Kiris-nebã vɩɩm la b tʋʋma tigissã na-kẽndr not-rãmbã
WAO-FUGDG RASEM A 5-11
D SẼN BÃNG BIIBLÃ KARENG PƲGẼ | MATYE 12-13
“Ki ne nadens yel-bũndi”
w13-MM 1/7 15-16 s. a 2-3
“Gese, mam bee ne yãmb wakat fãa”
Ki ne nadens yel-bũndã wilgda a Zeezi sẽn na n tigim neb nins b sẽn mak ne ki wã to-to, la rẽ sẽn na n yɩ wakat ninga. Nin-kãens yaa sẽn paam-b vʋʋsem sõng zaeeb n na n wa rɩ naam ne-a wã. Yaa yʋʋmd 33 Pãntekotã sasa la b sɩng bõn-buudã fẽrgre. Dũniyã saab wakate, b na n tigma neb nins sẽn paam vʋʋsem sõng zaeeb n ket tẽngã zug la sẽn zems ne soolmã, tɩ b kẽng saasẽ. Wakat kãnga, tigsgã na n saame. (Mat. 24:31; Wil. 7:1-4) Wa ned sẽn dʋ tãng zug sẽn tõe n tool n ges yɩɩgã, yel-bũndã sõnga a Zeezi karen-biisã tɩ b bãng yɛl sẽn na n zĩnd na maan yʋʋm 2000 pʋgẽ. Yel-kãens la bʋse? Yel-bũndã gomda bõn-buudã fẽrgr yelle, ki wã sẽn na n yi n bɩ, la tigsgã yelle. Sõs-kãngã pʋgẽ, d na n goma tigsgã yell n yɩɩda.—Ges-y pipi vẽnegrã.
A ZEZI KOGENDA SẼN PAAM-B VƲƲSEM SÕNG ZAEEBÃ
Yʋʋmd 100 soabã loogr poor la nadensã sɩng dũniyã sẽn yaa pʋʋgã pʋgẽ wã yiibu. Yaa wakat kãng la kiris-neb ne yʋʋrã sɩng pukri. (Mat. 13:26) Yʋʋmd 300 wã sasa tɩ kiris-neb ne yʋʋrã sõor looga kiris-neb hakɩkã hal wʋsgo. Tẽeg-y tɩ yel-bũndã pʋgẽ, tʋm-tʋmdbã kosa pʋʋgã soab sor n na n võ nadensã. (Ges-y vẽnegr a 2.) (Mat. 13:28) Pʋʋgã soab leokame tɩ bõe?
w13-MM 1/7 16 s. a 4
“Gese, mam bee ne yãmb wakat fãa”
A Zeezi wilgame tɩ pʋʋgã soab yeelame tɩ b bas ki wã ne nadensã “tɩ b bɩ ne taab hal tɩ ta tigsg wakate.” Woto wilgdame tɩ sẽn sɩng ne tʋm-tʋmdbã wakat n tãag rũndã, wakat fãa, kiris-neb sẽn paam vʋʋsem sõngã zaeeb n be tẽngã zugu. A Zeezi sẽn wa n yeel a karen-biisã bũmb ningã sɩd wilgda rẽ. A yeel-b-la woto: ‘Mam bee ne yãmb wakat fãa hal tɩ ta wakat sɛɛbo.’ (Mat. 28:20) Dẽnd a Zeezi pʋlmame t’a na n kogla sẽn paam-b vʋʋsem sõng zaeebã n tãag saabã wakate. La yel-bũndã wilgame tɩ nadensã na n bɩɩme n lim ki wã. Rẽnd sasa kãnga, d ra pa tõe n bãng neb nins sẽn sɩd paam vʋʋsem sõng zaeebã n welg ye. La na maan yʋʋm 30 nand tɩ tigsgã wakat sɩnge, lebga nana tɩ b bãng neb nins b sẽn mak ne ki wã n bake. Bõe yĩnga?
w13-MM 1/7 18 s. 10-12
“Gese, mam bee ne yãmb wakat fãa”
Pipi, nadensã kɛɛbo. A Zeezi yeela woto: ‘Tigsgã wakate, mam na n yeela tigsdbã tɩ b reng n kɛ nadensã n loe kila.’ Yʋʋmd 1914 tɛka, malɛgsã sɩnga nadensã sẽn makd kiris-neb ne yʋʋrã kɛɛbo, n welgd-b ne neb nins sẽn paam vʋʋsem sõng zaeebã sẽn yaa Rĩungã kambã.—Mat. 13:30, 38, 41.
