Kiris-nebã vɩɩm la b tʋʋma tigissã na-kẽndr not-rãmbã
SƖPAOLG RASEM A 1-7
D SẼN BÃNG BIIBLÃ KARENG PƲGẼ | ZOZOE 18-19
“A Zeova sẽn pʋɩ tẽngã to-to wã yɩɩ ne yam”
it-1 933 s. a 5
Toadga
Wõnda b sẽn pʋɩ tẽngã to-to n kõ buud toɛy-toɛyã tika bũmb a yiib zugu: Bãndã b sẽn maanã, la buudã neb sõor sẽn zem to-to. Tõe tɩ bãndã b sẽn maanã ra wilgda buud fãa pʋɩɩr sẽn na n yɩẽ zĩig ning sẽnes bala. Wala makre, ra wilgdame tɩ buud ning pʋɩɩr na n zĩnda tẽngã nug-goabg wall a rɩtgo, a yaang wall a nin-taoore, pa rẽ bɩ tẽn-nabrẽ wã, wall tãensã sẽnese. Bãndã sẽn wilg bũmb ningã ra yita a Zeova nengẽ. Rẽ sõngame tɩ sũ-kĩir bɩ no-koɛɛm pa zĩnd buudã sʋk ye. (Yel. 16:33) Wẽnnaam sẽn maan woto wã, sõngame me t’a paam n ges tɩ buud fãa na n paam a pʋɩɩr tɩ zems ne b yaab a Zakoob sẽn togs bãngr-goam nins Wẽnnaam sẽn vẽneg-a wã, a sẽn wa n dat n maam kaalmã, tɩ b gʋls tɩ be Sɩngr 49:1-33 pʋgẽ wã.
it-1 1107 s. a 6
Pʋɩɩrã
Tẽns nins b sẽn paam tɩ yaa b pʋɩɩrã. Yaa a Zeova n kõ a Israyɛll kom-dibli wã b pʋɩɩrã. A wilga a Moyiiz tẽngã todsã. (Sõd. 34:1-12; Zoz. 1:4) Yaa a Moyiiz n kõ Gaad ne Rubɛn buudã, la Manase buud pʋɩ-sʋkã b pʋɩɩrã. (Sõd. 32:33; Zoz. 14:3) B maana bãnd n kõ buud a taabã sẽn ketã b pʋɩɩrã. Yɩɩ a Eleazaar ne a Zozuwe nifẽ. (Zoz. 14:1, 2) Sẽn zems ne bãngr-gomd ning a Zakoob sẽn togs tɩ be Sɩngr 49:5, 7 pʋgẽ wã, b pa yãk tẽngã zĩis toor-toor n kõ a Sɩmeyõ ne a Levi buudã tɩ yɩ b pʋɩɩr ye. Sɩmeyõ buudã pʋɩɩrã (n paas tẽn-kɩrems nins sẽn gũbg tẽn-kãensã) ra bee Zida buudã pʋɩɩr tẽn-sʋka (Zoz. 19:1-9), tɩ Levi buudã pʋɩɩr ra yaa tẽns bãmb 48 sẽn be Israyɛll soolmã pʋgẽ. A Zeova ra yaa Levi buudã pʋɩɩre, bala a yãk-b lame tɩ b tʋmd tʋʋm sẽn yaa toor zall sik zĩigẽ wã. B ra reegda piig-pʋɩɩrã tɩ yaa b pʋɩɩre, tʋʋm nins b sẽn da tʋmdã yĩnga. (Sõd. 18:20, 21; 35:6, 7) B kõo zagsã rãmb zĩis b buudã sʋka. Zagsã rãmb neb sõor sã n wa paasdẽ, tɩ kom-dibli wã me na n deegd b rogem-pʋɩɩre, b na n weenda zĩisã b sẽn pʋɩ wã bõones-bõonese.
it-1 933 s. a 6
Toadga
B sẽn maan poeer n bãng buud fãa sẽn segd n zĩndẽ wã poore, b ra segd n tika bũmb a to n bãng buud fãa zĩig yalem sẽn tog n yɩ to-to: Yaa buud fãa neb sõor la b ra geta. “Yãmb segd n maana poeer n pʋɩ soolmã n kõ y buud toor-toorã. Buud neb sã n yaa wʋsgo, b pʋɩɩrã segd n yɩɩ bedre. La buud neb sã n pa waoogẽ, b pʋɩɩrã segd n yɩɩ bilfu. Ned kam fãa pʋɩɩr na n yɩɩ zĩig ning a poeerã sẽn lʋɩ wã.” (Sõd. 33:54) Poeerã sẽn wilg buud fãa sẽn segd n zĩndẽ wã ra pa segd n toeeme, la b ra tõe n paasame, wall b boog zĩigã yalem. Rẽ n so tɩ b sẽn wa n mik tɩ Zida zĩigã yaa yaleng wʋsgã, b boog a yalmã, n yãk n kõ Sɩmeyõ buudã nebã.—Zoz. 19:9.
D bʋgs Wẽnnaam Gomdã zug neere:
it-1 934 s. a 1
Tẽngã todse
Zʋrdẽ nin-taoor babgã pʋɩɩb kibarã b sẽn bilg to-to wã wilgdame tɩ yaa Zida buudã (Zoz. 15:1-63), Zozɛf (Efrayim) buudã (Zoz. 16:1-10), la Manase buud pʋɩ-sʋkã sẽn da be Zʋrdẽ nin-taoorã (Zoz. 17:1-13) zĩisã la b reng n ning todse, bala b gomda b tẽnsã la b tẽnsã tods yell beenẽ. Rẽ poore, wõnda tẽngã pʋɩɩbã yalsame, bala Israyɛll nebã yika Gilgalle n tɩ tilg b sik-zĩigã Sɩlo. (Zoz. 14:6; 18:1) B pa wilg tẽngã pʋɩɩbã sẽn yals n kaoos to-to ye. La a Zozuwe waa n keooga buud a yopoe wã sẽn ketã, bala b ra maasa ne tẽns nins sẽn da ketã reegre. (Zoz. 18:2, 3) B kõo bʋʋm toor-toore, buud a yopoe wã sẽn tall manesem a woto yĩnga. Kẽer yetame tɩ paoong ning b sẽn paam b sẽn tɩ zab n deeg tẽns a taabã, la b sẽn da pa yɛɛsd tɩ Kanaã nebã na n wa yik zabr ne-b zĩig pʋgẽ wã kɩtame tɩ bu-kãensã neb ra pa tagsd tɩ zab n deeg tẽns a taabã ra yaa yãgb yell ye. Tõeeme me tɩ yaa b sẽn da pa rat n kẽng n tɩ zab ne tẽn-bõones kãensã nebã sẽn da pa rat tɩ b soog-ba yĩnga, la b sẽn da maan laas-laasã. (Zoz. 13:1-7) Sẽn paase, tõeeme tɩ b ra pa mi Kãabg tẽngã zĩ-kãensã sõma n ta zĩis nins b sẽn da zoe n kõ-bã ye.
