Ziirã yell le yika tʋm-tʋmdbã sʋka

A Zeezi ne a karen-biisã sẽn yi Peere soolmã n debd Zeruzalɛmmã, b pasga Zʋrdẽ kʋɩlgã zĩig ning sẽn pẽ Zeriko wã. Neb a taab me n da tũud-ba, n na n tɩ maan yʋʋmd 33 Pakã.

A Zeezi lʋɩɩ taoor t’a karen-biisã pʋgda. A ra pa rat n ta tɩ Pakã zoe n sɩngame ye. La rabeem n da tar karen-biisã. Sẽn nan pa kaoose, a Lazaar sẽn wa n maan kaalem t’a Zeezi yi Peere n wat Zʋʋde wã, a Toma yeela karen-biis a taabã yaa: “Wa-y tɩ d me tũ bãmb n tɩ naag n ki.” (Zã 11:16, 47-53) Sɩd me, b sã n kẽng Zeruzalɛm, tõe n waa ne yelle. Dẽnd b bee bʋʋm la b sẽn yɛɛsdã.

Sẽn na yɩl n sõng a tʋm-tʋmdbã tɩ b tall raood baa ne yell ning sẽn watã, a bool-b-la kɛɛnga, n yeel-b woto: “Ges-y-yã! Tõnd dabda Zeruzalɛm, la b na n yõka Ninsaal Bi-riblã n kõ maan-kʋʋdbã kãsem-dãmbã ne tõog karen-saam-dãmbã, la b na n kaoo bãmb bʋʋd tɩ yɩ kũum. La b na n ninga bãmb bu-zẽms nusẽ tɩ b yaal bãmba, la b pãb-b ne kalwaase, la b ka-b da-pɩk [“ra-luk,” MN] zugu. La rasem a tãab daare, b na n vʋʋgame.”—Matye 20:18, 19.

Naoor a tãab la woto a Zeezi sẽn gom a kũumã la a vʋʋgrã yell ne a karen-biisã. (Matye 16:21; 17:22, 23) La so-kãngã wã, a pʋd n yeel-b lame tɩ b na n kaa yẽ raoog zugu. Karen-biisã kelgd-a lame la b pa wʋmd a gomdã võor ye. Tõe tɩ b ra ninga b yamẽ tɩ Wẽnnaam na n lebs n lugla Rĩung tẽng zugu, Israyɛll nebã sʋka, tɩ bãmb naag Kirisã n dɩ naam, n paam ziir la waoogre.

Tʋm-tʋmdb a Zak ne a Zã ma wã ra naaga neb nins sẽn da tũud a Zeezi n togd sorã. Tõe tɩ b ma wã yaa a Salome. A Zeezi ra kõo tʋm-tʋm-kãensã a yiibã yʋʋre, t’a võorã yaa “sa-kɛlems kamba,” b sẽn da yaa neb zɩɩm sẽn kaeedã yĩnga. (Mark 3:17; Luk 9:54) Sẽn pa kaoos wʋsgo, b yiibã wilgame tɩ b tʋllame n wa yɩ taoor dãmb Kirisã Rĩungã pʋgẽ. B ma wã ra mii rẽ. A bẽda kẽndã sasa, n wa a Zeezi nengẽ, n yĩgimd a taoor n na n bõos-a bũmb ning a kambã sẽn datã. A sẽn yĩgimd a Zeezi taoorã, a Zeezi sok-a lame tɩ bõe la a rata? A leokame yaa: “Kõ-y noor tɩ mam kom-dibl-kãensã a yiibã zĩnd ne yãmb y soolmã pʋgẽ, a yembr y rɩtgo, a to wã y goabga.”—Matye 20:20, 21.

Yaa a Zak ne a Zã n yeel b ma wã t’a bõos a Zeezi woto. A Zeezi yeel-b lame yaa: “Yãmb ka mi yãmb sẽn kot maam bũmb ningã ye. Dẽ yĩnga, yãmb tõe n yũu bõn-yũudl ning mam sẽn na n yũ wã?” Bala, rẽ tɩ yaa a sẽn nan togs-b tɩ yẽ na n paama namsg la yaoolgo. La b yeelame tɩ b tõeeme. (Matye 20:22) Wõnda b ra ket n pa wʋmd a Zeezi gomdã võor sõma ye.

A Zeezi yeel-b-la woto: “Yaa sɩd tɩ yãmb na n yũu bõn-yũudl ning mam sẽn na n yũ wã. La a ka be ne maam tɩ kõ noor tɩ ned zĩnd mam dɩtgo wall mam goabg ye. Mam sã n na n kõ me, yaa neb nins mam ba sẽn segl zĩ-kãens b yĩngã.”—Matye 20:23.

Tʋm-tʋmdb piigã sẽn wʋm a Zak ne a Zã sẽn kos bũmb ningã, b sũyã yikame. Tʋm-tʋmdbã sẽn da wa n wẽed no-koɛɛm n dat n bãng sẽn yaa-a kãseng n yɩɩd bãmb sʋkã, tõeeme tɩ yaa a Zak ne a Zã n da so goamã. (Luk 9:46-48) Sẽn yaa a soab fãa, a Zak ne a Zã sẽn kos bũmb ningã wilgdame tɩ tʋm-tʋmdb piig la a yiibã pa tũ a Zeezi sẽn sagl-b tɩ b modg n yɩ sik-m-mens rãmbã ye. B ket n datame n yaa taoor dãmba, n tar ziir la naam.

A Zeezi baoo a sẽn na n maaneg n welg yel-kãnga tɩ ra wa zẽn n paas ye. Rẽ n so t’a bool bãmb piig la a yiibã, n bʋk a meng n sagl-ba. A yeel-b lame yaa: “Yãmb miime tɩ neb nins nebã sẽn get wa soolem nanambsã maanda b nebã pãnga, la tɩ nin-kãsemsã soo bãmb ne pãnga. La a kõn yɩ a woto yãmb sʋk ye. Ned sã n dat n yɩ kãseng yãmb sʋka, bɩ a yɩ yãmb tʋmtʋmda. La ned sã n dat n yɩ taoor soab yãmb sʋka, bɩ a yɩ yãmb fãa yamba.”—Mark 10:42-44.

A Zeezi wilgame tɩ b tog n dɩka yẽnda togs-n-taare. A yeelame: “Yaa woto yĩng la Ninsaal Bi-riblã wa yã. Ka tɩ nebã na sõng bãmb ye, la yaa tɩ bãmb na sõng nebã, la tɩ kõ b vɩɩmã, n yao n fãag neb wʋsgo.” (Matye 20:28) Yʋʋm a tãab la woto a Zeezi sẽn sik a meng n sõngd nebã. A ra na n kell n maana woto hal n wa sak n ki nebã fãagr yĩnga. Karen-biisã ra segd n talla a Zeezi yamã buudu, n yɩ sik-m-mens rãmba, n sakd n tʋmd n sõngd neb a taabã. B pa tog n bao n na n yɩ taoor dãmba, n dat ziir la naam ye.