Malɛgsã tara nadensã kɛɛbo, tɩ welgr ning sẽn be kiris-neb ne yʋʋrã la kiris-neb hakɩkã sʋkã lebgd vẽeneg n paasdẽ. (Wil. 18:1, 4) Yʋʋmd 1919 wã, lebga vẽeneg tɩ Babilon Kãsengã lʋɩɩme. Yaa koe-moonegã n kɩt tɩ b ne welgr ning sẽn be kiris-neb hakɩkã ne kiris-neb ne yʋʋrã sʋkã n yɩɩda. Biiblã Zãmsdbã taoor lʋɩtbã sɩngame n wilgdẽ tɩ koɛɛgã mooneg yaa tɩlae ne ned kam fãa. Wala makre, yʋʋmd 1919 wã, b yiisa sebr (To Whom the Work Is Entrusted) n sagl sẽn paam-b vʋʋsem sõng zaeebã fãa tɩ b moon koɛɛgã zak-zaka. Sebrã pʋgẽ, b yeela woto: “Wõnda tʋʋmdã yɩɩda d pãnga, la yaa Zu-soabã tʋʋmde. A na n sõng-d lame tɩ d tõoge. Y sẽn paam n naag tʋʋmdẽ wã yaa zu-zẽkre.” Kiris-neb hakɩkã manesem yɩɩ wãna? Yʋʋmd 1922 Gũusg Gasgã pʋgẽ, b yeelame tɩ wakat kãng tɛka, Biiblã Zãmsdbã maneg n wɩnga ne koɛɛgã moonego. Sẽn pa yã n kaoose, zak-zak moonegã lebga bũmb sẽn kɩt tɩ nebã bãng tɩ bãmb la kiris-neb hakɩkã. Hal n tãag rũndã, ket n yaa woto.
Yiib-n-soaba, ki wã wʋkre. A Zeezi yeela malɛgsã tɩ ‘b wʋk ki wã n sui a baoorẽ wã.’ (Mat. 13:30) Yʋʋmd 1919 wã tɛka, b tigimda sẽn paam-b vʋʋsem sõng zaeebã kiris-neb tigingã b sẽn yɩlgã pʋgẽ. La sã n yaa ne sẽn paam-b zaeeb n ket tẽngã zug saabã wakatã, yaa b sẽn wat n ki n loog saasẽ la d tõe n yeel tɩ tigsgã saame.—Dan. 7:18, 22, 27.
D bʋgs Wẽnnaam Gomdã zug neere
Mat. 12:20, nwtsty
fɩtl laong sẽn ket n nusdẽ: Pĩnd lãmp-rãmbã ra maana ne yagdo. B ra ningda oliiv kaam a pʋgẽ wã n sagl laong n yõgen tɩ wita. Gɛrkã gom-bil ning b sẽn lebg tɩ “fɩtl laong sẽn ket n nusdẽ” wã tog n bilgda fɩtl bugum sẽn boog wʋsg n dat n ki, wall sẽn ki n wisdẽ. Ezayi 42:3 wã pĩnd n goma a Zeezi nimbãan-zoeerã yelle, n yeel t’a pa na n kiis fɩtl peend bugum sẽn yaa bilf ye. Woto rat n yeelame t’a pa na n koms sik-m-mens rãmb nins sẽn da namsdã raood n baas ye.
w16.10-MM 32
Yãmb ra miime bɩ?
Pĩnd wẽndẽ, ned ra tõe n sɩd kẽe a to pʋʋgẽ n bʋd nadens bɩ?