SƖPAOLG RASEM 8-14
D SẼN BÃNG BIIBLÃ KARENG PƲGẼ | ZOZOE 20-22
“Neb sẽn pa wʋm taab sõma, tɩ d tõe n dɩk yam a pʋgẽ”
“Yãmb sẽn wʋmã yaa sɩd bɩ?”
A Zozuwe wakatẽ wã, bũmb la Israyɛll neb nins sẽn da tɩ be Zʋrdẽ kʋɩlgã rʋʋnd a to wã naan n maane, tɩ d tõe n dɩk yam a pʋgẽ. (Zoz. 22:9-34) B wa n wʋmame tɩ Israyɛll neb nins sẽn be rʋʋnd a ye wã mee tẽn-kug-kẽeng kʋɩlgã noore. Ra yaa Rubɛn nebã ne Gaad nebã la Manase buudã pʋɩ-sʋkã. Israyɛll buud a taabã sẽn wʋmã ra yaa sɩda, la ra pa kibarã zãng ye. Kɩtame tɩ b yãk yam n na n tɩ zab ne b saam-biisã sẽn be rʋʋnd a to wã, bala b tagsame tɩ yaa a Zeova la b kɩɩs-yã. (Karm-y Zozoe 22:9-12.) Zu-noogo, b reng n tʋma rap tɩ b na n tɩ sok n wʋm yellã vɩʋʋgo. Bõe la b tɩ bãnge? B bãngame tɩ Rubɛn nebã ne Gaad nebã la Manase buudã pʋɩ-sʋkã sẽn me tẽn-kugrã pa sẽn na n kʋʋd maand ye. Yaa sẽn na yɩl tɩ yɩ kaset tɩ bãmb me naag n yaa a Zeova nin-buiidu. Ad b sũy yɩɩ noog b sẽn deng n bao n na n wʋm yellã vɩʋʋgo, n pa yɩ yãg-yãg n yik zabr ne b saam-biisã!
Bũmb nins sẽn na n sõng-y tɩ y tõog n yẽs ne y kẽed-n-taagã
Gom n wilg yɛlã vẽenegã kɩtdame tɩ neb wʋm taab võore. Hal sẽn kaoose, Israɛll buudã kibay pʋgẽ, a Rubɛn, a Gaad la a Manase buudã pʋɩ-sʋk sẽn pa Zʋrdẽ kʋɩlgã yaangã “mee tẽn-kug-kãseng be” n pẽneg Zʋrdẽ kʋɩlgã tɩ nebã neẽ. Buud a taabã sẽn be Zʋrdẽ wã nen-taoor rʋʋllã pa wʋm b manesmã võor ye. B sẽn tẽ tɩ b tʋma wẽn-kɩɩsg tʋʋmdã yĩnga, b seglame n na n wa zab ne kʋɩlgã yaang rãmbã b sẽn da get wa tõtbã. La nand tɩ b kaoog zabrã, b tʋma neb tɩ b kẽng n tɩ kelg n ges n wʋm yellã võore. Ad rẽ sɩd yɩɩ yam tʋʋmd menga! B mikame tɩ tẽn-kugrã pa sẽn na n tar n yõogd maand ye. Buud nins sẽn pa kʋɩlgã yaangã ra yɛɛsda buud a taabã yagensã ra wa yeel bãmb yagensã kaoosg zugẽ “tɩ b toor ka be ne Zusoab [a Zeova] ye.” Rẽ n kɩt tɩ b me tẽn-kugrã t’a ra segd n yɩ kaset sẽn wilgd tɩ bãmb me yaa a Zeova balemdba. (Zozue 22:10-29) B pʋda tẽn-kugrã yʋʋr tɩ kaseto, bala a ra segd n yɩɩ kaset t’a Zeova n yaa sɩd Wẽnnaamã.—Zozue 22:34.
D bʋgs Wẽnnaam Gomdã zug neere:
it-1 390 s. a 4
Kanaã
Israyɛll nebã sẽn wa zabd n na n deeg Kanaã tẽnsã, b wʋsg põsame, n zãgs tɩ Israyɛll nebã kõn soog-b ye. La d tõe n yeelame t’a ‘Zeova kõo Israyɛll nebã tẽngã wa a sẽn dag n kãab b yaab-rãmbã,’ t’a “kɩtame tɩ Israyɛll nebã soolmã sẽn gilgã fãa zĩnd ne laafɩ,” la tɩ ‘kãab-nood nins fãa a Zeova sẽn dag n kãab Israyɛll buudã baa a yembr ka vaal ye, b fãa paama pidsgu.’ (Zoz. 21:43-45) Tẽn-yags nins fãa sẽn da yaa Israyɛll nebã bɛɛbã ra yɛɛsdame. Sẽn paase, b ra pa tõe n maan Israyɛll nebã bũmb ye. A Zeova ra pĩnd n togsame t’a na n diga Kanaã nebã “bilf-bilfu,” sẽn na yɩl tɩ tẽngã ra wa tiig n lebg raboogo, tɩ we-rũmsã wa lebg wʋsg ye. (Yik. 23:29, 30; Tõo. 7:22) Kanaã nebã zab-teedã ra yaa sõma wʋsgo. Wala makre, b ra tara kut saar-dãmb sẽn tar sʋ-wogd b naoẽ wã. La baa ne rẽ, d pa tõe n yeel tɩ Israyɛll nebã sẽn pa tõog n soog tẽns kẽerã, yaa a Zeova yelle, la t’a pa tõog n pids a pʋlemsã ye. (Zoz. 17:16-18; Bʋ. 4:13) La Biiblã pʋd n wilgdame tɩ zab a wãn Israyɛll nebã sẽn pa tõogã yaa b sẽn pa maan sɩd ne a Zeova wã yĩnga.—Sõd. 14:44, 45; Zoz. 7:1-12.
