Kiris-nebã vɩɩm la b tʋʋma tigissã na-kẽndr not-rãmbã
TƲƲL-NIF RASEM A 2-8
D SẼN BÃNG BIIBLÃ KARENG PƲGẼ | MATYE 26
“Pakã ne a Zeezi kũumã tẽegre—B wõnego, la b welgre”
nwtsty, video-rãmb la fot-rãmba
Pakã rɩɩbo
Rɩbd nins b sẽn da rɩt pakã raarã yaa: 1) pe-bila, wall bull b sẽn sẽ (b pa segd n kaoog rũngã kõbr baa a yembr ye), 2) bur sẽn ka ning rã-bɩlle, la 3) zẽ-vã-toodo. (Yik. 12:5, 8; Sõd. 9:10-11) Misna wã pʋgẽ, b wilgame tɩ zẽ-vã-toodã tõe n yɩɩ vãad buud sẽn yaa toogo, la tɩ tẽegda Israyɛll nebã toog ning b sẽn paam Eziptã. A Zeezi maka bur sẽn ka ning rã-bɩllã ne a yĩngã sẽn zems zãngã. (Mat. 26:26) Tʋm-tʋmd a Poll boola a Zeezi tɩ “tõnd Pak pe-bilã.” (1 Kor. 5:7, MN) Pipi kiris-nebã wakatẽ, 4) b ra yũuda divẽ pakã rɩɩb sasa. A Zeezi maka divẽ wã ne a zɩɩmã sẽn da na n daag tɩ yɩ maoongã.—Mat. 26:27,28.
Mat. 26:26, nwtsty
yaa: Yaa estin sẽn yaa gɛrk gom-bilã la b sẽn lebg tɩ “yaa” wã. Vɛrse-kãngã pʋgẽ, a võorã yaa: “sẽn dat n yeele,” bɩ “makda.” Tʋm-tʋmdbã wʋma gomdã võor sõma, bala, b ra nee a Zeezi yĩngã sẽn zems zãngã, la b ra ne bur sẽn ka ning rã-bɩllã me b sẽn na n wãbã. Dẽnd burã ra pa tõe n yɩ a Zeezi yĩngã ye. Matye 12:7 wã pʋgẽ, yaa gɛrk gom-bi-kãngã me la b lebg be, tɩ Biibl-dãmb wʋsg pʋsẽ, a võorã yaa “sẽn dat n yeele.”
Mat. 26:28, nwtsty
kãab-paalgã zɩɩm: Yaa a Zeezi zɩɩmã sẽn daagã maasem yĩng la a Zeova maan kaool-paalgã yẽ ne kiris-neb nins sẽn paam vʋʋsem sõng zaeebã sʋka. (Ebre. 8:10) A Zeezi sẽn yeel vɛrse-kãngã pʋgẽ wã, ne a Moyiiz sẽn yeel bũmb ning Sinayi tãngẽ wã a Zeova sẽn wa n na n maan tõogã kaool ne Israyɛll buudã t’a Moyiiz yɩ se-yõkdã yaa yembre. (Yik. 24:8; Ebre. 9:19-21) Yaa lols la boees zɩɩm la b tall n maan kaool Wẽnnaam ne Israyɛll buudã sʋka. La yaa a Zeezi zɩɩmã la b tall n maan kaool-paalgã a Zeova ne Israyɛll sẽn yaa Wẽnnaam dẽndã sʋka. Kaool-paalgã sɩnga yʋʋmd 33 pãntekotã tɛka.—Ebre. 9:14, 15.
