Sak 132

A bee Wẽnnaam dɩtgo

VƲƲSEM sõngã pʋdgr Pãntekotẽ wã yɩɩ kaset sẽn wilg t’a Zezi taa saasẽ. Yãab ning a Etɩɛn sẽn paam rẽ poor bilfã me wilgdame t’a Zezi taa be. Sẽn deng tɩ b lob a Etɩɛn kug a sẽn kõ kaset ne kɩs-sɩdã yĩngã, a zẽka a koɛɛg n yeele: “Gese, mam yãa saasẽ sẽn pake, la Ninsaal Biiga sẽn yɛs Wẽnnaam dɩtgo.”

A Zezi ra bee Wẽnnaam dɩtg n gũudẽ t’a Ba wã kõ-a no-kãngã: “Dɩ naam y bɛɛba sʋka.” La hal t’a wa yik n na n zab ne a bɛɛbã, bõe la a Zezi ra maanda? A ra rɩta naam a karen-biis nins sẽn zae ne vʋʋsem sõngã zutu, n wilgd-b sor koe-noogã mooneg pʋgẽ. A ra leb n segend-b lame, tɩ b sã n wa vʋʋg bɩ b lebg a rĩm-taas a Ba wã Rĩung pʋgẽ.

Wala makre, a Zezi yãka a Soll (b sẽn wa n boond ne a Rom yʋʋrã t’a Pollã) t’a lʋɩ taoor karen-biisã maaneg tʋʋmd pʋgẽ bu-zẽmsã tẽnsẽ. A Soll ra tara yẽesem Wẽnnaam Tõogã yĩnga, la Zʋɩf rãmbã tũudum taoor dãmb ra tudg-a lame. Yaa rẽ yĩng la a sẽn da sak a Etɩɛn kʋʋbã, la a leb n kos maan-kʋʋd kãsem a Kayɩf sor n na n kẽng Damas n tɩ yõg rap la pagb nins sẽn ya a Zezi karen-biisã n tall n wa Zerizalɛmã. La a Soll sẽn da wa n be sorẽ, vẽenem kãseng n yi yĩngr n yãg n bui-a t’a lʋɩ tẽnga.

Koɛɛg n yi zĩig ned sẽn ka neẽ n sok-a: “Soll, Soll, yaa bõe tɩ fo namsd maam?” T’a Soll soke: “Zusoaba, yãmb yaa ãnda?”

Tɩ b leok-a: “Mam ya a Zezi fo sẽn namsd a soabã.”

Vẽenemã sẽn yaa yel-solemdã kɩtame t’a Soll lebg zoanga. A Zezi yeela a Soll t’a kẽng Damas n tɩ gũ t’a na n kõ-a-la noy beenẽ. Rẽ poore a Zezi vẽnega a meng ne a karen-biig a yembr yʋʋr sẽn boond t’a Ananias yãab pʋgẽ. A Zezi goma a Poll yell ne a Ananias n yeele: “Yẽ yaa mam nin-tũusdga sẽn na n wilg neb sẽn ka Zʋɩf buudu la rĩm dãmba la Israɛll yagens mam yʋʋre.”

Sɩd me, ne a Zezi teelgo a Soll (b sẽn da boond masã t’a Pollã) ne koe-moondb a taab tõogame tɩ koe-noogã la b zãmsg tʋʋmdã kẽng taoor wʋsgo. Sɩda, sẽn zems yʋʋm 25 a Zezi sẽn vẽneg a meng ne-a Damas sorã zugã poore, a Poll gʋlsame tɩ ‘koe-noogã moona dũniyã fãa.’

Yʋʋm wʋsg loogr poore, a Zezi kõo a tʋm-tʋmd nongr a Zã yãab toɛy-toɛy sẽn pʋg taaba. Ne yãab kãensã a sẽn bilg Biiblã sebr ning sẽn yaa Wilgrã pʋgẽ wã maasem, b sɩd tõe n yeelame t’a Zã vɩɩmdame n kaoos n yã a Zezi waoong a Rĩungã naamẽ. A Zã yeelame tɩ ne “vʋʋsem sõng pãnga,” (NW ) b talla yẽ n kẽng taoor wakata pʋgẽ n ta “Zusoaba raare.” ‘Raar’ kãng yɩɩ wakat bʋgo?