SƖPAOLG RASEM 15-21
D SẼN BÃNG BIIBLÃ KARENG PƲGẼ | ZOZOE 23-24
“Yaoolem sagls a Zozuwe sẽn kõ Israyɛll nin-buiidã”
it-1 82
Kaoole
Yɛlã ra yaa toore, Israyɛll nebã sẽn wa n kẽ Kanaã, Kãabg tẽngã pʋgẽ wã. Sẽn zems ne pʋleng ning a sẽn pʋlem b yaab-rãmbã, Wẽnnaam sẽn yaa yĩngr la tẽng Naabã ra kõo Israyɛll nebã sor tɩ b zab n deeg tẽngã. Dẽnd b pa kẽ tẽngã pʋgẽ wa sãamb ye. Sẽn paase, a Zeova ra gɩdg-b lame tɩ b ra maan kaool ne tẽn-kãensã neb sẽn da pa tũud yẽ wã ye. (Yik. 23:31-33; 34:11-16) Israyɛll nebã ra segd n tũu Wẽnnaam no-tũudsã bala. B ra pa segd n tũ tẽn-kãensã nebã b sẽn na n digã noy ye. (Maan. 18:3, 4; 20:22-24) Sẽn yɩɩd fãa, a Zeova ra keoog-b lame tɩ b ra maan kaool ne tẽn-kãensã nebã kãadmã wɛɛngẽ ye. B sã n da maan kaool a woto buud ne-ba, ra na n kɩtame tɩ b rɩgs pagb tẽn-kãensã sẽn pa tũud Wẽnnaam sɩd-sɩdã nebã sʋka, tɩ bãmb ne pʋg-kãens roagdbã lebg buudu, la kɩt me tɩ b maand b ziri tũudmã yɛlã la b tũud b minundã. Woto fãa ra na n yɩɩ bẽdgo, n kɩt tɩ b kɩɩs Wẽnnaam.—Tõo. 7:2-4; Yik. 34:16; Zoz. 23:12, 13.
A Zeova sẽn yeel fãa pidsdame
19 Sãmbg sẽn ka be, tõnd me sẽn yã bũmb nins pidsgã kɩtame tɩ d tõe n yeel woto: “Wẽnnaam sẽn da yeel tɩ b na n maana bũmb nins fãa n kõ yãmbã, b maaname n ka tol n bas baa a ye tɩ vaal ye. Bãmb maana fãa, baa a ye ka pa ye.” (Zozue 23:14) Wakat fãa, a Zeova fãagda a nin-buiidã, a kogend-b lame la a get b yell me. Rẽ yĩnga Wẽnnaam kãabsã fãa sʋka, y tõe n wilga baa a ye sẽn vaal n pa pids sɩda? Vẽenega, kae ye. Dẽnd d bãnga yam la d sẽn kɩs Wẽnnaam Gomdã sɩdã.
20 La bõe la a na n maan n kõ-d beoog daarã? A Zeova wilg-d lame tɩ tõnd sʋkã, neb wʋsg na n wa paam n vɩɩmda tẽngã sẽn na n lebg arzãnã zug ne sũ-noogo. Yaa neb bilf bal n na n tɩ rɩ naam ne Kiristã saasẽ. La d na n wa vɩɩmda tẽngã zug tɩ yaa saasẽ me, d tara bʋʋm sẽn sek n na n ket n tẽed wa a Zozue tɩ d sẽn gũud bũmb ninsã fãa na n pidsame. D tẽebã sɩd na n pidsame. A pidsgã poore, tõnd me sã n wa tẽeg a Zeova kãabsã fãa yelle, d na n yeela woto: “baa a ye ka pa ye.”
D bʋgs Wẽnnaam Gomdã zug neere:
A Zozue sebrã tags-kãsemse
24:2—Rẽ yĩnga a Abrahaam ba a Teera ra balemda bõn-naands bɩ? Sɩngrẽ wã, a Teera ra pa balemd a Zeova ye. Wõnda a ra balma kiuug wẽnnaam a Sin Uur neb wʋsg sẽn da balemdã. Sã n yaa ne Zʋɩf rãmbã kʋdemde, a Teera tog n da maanda bõn-naands me. Baasg zãnga, Wẽnnaam sẽn wa n yeel a Abrahaam t’a yi Uurã, a Teera tũ-a lame n kẽng Harã.—Sɩngre 11:31.
SƖPAOLG RASEM 22-28
D SẼN BÃNG BIIBLÃ KARENG PƲGẼ | BƲ-KAOODBÃ 1-3
“Ned kibar sẽn wilgd raood la yam tʋʋmde”
w04 15/3 31 s. a 3
A Ewuud tõoga bɛ wã sẽn da namsd-bã
A Ewuud sẽn mag n na n maan bũmb ninsã tõogame. La pa a sẽn tar yamã yĩnga, pa rẽ bɩ yaa bɛ wã n da pa tar võor ye. Wẽnnaam raabã pidsg pa be ne ninsaalbã yɛlã sẽn yaa to-to wã ye. Bũmb ning sẽn kɩt t’a Ewuud tõogã, yaa Wẽnnaam sẽn da sõngd-a wã yĩnga. Bala a sẽn da maand bũmb ningã ra zemsa ne Wẽnnaam raabã sẽn da yaa a fãag a nin-buiidã. Yaa Wẽnnaam meng n yãk a Ewuude. A Zeova “sã n dag n yãk bʋ-kaood n kõ Israyɛll nebã,” a Zeova “meng n dag n be ne bʋ-kaoodã a vɩɩm tɛka.”—Bʋ. 2:18; 3:15.