D bʋgs Wẽnnaam Gomdã zug neere
Mat. 26:17, nwtsty
Bur sẽn ka rã-bɩllã wakat pipi daare: Bur sẽn ka rã-bɩll kibsã ra sɩngda nizã rasem piig la a nu sẽn yaa pakã vẽk-m-beoogã, n kaoosd rasem a yopoe. Pakã yaa nizã rasem piig la a naase. A Zeezi wakatẽ wã, pakã ne bur sẽn ka rã-bɩll kibsã pʋgda taaba, tɩ kẽer boond rasem a nii wã fãa, nizã rasem piig la a naasã sẽn naage, tɩ “bur sẽn ka rã-bɩll kibsa.” (Luk 22:1) Vɛrse-kangã pʋgẽ, b tõe n lebga “pipi daarã” tɩ “ket tɩ beoogo.” Makre, Zã 1:15, 30 pʋgẽ, b lebga protos bɩ “pipi” wã tɩ “renge,” la “renga maam n beẽ.” Dẽnd tõe tɩ yaa b sẽn da wʋmd gom-bilã to-to wã ne zʋɩf-rãmbã raar sẽn da sɩngd wĩndg kõomã n kɩt tɩ karen-biisã sok a Zeezi nizã rasem piig la a tã wã daar tɩ b tɩ segl “Pakã rɩɩb yɛɛnẽ” wã. Karen-biisã segla pakã nizã rasem piig la a tã wã wĩndga, n sɩng-a rɩɩb “zĩ-sobdã” sẽn yaa rasem piig la a naasã sɩngrã.—Mark 14:16, 17.
Mat. 26:39, nwtsty
kɩt tɩ bõn-yũudl kãngã loog: Biiblã pʋgẽ, b mi n goma bõn-yũudl yelle, t’a makd Wẽnnaam daabo, wall tʋʋmd takɩ a sẽn kõ neda. Yaa vẽeneg tɩ b sẽn dõd a Zeezi t’a tʋʋsa Wẽnnaam la t’a yaa tẽn-dãmbda, tɩ b sẽn na n kʋ-a rẽ yĩngã na n paoog Wẽnnaamã ra sãamda a sũur wʋsgo. Rẽ n so t’a pʋʋs n kos tɩ sã n tõe bɩ ‘bõn-yũudl kãngã’ loog n bas-a.
TƲƲL-NIF RASEM A 9-15
D SẼN BÃNG BIIBLÃ KARENG PƲGẼ | MATYE 27-28
“Kẽng-y n maan karen-biisi—Bõe yĩnga, yɛ, la wãn-wãna?”
w04-MM 1/7 19 s. a 4
‘Bɩ y kẽng n maan karen-biisi’
A Zeezi tara zu-sobend a tigingã zugu, la yʋʋmd 1914 tɛkã, a tara zu-sobend Wẽnnaam Rĩungã sẽn da lugl paalma zugu. (Kolos rãmba 1:13; Wilgri 11:15) A yaa malɛgsã naaba, n tar zu-sobend malɛgs milyõ kobs zutu. (1 Tesalonik rãmba 4:16; 1 Pɩɛɛr 3:22; Wilgri 19:14-16) A Ba wã kõ-a-la tõog t’a sãam “pãn-soaadba fãa la noyã fãa la pãens fãa” sẽn kɩɩsd no-tɩrsã. (1 Korẽnt dãmba 15:24-26; Efɛɛz rãmba 1:20-23) A Zeezi zu-sobendã pa tek sẽn vɩ-bã bal zug ye. A leb n yaa “nin-vɩɩse la kũum bʋ-kaooda,” la Wẽnnaam kõ-a-la pãng t’a vʋʋg sẽn ki-bã. (Tʋʋma 10:42; Zã 5:26-28) Sɩd-sɩda, b segd n gesa noor ned ning sẽn paam zu-sobend kãseng woto wã sẽn kõ wã wa bũmb sẽn tar yõod wʋsgo. Woto yĩnga, yaa ne waoogr la yamleoog la d sakd noor ning Kirist sẽn kõ tɩ d ‘kẽng n tɩ maan karen-biisã.’
