Kiris-nebã vɩɩm la b tʋʋma tigissã na-kẽndr not-rãmbã
YƲƲM-VẼKR RASEM A 3-9
D SẼN BÃNG BIIBLÃ KARENG PƲGẼ | BƲ-KAOODBÃ 15–16
“Ned sã n zãmb a to, ad sɩd yaa paoogre!”
Zãmbã yaa yaoolem wakatã bãnde
4 Bɩ d reng n gom a Delila sẽn yaa pag ning bʋ-kaood a Samsõ sẽn da nongã yelle. A Samsõ ra segd n zaba ne Filisti nebã n sõng Wẽnnaam nin-buiidã. Tõe tɩ Filisti nebã nanambs a nu wã bãngame t’a Delila sɩd ra pa nong a Samsõ ye. B yeela a Delila t’a sã n sõng-b tɩ b bãng bũmb ning sẽn kɩt t’a Samsõ tar pãng wʋsgã tɩ b paam n tõog n kʋ-a, b na n kõ-a-la ligd wʋsgo. A Delila sẽn da nong ligdã yĩnga, a sakame. La a maka naoor a tãab fãa n pa tõog n bãng ye. A kell n “pẽdga a Samsõ n nams-a raar fãa.” A Delila pẽdg-a-la woto ‘hal t’a wa rat n ki.’ Rẽ kɩtame t’a Samsõ togs-a tɩ barg nan ka tik yẽ zugã, la tɩ b sã n põng a zugã, a pãn-kãsengã na n saame. A Delila sẽn bãng woto wã, a basame t’a Samsõ wa gõe a naoã zug t’a kɩt tɩ rao wa wõrs a zoobdã. Rẽ poore, a basa a Samsõ a bɛɛbã nusẽ tɩ b maan-a b sẽn date. (Bʋk. 16:4, 5, 15-21) Ad a sẽn maanã sɩd yɩɩ wẽng wʋsgo! A Delila sẽn da yaa rat-tɩ-loog-soabã yĩnga, a zãmba ned ning sẽn da nong-a wã.
Bʋkaoodb sebrã tags-kãsemse
14:16, 17; 16:16. F sã n pẽdgd ned yell poorẽ n fĩind ne nintãm n pa satẽ sãamda lagem-n-taare.—Yelbũna 19:13; 21:19.
Zãmbã yaa yaoolem wakatã bãnde
15 Bõe n tõe n sõng sẽn kẽ-b kãadmã tɩ b kell n pelg b pʋs ne taaba? Wẽnnaam Gomdã yeela woto: “Maan sũ-noog ne f pag ning fo sẽn peeg f bi-bɩɩlem wakatã,” la a paas tɩ f “maan sũ-noog ne pag ning [wall rao ning] fo sẽn nongã.” (Yel. 5:18; Koɛ. 9:9) Pag ne a sɩd sã n wa kʋʋndẽ, b tog n ket n maanda b sẽn tõe fãa tɩ zood ning sẽn be b sʋkã pãng paasdẽ. Woto rat n yeelame tɩ b ned kam fãa tog n ket n geta a to wã yell sõma. B tog n dɩkda sẽk n be ne taab la b paasd nonglem ning sẽn be b sʋkã pãnga. B segd n maoa b pãng tɛk n kogl b kãadmã la zood ning b sẽn tar ne a Zeova wã. Yɩl n tõog n maan dẽ, b tog n zãmsda Biiblã ne taaba, n moond koɛɛgã ne taab la b naagd taab n pʋʋsd n kot a Zeova sõngre.
