Kiris-nebã vɩɩm la b tʋʋma tigissã na-kẽndr not-rãmbã
BÕN-BƖƲƲNG RASEM A 6-12
D SẼN BÃNG BIIBLÃ KARENG PƲGẼ | TÕODO 33-34
“D bao t’a Zeova kogl tõnd ne a ‘nusã sẽn be wakat fãa’ wã”
it-2 1200
Yesurun
Yaa Israyɛll buudã waoogr yʋʋre. Sɛptãntã pʋgẽ, “Yesurun” lebga gom-bil b sẽn pʋte, n gomd b sẽn na n nong ned yelle. B lebg-a lame tɩ b “sẽn nong a soaba.” ‘Yesurunnã’ tog n da tẽegd-b lame t’a Zeova maana kaool ne-ba, la tɩ b segdame n kell n yɩ tɩrse. (Tõo. 33:5, 26; Eza. 44:2) Tõod 33:15 (MN) wã pʋgẽ, b sẽn gomd a Yesurun yell to-to wã yaa sẽn na n wilg tɩ Israyɛll nebã manesmã toeemame. Israyɛll nebã pa kell n vɩɩmd tɩ zems ne Yesurunnã b sẽn pʋd-bã ye. B pʋd n lebga neb b sẽn pa tõe n zã. B basa b Naand la b fãagdã, la b paoog-a.
Teeg-y-yã a Zeova sẽn yaa ‘belsg fãa Wẽnnaamã’
A Moyiiz taasa Israyɛll nin-buiidã goam sẽn be yamleoog la sẽn kengd raoodo. A wa n yeel-b-la woto: “Wẽnnaam sẽn-ka-sɛɛbã yaa yãmb zĩ-kẽedga, la b nusã sẽn be wakat fãa wã zãada yãmba.” (Tõo. 33:27) Kaoosg zugẽ, no-rɛɛs a Sãmwɛll me wa n yeela Israyɛll nebã woto: “Bɩ y tũ Zusoabã n da bas ye, la y sak bãmb ne y sũyã fãa. . . Yaa bãmb yʋ-kãsengã yĩng la Zusoabã ka na n bas bãmb nebã.” (1 Sãm. 12:20-22) Dẽnd d sã n ket n sakd a Zeova, a pa na n tol n bas-d ye. A na n ket n sõngd-d-la wakat ning fãa d sẽn dat sõngre.
D tõog toog n zoe zoeesã n da ya ye
16 Wala a Abrahaam, a Moyiiz me kiime n pa paam n yã Wẽnnaam sẽn da pʋlm-a bũmb ningã pidsg ye. Israyɛll nebã sẽn wa n kolg kãabg tẽngã, Wẽnnaam yeela a Moyiiz woto: “Fo na n yaasa yɩɩg n ges tẽng ning mam sẽn kõ Israyɛll nebã, la fo ka na n kẽ be ye.” Yaa a Moyiiz ne a Aarõ sẽn da beeg Wẽnnaam Meriba koomã zĩigẽ wã n kɩt tɩ b ra pa na n paam n kẽ kãabg tẽngã. B ra basame tɩ nin-buiidã yẽgengã yik b sũuri, hal tɩ kɩt tɩ b maan bũmb sẽn pa waoog Wẽnnaam. (Tõo. 32:51, 52) Rẽ yĩnga a Moyiiz sẽn da pa na n paam n kẽ kãabg tẽngã yĩng kɩtame t’a bas Wẽnnaam sakre, wall a lebg sũ-to-ned bɩ? Ayo. A pʋd n kosa a Zeova t’a ning Israyɛll nebã barka. A goamã baasgẽ, a yeela woto: “Israyɛll neba, yãmb tara sũ-noogo. Ãnda n yaa neb wa yãmba? Zusoabã fãaga yãmb n sõng yãmb wa gãongo. Bãmb yaa wa sʋʋg yãmb sẽn tar n tõogdẽ. Yãmb bɛɛbã na n wõgemda yãmb taoor tɩ y tab b poayã.”—Tõo. 33:29
D bʋgs Wẽnnaam Gomdã zug neere:
D rɩk a Zezi naoore, n yɩ sik-m-mens rãmb la nimbãan-zoɛtba
A sẽn get yɛlã to-to wã. A Ziid sebrã goma bũmb a Zeezi sẽn maan nand t’a wa tẽngã zug yelle. (Karm-y Ziid 9.) B boola a Zeezi tɩ malɛk-rãmbã naab a Mikayɛlle, n yeel t’a ‘zaba ne Sʋɩtãanã, n wẽ no-koeemd a Moyiiz kũumã poorẽ.’ Tẽeg-y t’a Moyiiz kũumã poore, a Zeova mum-a-la a toore, tɩ ned pa bãng sẽn yɩ zĩig ningã ye. (Tõo. 34:5, 6) Tõe t’a Sʋɩtãan sẽn da rat yaa rɩk a Moyiiz kũumã n kõ Israyɛll nebã. Bala, rẽ ra tõe n yɩɩ sabab tɩ b waoog a Moyiiz kũumã. La baa sẽn da yaa bũmb ning la a Sʋɩtãan da rat n maane, a Mikayɛll talla raoodo, n kɩɩs-a. Sebr a yembr yeelame tɩ gom-biis nins b sẽn lebg tɩ ‘zabe,’ la ‘wẽ no-koeemdã’ bilgda neb sẽn kɩɩsd taab bʋ-kaoodb taoore, la tɩ tõe tɩ rẽ wilgdame t’a Mikayɛll yeelame t’a Sʋɩtãan pa tar sor n na n dɩk a Moyiiz kũumã ye. La malɛk-rãmbã naab miime t’a pa tar sor n na n kao bʋʋd ye. Rẽ n so t’a bas yellã ne a Zeova sẽn yaa bʋ-kaood sẽn ka to wã. Rẽnd baa a Sʋɩtãan sẽn bao a Mikayɛll noorã, a pa sak n maan bũmb a sẽn pa tar sor n na n maan ye. Woto pa sik-m-meng sɩda?