MATYE 13:24-26 pʋgẽ, a Zeezi wẽe yel-bũnd n yeele: “Arzãn soolem wẽnda wa rao sẽn bʋd bõn-bu-sõng a pʋʋgẽ. La nebã sẽn gõe wakate, a bɛ wã waa n bʋda nadens koodã sʋk n bas n looge. Koodã sẽn zẽk n wom biisi, nadensã me pukame.” Seb-gʋlsdb kẽer yetame tɩ bãmb pa kɩs sɩd tɩ bũmb a woto ra maandame ye. La Rom dãmbã bʋ-kaoor sɛb n wilgd t’a buud ra beeme.
Sebr a ye yeelame tɩ Rom laloa wã pʋgẽ, ned sã n bʋd nadens a to pʋʋgẽ sũ-dokr yĩnga, a segda ne sɩbgre. Sebrã paasame tɩ b sẽn yiis noor yel-kãngã wɛɛngẽ wã wilgdame tɩ yaa bũmb sẽn da wae. Bʋ-kaoor yel-mit a Alastair Kerr yeelame tɩ yʋʋmd 533 wã, Rom naab a Zistiniyẽ yiisa sebr b sẽn boond tɩ Digeste. Be, a sõdga Rom nebã laloa wã noyã fãa, la bʋ-kaoor yɛl kẽer sẽn zĩnd yʋʋmd 100 soabã sẽnes n tãag yʋʋmd 250. Seb-kãng pʋgẽ, b wilgame tɩ bʋ-kaood a Ilpiyẽ lebg n tẽega yell a ye Rom nin-kãseng a Sɛlsiis sẽn welge. Yaa ned n da bʋd nadens a to pʋʋgẽ, tɩ sãam koodã. Sebrã pʋgẽ, b wilga bũmb toor-toor pʋʋgã soab sẽn da tõe n maan n paam tɩ bʋ-kaoodbã kɩt tɩ bɛɛgdã yao n dole.
Bũmb a woto sẽn da be Rom naamã sasa wã wilgdame t’a Zeezi sẽn gom bũmb ning yellã sɩd ra beeme.
WAO-FUGDG RASEM 12-18
D SẼN BÃNG BIIBLÃ KARENG PƲGẼ | MATYE 14-15
“A Zeezi tũnugda ne neb bilfu, n dɩlgd neb wʋsgo”
w13-MM 1/7 21 s. a 2
A Zeezi tũnugda ne neb bilfu, n dɩlgd neb wʋsgo
A Zeezi sẽn yã kʋʋngã, b nimbãaneg yõk-a lame. A maaga kẽer bãase, la a zãms-b bũmb wʋsg Wẽnnaam Rĩungã wɛɛngẽ. Zĩigã sẽn wa n maagdẽ wã, a karen-biisã kos-a lame t’a kõ nebã sor tɩ b kẽng tẽns nins sẽn pẽ be wã, n tɩ ra rɩɩbo. La a Zeezi yeela a karen-biisã woto: “Bɩ yãmb mens bao rɩɩb n kõ-b tɩ b rɩ.” Vẽenega, gom-kãens linga karen-biisã wʋsgo. Bala, b ra pa tar rɩɩb wʋsg ye. B sẽn da tar yaa bʋr a nu la zĩm a yiib bala.
w13-MM 1/7 21 s. a 3
A Zeezi tũnugda ne neb bilfu, n dɩlgd neb wʋsgo
Kʋʋngã nimbãaneg sẽn yõk a Zeezi wã, a maana yel-solemde. Yel-solemd kãnga sẽn yãk a toogo, yel-solemd a to kae evãnzil-gʋlsdb a naasã fãa sẽn gom a yell ye. (Mark 6:35-44; Luk 9:10-17; Zã 6:1-13) A kɩtame t’a karen-biisã yeel nebã tɩ b zĩnd mo-maasã zug pis-nu-nu la koab-koabga. A reng n pʋʋsa a Zeova, n yaool n kao burã la a weel zĩmã. La a pa kõ kʋʋngã rɩɩbã a toor ye. A kõ a karen-biisã, tɩ ‘karen-biisã pʋɩ n kõ kʋʋngã.’ Rɩɩbã seka nebã fãa n kelle. Yãmb we n ges koe! A Zeezi tũnuga ne a tʋm-tʋmdbã sẽn yaa neb bilfã, n dɩlg neb wʋsgo.—Ges-y pipi vẽnegrã.