D KELL N SAK A ZEOVA
16 Tigingã neb kẽer n da maan yel-wẽn-kãsemse, tɩ b leng-b ne “pãng” sẽn na yɩl tɩ b “paam tẽeb sẽn yaa sɩda,” bɩ sõma. (Tɩt 1:13) Yel-wẽn nins sãnda sẽn maan yɩɩ sabab tɩ b yiis-b tigingã pʋgẽ. La sõnga “neb nins sẽn paam remsgã” tɩ b maneg b yellã ne Wẽnnaam. (Heb. 12:11, Kãab-paalgã Koe-noogo) La b sã n yiis d roagd wall d zoa tigingã pʋgẽ, d maanda wãna? Tõnd manesem sẽn na n yɩ a soab yellã pʋgẽ wã na n wilga d sã n na n zĩnda d zoa wã poorẽ, bɩ d na n saka Wẽnnaam noyã. A Zeova geta d sã n na n tũu yẽ sẽn yeel tɩ d ra le tall tũud-n-taar ne tigingã ned b sẽn yiisã.—Karm-y 1 Korẽnt dãmb 5:11-13.
D bʋgs Wẽnnaam Gomdã zug neere:
w05 15/3 27 s. a 6
A Sãmsõ paama tõogre, ne a Zeova pãnga maasem
Bũmb a ye bal n da be a Sãmsõ yamẽ: Yaa a zab ne Filisti nebã. A sẽn tek n yals pʋg-yoodr sẽn be Gaaza soolmẽ wã zakẽ wã, yaa sẽn na yɩl n zab ne Wẽnnaam bɛɛbã. A Sãmsõ ra baooda zĩig n na n gãand ne yʋngã, tẽn-kãngã sẽn yaa b bɛɛbã tẽng pʋgẽ. A ra tõe n paama gãag zĩig pʋg-yoodr zakẽ. A Sãmsõ ra pa tar tags-yood a yamẽ ye. A yii pagã zakẽ ne yʋn-sʋk n looge, n gãd tẽngã noor kʋɩlemsã ne b ra-lugds a yiibã n tak-b n vik ne b kʋɩlen-kuyã fãa n palg a bãok n tall n kẽng tãng ning sẽn be Ebrõ neng taoorã zugu. Tãn-kãng ra bee sẽn zems kilo 60 ne tẽngã. A tõog n maana woto ne Wẽnnaam sõngre. Yaa Wẽnnaam n kõ-a pãnga.—Bʋ-kaoodbã 16:1-3.
YƲƲM-VẼKR RASEM 10-16
D SẼN BÃNG BIIBLÃ KARENG PƲGẼ | BƲ-KAOODBÃ 17–19
“D sã n kɩɩs a Zeova tõogã, wata ne zu-loeese”
it-2 278-279
A Mika
1. Yaa Efrayim neda. A Mika zuka a ma wã wanzuri ligd-koeems tusr la koabgã. A sẽn maan woto wã, a kɩɩsa Tõod piigã tõog a nii soabã. (Yik. 20:15) A sẽn vẽneg n togs la a lebs a ma ligdã, a ma wã yeelame yaa: “Mam na n welga wanzuri-kãngã toor n kõ Sẽn-Ka-Saab yĩnga, n kɩt tɩ b yẽneg n dõog wẽn-naandg m biigã yĩnga. Rẽ wã, m biiga, mam dɩkd-a lame n lebsd foom moasã.” Rẽ poore, a rɩka wanzuri ligd koeems kobs-yi n kɩs yõaka, “la yõakã rɩk-a lame n yẽneg n dõog wẽn-naandga.” La b rɩka wẽn-naandgã n ning a Mika roogẽ wã. A Mika sẽn da tar ‘wẽn-naands pʋʋsg roogã,’ a maana a maan-kʋʋr fuugu, la a maan a wẽn-naandse, la a yãk a biig a yembr t’a lebg yẽnda maan-kʋʋda. Baa ne sẽn wõnd bũmb nins a sẽn maanã yaa sẽn na yɩl n waoog a Zeova wã, a sẽn maana ra pa zems ye. Bala, ra kɩɩsda tõog ning sẽn gɩdg bõn-naandsã pʋʋsgã, (Yik. 20:4-6) la wilgdẽ me t’a maanda a toog kae ne a Zeova sɛk-roogã, la ne a maan-kʋʋdbã. (Bʋ. 17:1-6; Tõo. 12:1-14) Kaoosg zugẽ, a Mika talla a Zonatã sẽn yaa a Moyiiz biig a Gɛrsom yagengã n wa a zakẽ wã, n kɩt tɩ bi-bɩɩgã sẽn da yaa levi buudã nedã lebg yẽ maan-kʋʋda. (Bʋ. 18:4, 30) A Mika sẽn belg a meng n tagsdẽ t’a sẽn maanã yaa sõma wã, a yeelame yaa: “Moasã, mam miime tɩ Sẽn-Ka-Saab na n maan-m-la neere.” (Bʋ. 17:7-13) La a Zonatã ra pa a Aarõ yageng ye. Kɩtame t’a pʋd n da pa segd ne maan-kʋʋrã tʋʋmd ye. A Mika sẽn maan woto wã, paasa a yel-wẽndã.—Sõd. 3:10.