BÕN-BƖƲƲNG RASEM 13-19
D SẼN BÃNG BIIBLÃ KARENG PƲGẼ | ZOZOE 1-2
“Y sẽn tõe n maan to-to tɩ y sẽn maand fãa yãk nenga”
Nang pãng t’a Zeova bee ne foo!
7 D sã n dat raood sẽn na yɩl n tõog n maan Wẽnnaam daabã, d segd n zãmsda a Gomdã la d tũud a saglsã. A Zozuwe sẽn wa n na n ledg a Moyiizã, a Zeova sagl-a lame t’a maan woto, n yeele: “Nang pãng la f keng f sũuri, la f gũus neer n maan sẽn zems tõog ning fãa mam tʋm-tʋmd a Moyiiz sẽn da kõ yãmbã. . . Da sak tɩ f noor bas tõog kãngã sebrã togsg ye. Tags a yell wĩntoog ne yʋngo. Gũus la f maan bũmb nins fãa sẽn gʋls a pʋgẽ wã. Yaa woto la f zug na n yɩ noog tɩ f tõog ne tʋʋmdã.” (Zoz. 1:7, 8) A Zozuwe tũu saglgã n ‘tõog a tʋʋmdã.’ Tõnd me sã n maan woto, d na n paama raood sõma, n tõog tʋʋmd ning Wẽnnaam sẽn kõ-dã.
Nang pãng t’a Zeova bee ne foo!
20 Dũni-kãngã sẽn pid ne zu-loeesã yĩnga, yɩl n tõog n kell n sak Wẽnnaam pa nana ye. La d pa d yembr ye. Wẽnnaam bee ne tõndo. A Bi-riblã sẽn yaa tigingã zu-soabã me bee ne tõndo. Sẽn paase, d tẽed-n-taasã sẽn yɩɩd 7000000 wã bee ne-do. Bɩ d fãa kell n tall tẽeb la d moond koe-noogã, n tẽegd yʋʋmd 2013 soabã vɛrse wã sẽn yet bũmb ningã: Nang pãng la f keng f sũuri, tɩ f Wẽnnaam a Zeova bee ne foo.—Zoz. 1:9.
D bʋgs Wẽnnaam Gomdã zug neere:
A Zozoe sebrã tags-kãsemse
2:4, 5—Bõe yĩng t’a Rahaab belg rĩmã neb sẽn da gẽesd tẽn-gũusdbã? Yaa a Rahaab sẽn tẽ a Zeova wã yĩng la a sẽn gẽneg a yõor n kogl tẽn-gũusdbã. Rẽ n so tɩ b sẽn da baood n na n maan Wẽnnaam nin-buiidã wẽngã, pa yɩ tɩlae t’a wilg-b tẽn-gũusdbã zĩig ye. (Matiye 7:6; 21:23-27; Zã 7:3-10) Sɩd me b yeelame t’a Rahaab “zemsa a tʋʋmã yĩnga.” A sẽn belg neb nins rĩmã sẽn tʋmã bee tʋʋm kãens sʋka.—Zak 2:24-26.
BÕN-BƖƲƲNG RASEM 20-26
D SẼN BÃNG BIIBLÃ KARENG PƲGẼ | ZOZOE 3-5
“A Zeova ningda bũmb nins d sẽn maand ne tẽebã barka”
Zʋrdẽ kʋɩlgã rʋʋgre
GES-Y Israyɛll nebã sẽn dʋʋgd Zʋrdẽ kʋɩlgã tɩ yaa koɛɛnga! Yʋʋmdã sasa kãng yaool n yaa saas wakat tɩ kʋɩlgã ra pid ne koom. La ka wã, koomã fãa loogame tɩ yaa koɛɛng tɩ Israyɛll nebã tũud be n loogdẽ, wa Mog-miuugã pɩʋʋgr sasa wã. La koomã fãa kẽe yɛ? Bɩ d gese.
Israyɛll nebã sẽn wa n na n dʋʋg Zʋrdẽ kʋɩlgã, a Zeova kɩtame t’a Zozuwe yeel nebã woto: ‘Maan-kʋʋdbã na n talla kãabg koglgã n lʋɩ yãmb taoore. B sã n sagl b naoã Zʋrdẽ kʋɩlgã pʋgẽ, koomã na n yalsame.’
Maan-kʋʋdbã rɩka kãabg koglgã n lʋɩ nebã taoore. B sẽn ta Zʋrdẽ kʋɩlgẽ wã, b kell n kẽe koomã pʋgẽ. Koomã ra zoeta wʋsgo, la b sẽn sagl b naoã koomã pʋgẽ wã bal la koomã sẽn sɩd yalse. Ad yaa yel-solemde! A Zeova kɩtame tɩ koomã sẽn da zoet n watẽ wã kell n yalse. Rẽ poor bilf bala, kʋɩlgã lebga koɛɛnga.