Mat. 14:21, nwtsty
pagbã ne kambã: Yaa Matye evãnzillã pʋgẽ bal la b gom pagbã la kambã yell a Zeezi yel-solem-kãngã pʋgẽ. Rẽnd tõe tɩ nebã a Zeezi sẽn maan yel-solemd n dɩlgã sõor yɩɩga tus-piig la a nu.
w13-MM 1/7 21 s. a 1
A Zeezi tũnugda ne neb bilfu, n dɩlgd neb wʋsgo
D GOM kibar a yembr yelle. (Karm-y Matye 14:14-21.) Yɩɩ bilf sẽn deng yʋʋmd 32 Pakã. Rẽ tɩ rap 5000 n paas pagb la kamb n da be ne a Zeezi la a karen-biisã. B ra bee zĩig sẽn pa zãr ne Bɛtsayida sẽn yaa tẽn-bil sẽn be Galile mogrã rɩtgã.
D bʋgs Wẽnnaam Gomdã zug neere
Mat. 15:7, nwtsty
zãmb dãmba: Yaa hypokrites sẽn yaa gɛrk gom-bilã la b sẽn lebg tɩ zãmb dãmbã. A tẽegda Gɛrɛs soolmã reem-dɛɛmdba, (kaoosg zugẽ, Rom soolmã reem-dɛɛmdb me) sẽn da lut b nensã ne mask-rãmb sẽn kɩtd tɩ b koeesã yit wʋsgo. B wa n pʋta gom-bilã n gomd ned sẽn tʋmd pʋ-lik yelle, wall ned sẽn pa rat tɩ b bãng a sẽn sɩd yaa a soaba. Vɛrse-kãngã pʋgẽ, a Zeezi boola zʋɩf-rãmbã tũudum taoor dãmb tɩ “zãmb dãmba.”—Mat. 6:5, 16.
Mat. 15:26, nwtsty
kamba . . . ba-bi: A Moyiiz tõogã pʋgẽ, baag yaa rũng sẽn yaa rẽgdo. Biiblã pʋgẽ, b sã n mak ned ne baaga, mi n yaa paoogre. (Maan. 11:27; Mat. 7:6; Fili. 3:2; Vẽn. 22:15) La Mark ne Matye evãnzillã pʋgẽ, a Zeezi sẽn wa n gomd ne pagã, a sẽn yeel tɩ “ba-bi” wall “zak baasã,” makrã pa wẽng ye. A Zeezi sẽn mak bu-zẽmsã neb ne ba-bi b sẽn nongã, pa paoogr ye. A sẽn mak Israyɛll nebã ne “kamba,” la a mak bu-zẽmsã neb ne “ba-bi” wã, yaa sẽn na yɩl n wilg neb nins yell b sẽn segd n deng n gese. Sɩd me, kamb la baas sã n be zak pʋgẽ, kambã yell la b segd n deng n gese.
WAO-FUGDG RASEM 19-25
D SẼN BÃNG BIIBLÃ KARENG PƲGẼ | MATYE 16-17
“Yãmb tagsgã yaa ãnd rẽnda?”
w07-MM 1/3 13 s. 17
Pʋg-sɩdba, rɩk-y Kirist zu-sobendã togs-n-taare
Daar a ye me, a Zeezi ra wa n wilga a tʋm-tʋmdbã t’a segd n kẽnga Zerizalɛm la tɩ be, b na n ning-a-la ‘kãsem dãmbã la maan-kʋʋdbã kãsem dãmb ne gʋlsdbã nusẽ, tɩ b kʋ-a, la tɩ rasem a tãab raare a na n vʋʋgame.’ La a sẽn yeel-b woto wã, a Pɩyɛɛr bool-a-la kɛɛng n zab-a. A yeel-a-la woto: “Zusoaba, Wẽnnaam ka na n sak t’a yɩ woto ye! Bõn-kãng ka na n paam yãmb ye.” Vẽenega, a Pɩyɛɛr sẽn da nong a Zeezi to-to wã kɩtame t’a wa pa ye ne yɛlã vẽeneg ye. Yɩɩ tɩlae t’a Zeezi rems a Pɩyɛɛr tagsgã. Rẽ n so t’a yeel-a woto: “Leb mam poorẽ Sʋɩtãana. Fo rat n gɩdga mam sore, tɩ bõe, fo tagsg ka Wẽnnaam dẽnd ye, yaa ninsaal dẽnda.”—Matye 16:21-23.
