Sak 104

B wʋma Wẽnnaam koɛɛg naoor a tãab-n-soaba

A ZEZI sẽn da wa n be wẽnd-doogẽ wã, a ra maanda yɩɩre, a sẽn da tog n ki rẽ poor bilfã yĩnga. Bũmb ning sẽn da pak-a n yɩɩdã yaa rẽ na n wa sãam a Ba wã yʋʋre. Rẽ n so t’a pʋʋse: “M Ba, waoog-y y yʋʋrã.”

A sẽn yeel dẽ wã, koɛɛg sẽn yit saasẽ n moon n yeele: “Mam da waoog-a lame, la m na n le waoog-a lame.”

Koɛɛgã linga neba sẽn da lagem n yas be wã, tɩ b ka wʋmd yɛlã võor ye. Neb kẽer sɩngame n yetẽ tɩ yaa “malɛk n gom ne bãmba.” Tɩ neb a taab yetẽ tɩ yaa saag n kelem. La sɩd-sɩda yaa Wẽnnaam a Zeova meng n gome! La woto ka pipi b sẽn wʋm Wẽnnaam koɛɛg sẽn tɩ loe ne a Zezi ye.

A Zezi lisgẽ wã yʋʋm a tãab la pʋɩ-sʋk la woto, Lisd a Zã ra wʋma Wẽnnaam koɛɛg sẽn gom a Zezi yell woto: “Ad-a yaa mam Bi-nongre, mam sẽn nong ne m sũur fãa zãnga.” Rẽ poore, yʋʋmd ning sẽn loogã Pakã poor bilf a Zezi sẽn da wa n paam tedgr a Zak, a Zã ne a Pɩɛɛr taoorã, b wʋma Wẽnnaam sẽn yeele: “Yõ wã yaa mam Bi-nongre, mam sẽn nong ne m sũur fãa zãnga. Bɩ y kelg-a!” La masã Nizã kiuug rasem 10, rasem a naas sẽn deng a Zezi kũumã, ninsaalb leb n wʋma Wẽnnaam koɛɛg naoor a tãab-n-soaba. La so-kãngã a Zeova goma sẽn na yɩl tɩ neb kʋʋng wʋme!

A Zezi wilgame: “Koe-kãng sẽn goma ka mam yĩng ye, yaa yãmb yĩnga.” Koe-kãngã yaa kaset sẽn wilgd t’a Zezi sɩd yaa Wẽnnaam Biribla, sẽn yaa Mesi ning b sẽn kãabã. A Zezi paasame: “Masã yaa dũni kãngã bʋʋd wakate. Masã b na n diga dũniyã naab t’a yi.” Sɩda, a Zezi sẽn yɩ wẽn-sakd a vɩɩmã pʋgẽ wã sɩd wilgdame tɩ zemsame tɩ b ‘rig’ a Sʋɩtãan munaafɩɩk sẽn yaa dũniyã naabã ‘t’a yi,’ sẽn dat n yeel t’a segda ne kʋʋbo.

A Zezi wilga a kũumã sẽn na n wa ne bũmb ning n yeele: “La mam sã n paam zẽkr dũniyã zugu mam na n boola neba fãa tɩ b wa mam nengẽ.” A Zezi kũuma ka rat n yeel tɩ b tõog-a lame ye, bala yaa ne rẽ maasem la a na n bool neb a taab tɩ b wa yẽ nengẽ n tõog n paam vɩɩm sẽn kõn sa.

La kʋʋngã kɩɩsame n yeele: “Tõog zãmsda tõnd tɩ Kirist paada wakat sẽn ka sɛta. La yãmb yɩɩ wãn n yeel tɩ yaa tɩlae tɩ Ninsaal Biiga paam zẽkre? Ninsaal Bi-kãng yaa yɛ neda?”

Baa ne b sẽn paam kaset wʋsgã fãa, hal n wʋm Wẽnnaam mengã koɛɛgã, neb wʋsg ka tẽ t’a Zezi la Ninsaal Biig hakɩkã, sẽn yaa Mesi ning b sẽn kãabã ye. Baasg zãnga, wa a sẽn da maan Zãn Kibsẽ wã kiis a yoob sẽn loogã, a Zezi leb n wilgame tɩ yẽ yaa “vẽenem,” n kõ a kɛlgdbã sagl-kãngã: “Bɩ y tẽ vẽenem yãmb sẽn tar vẽenem wakate, tɩ yãmb tõe n yɩ vẽenem kamba.” A Zezi sẽn yeel bõn-kãensã poore, a loogame n bao zĩig n solge, b sẽn da baood-a n na n kʋ wã yĩnga.