Yãmb kɩsa sɩd t’a Zeova noyã yaa tõnd nafr yĩng bɩ?
17 D sã n tũud a Zeova sor-wilgrã, paasda d tẽebã pãnga. Tẽeg-y Israyɛll nebã sẽn wa n na n kẽ kãabg tẽngẽ wã. A Zeova yeela maan-kʋʋdb nins sẽn da zãad kãabg koglgã tɩ b lʋɩ nin-buiidã taoor tɩ b kẽn n kẽ Zʋrdẽ kʋɩlgã. La nin-buiidã sẽn ta kʋɩlgã noorã, b mikame tɩ koomã ra pidame n loog a kʋɩl-kogsã, bala ra yaa saas wakate. Bõe la b ra na n maane? B ra na n tilga b fu-rotã kʋɩlgã noor n gũ semen a wãn tɩ koomã boog bɩ? Ayo. B teega a Zeova zãng-zãnga, n tũ a sẽn yeelã. Biiblã yeela woto: “Kuga walsa koglga zɩtba sẽn ta kʋɩlgã, b nao sẽn sɩɩs kooma, ad-y kooma sẽn da zoetã yalsa zĩig pʋgẽ. . . Kuga walsa koglga zɩtba yalsa soa, kʋɩlga sẽn kʋɩ wã sʋka, tɩ Israyɛl kamb fãa looge.” (Zoz. 3:12-17, Sebr Sõngo) Yaa vẽeneg tɩ Israyɛll nebã sẽn yã tɩ koomã sẽn da zoet wʋsgã yalsame wã, b sũy yɩɩ noogo. B sẽn tũ a Zeova sor-wilgrã, b tẽebã pãng paasame.
Yãmb kɩsa sɩd t’a Zeova noyã yaa tõnd nafr yĩng bɩ?
18 Yaa sɩd tɩ rũndã-rũndã, a Zeova pa maand yel-soalem a woto n sõngd a nin-buiidã ye. La d sã n wilgdẽ tɩ d kɩs-a-la sɩda, a ningd-d-la barka. A kõt-d-la a vʋʋsem sõngã, tɩ d paamd raood n moond Rĩungã koɛɛgã dũniyã gill zugu. Sẽn paase, a Zeezi Kirist sẽn yaa a Zeova pipi kaset soabã pʋlma a karen-biisã t’a na n teel-b lame. A yeela woto: “Bɩ y kẽng n maan nebã buud fãa tɩ b yɩ mam karen-biisi. . . . La gese, mam bee ne yãmb wakat fãa hal tɩ ta wakat sɛɛbo.” (Mat. 28:19, 20) A Zeova Kaset rãmb wʋsg sẽn da yaa neb sẽn zoet yãnd wilgame tɩ yaa vʋʋsem sõngã n kõ-b raood tɩ b tõe n moon neb b sẽn pa mi ne yẽesem.—Karm-y Yɩɩl Sõamyã 119:46; 2 Korẽnt dãmb 4:7.
D bʋgs Wẽnnaam Gomdã zug neere:
A Zozoe sebrã tags-kãsemse
5:14, 15—A Zeova sodaasã naab yaa ãnda? Wõnda sodaas naab ning sẽn wa n keng a Zozuwe pɛlg b sẽn wa n na n sɩng Kãabg Tẽngã reegrã ra yaa ‘Gomdã’ sẽn yaa Kiristã, nand t’a wa yɩ ninsaal tẽng zugã. (Zã 1:1; Dãniyɛll 10:13) D sẽn mi t’a Zeezi Kirist sẽn paam ziirã sõngda Wẽnnaam nin-buiidã tẽebã zabr pʋgẽ wã, sɩd kengda d raoodo.
BÕN-BƖƲƲNG RASEM 27–ZĨ-LIKR RASEM A 3
D SẼN BÃNG BIIBLÃ KARENG PƲGẼ | ZOZOE 6-7
“Zãag-y y mens ne yel-yaalsã”
Da ges-y bõn-zaals ye!
5 Yʋʋm kobs rẽ zugẽ, Israyɛll nebã sẽn wa n zab n tõog Zeriko n wʋkd a teedã, a Akã basame t’a ninã kɩt t’a zu teedo. Wẽnnaam yaool n da wilg-b-la teed nins b sẽn segd n tall n wã yẽ laogã bĩngr zĩigẽ wã, la a yeel-b tɩ b sãam sẽn ketã fãa. A keoog-b-la woto: “Bɩ y gũus ne bũmb nins sẽn kisã.” Rat n yeel tɩ b pa segd n dɩk bũmb n soog ye. A Akã sẽn kɩɩs no-kãngã, kɩtame tɩ Israyɛll nebã sẽn wa n kẽng n na n tɩ zab ne Ai tẽngã nebã, Ai nebã tõog-b lame, hal n kʋ kẽere. La sã n pa b sẽn wa n puk a bãongã, a Akã pa tol n sak n vẽneg bũmb ning a sẽn maanã n togs ye. A bãongã pukr poore, a yeelame tɩ yẽ ‘yãa’ teedã tɩ ‘bõn yõk-a, t’a rɩk-ba.’ A Akã sẽn bas tɩ teedã a ninã sẽn yã wã ratem tõog-a wã, waa ne sãoong yẽ “ne bũmb nins fãa a sẽn so wã” zugu. (Zoz. 6:18, 19; 7:1-26) A Akã tʋlga bũmb a sẽn da mi tɩ Wẽnnaam gɩdgame.
w97 15/8 28 s. a 2
Bõe yĩng tɩ d segd n vẽneg yel-wẽnd n togse?