Mat. 28:19, nwtsty
maan karen-biisi: B tõe n lebga gɛrk gom-bilã sẽn yaa matheteuosã tɩ “zãms ned” t’a lebg karen-biiga. (Mat. 13:52 wã pʋgẽ, b lebga gom-bilã tɩ “zãmse.”) “Reeg lisgã” la “zãms nedã” wilgda d sẽn segd n “maan karen-biisã” to-to.
nebã buud fãa: Gom-bil ning b sẽn lebg ka tɩ “nebã buud fãa” wã rat n yeelame tɩ neb sẽn yit soolem toɛy-toɛya. B sẽn kõ noor tɩ b taas koɛɛgã “nebã buud fãa” wã yaa no-paalga. Nand t’a Zeezi sɩng a koe-moonegã, Gʋlsg Sõamyã ra wilgame tɩ bu-zẽmsã sã n dat n tũ a Zeova b tõe n wa naaga Israyɛll nebã. (1 Rĩm 8:41-43) Ne no-kãngã maasem, a Zeezi wilga a karen-biisã tɩ pa zʋɩf-rãmbã bal la b segd n taas koɛɛgã, tɩ wilgdẽ tɩ yaa dũniyã gill zug la b segd n maan karen-biisã.—Mat. 10:1, 5-7; Vẽn. 7:9.
Mat. 28:20, nwtsty
zãms bãmba: Gɛrk gom-bilã b sẽn lebg tɩ “zãmsã” rat n yeelame tɩ f sõng ned t’a paam bãngre, tɩ f kõ-a kaset tɩ f sẽn wilgd-a wã yaa sɩda. Zãms nebã tɩ b sak bũmb nins fãa a Zeezi sẽn wilgã segd n yɩɩ bilf-bilfu. B segd n sõng-b lame tɩ b bãng bõn-kãense, tɩ b tũ, la b rɩk a naoore.—Zã 13:17; Efɛ. 4:21-22; 1 Pɩy. 2:21.
D bʋgs Wẽnnaam Gomdã zug neere
Mat. 27:51, nwtsty
fu-lilldgã: Yaa fu-neer sẽn da welgd zĩ-sõng sẽn yɩɩdã ne zĩ-sõngã. Zʋɩf-rãmbã kʋdemdã pʋgẽ, b wilgame tɩ fu-lilldgã woglem taa metr 18, t’a yalmã ta metr a 9, n tagem sõma. A Zeova sẽn kɩt tɩ fu-lilldgã pasg a yiibã, wilgame t’a sũur sãama wʋsg ne neb nins sẽn kʋ a Biigã, la wilgdẽ me tɩ rẽ tɛka, sor pakame tɩ neb tõe n kẽng saasẽ.—Ebre. 10:19, 20.
wẽnd-doogã: Yaa naos sẽn yaa gɛrk gom-bilã la b sẽn lebg tɩ wẽnd-doogã. Naosã yaa roog b sẽn me tɩ zĩ-sõng sẽn yɩɩd la zĩ-sõng be a pʋgẽ.
Mat. 28:7, nwtsty
Kẽng-y n tɩ togs b karen-biisã tɩ b vʋʋgame: Yaa pʋg-kãensã n yɩ pipi n bãng t’a Zeezi vʋʋgame. Leb n yaa bãmb la b kõ noor tɩ b tɩ togs karen-biis a taabã. (Mat. 28:2, 5, 7) Sẽn zems ne zʋɩf-rãmbã kʋdemde, pag ra pa tar sor n kõt kaset bʋʋd roogẽ ye. La a Zeova malɛkã yẽ waooga pagbã, a sẽn kõ-b noor tɩ b tɩ togs karen-biis a taabã t’a Zeezi vʋʋgame wã.
TƲƲL-NIF RASEM 16-22
D SẼN BÃNG BIIBLÃ KARENG PƲGẼ | MARK 1-2
“Fo paama f yel-wẽnã sugri”
“Fo paama f yel-wẽnã sugri”
Roogã sẽn da pid ne neb t’a Zeezi gomd tɩ b kelgdẽ wã, rap a naas n tʋk rao ne a gãag n wa. Raoã kii bogre. B ratame t’a Zeezi sãoog raoã sẽn yaa b zoa wã. La b “ka tõe n tall-a n ta a Zeezi nengẽ,” bala nebã ra waoogame. (Mark 2:4) Tags-y n ges-y rẽ sẽn sãamd sũur to-to. B kong n dʋʋ roogã zug n kɩbg võore, n tũ be n sik b zoa wã roogã pʋga.
