Sak 112

A Zezi yaoolem Pakã kolgame

NIZÃ kiuug rasem 11 talaatã daar zaabr sẽn da wa n tat bal la a Zezi zãms a tʋm-tʋmdbã n sa oliiv tɩɩs tãngã zugu. Ad baraar sɩd yɩ yaamse! Masã, tõe tɩ ra yaa b sẽn da wa n lebd Betani n na n tɩ gãandã la a Zezi yeel a tʋm-tʋmdbã: “Yãmb mii t’a keta rasem a yiibu tɩ Pak ta, la b na n zãmba Ninsaal Biiga tɩ b ka bãmb kũum [da-luk] zugu.”

Wõnda vẽk-n-beoog arba sẽn da yaa Nizã rasem 12 wã, a Zezi baoo zĩig sẽn yaa sɩɩ n tɩ vʋʋs ne a tʋm-tʋmdbã. Yɩ tɩ zaamẽ wã, a ra zaba tũudmã taoor dãmb zãma wã sʋka, la a bãngame tɩ b baoodame n na n kʋ-a. Dẽ, arbã a ka yi nebã sʋk ye, bala a ra ka rat tɩ bũmb ba a ye gɩdg-a t’a ka maan Pakã ne a tʋm-tʋmdbã vẽk-n-beoogã zaabr ye.

Wakat kãng tɩ maan-kʋʋdbã kãsem dãmb la nin-buiidã kãsem dãmb ra tigma maan-kʋʋd kãsem a Kayɩf yirã. A Zezi sẽn puk b bãong yɩ tɩ zaamẽ wã zabd-b-la wʋsgo. Dẽ, b ra yẽsda ne taab sẽn na yɩl n maan sɩlem n kɩt tɩ b kʋ-a. Baasg zãnga b ra yetame: “Bɩ a ra yɩ tigra daare tɩ rãmbg wa zĩnd neba sʋk ye.” B ra zoeta neba, bala neba ra nonga a Zezi.

Tũudmã taoor dãmb sẽn da zems taab ne wẽnem n dat n kʋ a Zezi wã wakate, ned n wa b nengẽ. Sɩda, ling-b lame, bala nin-kãng ya a Zida Iskariot, a Zezi meng tʋm-tʋmda. A Sʋɩtãan ning-a-la yam-yook t’a zãmb a Zusoabã. A Zida sokame: “Yãmb na n kõo maam bõe tɩ m yõk bãmb n kõ yãmba?” Ad a Zida sok kãngã sɩd nooga b sũyã! Ne sũ-noogo b sakame n na n yao-a ligd bõoneg 30, sẽn yaa yamb ligd wa sẽn zems ne a Moiiz Tõogã kaoolã. Sẽn sɩng rẽ tɛka, a Zida ra baooda wakat sẽn zems n na n zãmb a Zezi n kõ-ba, tɩ kʋʋng ka be yambẽ ye.

Nizã kiuug rasem 13 wã ra sɩngda arba wĩndg kõomẽ. A Zezi sẽn yi Zeriko n wa arzũm ning sẽn loogã yĩngã, rẽnd ya a yʋnd a yoob la a yaoolem soab Betani la woto. Vẽk-n-beoogã sẽn yaa lamusã, yaoolem segls la b ra segd n maan Pakã sẽn da sɩngd baraar wĩndg lʋɩɩsẽ wã yĩnga. Yaa wakat kãng la b tog n kodg Pakã pe-bil n sẽ mumdi. Yɛ la b ra na n maan kibsã, la ãnda n na n maan seglsã?

A Zezi pa togs yel-kãensã sẽn na n yɩ to-to ye. Tõe tɩ yaa sẽn na yɩl t’a Zida ra tɩ togs maan-kʋʋdbã kãsem dãmb tɩ b wa yõk-a Paka maaneg wakat ye. La masã, sẽn da yaa lamusã wĩnd-kaoorã, a Zezi zĩnda Betani n tʋm a Pɩɛɛr ne a Zã, n yeel-ba: “Bɩ y kẽng n tɩ segl Pak tõnd yĩng tɩ d rɩ.”