it-2 278 s. a 3
A Mika
Rẽ poor bilfu, a Mika ne rap sull yiime n na n babs Dan buudã nebã. B sẽn paam-bã, Dan nebã soka a Mika n na n bãng sẽn yaa yell ning n be, t’a Mika leok yaa: “Yãmb sẽn wʋk mam wẽn-naandsã m sẽn dag n maanã fãa la y peeg m maan-kʋʋd n tar n loogdẽ wã, y bas-m-la ne bõe?” La a Dan kom-dɩbli wã keooga a Mika t’a sã n kell n pʋg-ba, n ket n kaasdẽ, b na n maan-a-la yelle. A Mika sẽn yã tɩ Dan nebã pãng yɩɩda bãmb wʋsgã, a lebg n kuila a zakẽ. (Bʋ. 18:22-26) Rẽ poore, Dan buudã neb zaba ne Layis tẽngã nebã, n yõog tẽngã bugum, la b me Dan tẽngã beenẽ. A Zonatã ne a kom-dɩbli wã lebga Dan buudã neb maan-kʋʋdba. “Dan nebã vigla wẽn-naandgã a Mika sẽn dag n maanã, la a kell n paa beenẽ wakat ning fãa Sɩlo Wẽnnaam doogã sẽn zĩndã.”—Bʋ. 18:27-31.
D bʋgs Wẽnnaam Gomdã zug neere:
Biibl b sẽn lebg tɩ yaa takɩ, t’a võor wʋmb me yaa nana
6 Rũndã-rũndã, bũmb nins sẽn wilgd tɩ Biiblã lɛbgdb segd n ninga Wẽnnaam yʋʋrã Biiblã pʋgẽ wã tara paasgo. Traduction du monde nouveau ning sẽn yi yʋʋmd 1984, Wẽnnaam yʋʋrã bee be naoor 7210. La b sẽn lebg n maneg a soab yʋʋmd 2013, naoor a yoob la b ning Wẽnnaam yʋʋrã n paase. Naoor a nu wã bee 1 Sãmwɛll 2:25; 6:3; 10:26; 23:14, 16 pʋgẽ. Bõe n kɩt tɩ b maan woto? B gesa mog-kɩɩngã seb-pindmã pʋsẽ n yã Wẽnnaam yʋʋrã vɛrse kãens pʋsẽ. Naoor a yoob-n-soabã bee Bʋ-kaoodb 19:18. Yaa b sẽn maag b yĩng n vaees Biibl-kʋdã n kɩt tɩ b bãng tɩ b tog n ninga yʋʋrã vɛrse-kãng pʋgẽ.