B sẽn maan woto n tiis a Zeezi sõsgã, a sũurã yikame bɩ? Ayo. B sẽn wilg tɩ b tara tẽebã pʋd n yɩ-a-la noogo, hal t’a yeel sẽn ki-a bogrã yaa: “Fo paama f yel-wẽnã sugri.” (Matye 9:2) La rẽ yĩnga, a Zeezi tara sor n kõ ned a yel-wẽn sugr bɩ? Karen-saam-dãmbã ne Fariizẽ-rãmbã ra sokda b mens woto: “Yaa a wãn tɩ rao-kãngã gomd a woto? Bãmb paoogda Wẽnnaam. Ãnda n tõe n kõ yel-wẽn sugr tɩ ka Wẽnnaam b yembr tãa?”—Mark 2:7.
A Zeezi sẽn mi bũmb nins b sẽn tagsd b sũurẽ wã, a sok-b lame: “Yaa bõe tɩ yãmb tar tags wẽns y sũyã pʋse? Bʋg yeelg n yaa naana n yɩɩda: ‘Fo paama f yel-wẽnã sugr bɩ, bɩ yik n kẽne?’” (Mark 2:8, 9) A Zeezi kũumã sẽn na n yɩ maoongã yĩnga, a ra tõe n tika rẽ n kõ raoã a yel-wẽnã sugri.
Mark 2:9, nwtsty
Bʋg n yaa naana n yɩɩda: Yaa nana n yɩɩd ne ned t’a yeel t’a kõo a to a yel-wẽn sugri, bala kaset pa be nebã sẽn tõe n yã n bãng t’a pa kõ sugr ye. La a Zeezi sẽn yeel daoã t’a ‘yik n kẽnã,’ a maana yel-solemd tɩ nebã yã vẽeneg t’a sɩd tõe n kõo ned a yel-wẽnã sugri. Kiba-kãngã ne Ezayi 33:24 goamã wilgdame tɩ yaa yel-wẽndã n kɩt tɩ ãdem-biisã bẽedẽ wã.
D bʋgs Wẽnnaam Gomdã zug neere
(Mark 1:11, MN) La koɛɛg n yi saasẽ n yeele: “Fo yaa mam Bi-ribla, mam sẽn nong a soabã. Fo taa mam yam.”
Mark 1:11, nwtsty
koɛɛg n yi saasẽ n yeele: Evãnzill-dãmbã pʋgẽ, naoor a tãabã a Zeova meng sẽn gom ne ninsaalbã pipi soab la woto.—Zã 12:28.
Fo yaa mam Bi-ribla: A Zeezi sẽn da wa n yaa malɛkã, a yaa Wẽnnaam Bi-ribla (Zã 3:16) B sẽn wa n dog a Zeezi tẽngã zug t’a yaa ninsaal sẽn zems zãng wa a Ãdem sɩngrẽ wã, a ra yaa “Wẽnnaam Bi-ribl” me. (Luk 1:35; 3:38) La wõnda ka wã, pa sẽn na n wilg a Zeezi sẽn yaa a soabã bal ye. Wẽnnaam sẽn yeel woto la a zae a Zeezi ne vʋʋsem sõngã, a wilga vẽeneg t’a zae-a-la ne a vʋʋsem sõngã t’a lebg a bi-ribla. Woto yaa “rogem-paalg” sẽn kɩt t’a na n wa leb saasẽ, la wilgdẽ t’a yãk-a lame t’a na n yɩ rĩm la maan-kʋʋdb kãsma.—Ges-y Zã 3:3-6; 6:51; Luk 1:31-33; Ebre. 2:17; 5:1, 4-10; 7:1-3.