Bũmb a ye sẽn kɩt tɩ d segd n vẽneg yel-wẽnd n togs yaa tɩ sõngdame tɩ d kogl tigingã t’a kell n yɩ yɩlemd a Zeova nifẽ. A Zeova yaa Wẽnnaam sẽn yaa sõngo. A ratame tɩ neb nins sẽn tũud-a wã yɩ yɩlemd tũudmã wɛɛngẽ, la b tall yel-manesem sẽn yaa sõma. A yeela a Gomdã pʋgẽ yaa: “Yãmb sẽn yaa kom-sakdsã yĩnga, ra le maan-y tɩ zems ne tʋlsem nins y sẽn da tar y zɩɩlmã wakatã ye. La y segd n lebga sõamyã y yel-manesem fãa pʋgẽ wa Sõng soabã sẽn bool yãmbã, bala b gʋlsame: ‘Yãmb segd n yɩɩ sõamyã, bala mam yaa sõngo.’” (1 Pɩyɛɛr 1:14-16) Neb sã n tʋmd tʋʋm-dẽgdo, pa rẽ bɩ b sã n maand yel-wẽnd tigingã pʋgẽ, tɩ b pa maan bũmb n kibl-b bɩ n yiis-ba, tõe n wãa tigingã nebã la kɩt tɩ b pa le paamd a Zeova barkã ye.—Ges-y Zozoe sak a 7.
Da ges-y bõn-zaals ye!
8 Ninã la yĩngã ratem wẽnsã tõe n kʋɩɩba kiris-neb hakɩkã me. Yaa rẽ yĩng la Wẽnnaam Gomdã sẽn sagend tɩ d kibl d mens bũmb nins d sẽn getã wɛɛngẽ, la d sũurã sẽn datã wɛɛngẽ wã. (1 Kor. 9:25, 27; karm-y 1 Zã 2:15-17.) A Zoob sẽn yɩ nin-tɩrgã sak n deegame tɩ bũmb nins d sẽn getã tara pãng wʋsgo, n tõe n kɩt tɩ d tʋlg bũmb ne d sũur fãa. A ra yeela woto: “Mam wẽena ne m nin tɩ m ka na n ges pʋg-sadb ne ratem sẽn yaa wẽng ye.” (Zoob 31:1) A Zoob pa yãk yam bal t’a pa na n sak n yo ye. A yãka yam n pa na n tol n bas tɩ yoob tʋlsem kẽ-a ye. A Zeezi meng wilgame tɩ pa segd tɩ d bas tɩ yoob yɛl kẽ d yamẽ ye. Daar a ye, a yeela woto: “Mam yeta yãmb tɩ ned ninga fãa sẽn get pag ne ratem wẽnga, a maana yoob ne yẽnda a sũur pʋgẽ.”—Mat. 5:28.
D bʋgs Wẽnnaam Gomdã zug neere:
w15 15/11 13 s. a 2-3
Karemdbã sogsgo
Pĩnd wẽndẽ wã, bɛɛb sã n da na n tɩ zab n deeg tẽng sẽn gũbg ne lalse, b ra wae n gũbgda tẽngã. Baa tẽng gũbgr sẽn na n kaoos to-to fãa, tõogdbã ra zaeeda tẽngã arzɛgsã fãa, la kood biis nins fãa sẽn da ketã. La Zeriko raboogã zĩigẽ, tẽn-vaeesdbã yãa kood biis wʋsg sẽn da kete. Rẽ wɛɛngẽ, sebr a ye pʋgẽ (Biblical Archaeology Review), b yeelame yaa: “Teed b sẽn maand ne yagdã sẽn yãk b toogo, bũmb nins d sẽn yã wʋsg n yɩɩd raboogã zĩigẽ wã yɩɩ kood biisi. . . Rẽ yaa bũmb sẽn yaa toor zalle, tẽn-vaeesdbã sɛb nins sẽn gomd Palɛstin yellã pʋsẽ. D ra tõe yãa kood biis sẽn be yʋʋr bɩ yʋy a yiib pʋgẽ, la tõog n yã kood biis sẽn yaa wʋsg woto fãa pa wae ye.”
Sẽn zems ne Biiblã kibarã, Israyɛll nebã sẽn pa zae Zeriko koodã biisã tara võore. Yaa a Zeova n da kõ-b noor tɩ b ra maan woto ye. (Zoz. 6:17, 18) Israyɛll nebã zaba ne Zeriko tẽngã sẽo-bilã sẽn wat waoodã ne tʋʋlgã sʋkã wakate, kẽebgã loogr poor bilf bala, wakat ning koodã biis sẽn yaa wʋsgã. (Zoz. 3:15-17; 5:10) Koodã biis sẽn da ket Zeriko soolmẽ wã wilgdame tɩ Israyɛll nebã sẽn gũbg Zeriko wã pa kaoose, wa Biiblã sẽn bilg yɛlã to-to wã.