w04 15/3 30 s. a 1-3
A Ewuud tõoga bɛ wã sẽn da namsd-bã
Pipi bũmb a Ewuud sẽn maan yaa “zabr sʋʋg” sẽn tar noy a yiibu, la sẽn pa woko, a sẽn tõe n solg a fuugã tẽngre. Tõe t’a ra miime tɩ b n na n vaees-a lame. Naoor wʋsgo, nebã ra sẽbgda b sʋʋsã b goabga. Woto neb nins sẽn tʋmd ne b rɩtg nugã ra tõe n foog-b-la tʋʋll-tʋʋlle. La a Ewuud sẽn da yaa gobrã, a “sẽbga sʋʋgã a rɩtg gere, a futã tẽngre,” bala rĩmã gũudbã ra tõeeme n pa vaees be ye. Sɩd me “a rɩka yaoodã n kõ Moaab rĩm a Eglõ” tɩ gɩdgr pa zĩnd ye.—Bʋ. 3:16, 17.
B pa togs bũmb nins sẽn deng n maan a Eglõ na-yirẽ wã ye. Biiblã yetame bal t’a “Ewuud sẽn kɩs rĩmã yaoodã n sɛ, a talla neb nins sẽn tʋk yaoodã tɩ b yi n looge.” (Bʋ. 3:18) A Ewuud sẽn kɩs rĩmã yaoodã n sɛ wã, a yãaga neb nins sẽn tʋk yaoodã n zãag sõma ne a Eglõ na-yirã, n bas-b la a lebg n wa. Bõe yĩnga? Rẽ yĩnga, a ra yãka nin-kãensã tɩ b na n kogl-a, bala yaa woto la a ra tog n maane, bɩ a ra yãk-b-la yaoodã tʋkr yĩng bala? A da ratame n zãag-ba, bãmb mensã koglg yĩnga, n yaool n wa maan bũmb ning a sẽn da magd n na n maanã bɩ? Sẽn yaa a soab fãa, a Ewuud talla raoodo, n lebg n waa a yembre.
“A [Ewuud] sẽn wa n ta kug wẽn-naandsã zĩig sẽn be Gilgallã, a lebg n waa rĩm a Eglõ nengẽ n yeel-a yaa: “N-na! Ad-y mam tara m koɛɛg n dat n togs yãmb y yembr bala.’” Biiblã pʋgẽ, b pa wilg a sẽn maan to-to n paam tɩ b le tall-a n kẽng a Eglõ nengẽ ye. Rĩmã gũudbã ra pa tog n maan gũusg sɩda? B tagsame tɩ Israyɛll nin-yend pa tõe n maan b rĩmã bũmb bɩ? Rẽ yĩnga, a Ewuud sẽn lebg n waa a yembrã kɩtame tɩ b ra tagsdẽ t’a zãmbda a tẽngã neb bɩ? Sẽn yaa a soab fãa, a kosame n na n gom ne rĩmã a ye bala. A sɩd paama rẽ.—Bʋ. 3:19.
D bʋgs Wẽnnaam Gomdã zug neere:
Bʋ-kaoodb sebrã tags-kãsemse
2:10-12. D segd n talla Biibl zãmsg na-kẽndr d sẽn tũud n pa vaandẽ, sẽn na yɩl n ‘da yĩm bõn-neeb nins fãa a Zeova sẽn maanã ye.’ (Yɩɩl Sõamyã 103:2) Roagdbã segd n zãmsa b kambã sɩd ning sẽn yit Wẽnnaam Gomdã pʋgẽ wã neere.—Tõodo 6:6-9.
SƖPAOLG RASEM 29–YƲƲM-SAR RASEM A 5
D SẼN BÃNG BIIBLÃ KARENG PƲGẼ | BƲ-KAOODBÃ 4-5
“A Zeova tũnuga ne pagb a yiib n fãag a nin-buiidã”
‘Bɩ d sakd a Zeova tʋʋmã ne yamleoogo, t’a paam pẽgre!’
6 A Barak ra yaa Israyɛll tãb-biiga, t’a Debora ra yaa no-rɛɛs-poaka. Na maan yʋʋm 20, Kanaã rĩm a Yabẽ ‘rag n namsda Israyɛll nebã n maand-b pãnga.’ Rẽ kɩtame tɩ Israyɛll nebã ra zoet rabeem n pa rat n yi b rotẽ wã ye. Israyɛll nebã ra pa tar zab-teed n na n zabe, wall gãong n na n kogl b mense, t’a Yabẽ tãb-biisã yaool n da tar kut saar-dãmb kobs-wɛ.—Bʋ. 4:1-3, 13; 5:6-8.
‘Tʋʋm-bʋg la pag tar a Zeova raabã pidsg pʋgẽ?’
12 Sẽn wa n yaa bʋ-kaoodb n so Israyɛll nebã, Wẽnnaam yãka pag yʋʋr sẽn boond t’a Debora, t’a lebg no-rɛɛsa. A Debora kenga bʋ-kaood a Barak raoodo, tɩ sõng-a t’a zab n fãag Israyɛll nebã b bɛɛbã nugẽ. A reng n togsame tɩ pa na n yɩ a Barak n na n paam waoogr Israyɛll bɛɛbã tõogr yĩnga, la t’a Zeova na n kɩtame tɩ pag tõog a Sisera sẽn yaa Kanaã tãb-biisã naabã. Sɩd yɩɩ woto. Bala, yɩ a Zayɛll sẽn da pa Israyɛll pagã n kʋ-a.—Bʋk. 4:4-9, 17-22.
