ-sʋk a to wã n yao neb nins a sẽn da zãmbã. La yaa wala a ra tõe n tika a yaoodã reesd sɛb zut n geel n bãng ligd ning takɩ a sẽn da segd n yao-bã. Dẽ n so t’a pʋlem t’a na n yaoo naoor a naas n dole, tɩ rẽ zems ne Wẽnnaam tõogã sẽn yet tɩ ‘ned sã n zuk pesgo, bɩ a yao piis a naas pesg a yembr yĩngã.’

A Zezi sũur yɩɩ noog ne a Zase sẽn kãab t’a na n dɩka a paoongã n tʋm to-to wã, bala a Zezi yeelame: “Rũnda bala fãagr waa yi-kãngã, nin-kãngã me sẽn ya a Abrahaam yagengã yĩnga. Tɩ bõe, Ninsaal Biiga waame n na n bao la b fãag bũmb nins sẽn menemã.”

Sẽn pa kaoose, a Zezi tũnuga ne biribl sẽn yaa laog-sãamdã makr n wilg ‘sẽn menem-bã’ yɛl sẽn yaa to-to. Masã yãoã yaa makr meng-meng ne ned sẽn da menem tɩ b lebs n yã-a. Tũudmã taoor dãmb ne neb nins sẽn tũud-bã yẽgemda ne a Zezi t’a reegda neb wala a Zase. La ne rẽ fãa, a Zezi ra ket n baoodame la a sãoogd a Abrahaam kamb nins sẽn menemã tẽebã wɛɛngẽ. Matɩe 20:29-34; Mark 10:46-52; Luk 18:35–19:10; Yikri 21:37.

▪ Wõnda yaa yɛɛnẽ la a Zezi seg bõos rãmbã sẽn yaa zoensã, la bõe la a maan n kõ-ba?

▪ Ãnda la a Zase, la bõe yĩng t’a rʋ tɩɩga?

▪ Wãn to la a Zase wilg t’a teka yam n kos sugri?

▪ Bõe la manesem ning a Zezi sẽn tall ne a Zase wã tõe n zãms tõndo?