YƲƲM-VẼKR RASEM 17-23
D SẼN BÃNG BIIBLÃ KARENG PƲGẼ | BƲ-KAOODBÃ 20–21
“Ket-y baood-y n bãngd a Zeova raabã”
w11 15/9 32 s. a 2
Y sã n wa maood ne zu-loeese, y tõe n dɩka a Fineyaas togs-n-taare
Gibeya rapã sẽn yaa Bẽnzame buudã nebã sẽn yõg Levi buudã nedã pagã, hal t’a ki wã poore, buud a taabã yika zabr ne Bẽnzame buudã nebã. (Bʋ. 20:1-11) Nand tɩ b kẽng zabrã, b pʋʋsa a Zeova, n kos-a sõngre. La hal naoor a yiib fãa, bɛɛbã tõog-b lame, n kʋ b neb wʋsgo. (Bʋ. 20:14-25) Rẽ yĩnga, b ra na n ninga b yamẽ t’a Zeova pa leok b pʋʋsgã bɩ? B sẽn yik zabr ne bɛɛbã n na n lebs-b wẽngã b sẽn da maan-bã, rẽ yĩnga, ra yaa bũmb sẽn sɩd pak a Zeova bɩ?
Bʋkaoodb sebrã tags-kãsemse
20:17-48—Bõe yĩng t’a Zeova bas tɩ Bẽnzame buudã sẽn da segd ne sɩbgrã tõog buud a taabã naoor a yiibu? A Zeova sẽn bas tɩ b tõog buud nins sẽn da tar kɩs-sɩdã, yaa sẽn na yɩl n bãng bu-kãensã sã n sɩd da rata ne b sũy fãa n yiis wẽngã Israyɛlle.
w11 15/9 32 s. a 4
Y sã n wa maood ne zu-loeese, y tõe n dɩka a Fineyaas togs-n-taare
Yam-bʋg la d tõe dɩk rẽ pʋgẽ? Baa ne kãsem-dãmbã sẽn modgd ne b sũy fãa, la b pʋʋsd a Zeova n kot-a sõngrã, zu-loees kẽer sẽn be tigingã pʋgẽ ket n nan pa sa ye. Sã n yaa woto, yɩta sõma tɩ kãsem-dãmbã tẽeg a Zeezi sẽn yeelã. A yeelame yaa: ‘Ket-y n kotẽ, tɩ b na kõ-yã. Ket-y n gẽesd-y tɩ y na yã. Ket-y n kogsd-y kʋɩlengã, tɩ b na pak n kõ-yã.’ (Luk 11:9) Baa b sã n pʋʋs n kos bũmb tɩ wõnd leoorã kaoosdame, kãsem-dãmbã tõe n basa b yam t’a Zeova na n wa leoka b kosgã, sẽn zems a wakate.
D bʋgs Wẽnnaam Gomdã zug neere:
YÃMB RA MIIME BƖ?
Pĩnd wẽndẽ, wãn to la tãb-biisã ra tar loobs n zabd taaba?
Yɩɩ loaabg la a Davɩɩd tall n kʋ nin-wobg a Goliate. Wõnda yɩ a sẽn da wa n yaa bilf n gũud piisã sasa wã la a zãms loaabg lobre.—1 Sãmwɛll 17:40-50.
Pĩnd-wẽndẽ wã, Ezipt la Asiiri nebã ra nong n maanda loobs desẽ-rãmb b teedã zutu. Loaabg yaa gãong wall fuug la b wãagda, n sẽb a noyã ne wĩ a yiibu. Tãb-biig fãa ra sagenda kug-saall loaabgã pʋgẽ. Kugrã bedrem zemsda orãnz-kɩdga, t’a zɩslmã zems garam 250. A yuumda loaabgã a zugẽ wã, la a bas wĩ-yɛnga, n lobg kugrã ne pãnga, tɩ yõg bɛ wã.