ZĨ-LIKR RASEM A 4-10
D SẼN BÃNG BIIBLÃ KARENG PƲGẼ | ZOZOE 8-9
“Gabawõ nebã kibarã sẽn sõngd tõnd tɩ d bãng bũmb ninsi”
D rɩk d Wẽnnaam a Zeova togs-n-taare, n da tũus neb ye
Rẽ poore, Israyɛll nebã yii Zʋrdẽ kʋɩlgã noorã n dʋ tãens nins sẽn be babgẽ be sʋkã zutu. A Zozuwe saka a Zeova sor-wilgr n solg n ling Ai galʋ-tẽngã n zab ne-a. (Zozue sak a 8) Kanaã rĩm dãmb wʋsg sẽn wʋm tɩ rĩm dãmb a taab la Israyɛll zab ne n tõoge, b sũu tãpo. (Zozue 9:1, 2) Hivit rãmbã galʋ-tẽng b sẽn boond tɩ Gabaõ wã neb manesem yɩɩ toore. Zozue 9:4 yetame: “Bãmb maana sɩlem.” Wala a Rahaabe, b wʋma a Zeova sẽn fãag a nin-buiidã n yiis-b Eziptã, la a sẽn tõog a Sihõ la a Oogã. (Zozue 9:6-10) Gabaõ nebã bãngame tɩ zabr pa na n yãk neng ye. Woto, b tʋma neb a Zozuwe nengẽ Gilgalle, tɩ b tɩ yõk sɛɛg Gabaõ nebã la galʋ-tẽns a tãab nins sẽn pẽ bãmba wã yĩnga, sẽn yaa Kefira, Beerot, la Kɩrɩyat-Zearim. B sẽn tʋm b rãmbã maana wa b yita tẽn-zãrgẽ. B sɩlmã tõogame. A Zozuwe maana kaool ne-ba, n yeel t’a pa na n kʋ-b ye. Rasem a tãab poore, a Zozuwe ne Israyɛll nebã bãngame tɩ b ra belg-b lame. Baasg zãnga, b sẽn da wẽen ne a Zeova yʋʋr n maan kaoolã yĩnga, b sɩd pa zab ne-b ye. (Zozue 9:16-19) A Zeova sakame bɩ?
‘Ra teeg-y y meng bãngr ye’
14 D fãa yaa koangdba. Woto kɩtame tɩ baa tigingã kãsem-dãmb nins sẽn tar minim wʋsgã pa segd n yĩm tɩ b sã n wa rat n yãk yam n maan bũmbu, b segd n kosa a Zeova sor-wilgr ye. Wala makre, tẽeg-y bũmb ning sẽn paam a Zozuwe ne Israyɛll kãsem-dãmbã, Gabaõ nebã sẽn da wa n maan sɩlem sẽn na yɩl t’a Zozuwe ra zab ne-bã. Gabaõ nebã maana wa b yita tẽn-zãrgẽ, t’a Zozuwe ne Israyɛll kãsem-dãmbã sak n maan kaool ne-ba, n pa reng n kos a Zeova sor-wilgr ye. Baa a Zeova sẽn pa kɩt tɩ b sãam kaoolã, a kɩtame tɩ b gʋls kibarã Biiblã pʋgẽ tõnd sõngr yĩnga.—Zoz. 9:3-6, 14, 15.
“Yik n gilg tẽngã”
14 Neb nins b sẽn tʋma yeelame: “Tõnd yii zĩ-zãrgẽ yãmb Zusoab a Wẽnnaam yʋʋra yĩnga.” (Zozue 9:3-9) F sã n ges b futã la b teedã, sɩd ra yaa wa b yita zĩ-zãrgẽ, la Gabaõ yaool n da pa yɩɩd kɩlometr 30 ne Gilgall ye. A Zozuwe ne nanambsã tẽ-b lame n maan zood kaool ne Gabaõ la ne galʋ-tẽns nins sẽn pẽ Gabaõ wã. Yaa sẽn na yɩl n põs sãoongã yĩng bal la Gabaõ nebã sẽn maan sɩlem woto wã bɩ? Pa woto ye. B manesmã wilgdame tɩ b ra rat n taa Israyɛll Wẽnnaamã yam. A Zeova sakame tɩ Gabaõ nebã lebg neb sẽn na n “kɛ raado la b yõng koom n kõ neba Zusoaba tẽn-kugra yĩnga.” (Zozue 9:11-27) Gabaõ nebã kell n wilgame tɩ b tʋllame n tʋm sik-m-meng tʋʋm a Zeova tʋʋmdã pʋgẽ. Yaa wa Gabaõ buudã neb kẽer zĩnda Netinim dãmba bɩ tʋm-tʋmdb sẽn yi Babilon yembdẽ wã n lebg n wa wã sʋka, sẽn tʋm wẽn-doogã b sẽn lebs n me wã pʋgẽ. (Ɛsdras 2:1, 2, 43-54; 8:20) D tõe n dɩka b togs-n-taar n modg n tall laafɩ ne Wẽnnaam la d yɩ neb sẽn sakd n tʋmd sik-m-meng tʋʋm a tʋʋmdẽ wã.
