Kiris-nebã vɩɩm la b tʋʋma tigissã na-kẽndr not-rãmbã
YƲƲM-VẼKR RASEM A 6-12
D SẼN BÃNG BIIBLÃ KARENG PƲGẼ | SƖNGRE 1-2
“A Zeova naana bõn-vɩɩs buud toor-toor tẽngã zugu”
Sɩngre 1:3, 4, 6, 9, 11; it-1 562-563
Bũmb nins b sẽn naanã
Naanegã pipi daarã, Wẽnnaam yeelame: “Bɩ vẽenem zĩndi.” Vẽenem n pasg sawatã, baa ne b sẽn da pa ne-a tẽngã zugã. Wõnda vẽenemã puka bilf-bilfu, wa seb-lebgd a J. W. Watts sẽn yeelã. A yeelame: “La vẽenemã puka bilf-bilfu.” (Sɩng. 1:3, A Distinctive Translation of Genesis) Wẽnnaam welga vẽenemã ne likã toore, n pʋd vẽenemã yʋʋr tɩ Wĩndga, la a pʋd likã yʋʋr tɩ Yʋngo. Woto wilgdame tɩ tẽngã ra yilemdeda a meng zugu, la a kẽnd n gilgd wĩntoogã me. Rẽ n so tɩ tẽngã bogr a ye sã n yaa wĩndga, bogr a to wã yaa yʋngo.—Sɩng. 1:3, 4.
Rasem a yiib-n-soabã, Wẽnnaam ‘welga koomã ne taaba’ n kɩt tɩ vɩʋʋg ra be b sʋka. Koom bilf n pa tẽngã zugu, la wʋsg n zẽk yĩngr n zãag ne tẽngã, tɩ vɩʋʋg ra be b sʋka. Wẽnnaam boola vɩʋʋgã tɩ Saase. La ra yaa sẽn na n welg-a ne tẽngã la a sẽn pʋd-a yʋ-kãnga wã, bala b pa wilg tɩ ãdsã la saasẽ yɛl a taab ra bee koomã sẽn da be yĩngrã pʋgẽ ye.—Sɩng. 1:6-8; ges-y ÉTENDUE.
Rasem a tãab-n-soabã, Wẽnnaam maana yel-solemd ne a pãn-kãsengã maasem, n kɩt tɩ koomã sẽn be tẽngã zugã fãa tigim zĩ-yende, tɩ tẽn-koɛɛng puki. A boola tẽn-koɛɛngã tɩ Tẽngã. Yaa daar-n-kãng me la Wẽnnaam naan bõn-vãad buud toor-toore, mood buud toor-toore, la tɩɩs sẽn womd biisi. Bõn-kãensã naanegã pa yɩ yaare, pa rẽ bɩ yaa bũmb sẽn da zoe n be n tall toeeng n wa lebg woto ye. B fãa ra tõe n weka “wa sẽn zems b buudã sẽn yaa to-to wã.”—Sɩng. 1:9-13.
Sɩngre 1:14, 20, 24, 27; it-1 563 7-10
Bũmb nins b sẽn naanã
Gom-bil a ye la b pʋd Sɩngr 1:16 pʋgẽ tɩ tar yõod wʋsgo. Pa Ebre gom-bil ning sẽn yaa bara wã b sẽn lebgd tɩ “naana” la b pʋd be ye. Yaa Ebre gom-bil ning sẽn yaa asah sẽn dat n yeel tɩ “maana” la b pʋd be. Sẽn mik tɩ wĩndgã, kiuugã la ãdsã naaga bũmb nins sẽn be ‘saasẽ’ wã wa Sɩngr 1:1 (Wẽnnaam Sebre, 1983) sẽn yetã, dẽnd b naan-b-la hal sẽn kaoose, tɩ Daar a naas-n-soabã nan pa ta ye. Daar a naas-n-soabã, Wẽnnaam “maaname” tɩ saasẽ bõn-kãensã sẽn be zĩig ningã yaa toor ne tẽngã la sa-gãongã. B sẽn yeel tɩ ‘Wẽnnaam yeelame tɩ ãdsã zĩnd sa-gãongẽ wã, n kõt dũniyã vẽenemã’ wilgdame tɩ ned sẽn be tẽngã zug ra tõe n yãa bõn-kãens sõma masã, tɩ yaa wa b sẽn be sa-gãongẽ wã. Sẽn paase, kiuugã, wĩndgã la ãdsã na n yɩɩ “bãn n wilg wakate, rayã, la yʋʋmã.” Rẽ ra na n wa sõnga ãdem-biisã tɩ b bãngd b soaya.—Sɩng. 1:14.