Aazi soolmẽ wã, tẽn-vaeesdbã bugsa loobs kug wʋsg pĩnd wẽndẽ tãb-biis sẽn tall n zabe. Tãb-biis nins sẽn mi loaabg lobr sõma wã tõe n lobame tɩ kẽng ne tʋʋlem, hal tɩ bɛ wã pa tõe n yã kugrã n kuug ye. Bãngdb kẽer yetame tɩ loaabg kugr tõe n ta zĩig ning tãp peemd sẽn tõe n ta, tɩ b taab yetẽ tɩ pa tõe ye. La yaa vẽeneg tɩ loaabg tõe n kʋʋ ned wa tãp sẽn tõe n kʋ wã.—Bʋkaoodba 20:16.
YƲƲM-VẼKR RASEM 24-30
D SẼN BÃNG BIIBLÃ KARENG PƲGẼ | RUT 1–2
“Ket-y n bɩɩsd-y nonglem hakɩɩkã”
D rɩk neb nins sẽn yɩ a Zeova zo-rãmbã togs-n-taare
5 A Rut sẽn da yaa pʋg-kõorã, a ra tõe n getame tɩ yẽ sẽn lebd Moaab n são. A ma wã, n paas a roagdb a taab n da be be, n tõe n ges a yell sõma. Moaab pʋd n yaa a ba-yiri. A ra mii tẽngã nebã, b buud-gomdã la b minimdã. A Naomi ra pa tõe n sõng-a Betlehɛm wa a roagdbã ye. Rẽ n so t’a yeel a Rut t’a pa Moaabe. A ra miime t’a pa na n tõog n paam sɩda, wall roog n kõ a bi-pagã ye. A Rut maana wãna? A pa maan wa a Orpa sẽn ‘lebg n leb a nebẽ wã la a wẽnnaam-dãmbẽ’ wã ye. (Rut 1:9-15) A Rut ra pa rat n leb a nebẽ wã, n tɩ tũud b wẽn-faadã ye.
D rɩk neb nins sẽn yɩ a Zeova zo-rãmbã togs-n-taare
6 Tõe tɩ tũu ne a Rut sɩdã, wall a Naomi t’a Rut bãng a Zeova. A bãngame t’a Zeova pa wa Moaab wẽnnaam-dãmbã ye. A ra nonga a Zeova, n miẽ t’a yaa Wẽnnaam sẽn segd ne waoogre. Rẽ n so t’a yãk yam n na n tũ a Zeova, tɩ d miẽ t’a sẽn yãk yam ningã zemsame. A yeela a Naomi woto: “Yãmb nebã na n yɩɩ mam neba, la yãmb Wẽnnaamã na n yɩɩ mam Wẽnnaam.” (Rut 1:16) D sã n tags a Rut sẽn da nong a Naomi to-to wã yelle, d sũur nooma wʋsgo. La yaa a sẽn da nong a Zeova wã n noom-d n yɩɩda. Rẽ n yɩ a Boaaz me noogo, t’a pẽg-a a sẽn wa n soond a Zeova maasmẽ wã yĩnga. (Karm-y Rut 2:12.) Y sã n karem a Boaaz sẽn yeel a Rut bũmb ningã, tõe tɩ y na n tagsa no-bil sẽn mi n tɩ soond a ma wã pɩgs tẽngrã yelle. (Yɩɩn. 36:8; 91:1-4) Woto me, a Rut paamame t’a Zeova kogl-a, la a keo-a a tẽebã yĩnga. A pa tol n maan a bãngẽ ne a sẽn yãk yam ningã ye.
D bʋgs Wẽnnaam Gomdã zug neere:
A Rut sebrã tags-kãsemse
1:13, 21—Rẽ yĩnga yaa a Zeova n kɩt tɩ yel-beedã paam a Naomi t’a sũur sãam bɩ? Ayo. La a Naomi pa ning Wẽnnaam taal a goamã pʋgẽ ye. La yɛl nins sẽn paam-a wã kɩtame t’a tags t’a Zeova sũur da pa noom ne-a ye. A toogã ra kɩtame t’a pa mi a sẽn na maaneg ye. Sẽn paase, rẽ wẽnde, f sã n da tar kamba b yetame tɩ Wẽnnaam bark bee f zugu, tɩ f sã n da yaa kiri, bɩ b get rẽ wala kãab-wẽnga. A Naomi sẽn da pa tar yagens t’a kamb a yiibã me ki wã, a tõe n da tagsdame t’a tara bʋʋm n na n yeel t’a Zeova ning-a-la yãnde.