D bʋgs Wẽnnaam Gomdã zug neere:
it-2 523
Ned luulgu
Tõogã a Zeova sẽn kõ Israyɛll nebã pʋgẽ, b wilgame tɩ b sã n da kʋ bi-bees kẽere, b ra tõe n luul-b-la raoog zug b kũumã poore, bala b ra get-b-la wa neb “Wẽnnaam sẽn kãab wẽnga.” B ra luunda kũumã nebã fãa nifẽ, tɩ yɩ keoogr nin-buiidã yĩnga. B ra segd n sika kũumã b sẽn luulã nand tɩ zĩigã sobge, n tɩ mumi. B sã n da bas kũumã raoogã zug yʋngã tõre, ra na n rẽgma tẽngã Wẽnnaam sẽn kõ Israyɛll nebã. (Tõo. 21:22, 23) Israyɛll nebã ra tũuda no-kãngã baa ne ned ning b sẽn kʋ wã sã n da pa Israyɛll neda.—Zoz. 8:29; 10:26, 27.
ZĨ-LIKR RASEM 11-17
D SẼN BÃNG BIIBLÃ KARENG PƲGẼ | ZOZOE 10-11
“A Zeova zab n sõnga Israyɛll nebã”
A Zozoe sebrã tags-kãsemse
Gabawõ yaa ‘tẽn-kãseng wa na-tẽnga. A yɩɩda Ai, la a neba fãa yaa gãndaado.’ (Zozoe 10:2) Baasg zãnga, Gabawõ nebã sẽn wʋm tɩ Israyɛll tõoga Zeriko ne Ai wã, b belga a Zozuwe t’a maan laafɩ kaool ne-ba. Tẽn-yagsã sẽn wʋmã, rabeem yõk-b lame. Bãmb rĩm dãmb a nu lagma taab n na n zab ne Gabawõ rãmbã. A Zozuwe tɩ sõnga Gabawõ nebã n zab ne b bɛɛbã n tõog-ba. A Zozuwe sẽn lʋɩ Israyɛll taoorã sasa b reesa galʋ-tẽns a taab me soolmã goabg la a taoore, la b tõog rɩtg rĩm dãmbã sẽn sũ tãp n wa na n zab ne-bã. Rĩm-dãmb nins fãa Israyɛll sẽn tõog Zʋrdẽ kʋɩlgã rʋʋndã yɩɩ bãmb 31.
Wĩntoogã yalsame
Tao-tao bala, a Zozuwe ne a sodaasã fãa yikame n na n kẽnge. B kẽna yʋng tõre. B sẽn wa n ta Gabawõ wã, nanambs a nu wã sodaas yɛɛsame n sɩng zoeese. A Zeova kɩtame tɩ sapɩlem bɛd rʋʋg n pãb-b hal tɩ b ki. Sapɩlmã sẽn kʋ neb ninsã yaa wʋsg n yɩɩd a Zozuwe sodaasã sẽn kʋ wã.
A Zozoe sebrã tags-kãsemse
10:13—Wãn to la bũmb a woto tõe n yɩ? Rẽ yĩnga bũmb bee a Zeova sẽn yaa yĩngr la tẽng Naandã sẽn pa tõe n maan sɩda? (Sɩngre 18:14) A sã n data, a tõe n tũnuga ne tẽngã sẽn gilgd to-to wã n kɩt tɩ ned sã n be tẽngã zug n get wĩndga ne kiuugã bɩ yaa wa b yasame. A leb n tõeeme n kɩt tɩ baa wĩndgã ne kiuugã sã n pa yas zĩ-yend me bɩ b ket n vẽnegd zĩigã. La sẽn sõs n yɩ to-to fãa, rẽ loogr poore, daar sẽn wẽnd woto pa leb n zĩnd ye.—Zozoe 10:14.
D bʋgs Wẽnnaam Gomdã zug neere:
w09 15/3 32 s. a 5
Karemdbã sogsgo
B sẽn gom sɛb kẽer yell Biiblã pʋgẽ wã, la b sẽn da tõe n teeg seb-kãens goamã pa segd n kɩt tɩ d tags tɩ yaa sɛb Wẽnnaam sẽn vẽneg tɩ b gʋls ye. La Wẽnnaam a Zeova kogenda sɛb nins fãa a goamã sẽn beẽ wã. Sẽn paase, gom-kãens “paada wakat fãa.” (Eza. 40:8) Hakɩɩkã, bũmb nins a Zeova sẽn kɩt tɩ b gʋls tɩ be Biiblã sɛb 66 pʋgẽ wã yaa bũmb nins bal sẽn yaa tɩlɛ ne-do, sẽn na yɩl tɩ d “tõe n paam minim sõma, n segl n sa tʋʋm-sõma buud fãa yĩnga.”—2 Tim. 3:16, 17.
ZĨ-LIKR RASEM 18-24
D SẼN BÃNG BIIBLÃ KARENG PƲGẼ | ZOZOE 12-14
“D tũ a Zeova ne d sũur fãa”
A Zozoe sebrã tags-kãsemse
14:10-13. Baa ne a Kalɛɛb sẽn da tar yʋʋm 85 wã, a kosa tʋʋmd sẽn yaa toogo, sẽn yaa tɩ zab n deeg Hebrõ babgã. A Anak buudã sẽn da yaa nin-wobdã n da be bab-kãnga. Ne a Zeova sõngre, a Kalɛɛb sẽn da tar zabr minimã reega Hebrõ n maan solgr tẽnga. (Zozoe 15:13-19; 21:11-13) A Kalɛɛb makrã sõngda tõnd tɩ d ra zãgs tẽeb tʋʋmd sẽn yaa toog ye.