Rasem a nu-n-soabã, yaa pipi bõn-vɩɩs buud toor-toor la b naan tẽngã zugu. Wẽnnaam pa naan bõn-vɩɩg a ye n da rat t’a tall toeeng n wa lebg bõn-vɩɩs a taab ye. Ne a pãn-kãsengã maasem, a naana bõn-vɩɩlɩ buud toor-toor tɩ pid tẽngã. Ad b sẽn yeele: “Wẽnnaam leb n naana parwẽna sẽn be ko-kãsengã pʋgã, wa sẽn zems b buudã sẽn yaa to-to, la b naan bõn-vɩɩlɩ nins sẽn dugd koomã pʋgã wa sẽn zems b buudu, la b yaa wʋsg n saagd koomã pʋga. Dẽ, Wẽnnaam leb naana bõn-yɩgdɩ wã fãa wa sẽn zems b buudu.” Wẽnnaam sũur sẽn yɩ noog ne a sẽn naan bũmb ninsã, a ning-b-la barka, la a yeel tɩ b ‘rog n fɩɩge.’ B ra tõe n maana woto, bala Wẽnnaam naan-b lame tɩ b tõe n wek wa “sẽn zems b buudu.”—Sɩng. 1:20-23.
Rasem a yoob-n-soabã, “Wẽnnaam naana we-rũms buud toor-toore, yir rũmsã buud toor-toore, la b naan bõn-bãooneg nins sẽn saagd tẽngã wa sẽn zems b buudu.” Wẽnnaam naan-b-la sõma, wa a sẽn da zoe n naan b rãmbã.—Sɩng. 1:24, 25.
Rasem a yoob-n-soabã baasgẽ, Wẽnnaam naana bõn-vɩɩg buud a to sẽn yaa toor fasɩ, sẽn yɩɩd rũmsã, la sẽn pa ta malɛgsã. Yaa ninsaala. Wẽnnaam naan-a lame n wẽneg a menga. Sɩngr 1:27 wã goma ninsaalbã yell koɛɛg-koɛɛga, n yeel tɩ “Wẽnnaam naana bãmb pag ne raoa,” tɩ Sɩngr 2:7-9 wã wilgd tɩ Wẽnnaam a Zeova yãka tẽngã tom n naan ninsaala, la t’a fʋʋsa vɩɩm vʋʋsem ninsaal yõ-bogdã pʋgẽ, tɩ ninsaal lebg nin-vɩɩga, t’a rɩk-a n tɩ ning zẽedã a sẽn da maanã zĩigẽ. Ka wã, a Zeova yãka tẽngã bũmb toor-toor a sẽn naanã, n naan ninsaala. A sẽn naan a Ãdmã poore, a yãka a sĩifã kõbr a yembr n naan pagã. (Sɩng. 2:18-25) Pagã naaneg poore, ninsaal ra lebga bõn-vɩɩg buud sẽn pid zãnga.—Sɩng. 5:1, 2.
D bʋgs Wẽnnaam Gomdã zug neere:
Siãnsã tʋʋmã manegda yãmb bɩ?
Saasã la tẽngã sẽn be yaa yʋʋm a wãna?
Siãnsã rãmb yetame tɩ tẽngã sẽn be rat n taa yʋʋm milyaar a 4, la tɩ saasã la bũmb nins sẽn be be wã yʋʋm taa milyaar 13 bɩ 14. Biiblã yẽ pa togsd yʋʋmd ning Wẽnnaam sẽn naan saasã la tẽngã ye. Biiblã zĩig baa a ye pa wilgd tɩ tẽngã sẽn be wã zemsa yʋʋm tus piig bal ye. Biiblã pipi vɛrse wã yetame tɩ “hal sɩngr wakate, Wẽnnaam naana saasã la tẽngã.” (Sɩngre 1:1) Woto kɩtame tɩ siãnsã rãmb tõe n tik b sẽn mi bũmb ninsã, n maan vaeesg sẽn na yɩl n bãng sẽn ta yʋʋm a wãn la saasã ne tẽngã be.