‘Tall raoodo, la f keng f sũuri’
9 A Zozue maana kaalem yʋʋmd 1450 sẽn deng a Zezi rogmã sẽnese. Dẽ poore, Wẽnnaam da yãkda neb tɩ b yaa bʋ-kaoodb Israyɛlle. Wakat kãnga, Kanaã naab a Zabẽ namsa Israyɛll nebã yʋʋm 20. La Wẽnnaam wa n kɩtame t’a no-rɛɛs-poak a Debora keng bʋ-kaood a Barak raoodo, t’a na n yik n zab n fãag Israyɛlle. A Barak tigma neb 10000 Taboor tãngã zugu, n na n zab ne a Zabẽ sodaasã taoor soab a Sizera. A Sizera ne a tãb-biisã ra bee Kɩsõ longã pʋgẽ ne saar-dãmb 900. Israyɛll nebã sẽn sig longã pʋgã, Wẽnnaam kɩtame tɩ saag tiig n ni tɩ zĩigã lebg bɛgdo, tɩ Kanaã nebã saar-dãmbã nao sudi. A Barak nebã tõoga zabrã, n “kʋ a Sizera tãb-biisã fãa.” A Sizera mengã zoe n tɩ solga pag a ye yʋʋr sẽn boond t’a Zaɛll fu-roogẽ. La a Zaɛll basame t’a gũs t’a kʋ-a. Wa a Debora sẽn da pĩnd n togs a Barakã, b sẽn tõog zabrã, yaa pag n “paam waoogrã.” Yɩɩ a Zaɛlle. A Debora ne a Barak la a Zaɛll sẽn tall raoodã kɩtame tɩ “laafɩ zĩnd [Israyɛll] tẽngã pʋgẽ yʋʋm pis-naase.” (Bʋk. 4:1-9, 14-22; 5:20, 21, 31) Pagb la rap wʋsg sẽn yɩ wẽn-zoɛtb me talla tẽeb la raoodo.
D bʋgs Wẽnnaam Gomdã zug neere:
Bʋ-kaoodb sebrã tags-kãsemse
5:20—Wãn to la ãdsã sẽn be yĩngrã zab n sõng a Barake? Biiblã pa yeel tɩ rẽ wilgdame tɩ malɛgsã sõng-b lame, bɩ t’a Sizera bagbã yãa ãdsã lʋɩɩsã n wilg tɩ rẽ makda yel-beed sẽn wate, wall bũmb b sẽn da reng n togs tɩ pa pids ye. La yaa vẽeneg tɩ Wẽnnaam kẽesa a toog zabrẽ wã.
YƲƲM-SAR RASEM A 6-12
D SẼN BÃNG BIIBLÃ KARENG PƲGẼ | BƲ-KAOODBÃ 6-7
“Kẽng ne pãng ning fo sẽn tarã”
Wẽnnaam noyã tõe n nafa yãmba
Ned sẽn tall tagsg sẽn zems a meng zug la sẽn ges a meng wa sẽn segd yɩɩ a Zedeyõ sẽn yɩ pĩnd ebre-rãmbã bʋ-kaood a yembrã. A pa bao n na n yɩ Israyɛll taoor soab ye. La b sẽn wa n yãk a Zedeyõ t’a lʋɩ taoorã, a yeelame t’a pa zems ne zu-no-kãngã ye. “Mam buuda yaa naong rãmb n yɩɩd Manase buuda fãa. La mam yaa bilf n yɩɩd neb nins fãa sẽn be m ba zakẽ wã,” woto la a wilg-yã.—Bʋ-kaoodba 6:12-16.
A Zeova n wilgd a nin-buiidã sore
5 Neb a taab me la a Zeova wa n yãke, n kõ-b a vʋʋsem sõngã tɩ b tõog n lʋɩ a nin-buiidã taoore. Wala makre, a Zozue ne a Zedeyõ la a Davɩɩd. Biiblã yeelame t’a Nun biig a Zozue ra “pida ne yam wʋsgo.” (Tõo. 34:9) B wilgame tɩ ‘Sẽn-Ka-Saab Sɩɩgã kẽe a Zedeyõ.’ (Bʋ. 6:34) B yeelame me tɩ “Sẽn-Ka-Saab Sɩɩgã kẽ a Davɩɩde.” (1 Sãm. 16:13) Nin-kãensã fãa teega a Zeova t’a kõ-b a vʋʋsem sõngã, tɩ b tõog n tʋm tʋʋm b sẽn da pa tõe n tʋm ne b mens pãnga. (Zoz. 11:16, 17; Bʋ. 7:7, 22; 1 Sãm. 17:37, 50) Kɩtame tɩ yɩ a Zeova n paam pẽgrã fãa.
A Zedeyõ tõoga Madiyã nebã
A Zeova yeela a Zedeyõ yaa: ‘Mam na n kɩtame tɩ Israyɛll nebã tõog zabrã. La fo sodaasã sẽn yaa wʋsgã, fo tõe n wa tagsdame tɩ yaa ne f mengã pãng la f tõog zabrã. Yeel sodaasã tɩ ned ning sẽn yɛɛsd lebg n kuili.’ Neb 22 000 n lebg n kuili, tɩ kell sodaas 10000. La a Zeova yeelame: ‘Sodaasã ket n yaa wʋsgo. Tall-b n kẽng kʋɩlgẽ wã, la f yeel-b tɩ b yũ koomã. Neb nins sẽn na n kaad koomã ne b nug n yũud la b get bɛɛbã sã n pa watã, yaa bãmb bal n na n kẽng zabrã.’ Neb 300 bal n da kaad koomã n yũuda. A Zeova yeelame tɩ b na n tõoga Madiyã sodaasã sõor sẽn yaa 135 000 wã.
D bʋgs Wẽnnaam Gomdã zug neere:
Bʋ-kaoodb sebrã tags-kãsemse
6:25-27. A Zedeõ gũusame n pa yik a kɩɩsdbã sũy zaalem ye. Tõnd me sã n moond koe-noogã d segd n gũusa d goamẽ wã n da yik nebã sũy zaalem ye.