YƲƲM-VẼKR RASEM 31–WAO-FUGDG RASEM A 6
D SẼN BÃNG BIIBLÃ KARENG PƲGẼ | RUT 3–4
“D modg n paam yʋ-noogo, la d kell n tall-a”
“Pʋg-sõngo”
18 A Boaaz bʋka a koɛɛg n togs a Rut bũmb sẽn sɩd keng a raoodo. A yeel-a-la woto: “M biiga, bɩ Zu-soabã ning fo zug barka. Yaoolem bõn-neer ning fo sẽn maanã yaa neer n yɩɩd bũmb nins fo sẽn da maan pĩndã. Tɩ bõe, fo ka bao rasãmb naong rãmbã wall rakã-rãmb sʋk ye.” (Rut 3:10) ‘Bũmb nins a Rut sẽn da maan pĩndã’ yaa a sẽn wilg nonglem hakɩka, n sak n yãag a Naomi n wa Israyɛll la a get a yellã. “Yaoolem bõn-neerã” yaa bũmb ning a sẽn maan baraar yʋngã. A Boaaz pẽga a Rut sẽn ka tɩ bao bi-bɩɩg sẽn yaa ra-kãagr bɩ naong soabã. A bãngame t’a Rut ra pa rat bal n maan a Naomi neere, la t’a ra ratame me n sõng t’a Naomi sɩdã sẽn maan kaalmã yʋʋr da menem ye. Dẽnd a Boaaz sɩd bee bʋʋm, a sũur sẽn yɩ noog ne pʋg-kãngã sẽn pa bao a meng nafrã.
“Pʋg-sõngo”
21 A Rut sũur tog n da yaa noogo, a sã n da tagsd a Boaaz sẽn yeel-a tɩ nebã fãa miime t’a yaa “pʋg-sõngã.” Yaa vẽeneg tɩ yaa a sẽn da rat ne a sũur fãa n bãng a Zeova la a tũ-a wã n kɩt t’a ra tar yʋ-noogã. A ra maanda a Naomi ne a nebã neer la a kʋmd-ba, n pʋd n da sakd n dɩkd tẽngã neb manesem la b minundã, baa ne a sẽn da yaa sãanã. D sã n tar a Rut tẽebã buudu, d na n nanda neb a taabã, n pa paoogd b minundã ye. Rẽ, d me na n paama yʋ-noogo.
“Pʋg-sõngo”
25 A Boaaz reega a Rut n maan a paga. Kibarã yeta woto: “Zu-soabã kɩtame t’a rɩk pʋg n dog bi-ribla.” Betlehɛm pagbã ninga a Naomi barka, la b pẽg a Rut n yeel t’a yaa sõma ne a sɩdã ma n yɩɩd kom-dibli a yopoe. Kaoosg zugẽ, a Rut biigã wa n lebga rĩm a Davɩɩd yaaba. (Rut 4:11-22) La a Davɩɩd yaa a Zezi Kirist yaaba.—Mat. 1:1.
D bʋgs Wẽnnaam Gomdã zug neere:
A Rut sebrã tags-kãsemse
4:6—Wãn to la ned tõe n “sãam” a rogem-pʋɩɩre, a sã n da a ba-biig pʋʋg n deeg a pʋg-kõore? Pipi, yaa tɩ naong sã n sẽbg ned t’a koos a pʋʋg sẽn yaa a rogem-pʋɩɩre, ned ning sẽn na n da pʋʋgã segd n yaoa ligd sẽn zems yʋʋm nins sẽn ket tɩ yʋʋm pis-nu kibsã ta wã. (Maankʋʋre 25:25-27) Rẽ boogda a soabã paoongo. Sẽn paase, a Rut sã n dog biiga, bi-kãng n na n wa soog pʋʋgã a ba wã sẽn da wã, pa yɩt ned a to a ba wã neb sʋk ye.