Sɩngre 1:26, it-2 16
A Zeezi Kirist
A pa naand a to ye. Bi-riblã naagame n sõng n naan bũmb toor-toore. La rẽ pa kɩt tɩ yẽ me yaa naanda, wa a Ba wã ye. Wẽnnaam tũnuga ne a vʋʋsem sõngã n naan bũmb fãa. (Sɩng. 1:2; Yɩɩn. 33:6) Sẽn mik tɩ yaa a Zeova la vɩɩmã kõtã, bõn-vɩɩlɩ wã fãa, d sẽn ne b rãmb la d sẽn pa ne b rãmbã fãa yaa yẽ n naane. (Yɩɩn. 36:10) Bi-riblã pa naand a to ye. A Zeova la Naandã, la a tũnuga ne a Bi-riblã n naan bũmb toor-toorã. A Zeezi mengã wilgame tɩ yaa Wẽnnaam la bũmb fãa Naandã, wa Biiblã tõr sẽn wilgdã.—Mat. 19:4-6; ges-y CRÉATION.
YƲƲM-VẼKR RASEM 13-19
D SẼN BÃNG BIIBLÃ KARENG PƲGẼ | SƖNGRE 3-5
“Pipi zirẽ-beedã sẽn wa ne zu-loees ninsã”
A Zeova raabã na n pidsame!
9 A Sʋɩtãan tũnuga ne waaf n belg a Awa t’a kɩɩs a Zeova sẽn yaa a Ba wã. (Karm-y Sɩngr 3:1-5; Vẽn. 12:9) A yeelame tɩ sẽn pa “tɩɩsã fãa sẽn be zẽedã zĩigẽ wã biis” la b tõe n dɩ wã pa segd ye. Yaa wa a sẽn sok bal tɩ: ‘Dẽnd yãmb pa tõe n maan y yam wɛ?’ Rẽ poore, a yeela bũmb sẽn yaa ziri fasɩ! A yeela a Awa yaa: “Yãmb ka na n tol n ki ye.” La a mak masã n na n kɩt t’a tẽ tɩ Wẽnnaam noorã tũub pa na n naf-a ye. Ad a sẽn yeele: “Wẽnnaam miime, tɩ yãmb sã n dɩ tɩɩgã bil daare, yãmb yamã na n wekame.” A Sʋɩtãan gomdã rat n yeelame t’a Zeova sẽn gɩdg tɩ b ra rɩ tɩɩgã bilã, a pa rat tɩ b yamã wek ye. A Sʋɩtãan pʋd n belga a Awa tɩ b sã n dɩ, b na n lebga “wa Wẽnnaam n mi sõama ne wẽng n bake.”
Sɩngre 3:6, w00 15/11 25-26
D tõe n dɩka yam a Ãdem ne a Awa nengẽ
A Awa ra tõeeme n pa beeg bɩ? Ayo. D ning d meng a zĩigẽ. Waafã golma goam nins fãa Wẽnnaam ne a Ãdem sẽn da togsã. Ned yãmb sẽn pa mi sã n dõd ned yãmb sẽn nonge, la y sẽn kɩs sɩda, n yeel t’a yaa zãmb soaba, y manesem na n yɩɩ wãna? A Awa ra segd n talla manesem sẽn wilgd t’a sũur pa noom ne waafã goamã, n yik a sũur ne-a, la a pʋd n da kelg-a meng ye. Sɩd me, waafã yaa ãnda, n na n yeel tɩ Wẽnnaam pa tɩrlem soaba, la a yeel t’a Awa sɩdã goam pa sɩda? A Awa sã n da sakd a sɩdã zu-sobendã, a ra tog n deng n tɩ yã-a lame n kos-a saglse, n yaool n yãk a sẽn na n maane. Yaa woto la tõnd segd n maane, b sã n wa togs-d goam sẽn kɩɩsd noy nins Wẽnnaam sẽn kõtã. La a Awa tẽe Makdã goamã, n da rat tɩ yaa yẽ mengã n tar sor n na n yãkd sẽn yaa sõma ne wẽngã a toore. A sẽn da tagsd woto n pa satẽ wã, wa n kɩtame t’a maneg n dat rẽ. A pa bao n na n yiis tʋls-wẽngã a sũurẽ, wall a gom rẽ yell ne a sɩdã sẽn yaa zakã soabã ye. A pʋd basame tɩ tʋls-wẽngã ra paamd pãng a sũurẽ wã. Ad yaa kaeto!—1 Korẽnt rãmbã 11:3; Zak 1:14, 15.