YƲƲM-SAR RASEM 13-19
D SẼN BÃNG BIIBLÃ KARENG PƲGẼ | BƲ-KAOODBÃ 8-9
“Sik-m-meng sãoo wuk-m-menga”
D zãag d mens ne wags-n-taare, la d bao laafɩ
10 D gom yell ning sẽn zĩnd a Zedeyõ ne Efrayim buudã neb sʋkã yelle. A Zedeyõ ra yaa Manase buudã neda. A Zeova sõnga a Zedeyõ ne a rap 300 wã tɩ b tõog zab-kãsenga, hal n da tõe n wuk b mens rẽ yĩnga. Efrayim buudã rap wa n yãa a Zedeyõ, la pa sẽn na n pẽg-a ye. Ra yaa sẽn na n wẽ no-koɛɛm ne-a. B sũyã yikame, a Zedeyõ sẽn pa bool-b sɩngrẽ wã tɩ b wa naag-a n zab ne Wẽnnaam bɛɛbã yĩnga. Yaa b buudã yʋʋr sẽn na n yi wã bal n da pak-b n yɩɩda, hal tɩ b ra yĩm bũmb ning sẽn tar yõod n yɩɩdã: Yaa t’a Zedeyõ kɩtame t’a Zeova yʋʋrã paam waoogre, la a kogl a nin-buiidã.—Bʋ. 8:1.11.
11 A Zedeyõ sika a meng n yeel Efrayim rapã yaa: “Rẽ yĩnga, mam sẽn tʋmã tõe n dɩk n maka ne yãmb sẽn tʋmã sɩdã?” Rẽ poore, a togs-b-la bũmb takɩ sẽn wilgd t’a Zeova ning-b-la barka. Woto kɩtame tɩ b ‘sũyã sigi.’ (Bʋ. 8:2, 3) A Zedeyõ kell n sika a menga, sẽn na yɩl tɩ laafɩ zĩnd Wẽnnaam nin-buiidã sʋka.
Bõe yĩng tɩ kiris-nebã segd n yɩ sik-m-mens rãmba?
15 Sik-m-mengã wɛɛngẽ, a Zedeyõ kõo mak-sõng tɛkẽ. A Zeova sẽn wa n yeel-a t’a ratame t’a tɩ zab n fãag Israyɛll nebã Madiyã rãmbã nugẽ wã, a leokame: “Manaase buudã fãa pʋgẽ, yaa tõnd doogã n tɩ yaa naong rãmba. Sẽn paase, mam ba wã zak pʋga, maam n yaa b fãa yao-zʋʋga.” (Bʋ. 6:15) A saka tʋʋmdã, la a baoome n na n bãng a Zeova sã n sɩd ratame tɩ yẽ tʋm tʋʋmdã. A leb n kosa a Zeova t’a wilg-a sor bũmb fãa pʋgẽ. (Bʋ. 6:36-40) A Zedeyõ ra yaa raood soaba, la a tar pãnga. Baa ne rẽ, a yɩɩ gũus-m-meng soaba, n tʋm ne yam. (Bʋ. 6:11, 27) A pa tũnug ne tʋʋmd ning a Zeova sẽn kõ-a wã n bao naam la yʋʋr ye. A sẽn tʋm tʋʋmdã n sa wã bala, a lebg n kuila a yiri.—Bʋ. 8:22, 23, 29.
Kẽn-y-yã a Zeova soayã zutu
9 D sã n dat n yɩ Wẽnnaam zo-rãmba, d segd n yɩɩ “sik-m-mens rãmba.” (1 Pɩɛ. 3:8; Yɩɩl 138:6) Bʋ-kaoodb sak a 9 wã pʋgẽ, b wilgda tõnd sik-m-mengã yõodo. Be a Zedeõ biig a Zotam yeela woto: “Daar a yembre, tɩɩs yiime n kẽng n na n tɩ yãk naab t’a soog-ba.” A goma oliiv tɩɩg ne kankang la viyn yelle. Tɩ-kãens ra makda rap Israɛll nebã sẽn da rat tɩ b yɩ rĩm dãmb tɩ b tõdge. La yaa gõaag yõod sẽn pa waoogã n wa n sak n na n yɩ rĩma. Gõaagã makda wuk-m-meng soab a Abimelɛk naamã. A yɩɩ nin-kʋʋda, la ned sẽn da rat ne a sũur fãa n soog a taabã n weoog-ba. Baa a sẽn tõog n ‘soog Israɛll nebã yʋʋm a tãabã,’ a yõor yɩɩ koɛɛga. (Bʋ. 9:8-15, 22, 50-54) Woto sɩd wilgdame tɩ f sã n yaa “sik-m-meng” soaba, rẽ n são!
D bʋgs Wẽnnaam Gomdã zug neere:
Yik n gilg tẽngã
A Zedeyõ riga sodaas nins sẽn kellã n zʋʋg Bɛt-sita la Abɛl-mehola goabg babgẽ wã sẽn pẽ Zʋrdẽ kʋɩlgã. (Bʋ-kaoodba 7:22-25) Biiblã yetame: ‘A Zedeyõ ne neb kobs-tã wã sẽn be ne yẽ wã taa Zʋrdẽ kʋɩlgã n dʋʋg-a. Bãmb yɛɛme, la b ket n digda b bɛɛbã.’ Israɛll nebã sẽn dʋ kʋɩlgã rʋʋndã, b riga b bɛɛbã n tees goabg babgã n ta Sukot la Penuɛll sẽn pẽ Zabokã, n tɩ ta tãensẽ wã Zogbeha (sẽn pẽ rũndã-rũndã Amman sẽn be Jordanie wã). Woto ra yaa kɩlometr 80 la b sẽn zoe n pʋg b bɛɛbã n zab ne-bã. A Zedeyõ yõka Madiã rĩm dãmb a yiib n kʋ, la a leb a galʋ-tẽngẽ wã Ofra, sẽn pẽ zĩig ning zabrã sẽn sɩngẽ wã. (Bʋ-kaoodba 8:4-12, 21-27) Vẽenega, a Zedeõ sẽn tõog n maan bõn-kãseng ningã pa tek minit a wãn bard peebgo, bug-vɩlens zẽk n yuum la koɛɛg zẽkr ye. La tags-y n ges rẽ sẽn kɩtd tɩ goam nins b sẽn togs tẽeb nebã wɛɛngẽ wã pãng paas to-to: “Weer ka be tɩ mam tõe n togs a Zedeõ [ne a taab sẽn] lebg pãens rãmb zabr zĩigẽ” wã kɩbar ye. (Hebre dãmba 11:32-34) Kiris-nebã me tõe n yaame, la b segd n ket n maanda Wẽnnaam daabã.—2 Korẽnt dãmba 4:1, 16; Galat dãmba 6:9.