WAO-FUGDG RASEM A 7-13
D SẼN BÃNG BIIBLÃ KARENG PƲGẼ | 1 SÃMWƐLL 1–2
“Pelgd-y y pʋs n pʋʋsd a Zeova”
A pelga a pʋg n togs Wẽnnaam sẽn be a sũurẽ
12 Pʋʋsgã wɛɛngẽ, a Ana sẽn maanã yaa mak-sõng n kõ a Zeova nin-buiidã. A Zeova yeta tõnd tɩ d pelg d pʋs n gom ne-a n da maan yam-yoogo, n togs-a d zu-loeesã fãa, wa biig sẽn kɩs a ba sɩda, n miẽ t’a nong-a lame. (Karm-y Yɩɩl Sõamyã 62:9; 1 Tesalonik rãmb 5:17.) Wẽnnaam vẽnega tʋm-tʋmd a Pɩɛɛr t’a yeel bũmb sẽn kengd raood pʋʋsgã wɛɛngẽ. A yeela woto: “Bɩ y bas yãmb yɩɩrã fãa ne bãmba; tɩ bõe, bãmb mengã geta yãmb yelle.”—1 Pɩɛ. 5:7.
w07 15/3 16 s. a 4
A Ann sẽn maan to-to n paam sũur pʋgẽ bãane
Yam-bʋg la d tõe n dɩk rẽ fãa pʋgẽ? D sã n wa pʋʋs a Zeova d zu-loeeesã wɛɛngẽ, d tõe n togs-a-la rẽ sẽn namsd tõnd to-to, la d kos a sõngr ne d sũur fãa. Bũmb sã n kae d sẽn tõe n maan n welg zu-loɛɛgã, d segd n basa yellã a nugẽ. Rẽ maaneg n yaa sõma n tɩ yɩɩda.—Yel-bũnã 3:5, 6.
D bʋgs Wẽnnaam Gomdã zug neere:
Pipi Sãmwɛll sebrã tags-kãsemse
2:10—Bõe yĩng t’a Ann pʋʋs t’a Zeova ‘kõ a rĩmã pãnga,’ tɩ rĩm sẽn yaa ninsaal yaool n da pa rɩt naam Israyɛll sasa kãnga? B ra pĩnd n togsa a Moyiiz Tõogã pʋgẽ tɩ Israyɛll nebã ra na n paama rĩm sẽn yaa ninsaala. (Tõodo 17:14-18) A Zakoob sẽn da wa n bẽed a yõor bãagã a togsa bãngr-gomd n yeele: “Naam dasaar ka na n bas a Zida ye.” (Sɩngre 49:10) Sẽn paase, a Zeova goma a Saara sẽn yaa Israyɛll nebã yaab poakã yell n yeele: “Buud toɛy-toɛy rĩm dãmb na yi yẽ pʋgẽ.” (Sɩngre 17:16) Rẽnd a Ann sẽn da pʋʋsda yaa rĩm sẽn da wat beoog-daar yĩnga.