A Ãdem kelga a pagã koɛɛgã
Tao-tao bala, a Awa pirsa a Ãdem t’a tũ-a a yel-wẽndã pʋgẽ. Bõe yĩng t’a Ãdem sak nana-nana woto? (Sɩngre 3:6, 17) A Ãdem ra tog n yãka a sẽn na n maan sɩd ne a soab ningã. A na n saka a Naandã sẽn kõ-a pag a sẽn nonge, la bũmb fãa wã bɩ? A Ãdem na n bao n bãnga Wẽnnaam sẽn dat t’a maan bũmb ning yellã pʋgẽ bɩ, bɩ a na n tũu a pagã raabã tɩ yellã rɩ b yiibã fãa bɩ? A Ãdem ra mii sõma t’a pagã sẽn dat n dɩ tɩɩg ning Wẽnnaam sẽn gɩdg-b tɩ b ra rɩ wã bilã n paam bũmb ningã yaa belgre. Wẽnnaam vẽnega tʋm-tʋmd a Poll t’a yeel yaa: “Pa a Ãdem la b belg ye. Yaa pagã la b belg-yã, t’a lebg kɩɩsda.” (1 Tɩmote 2:14) Dẽnd yaa Ãdem mengã n yãk yam n na n kɩɩs a Zeova. Yaa vẽeneg t’a sẽn da yɛɛsd n tɩ yɩɩd yaa yẽ ne a pagã sẽn pa na n le zĩnd ne taabã. A ra pa kɩs sɩd zãng tɩ Wẽnnaam tõe n demsa yellã ye.
Sɩngre 3:15-19, w12 10/1 4 s. a 2
Pagbã sɩd tara yõod Wẽnnaam nifẽ bɩ?
Wẽnnaam kãaba pag wẽng bɩ?
Ayo. Yaa ‘wag-kʋdrã b sẽn boond tɩ Sʋɩtãanã’ la Wẽnnaam “kãab wẽnga.” (Wilgri 12:9; Sɩngre 3:14) Wẽnnaam sẽn yeel t’a Ãdem na n “sooga” a pagã, pa wilgd t’a ra ratame t’a Ãdem nams a pagã ye. (Sɩngre 3:16) Yaa yel-wẽndã biis la a reng n yã n togs-ba.
Sɩngr sebrã tags-kãsemse—I
3:17—Wãn to la b kãab tẽn-gãongã wẽngã, la rẽ kaoosa wakat a wãna? Kãab wẽng ning b sẽn kãab tẽn-gãongã ra rat n yeelame t’a koobã ra na n yɩɩ toog wʋsg masã. Tẽn-gãongã b sẽn kãab wẽngã sẽn na n wom biis ne a gõosã sɩd yɩɩ bũmb sẽn nams a Ãdem kambã la a yagensã, hal t’a Nowe ba a Lamek gom “tẽng ninga [a Zeova] sẽn da kãab wẽnga . . . ne tõnd nus tʋʋma tood” yelle. (Sɩngre 5:29) Sãoong sa-kãsengã poore, a Zeova ninga a Nowe ne a komdibli wã barka, n yeel-b t’a ratame tɩ b rog kamb n pid tẽngã. (Sɩngre 9:1) Yaa wa Wẽnnaam yiisa kãab wẽng ning a sẽn da kãab tẽn-gãongã.—Sɩngre 13:10.