Zʋɩf rãmbã sẽn ka tẽ a Zezi wã pidsa a Ezai goam nins sẽn yet tɩ ‘nebã nin na n mumame tɩ b sũyã riglem sẽn na yɩl tɩ b ra tek yam tɩ b maag bãmbã.’ Yãab pʋgẽ, a Ezai yãa a Zeova saasẽ samana, t’a Zezi ra be ne a Zeova, ne ziir ning a sẽn da tar sẽn deng t’a yɩ ninsaalã. Baasgo, Zʋɩf rãmbã pidsa a Ezai sẽn gʋlsã, n tõdg tɩ b kõn sak kasetã sẽn wilgd t’a Zezi la b Fãagdã b sẽn kãab-bã ye.

Baasg zãnga, neb wʋsg nanambsã sʋk menga (Zʋɩf rãmbã bʋ-kaoodb sull kãseng sẽn yaa Sãnedrẽ wã neba) n sɩd tẽ a Zezi. Nanambs kãens a yiib yɩɩ a Nikodɛm ne a Zozɛf sẽn yit Arimate wã. La nanambsã ra nan ka togs tɩ b tẽeda a Zezi ye, b ra zoeta b na n wa rig-b n yiis b naamã zĩisẽ karen-doogã neb sʋka. Ad bãmbã sɩd bõn-yã!

A Zezi leb n wilgame: “Ned ninga sẽn tẽed maam, a ka tẽed maam [bal] ye, a tẽeda sẽn tʋm-a maama. La ned ninga sẽn yã maam, a yãa sẽn tʋm-a maama [me]. . . . Ned sã n kelg mam goama n ka reege, ka maam n kaood yẽ bʋʋd ye, tɩ bõe, mam ka wa n na n kao dũniyã bʋʋd ye, yaa tɩ fãag dũniyã. . . . Yaa goam nins mam sẽn da goma n na n kao yẽ bʋʋd yaoolem daare.”

A Zeova sẽn nong dũniyã kɩtame t’a tʋm a Zezi sẽn na yɩl tɩ neb nins sẽn na n tẽ-a wã paam fãagre. Yaa neba sẽn na n sak bũmb nins Wẽnnaam sẽn kõ a Zezi noor t’a togsã la b na n paam fãagre. Bʋʋdã na n kaoo “yaoolem daare,” sẽn yaa Kirist Yʋʋm Tusr Naamã sasa wã.

A Zezi baasa a goamã n yeele: “Mam ka gom ne m meng pãng ye. La m Ba sẽn tʋm maama, b kõo maam noor ne bũmb nins mam sẽn na n togsã, la mam sẽn na n goma. La mam miime tɩ bãmb tõoga wata ne vɩɩm sẽn ka sɛta. Woto yĩnga, mam sẽn gomd bũmb ninsa fãa, mam gomda wa m Ba sẽn togs maamã.” Zã 12:28-50; 19:38, 39; Matɩe 3:17; 17:5; Ezai 6:1, 8-10.

▪ Naoor a tãabã b sẽn wʋm Wẽnnaam koɛɛg sẽn tɩ loe ne a Zezi wã yaa wakat bʋse?

▪ Wãn-wãn la no-rɛɛs a Ezai yã a Zezi ziirã?

▪ Nanambs nins sẽn tẽ a Zezi wã yaa ãnda rãmba, la bõe yĩng tɩ b ka sak n togs rẽ vẽenega?

▪ ‘Yaoolem daarã’ yaa bõe, la bõe zug la b na n tik n kao neba bʋʋd wakat kãnga?

Sak 105

Daar sẽn yaa kãseng sɩngre

A ZEZI sẽn yi Zerizalɛm tẽnẽ wã raar zaabrã, a leba Betani, sẽn be oliiv tɩɩs tãngã yaang sigdgẽ wã. A yaoolem mooneg tʋʋmdã Zerizalɛmã rasem a yiib-n-soabã baasg la woto. Sik kae t’a ra leb n tɩ gãanda a zoa a Lazaar yirã ye. A sẽn yi Zeriko n wa arzũma tɛkã, yʋng a naas-n-soab a sẽn gãand Betani la woto.

Talaatã sẽn yaa Nizã rasem 11 wã yibeoog pĩnda, a Zezi ne a karen-biisã ra leb n dɩka sore. Daar n kãngã yɩɩ a Zezi mooneg tʋʋmdã daar sẽn yɩ kãsenga, daar ning a sẽn tʋm n tɩ yɩɩdã. Ra leb n yaa yaoolem daar a sẽn zĩnd wẽnd-doogẽ wã, la a tʋʋmdã yaoolem daare, sẽn deng a bʋʋdã la a kʋʋbã.

A Zezi ne a karen-biisã leb n dɩka sor ning sẽn yit oliiv tɩɩs tãngã zug n teesd Zerizalɛmã. Sorã zugu, a Pɩɛɛr yãa tɩɩg ning a Zezi sẽn da kãab wẽng a yɩ tɩ zaamẽ yibeoogã. A yeelame: “Karensaamba, ges-y kankanga yãmb sẽn kãabã, a kʋɩɩme.”