D sã n zãms Biiblã bãngr-goam neere, n paas a Zezi mengã bãngr-gomd sẽn tɩ loe ne yaoolem dayã, d yãtame tɩ ‘Zusoaba raar’ sɩnga yʋʋmd 1914 sẽn yɩ yʋʋmd b sẽn ka tõe n yĩmã! Dẽ, yɩɩ yʋʋmd 1914 la a Zezi lebg n wa ne manesem ninsaalb nin sẽn ka ne wã, tɩ ka tũ ne zãma wã fãa maan kaset ne a waoongã ye. La ra ya a sõgen dãmb sẽn yaa sakdbã bal n bãng t’a lebgame. Yɩɩ yʋʋm kãng la a Zeova kõ a Zezi noor t’a tɩ rɩ naam a bɛɛbã sʋka!

A Zezi saka a Ba wã noore, n dig a Sʋɩtãan ne a zĩn dãmbã n yiis saasẽ, n sik-b tẽngã zugu. A Zã sẽn yã yel-kãensã sẽn maan yãabã pʋgẽ poore, a wʋma koe-kãseng sẽn yit saasẽ sẽn yete: “Masã fãagre ne pãnga la tõnd Wẽnnaam [Rĩungã] ne bãmb Kirist pãnga waame!” N-ye, yʋʋmd 1914, Kiristã sɩnga naam dɩɩbo!

Ad wã sɩd yɩɩ koe-noog n kõ a Zeova balemdb nins sẽn be saasẽ wã! B sagl-b lame: “[Saase] la yãmb dãmba sẽn be be, bɩ y maan sũ-noogo!” La yɛla yaa wãn to-to ne b rãmb nins sẽn be tẽng zugã? Koɛɛgã sẽn yit saasẽ wã paasame: “Toog bee ne neb nins sẽn be dũniyã zugu la ko-kãsenga pʋgẽ wã. Tɩ bõe, Sʋɩtãana sigame n wa yãmb nengẽ, la a sũ-puugra yaa kãsenga a sẽn bãng t’a wakat yaa bilfa yĩnga.”

Tõnd bee wakat bilf kãng pʋgẽ masã woto. Masã neba wilgda b sã n tara zʋg-sõma nins b sẽn baoodã n na n kẽ Wẽnnaam dũni paalgã pʋgẽ, bɩ b sã n yaa nin-wẽns n zems ne sãoongo. Sɩda, yãmb mengã baasg sẽn na n yɩ to-to wã bee ne y sã n na n saka Wẽnnaam Rĩungã koe-noogã b sẽn moond tẽngã gill zug Kiristã sor-wilgr pʋgẽ wã bɩ y sã n pa na n sak-a.

Rẽ poore Wẽnnaam na n kɩtame t’a Zezi Kirist sãam a Sʋɩtãan dũni wẽngã zãng ne neb nins fãa sẽn teend-a wã tẽngã zugu. A Zezi na n yiisa wẽngã fãa zabr ning b sẽn boond Biiblã pʋgẽ tɩ Armagedõ wã sasa. Ãndũniyã pʋgẽ, Wẽnnaam a Zeova sẽn yãk a toogo, a Zezi la ned ning sẽn yaa kãseng n yɩɩda. Armagedõ poore, a Zezi na n yõka a Sʋɩtãan ne a zĩn dãmbã n sẽb n lob “bog-zulung” pʋgẽ tɩ b zĩnd be yʋʋm tusri. Bog-zulung kãng makda b sẽn ka na n tõog n maan baa fɩ wã. Tʋʋma 7:55-60; 8:1-3; 9:1-19; 16:6-10; Yɩɩl Sõamyã 110:1, 2; Hebre dãmba 10:12, 13; 1 Pɩɛɛr 3:22; Luk 22:28-30; Kolos rãmb 1:13, 23; Wilgri 1:1, 10; 12:7-12; 16:14-16; 20:1-3; Matɩe 24:14.

▪ A Zezi sẽn dʋ saasẽ wã poore, zĩ-bʋg la a ra be, la bõe la a ra gũuda?

▪ A Zezi sẽn dʋ saasẽ wã poore, ãnda zug la a ra rɩt naam, la wãn to la naam kãng ra vẽnegda?

▪ ‘Zusoaba raar’ sɩnga wakat bʋgo, la bõe n maan a sɩngrẽ wã?

▪ Wãn to la moonegã tʋʋmd sẽn maand rũndã-rũndã wã pak tõnd ned kam fãa?

▪ Moonegã tʋʋm kãngã sã n wa maan n sa, yel-bʋs n na n pʋgle?