it-1 672
Rogem toogo
Yaa toog ning biig rogem sẽn wat ne wã. Pipi pag a Awa sẽn kɩɩs Wẽnnaamã poore, Wẽnnaam wilg-a-la toog ning a sẽn na n paam a sã n wa n tʋtẽ, la a rogem wakate. A sã n da kell n sak Wẽnnaam, a ra na n ket n paamdame tɩ Wẽnnaam ningd-a barkã. Rogmã sũ-noogã me ra na n yɩɩ sũ-noog tɛkẽ! Bala, ‘a Zeova barkã n wat ne arzɛka, tɩ yɩɩr ka naag ye.’ (Yel. 10:22) La masã ninsaal buud fãa yĩng sẽn pa zems zãngã, kɩtame t’a na n paamd toogo. Sɩd me Wẽnnaam yeelame yaa (wakat ninga, b gomda bũmb nins a sẽn basd tɩ paamd tõndã yelle, wa yaa yẽ mengã n maande): “Mam na n kɩtame tɩ fo tʋdb wakat yɩ toog wʋsg ne-fo. Fo rogem na yɩɩ toogo.” (Sɩng. 3:16)
D bʋgs Wẽnnaam Gomdã zug neere:
Sɩngre 4:23, 24, it-2 105 8
A Lemek
Goam nins a Lemek sẽn da yet a pagbã (Sɩng. 4:23, 24) wilgda nen-kɛglem ning sẽn da be b wakatẽ wã. Ad a sẽn yeele: “A Ada ne a Sɩla, kelg-y mam koɛɛgã: A Lemek pagba, yok-y y tʋb n kelg mam goamã! Mam kʋʋ raoa, m poglgã yĩnga, la m kʋ biiga, m sãmpogrã yĩnga. B sã n dok b sũur naoor a yopoe a Kayẽ yĩnga, b na n doka b sũur naoor pis-yopoe la a yopoe maam a Lemek yĩnga.” A Lemek ra rat n wilgame tɩ yaa bũmb a sẽn maan n na n kogl a yõore. A ra rat n yeelame tɩ yẽ sẽn kʋ raoã pa yɩ ne pʋ-toog wa a Kayẽ sẽn maanã ye. A yeelame tɩ raoã pogla yẽ, tɩ yẽ me bao n na n kogl a menga, tɩ tũ ne raoã yõore. Rẽ n so t’a goamã yaa wa kosg buudu, sẽn na yɩl tɩ ned ra wa bao n na n kʋ yẽ n lebse, a sẽn kʋ raoã n na n kogl a yõorã yĩng ye.
Sɩngre 4:26, it-1 352 5
Goam sẽn paoogde
A Enoos wakatã la sẽn deng sa-kãsengã, nebã “sɩngame n pʋʋsd” ne a Zeova yʋʋre. La pa wõnd ra yaa bũmb sẽn zemse, bala yaa vẽeneg tɩ hal sẽn deng wakat-kãnga, a Abɛll ra sɩng n pʋʋsda Wẽnnaam, n pʋt a yʋʋrã. (Sɩng. 4:26; Ebre. 11:4) Sã n mik tɩ wa bãngdb kẽer sẽn wilgã, nebã sẽn sɩng n pʋʋsd ne a Zeova yʋʋrã to-to wã pa zemse, la tɩ b rɩka a Zeova yʋʋrã n pʋd ninsaalba, bɩ bõn-naands b sẽn da pʋʋsde, dẽnd b sẽn da maandã yaa bũmb sẽn paoogd a Zeova.—Ges-y ÉNOSH.
YƲƲM-VẼKR RASEM 20-26
D SẼN BÃNG BIIBLÃ KARENG PƲGẼ | SƖNGRE 6-8
“A maana woto bal kɛpɩ”
Sɩngre 6:9, 13, w18.02 4 s. a 4
D tall tẽeb la d yɩ sakdb wa a Nowe ne a Dãniyɛll la a Zoobe
4 Zu-loe-bʋs la a Nowe paam-yã? A Nowe yaab a Enok wakatã tɩ nebã wẽn-kɩɩsgã ra zoe n tara pãnga. B goma “gom-wẽns” meng n paoog a Zeova. (Zʋʋd 14, 15) Nen-kɛglmã ra tara paasg bala. A Nowe wakatã ne a na n ta tɩ “zĩiga fãa nebã rag n maanda taab pãnga.” Malɛg-wẽns n tek b mens n lebg ninsaalba, n dɩgs pagb n dog kamba. B kambã ra yaa nen-kɛglem dãmba. (Sɩng. 6:2-4, 11, 12) La a Nowe ra yaa toor fasɩ. Biiblã yeelame: “A Nowe paama Sẽn-Ka-Saab nimbãan-zoeere. . . A Nowe zamaanã neb fãa sʋka, yẽnda rag n yaa nin-tɩrga, n yaa burkĩna. A Nowe rag n tũuda Wẽnnaam.”—Sɩng. 6:8, 9.