Tẽeb la wẽn-zoeer kɩtdame tɩ ned tall raoodo
11 Tẽeb-kãng buudã bɩt n paasdame. D sã n tũud sɩdã n lemb a yõodã la d neẽ t’a Zeova leokda d pʋʋsgã, la t’a wilgd-d-la sor ne manesem toor-toore, d tẽebã bɩtame n paasdẽ. (Yɩɩl Sõamyã 34:9; 1 Zã 5:14, 15) D tõe n kɩsa sɩd t’a Zozuwe ne a Kalɛɛb sẽn da lemb Wẽnnaam sõmblmã, paasa b tẽebã pãnga. (Zozoe 23:14) Wala makre, yʋʋm 40 b sẽn yeeb we-raoogã pʋgẽ wã, b yãame tɩ Wẽnnaam kell n kogl-b-la wa a sẽn da kãabã. (Sõdbo 14:27-30; 32:11, 12) B yiibã fãa lʋɩya taoor Kanaã tẽngã reegr zabr sẽn kaoos yʋʋm a yoobã pʋgẽ. Sẽn na n baase, b talla yĩns keelem, la b vɩɩmd sũ-noog pʋgẽ. Hal menga, b ned kam fãa paama tẽng tɩ yɩ a pʋɩɩre. Sɩd-sɩda, a Zeova ningda neb nins sẽn balemd-a ne tẽeb la raoodã bark wʋsgo.—Zozoe 14:6, 9-14; 19:49, 50; 24:29.
D bʋgs Wẽnnaam Gomdã zug neere:
it-1 1032
Geball
A Zozuwe wakatã, a Zeova sõda “Geball soolmã” n naag tẽns nins Israyɛll nebã sẽn da segd n deegã. (Zoz. 13:1-5) Neb n tik rẽ n yeel tɩ Biiblã goamã pa tũud taaba, tɩ bala Geball soolmã ra bee Israyɛll nug-rɩtg hal zĩig sẽn zãrẽ, (sẽn kogl kilo 100 ne Dan buudã) la tɩ wõnda Israyɛll zɩ n soog Geball soolmã ye. Bãngdb kẽer yeelame tɩ tõe tɩ Biiblã babg ning b sẽn da gʋls ne Ebre wã pʋgẽ, vɛrse wã zĩ-kãnga wã sãamame. B yetame tɩ pĩndã, b ra gʋlsa be tɩ “tẽng ning sẽn pẽ ne Libã wã” bɩ ‘hal n tãag Geball soolmã todse.’ La d segd n tẽegame me tɩ bũmb nins a Zeova sẽn pʋlem tɩ be Zozoe 13:2-7 pʋgẽ wã wɛɛngẽ, Israyɛll nebã ra segd n maana bũmb n yaool n paam rẽ. Dẽnd tõe tɩ yaa Israyɛll nebã kɩɩsgã yĩng la b sẽn zɩ n tõog n soog Geball soolmã.—Ges-y Zoz. 23:12, 13.
ZĨ-LIKR RASEM 25-31
D SẼN BÃNG BIIBLÃ KARENG PƲGẼ | ZOZOE 15-17
“Kogl-y y rogem-pʋɩɩrã sẽn tar yõod wʋsgã”
Sẽn kʋʋl-bã tara yõod kiris-neb tigingã pʋgẽ
Kiris-neb nins sẽn kʋʋlã sã n ket n nangd pãng Rĩungã mooneg tʋʋmd pʋgẽ baa ne kʋʋlmã sẽn wat ne gɩdgr ninsã, b tũuda Israyɛll ned a Kalɛɛb sẽn yɩ wẽn-sakdã sẽn yãag a Moyiiz rasempʋɩɩgã pʋgẽ yʋʋm pis-naas pʋgẽ wã makre. A Kalɛɛb sẽn da wa n pasgd Zʋrdẽ Kʋɩlgã n na n kẽ Kãabg Tẽngã t’a ra tara yʋʋm 79. A sẽn lagem Israyɛll tãb-biisã n zab n tõog b bɛɛbã yʋʋm a yoob poore, a ra tõe n yeelame t’a yaa n modgame tɩ seke, n segd n vʋʋs masã. La a pa maan woto ye, a kosa tʋʋm toog ning sẽn yaa zab n deeg ‘tẽns sẽn yaa bɛd n tar pãnga,’ sẽn be Zida tãensã zutã, zĩig ning Anakim dãmbã sẽn yaa nin-wobdã sẽn da be wã. Ne a Zeova sõngre, a Kalɛɛb sɩd ‘rig-b-la wa a Zeova sẽn da yeelã.’ (Zozoe 14:9-14; 15:13, 14) Kɩs-y sɩd tɩ y sã n ket n womd Rĩungã biis y kʋʋlem wakate, a Zeova bee ne yãmb wa a sẽn da be ne a Kalɛɛbã. La y sã n kell n yɩ wẽn-sakda, a na n kõ-y-la zĩig a dũni paalgã pʋgẽ.—Ezayi 40:29-31; 2 Pɩyɛɛr 3:13.
