Sak 103

A Zezi waa wẽnd-doogẽ wã yɛsa

A ZEZI ne a karen-biisã sẽn yi Zeriko n wa wã tɛka, b yʋng a tãab-n-soab la woto. Tẽne wã yibeoog pĩnda, sẽn yaa Nizã rasem 10, tɩ b ra zoe n bee sorẽ yɛs n debd Zerizalɛm. Kom n da tar a Zezi. Dẽ a sẽn yã kankang sẽn tar vãado, a kẽngame n tɩ ges a sã n na n yãa kankama.

Tɩɩgã ra toba pĩnda, bala yaa sigr kiuug la kankam wakate, tɩ masã ra yaool n yaa tʋʋlg kiuugã baasgẽ. La yaa vẽeneg t’a Zezi ra tagsdame tɩ kankangã sẽn tob pĩndã, a ra segd n tara kankam dẽems me. La a pa yã kankamd ye. Tɩɩgã vãad belgda neba. Dẽ a Zezi kãaba tɩɩgã wẽng n yeele: “Ned kõn leb n dɩ fo biis yɛs abada ye.” Yɩɩ vẽk-n-beoogã yibeoog la b bãng a Zezi kãabgã sẽn wa ne bũmb ninga, la a võore.

A Zezi ne a karen-biisã kell n sãagame n ta Zerizalɛm. A leba wẽnd-doogẽ wã a sẽn da kẽngẽ a yɩ tɩ zaamẽ zaabrã. La baraare, a maana wala a sẽn da maan yʋʋm a tãabã sẽn loogã, a sẽn da wa n wa yʋʋmd 30 Pakã. A Zezi riga raadbã la koosdbã n yiis wẽnd-doogẽ wã, n leeb ligd tɛkdbã taabl dãmba, la sẽn koosd-b walã goeelse. A pʋd n ka bas tɩ ned ba a yembr tʋk teoog n pɩʋʋg wẽnd-doogã pʋgẽ ye.

A ninga neb nins sẽn tekd ligdã la sẽn koosd-b rũmsã wẽnd-doogã pʋgẽ wã taale, n yeele: “A gʋlsame: B na n boola mam dooga tɩ pʋʋsg roog buud fãa yĩnga. La yãmb maan-a lame tɩ yɩ fãadb zĩiga.” B yaa fãadba, bala b ra koosda rũmsã toog wʋsg ne neb nins sẽn da ka tar b sẽn na n maaneg tɩ sã n ka b raa b maandã rũms bãmb nengẽ wã. Dẽnd sã n yaa ne a Zezi, toleng kãngã buud yaa fãabo.

Maan-kʋʋdba kãsem dãmba, gʋlsdbã, la nin-buiidã taoor dãmb sẽn wʋm a Zezi sẽn maan bũmb ningã, b leb n baoo sor n na n kɩt tɩ b kʋ-a. Woto b wilgdame tɩ b yaa neb b sẽn ka tõe n toeeme. La b ra ka mi b sẽn na n maan to-to n kʋ-a ye, bala neba fãa ra kelgda a Zezi sõma-sõma.

Sẽn paas Zʋɩf rãmbã, bu-zẽms neb me n wa Pakã. Bãmb yaa porzelit rãmba, sẽn dat n yeel tɩ b tuubame n kẽ Zʋɩf rãmbã tũudum pʋgẽ. Masã Gɛrk rãmb kẽere, sẽn yaa porzelit rãmb n wa a Filip nengẽ n kos n na n yã a Zezi. A Filip me kẽng n tɩ yãa a Ãndere, la tõe tɩ ra yaa sẽn na yɩl n tɩ sok-a n ges sɛk a woto sã n zemsame. Wõnda a Zezi ra ket n bee wẽnd-doogẽ wã, zĩig ning Gɛrk rãmbã sẽn da tõe n yã-a wã.

A Zezi ra miimi tɩ rasem a wãn pʋgẽ bala a ra na n kiimi. Rẽ n so t’a rɩk makr sẽn zems n bilg bũmb ning sẽn na n paam-a wã n yeele: “Wakat taame tɩ ninsaal Biiga na n paam waoogre. Mam yeta yãmb sɩd-sɩda tɩ kaaf sã n ka lʋɩ tom pʋgẽ n ki, a paada a yembr bala. La a sã n ki, a womda biis wʋsgo.”

Ka-beell yõod paoodame. La yaa wãn to yẽ, b sã n bʋd-a t’a “ki,” n ka leb n yaa ka-beelle? Rẽ poore a bundame n yi, n bɩ n lebg kaaf sẽn womd ki wʋsgo. Woto me, a Zezi ra yaa ninsaal sẽn zems zãng a yembr bala. La a sã n ki wẽn-sakr pʋgẽ, a yɩta sabab tɩ Wẽnnaam sõgen dãmb sẽn na n sak n kɩɩs b mens raab wa yẽ paam vɩɩm sẽn-kõn-sa. Rẽ n so t’a Zezi yeele: “Ned ninga sẽn nong a vɩɩm, a vɩɩm na sãam. La ned ninga sẽn ka nong a vɩɩm dũniyã zug ka, a na tall a vɩɩm wakat sẽn ka sɛta.”

Yaa vẽeneg t’a Zezi ra ka tagsd a meng yell bal ye, bala rẽ poore, a wilgame: “Ned sã n dat n maan mam tʋʋmde, bɩ a tũ maam. La mam sẽn be zĩig ninga, mam tʋm-tʋmd me na n zĩnda be. Ned sã n maan mam tʋʋmde, mam Ba na waoog-a.” Ad f sã n tũ a Zezi la f tʋm a yĩnga, f sɩd paamda keoor sẽn yaa kãsenga! Keoorã yaa f sẽn na n paam tɩ Ba wã kɩt tɩ f lagem ne Kiristã n dɩ naam Rĩungã pʋgẽ.

A Zezi tagsa nams-kãseng ning la kũ-toaag ning sẽn da gũud-a wã yelle, n paase: “Masã sũ-sãoong n tar maam. La mam na n yeelame tɩ bõe? . . . M Ba, fãag maam ne wakat kãngã.” A sã n da tõe n gilẽ bũmb ning sẽn da gũud-a wã, yɩtẽ-la noog ne-a! La ayo, wa a sẽn yeelã: “Yaa bõn kãng yĩng la mam wa n be ka masã.” A Zezi saka Wẽnnaam daaba fãa, baa yẽ mengã kũum sẽn yaa maoongã. Matɩe 21:12, 13, 18, 19; Mark 11:12-18; Luk 19:45-48; Zã 12:20-27.

▪ Bõe yĩng t’a Zezi ra tẽed t’a na n yãa kankam tɩ yaool n pa kankam wakate?

▪ Bõe yĩng t’a Zezi bool neb nins sẽn da koosd wẽnd-doogã pʋgẽ wã tɩ “fãadba”?

▪ Wãn-wãn to la a Zezi wõnd ka-beell sẽn kiida?

▪ A Zezi tagsg ra yaa wãn-wãn ne namsgã la kũumã sẽn da gũud-a wã?