Sɩngre 6:14-16, w13 4/1 13 s. a 6
A “kẽna ne Wẽnnaam sɩd-sɩdã”
Tʋʋmdã kaoosa yʋʋm wʋsgo. Tõe tɩ kaoosa yʋʋm 40 bɩ 50 menga. B ra segd n kɛɛ tɩɩsã, n wuk b sẽn kɛ b rãmbã, n wã-b tɩ zemse la b kã-b n naag taaba. Koglgã ra yaa rot a tã sẽn dog taab zutu, a ra tara ro-pʋs ka tɛka, la rignoor a kɩrengã. Yaa vẽeneg t’a ra tara võya zĩis toɛy-toɛy, la zugu. Zugã tẽn-sʋka ra zẽkame sẽn na yɩl tɩ koomã tõe n sigda. —Sɩngre 6:14-16.
D tõog toog n zoe zoeesã n da ya ye
13 Bõe n sõng nin-kãensã fãa sẽn tũ a Zeova pĩnd wẽndẽ wã tɩ b tõog n zoe zoeesã n baase? Tẽeg-y-yã a Poll sẽn gom a Nowe yell n yeel bũmb ningã. (Karm-y Hebre dãmb 11:7.) A Nowe ra na zɩ n yã sa-kãseng sẽn ni n kʋ neb la rũms ye. (Sɩng. 6:17) Sa-kãseng ra zɩ n zĩnd ye. La ne rẽ fãa, a Nowe pa tags tɩ sa-kãseng pa tõe n zĩnd ye. Bõe yĩnga? A ra kɩsa sɩd ne a sũur fãa t’a Zeova sã n yeel t’a na n maana bũmbu, a maandame. Woto kɩtame t’a pa tags t’a Zeova sakr yaa toog tɩ loog noor ye. A pʋd n maana a Zeova sẽn yeel-a t’a maanã bal kɛpɩ. (Sɩng. 6:22) A Nowe ra segd n tʋma tʋʋm wʋsgo. A ra segd n kaa koglgã, n kẽes rũms a pʋgẽ, la a bao rɩɩb yẽ ne a zakã rãmb la rũmsã yĩng n bĩngi. A leb n da segd n keooga nebã, la a sõng a zakã rãmb me tɩ b kell n tall zood sõma ne a Zeova. Pa wakat fãa la woto maaneg yɩ nana ne a Nowe ye. La a tẽebã yĩng kɩtame t’a tõog toogo, n tʋm tʋʋm nins fãa a Zeova sẽn bobl-a wã. Woto kɩtame t’a Zeova fãag yẽ ne a zakã rãmba, la a ning-b barka.
D bʋgs Wẽnnaam Gomdã zug neere:
Sɩngr sebrã tags-kãsemse—I
7:2—Bõe zug la b ra tik n maand welgr rũm-yɩlem la rũm-dẽgd sʋka? Yaa wa welgrã ra tɩ loee ne b sẽn tõe n dɩk b rãmb n maan maandã tũudmã pʋgẽ wã, lakae a ra pa tɩ loe ne b sẽn tõe n dɩ b rãmb bɩ b sẽn pa tõe n dɩ b rãmbã ye. Sẽn deng sãoong sa-kãsengã, ninsaalbã ra pa wõbd rũmsã nemd ye. B sɩng n gomda rɩɩb sẽn yaa yɩlemd la sẽn yaa “bõn-dẽgd” yell ne a Moiiz Tõogã bala, la rẽ tũu ne a Moiiz Tõogã n looge. (Tʋʋma 10:9-16; Efɛɛz rãmba 2:15) Yaa wa a Nowe ra mii bũmb ning sẽn da zems ne maoong a Zeova balengã pʋgẽ. A sẽn yi koglgẽ wã bala, a “mee tẽn-kugr [a Zeova] yĩnga. Le yẽ yãka rũm sõama wã buud fãa rũng a ye-ye la bõn-yɩgdɩ wã sẽn yaa sõama wã buud fãa me a ye-ye n maan maand sẽn yõogd bugum tẽn-kugra zugu.”—Sɩngre 8:20.
Sɩngr sebrã tags-kãsemse—I
7:11—A Nowe wakatẽ sa-kãsengã koom yii yɛ? Naanegã sasa bɩ “daar” a yiib-n-soabã wẽnde, b sẽn da wa n maan “sa-gãong” sẽn gũbg tẽngã, koom n da be “sa-gãonga tẽngra” tɩ koom be “sa-gãonga zugẽ.” (Sɩngre 1:6, 7) Koom ning sẽn be “tẽngra” ra yaa koom ning sẽn da zoe n be tẽng zugã. La koom ning sẽn da be “zugẽ” wã ra yaa walem sẽn yaa wʋsg-wʋsg n da luund tẽngã zugu, n da yaa ‘bog-zulums ko-nini.’ Ko-kãng n dʋʋg tẽngã zug a Nowe wakatã.