Fo taa mam yam: bɩ “m sũur nooma ne-fo, m nong-f-la wʋsgo.” Mat. 12:18 pʋgẽ me, b yeela woto. Yaa gomd b sẽn togs Ezayi 42:1 wã pʋgẽ, n gom Mesi wã bɩ Kiristã yelle. Wẽnnaam sẽn zae a Zeezi ne a vʋʋsem sõngã la a yeel vẽeneg t’a yaa a Bi-riblã wilgame t’a Zeezi la Mesi wã b sẽn da pʋlem tɩ watame wã.
Mark 2:28, nwtsty
Vʋʋsg daarã Zu-soaba: A Zeezi yeela woto (Mat. 12:8; Luk 6:5) n na n wilg t’a Ba wã kõ-a-la sor t’a tʋm a tʋʋmdã vʋʋsg raarã. (Ges-y Zã 5:19; 10:37, 38) Yaa vʋʋsg raar la a Zeezi maan a yel-soalem kẽer sẽn yɩ nebã noog wʋsgo. Wala makre, bãad-rãmb kẽer a sẽn maage. (Luk 13:10-13; Zã 5:5-9; 9:1-14) Woto fãa wilgda yolsg ning ãdem-biisã sẽn na n paame, a Rĩungã naam sasa sẽn na n yɩ wa vʋʋsg raarã.—Ebre. 10:1.
TƲƲL-NIF RASEM 23-29
D SẼN BÃNG BIIBLÃ KARENG PƲGẼ | MARK 3-4
“B sãooga ned vʋʋsg raare”
Bõe la ned tar sor n na n maan vʋʋsg daare?
Vʋʋsg daar a to yɛsa, a Zeezi kẽnga zʋɩf-rãmbã karen-doogẽ. Wõnda yaa Galɩle soolmẽ wã. A yãa rao a ye, la a rɩtg nugã ra kiime. (Luk 6:6) Tõogã karen-saam-dãmb ne Fariizẽ-dãmbã ra gũusdame n get a Zeezi sẽn na n maanega. Bũmb la b sok a Zeezi, tɩ wilgd tɩ b ra tara yam-wẽnga. B sokame yaa: “Noor beeme tɩ maag bãad vʋʋsg daar bɩ?”—Matye 12:10.
Zʋɩf-rãmbã tũudum taoor dãmb ra getame tɩ sã n pa yõor yelle, f sã n sãoog ned vʋʋsg daare, yaa yel-wẽnde. Wala makre, ned karg bɩ a nug sã n kaoog tɩ b sẽbge, bɩ a sã n dãmb tɩ b wob-a vʋʋsg daare, b kɩɩsa tõogã, bala pa yell sẽn tõe n tũ ne a yõor ye. Yaa vẽeneg tɩ tõogã karen-saam-dãmb ne Fariizẽ-dãmbã sẽn sokd a Zeezi woto wã pa b sẽn zoet raoã nimbãaneg ye. B sẽn baood yaa b paam n dõd a Zeezi.
Bõe la ned tar sor n na n maan vʋʋsg daare?
La a Zeezi ra miime tɩ b tara yam-wẽnga. A ra miime tɩ baa tõogã sã n wilgame tɩ ned pa segd n tʋm vʋʋsg daare, tũudmã taoor dãmb tolg n zẽna yɛlã. (Yikri 20:8-10) B ra zoe n ning-a-la taale, a sẽn maan neer vʋʋsg daar yĩnga. La bũmb la a Zeezi na n maan b nifẽ, tɩ tolg n puk b wẽnemã. A yeela rao ning nug sẽn ki wã yaa: “Yik n yaas sʋk ka!”—Mark 3:3.
Mark 3:5, nwtsty
ne sũ-yikri, la ne sũ-sãanga: Yaa a Mark bal n togs a Zeezi manesmã sẽn yɩ to-to a sẽn yã tũudmã taoor dãmbã sũy sẽn diglmã. (Mat. 12:13; Luk 6:10) Tog n yaa a Pɩyɛɛr sẽn da wae n wilgd a yĩn-sidgã n togs a Mark a Zeezi manesem sẽn yɩ to-to wã.—Ges-y “Mark sebrã sẽn gomd bũmb ning yelle.”