it-2 1097
Modg ned t’a tʋmd tʋʋm-kɛgemse
Pĩnd wẽndẽ wã, modg neb tɩ b “tʋmd tʋʋm-kɛgemsã” ra yaa bũmb sẽn wae, bala naoor wʋsgo, bɛɛb sã n da zab ne tẽng n deeg-a, b kɩtdame tɩ nin-buiidã lebg yembse. (Tõo. 20:11; Zoz. 16:10; 17:13; Ɛst. 10:1; Eza. 31:8; Wiis. 1:1) Israyɛll nebã sẽn wa n yaa yembs n tʋmd tʋʋm-kɛgemsã, Ezɩpt yembs taoor dãmbã ra namsd-b lame, n kɩt tɩ b me Pitom la Ramsɛs sẽn yaa teed bĩngr zĩisã. (Yik. 1:11-14) Israyɛll nebã sẽn wa n kẽ Kãabg tẽngẽ wã poore, b pa rig Kanaã nebã n yiisi, la b sãam-b wa a Zeova sẽn da kõ-b noorã ye. B pʋd n modg-b lame tɩ b lebg yembs n tʋmd tʋʋm-kɛgemse. Wa n baasa wẽnga, bala kɩtame tɩ Israyɛll nebã wa tũud ziri wẽnnaam-dãmba. (Zoz. 16:10; Bʋ. 1:28; 2:3, 11, 12) Rĩm a Salomo kell n kɩtame tɩ Amoor nebã, Hɛt nebã, Perɛɛz nebã, Hevi nebã la Zebuus nebã yɩ yembs n tʋmd tʋʋm-kɛgemse.—1 Rĩm. 9:20, 21.
it-1 390 s. a 4
Kanaã
Israyɛll nebã sẽn wa zabd n na n deeg Kanaã tẽnsã, b wʋsg põsame, n zãgs tɩ Israyɛll nebã kõn soog-b ye. La d tõe n yeelame t’a ‘Zeova kõo Israyɛll nebã tẽngã wa a sẽn dag n kãab b yaab-rãmbã,’ t’a “kɩtame tɩ Israyɛll nebã soolmã sẽn gilgã fãa zĩnd ne laafɩ,” la tɩ ‘kãab-nood nins fãa a Zeova sẽn dag n kãab Israyɛll buudã baa a yembr ka vaal ye, b fãa paama pidsgu.’ (Zoz. 21:43-45) Tẽn-yags nins fãa sẽn da yaa Israyɛll nebã bɛɛbã ra yɛɛsdame. Sẽn paase, b ra pa tõe n maan Israyɛll nebã bũmb ye. A Zeova ra pĩnd n togsame t’a na n diga Kanaã nebã “bilf-bilfu,” sẽn na yɩl tɩ tẽngã ra wa tiig n lebg raboogo, tɩ we-rũmsã wa lebg wʋsg ye. (Yik. 23:29, 30; Tõo. 7:22) Kanaã nebã zab-teedã ra yaa sõma wʋsgo. Wala makre, b ra tara kut saar-dãmb sẽn tar sʋ-wogd b naoẽ wã. La baa ne rẽ, d pa tõe n yeel tɩ Israyɛll nebã sẽn pa tõog n soog tẽns kẽerã, yaa a Zeova yelle, la t’a pa tõog n pids a pʋlemsã ye. (Zoz. 17:16-18; Bʋ. 4:13) La Biiblã pʋd n wilgdame tɩ zab a wãn Israyɛll nebã sẽn pa tõogã yaa b sẽn pa maan sɩd ne a Zeova wã yĩnga.—Sõd. 14:44, 45; Zoz. 7:1-12.
D bʋgs Wẽnnaam Gomdã zug neere:
w15 15/7 32
YÃMB RA MIIME BƖ?
Rẽ yĩnga, pĩnd wẽndẽ wã, Israyɛll soolmã ra pida ne tɩɩs wa Biiblã sẽn bilgdã bɩ?
BIIBLÃ wilgdame tɩ Kãabg tẽngã zĩis kẽer ra yaa weto, la tɩ tɩɩsã ra yaa “wʋsgo.” (1 Rĩm. 10:27; Zoz. 17:15, 18) La d sã n ges tẽngã zĩis kẽer sẽn yaa we-rasempʋɩɩg to-to rũndã-rũndã wã, kẽer tõe n maanda sãmbs tẽngã sã n sɩd ra yaa woto pĩndã.
Sebr a yembr pʋgẽ (La vie dans l’Israël de la Bible), b wilgame tɩ “pĩnd wẽndẽ Israyɛll soolmẽ wã, wetã sẽn beẽ wã ra yaa yalems n yɩɩd b sẽn yaa to-to rũndã-rũndã wã.” Sẽn tɩ yɩɩd fãa, tãensã zutã ra pida ne tɩɩs b sẽn boond tɩ pẽ (Pinus halepensis), tɩɩs b sẽn boond tɩ sɛnn de palɛstin (Quercus calliprinos) la tɩɩs b sẽn boond tɩ terebẽnt (Pistacia palaestina). Sefela wã sẽn yaa zĩig sẽn be Zida tãensã la Mediterane mogrã sʋkã, wom-seesã (Ficus sycomorus) ra yaa wʋsgo.
Sebr a yembr (Les plantes de la Bible) wilgdame tɩ Israyɛll soolmã zĩis kẽer pa le tar tɩɩs masã ye. Bõe n kɩt tɩ lebg woto? Sebrã wilgdame tɩ yɩɩ bilf-bilf la zĩisã sẽn wa n lebg woto wã. Ad sebrã sẽn yete: “Ninsaalbã kell n wɩnga ne bũmb toor-toor maaneg sẽn sãam moodã la wetã. Sẽn tɩ yɩɩd fãa, yaa sẽn na yɩl n paam zĩis wʋsg koobã la rũmsã gʋʋlg yĩnga, la b paam meeb teedo, la raad bugum yĩnga.”