La bõe yĩng t’a Zezi kʋ tɩɩgã? A wilga kankangã kʋʋb võore, n yeele: “Mam yeta yãmb sɩda tɩ yãmb sã n tar tẽebo n ka sãmbdẽ, yãmb kõn maan bũmb ninga sẽn maan kankanga bal ye, la yãmb sã n yeel tãng kãngã [oliiv tɩɩs tãngã b sẽn da yas a soab zugã] t’a serg n kẽ ko-kãsenga pʋgẽ, a na n yɩɩ woto bala. Bũmb ninga fãa yãmb sẽn na n kos ne tẽeb pʋʋsg pʋgẽ, yãmb na n deegame.”

Woto, a Zezi kɩtame tɩ tɩɩgã kʋɩ sẽn na yɩl n zãms a karen-biisã tɩ b segd n tẽe Wẽnnaam. Rẽ la a sẽn yeel-bã: “Yãmb sẽn na n pʋʋs n kos bũmb ninga fãa bɩ y tẽ tɩ yãmb deeg-a lame, la yãmb na yã t’a pidsame.” Ad wã yaa zãmsg sẽn tar yõod wʋsg b sẽn segd n bãnge, sẽn yɩɩd fãa mak-kãsems nins b sẽn da na n seg rẽ poor bilfã yĩnga! La loees a to me n be kankangã kʋɩɩb ne tẽebã sʋka.

Wa kankangã vãad sẽn tõe n belg nedã, ne nif gesgo Israɛll buudã me ra tudgda neba. Baa buudã sẽn da maan kaool ne Wẽnnaamã, tɩ b sã n get zugẽ-zugẽ bɩ ra wõnd a tũuda Wẽnnaam noyã, buudã baas n wilgame t’a ka tar tẽeb ye, t’a ka tõe n wom bi-sõma ye. Tẽeb kaalem kãng yĩng kɩtame t’a ra na n zãgs Wẽnnaam meng Biriblã rẽ poor bilfu! Woto yĩnga, a Zezi sẽn kɩt tɩ kankangã kʋɩ wã, ra yaa sẽn na n wilg buudã sẽn ka tar tẽebã la sẽn ka womd biisã baasg sẽn na n yɩ a soaba.

Pa kaoos la a Zezi ne a karen-biisã kẽ Zerizalɛm pʋgẽ ye. La wa b sẽn da minim n maand to-to wã, b kẽnga wẽnd-doogẽ wã, t’a Zezi sɩng neba zãmsgo. Sãmbg sẽn ka be, maan-kʋʋdba kãsem dãmb la nin-buiidã kãsem dãmb ra ket n tẽra a Zezi sẽn maan ligd tɛkdbã to-to wã a yɩ tɩ zaamẽ wã. Rẽ n so tɩ b bao a Zezi noor woto: “Yãmb maanda bõn-kãens ne ãnda noore, la ãnda n kõ yãmb no-kãnga?”

T’a Zezi leok-ba: “Mam me na n soka yãmb bũmbu, la yãmb sã n leok maam, mam na togs yãmb mam sẽn paam noor zĩig ninga tɩ maan bõn-kãense. A Zã lisgã yii yɛ? A yii [saasẽ] bɩ, bɩ a yii ninsaalb nengẽ?”

Maan-kʋʋdbã la kãsem dãmbã yãa taab sẽn na yɩl n bãng b sẽn na n leok to-to. “Tõnd sã n leok t’a yii [saasẽ], bãmb na n yeelame tɩ yaa bõe tɩ tõnd ka tẽ yẽnda? La tõnd sã n leok t’a yii ninsaal nengẽ, tõnd zoeta kʋʋnga, tɩ bõe, neba fãa tẽedame t’a Zã yaa Wẽnnaam no-rɛɛsa.”

Taoor dãmbã ra ka mi b sẽn na n yɛɛlg ye. Dẽ, b leoka a Zezi: “Tõnd ka mi ye.”

Dẽ la a Zezi me leok-ba: “Mam me ka na n togs yãmb mam sẽn paam noor zĩig ning n maand bõn-kãens ye.” Matɩe 21:19-27; Mark 11:19-33; Luk 20:1-8.

▪ Bõe n kɩt tɩ Nizã kiuug rasem 11 talaatã ra yaa raar sẽn ka wõnd a taaba?

▪ Zãms-bʋg la a Zezi kõ a sẽn kɩt tɩ kankangã kʋɩ wã?

▪ Wãn-wãn la a Zezi leok b rãmb nins sẽn da sokd-a tɩ yɛ la a paam noor n maand yɛlã?