D bʋgs Wẽnnaam Gomdã zug neere
Mark 3:29, nwtsty
Paoog vʋʋsem sõngã: Vɛrse-kãngã pʋgẽ, paoogrã yaa goam sẽn sãamd ned yʋʋre, tʋya, gomd sẽn paoogd Wẽnnaam wall sẽn sãbsd bũmb sẽn yaa sõng Wẽnnaam nifẽ. Sẽn yaa Wẽnnaam n kõt vʋʋsem sõngã, ned sã n maand bũmb ne vʋʋsem sõngã maasem tɩ b sãbsd a tʋʋmdã ne pʋ-toogo, yaa Wẽnnaam la b paoogda. Wa Mat. 12:24, 28 ne Mark 3:22 sẽn wilgã, zʋɩf-rãmbã tũudum taoor dãmb da nee vẽeneg tɩ yaa ne Wẽnnaam vʋʋsem sõngã maasem la a Zeezi maand yel-soalmã. La b yeelame tɩ yaa ne a Sʋɩtãan pãnga.
Yel-wẽn-kãng paada ne-a wakat sẽn kõn sa: Wõnda yel-wẽn-kãngã kae sugr ye. Maoong kae n dond-a ye.
w14-MM 1/12 14-15 s. a 6-8
Yãmb ‘wʋmda Gʋlsg Sõamyã võor’ bɩ?
Yam bʋg la d tõe n dɩk rao sẽn bʋd bõn-biis la a tɩ gõeyã yel-bũnd pʋgẽ? Pipi, d segd n bãngame tɩ d pa tõe tɩ Biiblã karen-biig tẽeb bɩ tao-tao ye. Baa d sã n maand d sẽn tõe fãa n na n sõng-a, d pa segd n pẽdgd-a t’a reeg lisg ye. D na n ninga d yamẽ tɩ yẽ n segd n dɩk a meng n kõ Wẽnnaam. Sẽn noom a Zeova yaa ned sẽn na n dɩk a meng n kõ-a a sẽn nong-a wã yĩnga. Sã n pa woto, pa tat a yam ye.—Yɩɩl 51:14; 54:8; 110:3.
Yiibu, d sã n wʋm yel-bũndã võor sõma, na n sõng-d lame tɩ d koe-moonegã sã n pa womd biis bɩ d ra koms raood ye. D segd n maana sũ-mare. (Zak 5:7, 8) D sã n maan d sẽn tõe fãa n na n sõng karen-biig t’a pa sake, pa rat n yeel tɩ d pa zãms-a sõma ye. Yaa ned sẽn na n yaa sik-m-meng soaba, n dat n toeem bal la a Zeova na n kɩt tɩ koɛɛgã a sẽn kelgã wom biisi. (Mat. 13:23) Rẽnd pa neb nins d sẽn sõng tɩ b reeg lisgã sõor bal la d segd n tik n yeel tɩ d moonda sõma ye. Sɩd me, a Zeova pa get neb nins d sẽn zãmsd Biiblã manesem sẽn yaa to-to wã n pẽg tõnd ye. Yaa tõnd sẽn modgd to-to wã n noom-a.—Karm-y Luk 10:17-20; 1 Korẽnt dãmb 3:8.
Tãabo, pa wakat fãa la d tõe n bãng Biibl karen-biig sẽn toeemd to-to wã ye. Wala makre, misioneer a ye n da zãmsd rao ne a pag Biiblã, tɩ b wa yeel-a tɩ b rat n lebga koe-moondb sẽn pa reeg lisgu. Misioneerã tẽeg-b lame tɩ b segd n deng n basa sɩgaarã yũubu. La b leok-a lame tɩ b basa sɩgaarã na maan kiisi, tɩ ling-a. B bãngame tɩ baa b sã n solg n yũ sɩgaare, a Zeova neeme, la t’a kisa pʋ-lik soaba. Rẽ n so tɩ b zems taab n yeel tɩ b sã n pa na n tolg n bas sɩgaarã, b pa na n solgd misioneerã n yũud ye. Baa misioneerã sẽn da pa mi tɩ b toeemdame wã, b sẽn nong a Zeova wã kɩtame tɩ b tõog n bas sɩgaarã.