w15-MM 1/5 13 s. 16-17
Gũus-y ne Sʋɩtãanã! A raabã yaa paam yãmb n sãame!
A Sʋɩtãan tõe n belga ned sẽn tũud a Zeova ne yẽesem menga. Wala makre, a Zeezi sẽn wa n yeel a karen-biisã tɩ pa na n kaoos la b yõk-a n kʋ wã, tʋm-tʋmd a Pɩyɛɛr sẽn nong-a wã tall-a lame n yi kɛɛnga, n yeel-a woto: “Zu-soabã, Wẽnnaam ka na n sak t’a yɩ woto ye! Bõn-kãng ka na n paam yãmb ye.” La a Zeezi leoka a Pɩyɛɛr n yeel yaa: “Leb mam poorẽ Sʋɩtãana.” (Mat. 16:22, 23) Bõe yĩng t’a Zeezi bool a Pɩyɛɛr t’a “Sʋɩtãana”? Yaa t’a Zeezi ra wʋmda yɛlã võor sõma. A ra miime tɩ pa na n kaoos la a ki tɩ yɩ maoongo, la a wilg t’a Sʋɩtãan yaa ziri yagd ye. Wakat kãng sẽn da pa reem wakatã, a Zeezi ra miime t’a pa segd n tags tɩ “Wẽnnaam ka na n sak” tɩ yell a woto paam-a ye. A sã n da tags woto n pa kell n maan gũusgu, a maana a Sʋɩtãan sẽn datã bal kɛpɩ.
Dũni-kãngã saab sẽn kolgdã, tõnd wakatã pa reem wakat ye. A Sʋɩtãan sẽn dat yaa tõnd sẽn na n bas tɩ lebg naarã baoob n pak tõnd n yɩɩda. A ratame tɩ d yĩm tɩ d vɩɩ yaoolem wakatã, n pa le maand gũusg ye. Bɩ y gũusi, n da sak t’a tõog-y ye. (Mat. 24:42) Ra bas-y t’a Sʋɩtãan belg-y tɩ y wa tagsdẽ tɩ dũniyã saab ket n zãrame, wall t’a pa na n tol n sa meng ye.
w06-MM 1/4 21 s. a 9
‘Bɩ y kẽng n maan karen-biisi, n lis-ba’
Bõe la d segd n maane, d sã n dat n tũ a Zeezi makrã Wẽnnaam daabã maaneg pʋgẽ wã? A Zeezi yeela a karen-biisã: “Ned sã n dat n tũ maam, bɩ a kɩɩs a meng raabo n dɩk a kũum [da-luk] n tũ maam.” (Matɩe 16:24) Ad yɛl a tãab tõnd sẽn segd n maane. Pipi, d segd n ‘kɩɩsa d meng raabo.’ Sẽn dat n yeel tɩ d na n zãgsa d tʋlsem nins sẽn pa zemsã, la d sak Wẽnnaam saglsã la a sor-wilgrã. Yiib-n-soaba, d segd n ‘dɩka d kũum da-luka.’ A Zeezi wakatã, ra-luk ra makda yãnd la namsgo. D sẽn yaa kiris-nebã yĩnga, d sakda namsg koe-noogã yĩnga. (2 Tɩmote 1:8) Baa dũniyã neb sẽn tõe n yaal-d bɩ b ning-d taalã, d pa zoet yãnd ye, la wa a Zeezi, d tara sũ-noogo, d sẽn mi tɩ d tata Wẽnnaam yamã yĩnga. (Hebre dãmba 12:2) Sẽn na n baase, d segd n tũu a Zeezi wakat fãa.—Yɩɩl Sõamyã 73:26; 119:44; 145:2.