Tɩ b sok-a: “Yãmb datame tɩ tõnd tɩ segl dɩɩba yɛɛnẽ?”

T’a Zezi leoke: “Yãmb sã n kẽ tẽnga pʋgẽ, yãmb na n sega rao sẽn zɩt yʋʋr ne koom. Bɩ y tũ-a n kẽ yir ninga a sẽn na n kẽ wã. La bɩ y yeel yira soab yaa: Karen-saamb sokda yãmb tɩ yaa: Doog bee yɛ maam ne m karen-biisã sẽn na n kẽ n dɩ Pake? La a na n wilga yãmb do-kãseng sẽn be roog zugu n tar teed fãa. Yaa be la yãmb na n segl Pake.”

Sãmbg sẽn kae, yirã soab ya a Zezi karen-biiga, sẽn tõe n da gũudẽ t’a Zezi wa kos a roogã kibsã yĩnga. Sẽn ya a soab fãa, a Pɩɛɛr ne a Zã sẽn ta Zerizalɛmã, b yãame tɩ bũmba fãa segla wala a Zezi sẽn da reng n togsã. Dẽ, neb a yiibã kẽngame n tɩ segl pe-bilã la b maan segls a taabã sẽn na yɩl tɩ Pakã maandb 13, sẽn ya a Zezi ne a tʋm-tʋmdb 12 wã, paam b sẽn datã Pakã yĩnga. Matɩe 26:1-5, 14-19; Mark 14:1, 2, 10-16; Luk 22:1-13; Yikri 21:32.

▪ Arbã raare wõnda bõe la a Zezi maan-yã, la bõe yĩnga?

▪ Tigis-bʋg n maand maan-kʋʋd kãsmã yiri, la bõe yĩng t’a Zida Iskariot kẽng tũudmã taoor dãmb nengẽ?

▪ Ãnda rãmb la a Zezi tʋm Zerizalɛm lamusa raare, la yaa bõe yĩnga?

▪ Bõe la nin-kãensã a Zezi sẽn tʋm Zerizalɛmã tɩ yã, tɩ leb n wilgdẽ t’a Zezi tõe n maana yel-soalma?

Sak 113

Zãmsg sik-m-mengã wɛɛngẽ yaoolem Pakã wakate

A ZEZI ra kõo a Pɩɛɛr ne a Zã noyã, tɩ b ra zoe n ta Zerizalɛm n segl Pakã. Yaa rẽ poor zaabr sasa la a Zezi ta be, la wõnda karen-biis piiga tũ-a lame. A Zezi ne a poorẽ dãmbã sẽn da wa n sigd oliiv tɩɩs tãngã tɩ wĩndgã ra lʋɩtame. Hal tɩ ta a vʋʋgrã poore, woto ra yaa yaoolem soab a Zezi sẽn zĩnd tãn-kãngã zug n ges tẽngã ne wĩntoogo.

Pa kaoos la a Zezi ne a poorẽ dãmbã ta galʋ-tẽngẽ wã, n kẽng zak ning b sẽn na n tɩ maanẽ Pakã ye. B rʋʋ zugẽ doogẽ wã n yã tɩ bũmba fãa segla sẽn na yɩl tɩ b maan Pakã beenẽ. A Zezi ra gũuda wakat kãngã, wa a sẽn yeelã: “Mam dag n data ne m sũur fãa n dɩ Pak kãngã ne yãmb tɩ m toogã nan ka ta ye.”

Pakã maandb ra minim n yũuda divẽ vɛɛr dãmb a naase. A Zezi sẽn deeg vɛɛr a tãab soabã poore, a pʋʋsa bark n yeele: “Deeg-y bõn-yũudl kãngã n pʋɩ taaba. Tɩ bõe, mam yeta yãmba tɩ mam ka na n le yũ viyn biis koom yɛs hal tɩ Wẽnnaam [Rĩungã] wa.”