YƲƲM-SAR RASEM 20-26
D SẼN BÃNG BIIBLÃ KARENG PƲGẼ | BƲ-KAOODBÃ 10-12
“A Zɛfte: Rao tẽeb sẽn tar pãnga”
D kell n sak Wẽnnaam, n paam n ta a yam
9 Tõe tɩ wẽn-sakdb nins sẽn deng a Zɛfte wã mak-sõngã me sõng-a lame. Wala makre, a ra miime tɩ baa a Zozɛf ba-biisã sẽn kisg-a wã, a zoe b nimbãanega, n pa maan-b wẽng n lebs ye. (Sɩng. 37:4; 45:4, 5) Tõe t’a Zɛfte bʋgsa kiba-kãensã buud zugu, tɩ sõng-a t’a bãng a sẽn segd n maaneg tɩ yɩ a Zeova noogo. Yaa vẽeneg t’a ba-biisã sẽn maan-a bũmb ningã ra zabd-a-la wʋsgo, la a pa sak tɩ rẽ kɩt t’a bas a Zeova tũubu, wall a nin-buiidã sõngr ye. (Bʋ. 11:9) A Zɛfte ra miime t’a sã n sõng n zab a Zeova yʋʋrã yĩng n são a sẽn na n bao n dok a sũuri. A kell n zĩnda a Zeova poorẽ ne a sũur fãa, tɩ naf yẽ ne Israyɛll nebã fãa.—Ebre. 11:32, 33.
it-2 1202 s. a 6
A Zɛfte
A Zɛfte sẽn da yaa raood soabã pa bas tɩ kaoos la a lʋɩ nin-buiidã taoor ye. A tʋma rap Amo nebã rĩm nengẽ tɩ b tɩ yeel-a tɩ yaa Amo nebã n yik zaabrã, bala bãmb n wa n kẽ Israyɛll soolmẽ wã. Rĩmã leokame tɩ yaa Israyɛll nebã n deeg tẽngã bãmb nengẽ. (Bʋ. 11:12, 13) A Zɛfte wilgame t’a pa tãb-biig bala, sẽn pa mi baa fʋɩ ye. A pʋd n wilgame t’a mii Wẽnnaam nin-buiidã kʋdemdã yɛl sõma, la a mi Wẽnnaam manesem sẽn yɩ to-to ne a nin-buiidã pĩndã. A wilgame tɩ Amo nebã goam pa sɩda, n yeel 1) tɩ Israyɛll nebã pa reeg Amo, Moaab la Edom tẽnsã (Bʋ. 11:14-18; Tõo. 2:9, 19, 37; 2 Kib. 20:10, 11), 2) tɩ Israyɛll nebã sẽn wa n zabd n deesd tẽnsã tɩ tẽng ning poorẽ b sẽn zabdã ra pa Amo nebã n so, bala ra yaa Amoor nebã sẽn da be Kanaã soolmẽ wã n so, tɩ Wẽnnaam kɩt tɩ Israyɛll tõog a Sɩyõ sẽn yaa b rĩmã, la b reeg b tẽngã, 3) la tɩ yaa yʋʋm kobs-tã la woto Israyɛll nebã sẽn so zĩigã, la woto wã, maana wãn tɩ Amo nebã wa yik masã n dat zĩigã?—Bʋ. 11:19-27.
it-2 1202 s. a 7
A Zɛfte
A Zɛfte pɩdga yellã n togse, n wilg tɩ yellã yaa tũudum yelle. A yeelame tɩ yaa a Zeova n kõ bãmb tẽngã, la tɩ b pa na n tol n yãk baa yaa bɛk n kõ neb sẽn pʋʋsd wẽn-faoog ye. A yeelame t’a Kemoos yaa Amo nebã wẽnnaam. Neb kẽer ra tagsdame tɩ tog n yaa tudgri. La baa ne Amo nebã wẽnnaam sẽn da yaa a Milkommã, tɩ Moaab nebã wẽnnaam yaa a Kemoosã, bu-kãensã sẽn yaa ba-biisã ra tũuda wẽn-naands ka tɛka. A Solomo sẽn kẽ kãadem ne bu-zẽms pagbã pʋd n kɩtame t’a Kemoos tũudmã kẽ Israyɛll soolmẽ wã. (Bʋ. 11:24; 1 Rĩm. 11:1, 7, 8, 33; 2 Rĩm. 23:13) Sẽn paase, Biibl-mitb kẽer yeelame tɩ tõe tɩ “Kemoos” rat n yeelame tɩ “sẽn tõogd-a, sẽn zabd-a n deegdẽ.” (Ges-y Hebräisches und chaldäisches Handwörterbuch über das Alte Testament, par W. Gesenius, Leipzig, 1857, tome 5, vol. 1, p. 414.) Tõe t’a Zɛfte sẽn gom a Kemoos yellã yaa a sẽn da mi tɩ Amo nebã ra tẽedame tɩ yaa a Kemoos n tõogd buud a taabã, n deesd b tẽnsã n kõt bãmbã.