TƲƲL-NIF RASEM 30–SIG-NOY RASEM A 6
D SẼN BÃNG BIIBLÃ KARENG PƲGẼ | MARK 5-6
“A Zeezi tõe n vʋʋga kũum”
Mark 5:39, nwtsty
Biigã ka ki ye, a gõeeme: Biiblã pʋgẽ, b mii n maka kũum ne gõeem. (Yɩɩn. 13:4; Zã 11:11-14; Tʋʋ. 7:60; 1 Kor. 7:39; 15:51; 1 Tes. 4:13) A Zeezi ra na n vʋʋga bi-puglã. Dẽnd tõe t’a yeela woto n na n wilg tɩ wa b sẽn tõe n nek ned sẽn gõeyã, b tõe n vʋʋga kũum me. Yaa a Zeova sẽn yaa Zeezi ba wã, “Wẽnnaam ning sẽn kõt kũum vɩɩm, la b kɩtdẽ tɩ bũmb nins sẽn ka be wã zĩndã,” n kõ-a tõog t’a vʋʋg bi-puglã.—Rom. 4:17.
A Zeezi vʋʋga bi-pugl sẽn da ki
Naoor wʋsgo, a Zeezi sã n sãoog neda, a yet-a lame t’a ra togs ned ye. So-kãngã me, a yeela biigã roagdbã woto. Baa ne rẽ, kibarã yelga “tẽngã fãa.” (Matye 9:26) Mams-y wa yãmb ned sẽn na n maan kaalem tɩ b vʋʋg-a. Y sũur kõn yɩ noog wʋsg tɩ y gom dẽ yell sɩda? Yɩɩ naoor a yiib-n-soab la woto a Zeezi sẽn vʋʋg kũum.
D bʋgs Wẽnnaam Gomdã zug neere
Mark 5:19, nwtsty
tɩ wilgi: A Zeezi sã n da mi n maan yel-solemde, a yetame tɩ b ra maan tɩ nebã bãng ye. (Mark 1:44; 3:12; 7:36) La so-kãngã, a yeela raoã t’a tɩ wilg a roagdbã bũmb ning sẽn maanã. A Zeezi yeela raoã woto bala, tẽngã rãmb kos-a-la yel-solemd t’a tõdg tɩ b rig-a t’a yi tẽngã, t’a ra pa na n paam n taas-b koɛɛgã a toor ye. Tõe me tɩ yaa sẽn na n yɩl tɩ nebã sã n wʋm kurkuyã kũumã bɩ ra sãam b sũur wʋsg ye.
Mark 6:11, nwtsty
Pĩms-y y naoã tomã: Karen-biisã sã n maan woto, rat n yeelame tɩ Wẽnnaam sẽn na n maan b rãmbã bũmb ningã taal pa be bãmb zug ye. “Pĩms-y y naoã tomã” bee Mat. 10:14 la Luk 9:5. A Mark ne a Luk fãa paasame tɩ b maan boto tɩ yɩ kaset b yĩnga. A Poll ne a Barnabas sẽn tɩ moon koɛɛgã Ãntios sẽn be Pisidi soolmẽ wã, b maana woto. (Tʋʋ. 13:51) Korẽnt soolmẽ wã me, a Poll maana bũmb sẽn wõnd woto. A fugsa a futã, n yeel yaa: “Yãmb sã n sãame, a taalã be ne yãmba, la a ka be ne maam ye.” (Tʋʋ. 18:6) Karen-biisã ra mii manesem a woto, bala zʋɩf-rãmb kẽer sẽn da kẽnd bu-zẽmsã tẽnsẽ sã n da wa lebg n kuusẽ n kolg Israyɛlle, b pĩmsda b naooda wã tom sẽn na yɩl tɩ bu-zẽmsã tẽns rẽgd ra tũ-b n kẽ ye. La a Zeezi saglgã võor yaa toore.