D bʋgs Wẽnnaam Gomdã zug neere
Mat. 16:18, nwtsty
fo yaa Pɩyɛɛre, la kug-kãngã zugu: Petros sẽn yaa gɛrk gom-bilã võor yaa kugri. A Zeezi sẽn pʋd gom-bilã Matye 16:18 pʋgẽ wã, yaa wa ned yʋʋre. A wõnda gɛrk yʋʋr ning a sẽn pʋd a Sɩmo wã. (Zã 1:42) Gɛrk gom-bi-kãng bee Mat. 7:24, 25; 27:60; Luk 6:48; 8:6; Rom. 9:33; 1 Kor. 10:4; 1 Pɩy. 2:8. A Pɩyɛɛr da pa yet tɩ yẽ la kugr ning zug a Zeezi sẽn lugl a tigingã ye. Bala, a meng yeela 1 Pɩyɛɛr 2:4-8 t’a Zeezi la b sẽn da pĩnd n yeel t’a yaa yẽbgrã pãng kugr Wẽnnaam sẽn yãkã. Tʋm-tʋmd a Poll me boola a Zeezi tɩ ‘yẽbgrã kugri,’ la ‘pĩiga.’ (1 Kor. 3:11; 10:4) A Zeezi yeelame tɩ mam “yeta foom tɩ fo yaa Pɩyɛɛre,” kugri. La a ra gomda a meng sẽn yaa Kiristã b sẽn bool tɩ “kugrã” yelle. “Kug-kãng” n da na n lebg kiris-neb tigingã pãng kugri.
tiginga: Yaa Mat. 16:18 pʋgẽ wã, la b pʋd ekklêsia sẽn yaa gɛrk gom-bilã pipi. Ekklêsia wã yita gɛrk gom-biis a yiib pʋgẽ. A ye wã yaa ek sẽn dat n yeel tɩ “yɩnga,” t’a to wã yaa kaleo sẽn dat n yeel tɩ “boole.” A tẽegda neb sulli, wall neb b sẽn bool n lagem taab bũmb takɩ yĩnga. Vɛrse-kãngã pʋgẽ, a Zeezi pĩnd n goma tigingã luglg yelle. Tigingã ka wã yaa kiris-neb nins sẽn paam-b vʋʋsem sõng zaeebã b sẽn bool tɩ ‘kug-vɩɩs’ b sẽn tall n me ‘sɩɩg-sõng roogã.’ (1 Pɩy. 2:4, 5) Sɛptãntã pʋgẽ, b pʋda gom-bi-kãngã sẽn wõnd ebre gom-bil ning b sẽn lebg tɩ “tigingã” zĩis wʋsgo, tɩ mi n yaa Israyɛll nebã fãa yell la b gomda. (Tõo. 23:4; 31:30) Woto me, yaa neb nins b sẽn ‘bool n yiis likã pʋgẽ wã,’ la b sẽn ‘tũus n yiis dũniyã neb sʋkã’ n yaa “Wẽnnaam tigingã.”—1 Pɩy. 2:9; Zã 15:19; 1 Kor. 1:2.
Mat. 16:19, nwtsty
saasẽ Rĩungã kʋɩlen-biisi: Biiblã pʋgẽ, b sã n yeel tɩ b kõo ned kʋɩlen-biisi, yaa kʋɩlen-biis sɩdem-sɩdem tɩ yaa makr me, wilgdame tɩ b kõo a soabã tõogo. (1 Kib. 9:26, 27; Eza. 22:20-22) ‘Kʋɩlen-biisã’ makda tõogo, la tʋʋmd b sẽn kõ neda. A Pɩyɛɛr talla kʋɩlen-biisã b sẽn kõ-a wã n sõng zʋɩf-rãmbã (Tʋʋ. 2:22-41), samari nebã (Tʋʋ. 8:14-17) la bʋzemsã (Tʋʋ. 10:34-38) tɩ b paam Wẽnnaam vʋʋsem sõngã sẽn na yɩl n tõog n kẽ saasẽ Rĩungã pʋgẽ.