Rɩɩbã wakate, a Zezi yikame n pidg a zugẽ fuugã, n dɩk peende, la a pids laag ne koom. Ra mi n yaa gãag soab n kɩtd tɩ b waas sãamb nao. La so-kãngã gãag soab sẽn da ka be wã, ya a Zezi n maan tʋʋm kãnga. Tʋm-tʋmdbã sʋka, a yembr ra tõe n yik n maana rẽ. La wõnda wags-n-taar buud n da ket n be b sʋka, rẽ n so tɩ bãmb ned ba a yembr ka maan dẽ wã. Masã, a Zezi sẽn sɩng b nao wã waasgã, yãnd yõk-b lame.

A Zezi sẽn ta a Pɩɛɛr nengẽ, a tõdgame n yeele: “Mam ka na n sak tɩ yãmb waas mam nao wã abada.”

T’a Zezi yeel-a: “Mam sã n ka waas foom, dall fo ka mam dẽnd ye.”

T’a Pɩɛɛr leoke: “Zusoaba, ka mam nao wã bal ye, la mam nusa ne m zuga me.”

Dẽ a Zezi leokame: “Ned ninga sẽn so koom ka le baood koom soob yɛs ye, a sã n ka a nao wã waasg bala t’a tõe n lebg yɩlemd meng-menga. Yãmb yaa yɩlma, la ka y fãa ye.” A yeela woto, bala a ra miimi t’a Zida Iskariot ra segendame n na n zãmb-a.

A Zezi waasa bãmb 12 wã fãa nao, ne a zãmbd a Zida me nao wã. Rẽ poore a lebs n yeelga a zugẽ fuugã, n leb n tɩ zĩnd rɩɩbã zĩigẽ yɛsa. La a yeele: “Yãmb bãnga bũmb ninga mam sẽn maan yãmba võor bɩ? Yãmb boonda maam tɩ karen-saamba la Zusoaba. Yãmb yeela sɩda, tɩ bõe, mam yaa woto. Mam sẽn yaa yãmb Zusoaba la y karen-saamba n waas yãmb nao wã, yãmb me tog n waasa taab nao wã. Tɩ bõe, mam kõo yãmb mamsg tɩ y maan wa mam sẽn maan yãmbã. Mam yeta yãmb sɩd-sɩda tɩ tʋm-tʋmd ka yɩɩd a zu-soab ye, la b sẽn tʋm a soaba ka yɩɩd sẽn tʋm-a yẽ wã ye. Yãmb sẽn bãng bõn-kãensã, yãmb sã n maan woto, bark bee yãmb zutu.”

Ad wã yaa zãmsg sẽn wilgd tɩ b segd n sak n tʋma sik-m-meng tʋʋma! Tʋm-tʋmdbã ka segd n baoodẽ n na n yɩ taoor dãmba, n tagsdẽ tɩ bãmb yaa nin-bɛd wʋsg hal tɩ neb a taabã segd wakat fãa n tʋmd n kõt bãmb ye. B segd n dɩka togs-n-taar ne makr ning a Zezi sẽn kõ wã. Ka yet tɩ b rɩk taab nao waasg tɩ lebg minung ye. Ayo, yaa sak n tʋm n kõ neba, n da maan welsg ye, baa tʋʋmdã sẽn sõs n yaa tʋʋm-yaalg bɩ a ka noom-f to-to. Matɩe 26:20, 21; Mark 14:17, 18; Luk 22:14-18; 7:44; Zã 13:1-17.

▪ A Zezi sẽn da wa n kẽed Zerizalɛm n na n maan Pakã, bõe yĩng t’a sẽn da get tẽnga to-to wã pa wa raasenkam?

▪ Pakã wakate, vɛɛr bʋg la a Zezi ning bark n yaool n kɩs tʋm-tʋmdb 12 wã?

▪ A Zezi sẽn da wa n be tẽng zug wakate, bõe la gãag soab ra minim n maand sãana, la bõe yĩng tɩ b ka maan dẽ Pak ning a Zezi sẽn maan ne a karen-biisã wakate?

▪ A Zezi bõn-datl ra yaa bõe, a sẽn maan tʋʋmd sẽn ka tar ziir n waas a tʋm-tʋmdbã nao wã?