D bʋgs Wẽnnaam Gomda zug neere
it-2 1201
A Zɛfte
A Zɛfte ra pa tãmpĩir ye. A Zɛfte ma wã ra yaa “pʋg-yoodre,” la pa rat n yeel t’a Zɛfte yaa yoodem biiga, bɩ tãmpĩir ye. A ma wã ra yɩɩ pʋg-yoodre, la rẽ t’a ra pa kẽ kãadem ne a Galaad n lebg a pag a yiib-n-soaba, wa a Rahaab me sẽn da yɩ pʋg-yoodre, n yaool n na n wa lebg a Salmo pagã. (Bʋ. 11:1; Zoz. 2:1; Mat. 1:5) A Zɛfte ba-biisã, rat n yeel t’a ba wã pipi pagã kambã sẽn dig-a t’a loog sẽn na yɩl t’a ra naag bãmb n paam rogem-pʋɩɩrã pʋd n wilgdame t’a pa tãmpĩir ye. (Bʋ. 11:2) Sẽn paase, a Zɛfte wa n lebga Galaad nebã taoor soab b fãa sẽn da sakde (wõnda a Zɛfte ba-biisã ra yaa nin-kãsems b sʋkã). (Bʋ. 11:11) A tɩ maana maand sɛk-roogẽ wã me. (Bʋ. 11:30, 31) Bõn-kãensã baa a ye ra pa tõe n maane, sã n da mikame t’a Zɛfte yaa tãmpĩiri, bala tõogã ra yeela vẽeneg yaa: “Tãmpĩir ka tõe n kẽ Sẽn-Ka-Saab tiging pʋgẽ ye. Baa yẽnda yagens ne a yagen-tʋb-ra-kẽes n tɩ tãag zamaan piig ka tõe n kẽ beenẽ ye.”—Tõo. 23:3.
YƲƲM-SAR RASEM 27–YƲƲM-VẼKR RASEM A 2
D SẼN BÃNG BIIBLÃ KARENG PƲGẼ | BƲ-KAOODBÃ 13-14
“Yam-bʋg la roagdbã tõe n dɩk a Manowa ne a pagã nengẽ?”
Sõng-y y kambã tɩ b tũ a Zeova: Pipi babgo
1 A MANOA ne a pagã ra kɩsa sɩd tɩ b pa tõe n dog biig ye. La daar a yembre, a Zeova tʋma malɛk t’a wa yeel a Manoa pagã t’a na n doga bi-ribla. Ad sɩd yɩɩ lingr tɛkẽ! Pagã sẽn tɩ togs a Manoa kibarã, yɩ-a-la noog wʋsgo. La a Manoa tagsa a Zeova sẽn dat t’a wub biigã to-to wã yell neere. Wakat kãng tɩ Israyɛll neb wʋsg ra tʋmda tʋʋm-wẽnse. Woto wã, wãn to la yẽ ne a pagã na n tõog n sõng b biigã t’a tũ a Zeova la a nong-a? Rẽ n so t’a Manoa pʋʋs a Zeova n kos t’a tʋm malɛkã t’a le wa bãmb nengẽ. A yeela woto: “Sẽn-Ka-Saab sẽn yaa mam Wẽnnaam, mam kot-y lame tɩ y kɩt tɩ rao ningã yãmb sẽn dag n tʋmã leb n lebg n wa tõnd nengẽ, n wa wilg tõnd d sẽn tog n maan to-to ne biigã, a rogmã poore.”—Bʋ. 13:1-8.
w05 15/3 25-26
A Samsõ tõogame, la yɩɩ ne a Zeova pãngã maasem!
A Samsõ sẽn wa n bɩtẽ wã, a Zeova ra ‘ningd-d-la barka.’ (Bʋ. 13:24) Daar a ye, a Samsõ waa a ba wã ne a ma wã nengẽ, n yeel-b yaa: “Mam sẽn kẽng Timna wã mam yãnda pʋg-sad Filistẽ-dãmbã kom-pugli sʋka, kẽng-y n tɩ kos-y-yã-a n kõ-m tɩ m maan m paga.” (Bʋ. 14:2) Mams-y n ges-y rẽ sẽn ling a roagdbã to-to. B bi-riblã pa fãag Israyɛll nebã neb nins sẽn da namsd-bã nusẽ ye. A pʋd n da baoodame meng n na n kẽ kãadem ne b bi-pugla. Wẽnnaam tõogã yaool n da gɩdgame tɩ b ra bao pagb buud nins sẽn pʋʋsd wẽn-naandsã sʋk ye. (Yik. 34:11-16) Rẽ n so t’a roagdbã yeel-a yaa: “Yaa pag n ka be fo roagdbã kom-pugli sʋk bɩ? Bɩ tõnd buudã fãa sʋka, pag n ka be beenẽ, tɩ fo wa tɩ rat Filistẽ-dãmbã sẽn ka kẽ bãongã biig n maan f paga?” La a Samsõ kell n pẽdgame n yeel yaa: “Kos-y yẽnda n kõ-ma, bala, yaa yẽnda n ta mam yam.”—Bʋ. 14:3.
D bʋgs Wẽnnaam Gomdã zug neere:
w05 15/3 26 s. a 1
A Samsõ tõogame, la yɩɩ ne a Zeova pãngã maasem!
1 A Samsõ sẽn yeel tɩ Filistẽ-poakã ‘taa yẽ yamã’ rat n yeelame tɩ bõe? Sebr a ye (McClintock and Strong’s Cyclopedia) wilgame tɩ pa rat n yeel t’a ra yaa “neere, t’a nengã bee rasãnde, n sakd gesgo,” “la tɩ rat n yeelame tɩ b ra tõe n tũnuga ne-a n maan bũmbu, bɩ n pids bõn-daabo.” Bõe la rẽ? Bʋ-kaoodb 14:4 wilgdame tɩ yaa a Zeova n “maan a woto, n na n tũnug a Samsõ, sẽn na n yɩl n paam n sɩbg Filistẽ-dãmbã.” Yaa bõn-daab kãng yĩng la a Samsõ sẽn da rat pagã. A Samsõ sẽn wa n bɩ n lebg raoã, a Zeova vʋʋsem sõngã sɩngame n tʋmd a zugu. (Bʋ-kaoodbã 13:25) Dẽnd yaa a Zeova vʋʋsem sõngã n kɩt t’a Samsõ na n kos tɩ b bao pag n kõ-a wã, wa vʋʋsem sõngã me sẽn zĩnd ne-a sasa ning fãa a sẽn yɩ Israyɛll bʋ-kaoodã. Rẽ yĩnga, a Samsõ paama segb n na n pids a bõn-daabã bɩ? D reng n ges a Zeova sẽn wilg-a to-to t’a bee ne-a.