WAO-FUGDG RASEM 26–TƲƲLG RASEM A 4
D SẼN BÃNG BIIBLÃ KARENG PƲGẼ | MATYE 18-19
“Da yɩ-y kug-lakdg y meng wall y taabã yĩng ye”
Mat. 18:6, 7, nwtsty
bõang sẽn tɛt neer kugri: bɩ neer kug-kẽengã. A võora meng yaa bõang neer kugri. Yaa kug-kẽeng sẽn zɩs tɩ yaa bõang n tõe n tɛ-a.
kug-lakdga: Skandalon sẽn yaa gɛrk gom-bil ning b sẽn lebg tɩ kug-lakdgã võor yaa bẽdgo. Kẽer yeelame tɩ yaa rɩɩb ning b sẽn ningd bẽdgẽ wã. Kaoosg zugẽ, b wa n boonda bũmb ning fãa sẽn tõe n yɩ sabab tɩ ned lak wall a lʋɩ tɩ kug-lakdga. A makda bũmb ned sẽn maane, bɩ yell sẽn kɩt tɩ ned lake, bɩ n maan sẽn pa segd wall yel-wẽnde. Matye 18:8, 9 wã pʋgẽ, skandalizo wã b sẽn lebg tɩ ‘wat ne lʋɩɩsã’ tõe n dat n yeelame me tɩ ‘lebg bẽdgo, wall kɩt tɩ ned maan yel-wẽnde.’
nwtsty fot-rãmb la video-rãmba
Neer kugri
Yaa ne kugr a woto la b ra werd koodã, wall oliivã biis n yãkd kaamã. Kug kẽer da yaa bõoneg n zems tɩ ned tõe n take. La sãnda ra yaa bɛd wʋsg tɩ yaa rũng n tõe. Tog n yaa neer kugr sẽn zɩs a woto la Filisti nebã sẽn modg a Samsõ t’a wer ne koodã. (Bʋ. 16:21) Pa Israyɛll soolmẽ wã bal la rũms ra werd koodã ye. Rom soolmã fãa pʋgẽ la bala me, ra yaa woto.
Neer ne a biiga
Neer ning b sẽn wilg ka wã, yaa rũng wala bõang n tõe n take. Yaa neer b sẽn da tar n werd koodã wall oliivã biisi. B sẽn maan ne-biigã to-to wã, a tõe n bilma faag-faag neerã zugu.
Mat. 18:7, nwtsty
Mat. 16:19, nwtsty
Zeɛn: Yaa geh hinnom sẽn yaa ebre gom-bil sẽn dat n yeel tɩ “Hinom longo” la b sẽn lebg tɩ zeɛnnã. Yaa long sẽn da be Zerizalɛm lalgã poore. (Ges-y App. B12, carte “Jérusalem et ses environs.”) A Zeezi wakatẽ wã, Hinom longã ra lebga Zerizalɛm nebã sagd yõogr zĩiga. Rẽ n so tɩ Zeɛnnã makda sãoong wakat fãa yĩnga.
Zeɛn
Gɛrk gom-bil ning b sẽn lebg tɩ “Hinom longã” yaa zĩig sẽn da be Zerizalɛm lalgã poore. (Zer. 7:31) B ra pĩnd n togsame tɩ b na n wa loba kũ-rãmb beenẽ. (Zer. 7:32; 19:6) Kaset pa be n wilgdẽ tɩ b ra lobda rũms wall ninsaalb vɩɩs Zeɛnnã pʋgẽ, n na n nams-b ye. Rẽnd Zeɛnnã pa makd bugum zĩig nif sẽn pa ne, tɩ b lobd ninsaalb be n namsd-b wakat sẽn kõn sa ye. A Zeezi ne a karen-biisã sẽn gom zeɛn yellã, yaa “kũum a yiib soabã” yell la b sẽn da gomdã. A makda sãoong wakat fãa yĩnga.—Vẽn. 20:14; Mat. 5:22; 10:28.