YƲƲM-VẼKR RASEM 27– WAO-FUGDG RASEM A 2
D SẼN BÃNG BIIBLÃ KARENG PƲGẼ | SƖNGRE 9-11
“Dũniyã gill fãa rag n gomda buud-gomd a yembre”
Sɩngre 11:1-4, it-1 255
Babilon-kãsengã
Pĩnd wẽndẽ Babilondã sẽn da yaa to-to. Babilond tẽngã meebã Sineyaar zĩ-longẽ wã, ne b sẽn mak n na n me Babɛll gasgã yɩɩ wakat-yɛnga. (Sɩng. 11:2-9) Bũmb ning sẽn kɩt nebã wʋsgã ra rat n me gasgã ne tẽngã pa sẽn na n waoog a Zeova yʋʋrã ye. B sẽn da ratã yaa ‘bao yʋʋr n kõ b menga.’ Gas-wogd nins b sẽn yã pĩnd wẽndẽ Babilond raboogẽ wã la Mezopotami soolmã zĩis a taabã wilgdame tɩ tog n da yaa tũudum yĩng la b sẽn da rat n me Babɛll gasgã, baa a woglem la a bedrem sẽn da yaa to-to fãa. Wẽnnaam a Zeova sẽn kɩt tɩ meebã yalsã wilgda vẽeneg t’a ra geta zĩ-kãngã wa ziri tũudmã yẽgre. Yaa sɩd tɩ Babɛll sẽn yaa tẽngã yʋʋr ne ebre wã võor yaa “Gẽdgre,” la Simeer buud-gomdã (Ka-dingir-ra) ne Akaad buud-gomdã (Bab-ilu) pʋgẽ, yʋʋrã võor yaa “Wẽnnaam rig-noore.” Dẽnd sẽn pa-b tẽngã pʋgẽ wã toeema a yʋʋrã bilfu, sẽn na yɩl tɩ b ra wa boond pipi yʋʋrã sẽn tẽegd Wẽnnaam sẽn da gẽdg nebã goamã, la b sẽn pʋd-a yʋʋr ningã bɩ b sẽn ledg-a ne yʋʋr ningã ket n tẽegda tũudum yelle.
it-2 111 6
Buud-gomde
Sɩngr sebrã wilgdame tɩ sa-kãsengã poore, neb kẽer n naag taab n na n maan bũmb sẽn pa zems ne Wẽnnaam daabã a sẽn da togs a Nowe ne a kom-dibli wã vẽenegã. (Sɩng. 9:1) Nin-kãens ra pa rat n sãeeg n “pid dũniyã” ye. B pʋd n da rata ne b sũur fãa tɩ ninsaalbã fãa tigim taab zĩig a ye, n me tẽng n vɩɩmd a pʋgẽ. Zĩ-kãng la b sẽn wa n boond tɩ Sineyaar zĩ-longã sẽn be Mezopotami wã. Yaa vẽeneg me tɩ ra na n lebga b tũudum zĩiga, tɩ gasg me be beenẽ rẽ yĩnga.—Sɩng. 11:2-4.