Mat. 18:10, nwtsty
geta mam ba wã nenga: “kẽeda m ba wã nengẽ.” Malɛgsã sẽn tõe n kẽ Wẽnnaam sẽn beẽ wã, yaa bãmb bal n tõe n ges a nengã.—Yik. 33:20.
w10 1/11 16
Malɛgsã sẽn sõngd tõnd to-to
A Zeezi yeelame tɩ Wẽnnaam kõo malɛgsã noor tɩ b ges a nin-buiidã yelle, tɩ bũmb da maan b tẽebã ye. Rẽ n so t’a Zeezi sẽn keoog a karen-biisã tɩ b ra maan bũmb sẽn na n yɩ kug-lakdg b to yĩngã, a yeele: “Gũus-y n da paoog-y kom-kãensã ned ba a yembr ye. Bala, mam yeta yãmb tɩ bãmb malɛgsã sẽn be saasẽ wã geta mam ba sẽn be saasẽ wã neng daar fãa.” (Mat. 18:10) A Zeezi gomdã pa rat n yeel tɩ kiris-ned fãa tara malɛk tɩ get a yell ye. A sẽn yeelã wilgdame bal tɩ malɛgs nins sẽn sakd Wẽnnaamã tʋmda tigingã neer yĩnga.
D bʋgs Wẽnnaam Gomdã zug neere:
Mat. 18:22, nwtsty
naoor pis-yopoe naoor a yopoe: Gɛrk gom-bil ning b sẽn lebg woto wã rat n yeelame tɩ “70 la a 7,” (77) bɩ “70 naoor a 7” (490). Sɛptãntã pʋgẽ, b lebga ebre wã gom-bi-kãngã Sɩngr 4:24 pʋgẽ wã tɩ zems ne gɛrkã. Baa nebã sẽn wʋmd a võorã to-to, yopoe naoor a yopoe rat n yeelame tɩ “wakat fãa,” bɩ “sẽn pa tar tɛka.” Dẽnd a Zeezi sẽn yeel a Pɩyɛɛr tɩ naoor pis-yopoe naoor a yopoe wã, a ra rat n wilga a karen-biisã tɩ b segd n kõta sugri, n da yãk sõor ye. La Babilond talmuudã pʋgẽ, (Yoma 86b) b yeelame: “Ned sã n beeg-f vugri, naoor a yi wall a tãabo, f segd n kõ-a-la sugri. La naoor a naas-n-soabã bɩ f ra kõ-a sugr ye.”
Mat. 19:7, nwtsty
baosg sebre: Tõogã ra wilgame tɩ rao sã n dat n bas a paga, a tog n baoa baosg sebre, t’a segd n tɩ yã kãsem-dãmbã. Tõogã sẽn wilg woto wã ra kõt-a-la weer t’a maneg n tags a yam-yãkrã zug neere. Woto yaa sẽn na yɩl tɩ ned ra yɩ yãg-yãg n kao a kãadem bʋʋm faad yĩnga, la sẽn na yɩl n kogl pagbã. (Tõo. 24:1) La a Zeezi wakatẽ wã, tũudmã taoor-dãmb ra kɩtame tɩ ned tõe n kao a kãadem faag-faaga. Pipi kiris-nebã wakate, kʋdemd yɛl mit a Zozɛf sẽn yaa farizɩẽ n da kao a kãadmã yeelame tɩ ned tõe n kaoa a kãadem bʋʋm fãa yĩnga.
nwtsty fot-rãmb la video-rãmba
Baosg sebre
Baosg seb-kãngã gʋlsa ne Arameẽ, yʋʋmd 71 bɩ 72 a Zeezi rogmã poore. B yã-a-la Wadi Murabbaat sẽn yaa kʋɩl-koɛɛngã nug rɩtgo, Zide rasempʋɩɩgẽ wã. Baosgã sebr zugu, b gʋlsame tɩ zʋɩf-rãmbã soolem gudgr yʋʋm a yoob-n-soabã, a Naksan biig a Zozɛf kaoa a kãadmã ne a pag a Miriam sẽn yaa Zonatã sẽn be Masada soolmẽ wã bi-puglã.