Sɩngre 11:6-8; it-2 111 7
Buud-gomde
Wẽnnaam sẽn yaa pãng sẽn ka to soabã pa bas tɩ b sẽn wuk b mens n dat n maan bũmb ningã tõog ye. A gẽdga b goamã tɩ kɩt tɩ b pa le tõe n wʋm taab ye. Rẽ n so tɩ b ra pa le tõe n naag taab n tʋme, n sãeeg n kẽng dũniyã zĩig fãa. B goamã sẽn gẽdgã kɩtame me tɩ b ra pa tõe n le wa naag taab n maan bũmb sẽn yaa wẽnga, bũmb sẽn pa zems ne Wẽnnaam daabã ye. Bala, ra na n yɩɩ toog masã ne ninsaalbã tɩ b tõog n yɩ noor a ye n tʋm ne yam la pãng n maan bõn-kãsemse. B sẽn lebg buud toor-toorã me kɩtame tɩ ra yaa toog tɩ b rɩk bãngr sẽn pa yit Wẽnnaam nengẽ, la sẽn yaa bãmb mensã sẽn maan vaeesg n paame, n naag taab n tõog n maan bũmbu. (Ges-y Koɛ. 7:29; Tõo. 32:5) Dẽnd yaa sɩd tɩ ninsaalbã goamã gẽdgrã kɩtame tɩ b weel taaba, la nafa ninsaalbã, bala kaoosame tɩ ninsaalb ra pa le tõe n naag taab n pids magb sẽn pa sõma la sẽn tõe n wa ne yɛl ye. (Sɩng. 11:5-9; ges-y Eza. 8:9, 10) D sã n tags n ges bãngr ning fãa ninsaalbã sẽn paam tõnd wakatã, n tũnug ne rẽ n maan sẽn pa segdã, rẽ bal seka d na bãng tɩ Wẽnnaam ra pĩnd n yãa yɛlã sẽn da na n baas to-to wã, a sã n da bas tɩ b me Babɛll gasgã.
Sɩngre 11:9; it-2 375
Buudã toor-toorã
Ninsaalbã sẽn pa le wʋmd taab goamã, tarẽ-n-tarẽ, buud fãa wa n tara a minimdu, a yel-maandɩ, a rog-n-migsi, la a tũudum. (Maan. 18:3) Buud toor-toorã neb sẽn zãag b mens ne Wẽnnaamã, b maana bõn-naands b wẽnnaam-dãmbã yĩnga.—Tõo. 12:30; 2 Rĩm. 17:29, 33.
D bʋgs Wẽnnaam Gomdã zug neere:
Sɩngre 9:20-22, 24, 25; it-1 421 4
A Kam
Tõe t’a Kanaã mengã maana kaset ne yellã, t’a ba a Kam pa sɩbg-a ye. La tõe me tɩ yaa bãngr-gomd la a Nowe togs n na n wilg t’a Kanaã yagensã na n dɩka a Kam zʋgã. Tõe t’a Kanaã ra zoe n dɩkda a ba a Kam zʋgã. Israyɛll nebã sẽn yaa a Sɛm yagensã sẽn wa n zab n tõog Kanaã nebã la kãab-wẽngã sɩng pidsgu. Sẽn põs-b sãoongã (wala makre, Gabawõ nebã [Zoz. 9]) lebga yembs Israyɛlle. Yʋʋm kobs poore, kãab-wẽngã le maneg n paama pidsgu, bala pãn-soaadb sẽn yaa a Zafɛt buudã tõog n sooga Kanaã nebã sẽn yaa a Kam buudã. Yɩɩ Meed la Pɛrs rãmbã soolmã, Gɛrs soolmã, la Rom soolmã.
Sɩngre 10:9, 10; it-2 403
A Nimrood
A Nimrood soolmã sɩngr yɩɩ Babɛlle, Erɛke, Akaade, ne Kalne. B fãa ra bee Sineyaar soolmẽ wã. (Sɩng. 10:10) Dẽnd wõnda yaa yẽ n kɩt tɩ b sɩng Babɛll tẽngã la a gasgã meebo. Rẽ zemsa ne zʋɩf-rãmbã kʋdemdã kibayã me. Ad a Zozɛf sẽn yeele: “Bilf-bilfã, a Nimrood tõogame n toeem yɛlã sẽn da sigl to-to wã, hal n lebg na-toaaga. A ra yetame tɩ yaa yẽ sã n tõog tɩ ninsaalbã teeg yẽ pãngã la a naamã wakat fãa bal la b na n bas Wẽnnaam zoeese. A yeelame tɩ Wẽnnaam sã n le bao n na n kɩt tɩ saag ni n sãam tẽngã, yẽ na n maana bũmb n kogl nebã: A na n mee gasg sẽn yaa zãntlgo, hal tɩ koomã pa tõe n ta be, la t’a na n doka a yaab-rãmbã sẽn ki wã sũuri. Nebã sakame n na n tũ a Nimrood goamã, n getẽ tɩ bãmb sã n sak Wẽnnaam, yaa yembdo. Rẽ n so tɩ b sɩng gasgã meebo, . . . hal tɩ b sẽn me-a tʋʋl-tʋʋl to-to wã yɩɩd b sẽn da tagsdã menga.”—Antiquités judaïques, I, 114, 115 (IV, 2, 3).