WAO-FUGDG RASEM 14-20
D SẼN BÃNG BIIBLÃ KARENG PƲGẼ | 1 SÃMWƐLL 3–5
“A Zeova nanda ninsaalbã”
A yaa pãng sẽn ka to soaba, la a yaool n nanda nebã
3 A Sãmwɛll sɩnga tʋʋm sɛk-roogẽ wã t’a nan ket n paoodẽ. (1 Sãm. 3:1) Daar a ye yʋngo, a wa n gõeeme, tɩ bũmb maane. (Karm-y 1 Sãmwɛll 3:2-10.) A wʋma b sẽn bool-a. A tagsame tɩ yaa maan-kʋʋdb kãsem a Eli n bool-a, n zoe n kẽng n na n tɩ sake. A sẽn ta wã, a yeela a Eli yaa: “Ad maam! Bala, yãmb boola maam.” A Eli leok-a lame t’a pa bool-a ye. A buud maana naoor a yiib n paase, t’a Eli bãng tɩ yaa Wẽnnaam la sẽn boond a Sãmwɛllã. Rẽ n so t’a wilg-a a sẽn tog n leok to-to, t’a Sãmwɛll sɩd maan woto. Bõe yĩng t’a Zeova pa yeel a Sãmwɛll hal sɩngrẽ wã tɩ yaa yẽ la sẽn gomd ne-a wã? Biiblã pa togs rẽ ye. La wõnda a Zeova tagsa a Sãmwɛll sẽn nan paoodã, n pa rat n maan bũmb sẽn na n yirb-a ye.
A yaa pãng sẽn ka to soaba, la a yaool n nanda nebã
4 Karm-y 1 Sãmwɛll 3:11-18. Tõogã a Zeova sẽn da kõ wã pʋgẽ, b wilgame tɩ kambã segd n waooga sẽn kʋʋl-bã, sẽn yɩɩd fãa, taoor dãmbã. (Yik. 22:27; Maan. 19:32) Woto wã, yãmb tagsdame t’a Sãmwɛll na n yika yibeoogã, n kẽng a Eli nengẽ ne raood n tɩ togs-a Wẽnnaam bʋ-kaoor koɛɛgã? Ayo! Sɩd me, Biiblã yeelame t’a “dag n zoeta rabeem n ka rat n wilg a Eli vẽnegr ning yẽnda sẽn paamã ye.” La a Zeova maaname t’a Eli bãng t’a boonda a Sãmwɛlle. Rẽ n so t’a Eli yeel-a t’a gome, la a ‘ra solg-a bũmb baa a yembr ye.’ A Sãmwɛll sakame, n togs-a “bũmbã fãa.”
D bʋgs Wẽnnaam Gomdã zug neere:
Pipi Sãmwɛll sebrã tags-kãsemse
3:3—A Sãmwɛll sɩd da gõeyã zĩ-sõng sẽn yɩɩdẽ wã bɩ? Ayo. A Sãmwɛll da yaa Levi ned sẽn da yit Kohat buudẽ wã sẽn pa maan-kʋʋdbã. (1 Kɩbaya 6:18-23) Woto yĩnga, a ra pa tar sor n na n “kẽ n ges zĩ-sõnga teed” ye. (Sõdbo 4:17-20) Zĩ-sõngã babg ning pʋgẽ a Sãmwɛll sẽn da tõe n kẽ bal da yaa sɛk roogã samandẽ. Ra yaa be la a ra gõeyã. Yaa wa a Eli me ra gõeyã samandã pʋgẽ zĩig ninga. Vẽenega, b sẽn yet tɩ “Wẽnnaam kãabg koglgã sẽn be wã,” b ra gomda sɛk roogã la a samandã fãa yelle.
WAO-FUGDG RASEM 21-27
D SẼN BÃNG BIIBLÃ KARENG PƲGẼ | 1 SÃMWƐLL 6–8
“Ãnd la yãmb rĩma?”
it-2 827 s. a 1
Wẽnnaam Rĩungã
B kosa rĩm sẽn yaa ninsaala. Israyɛll nebã sẽn yi Ezɩptã na maan yʋʋm 400 poore, la sẽn yɩɩd yʋʋm 800 Wẽnnaam sẽn maan kaool ne a Abrahamã, b kosa rĩm sẽn yaa ninsaala, t’a na n lʋɩ b taoore, wa tẽns a taabã sẽn da tar rĩm-dãmbã. B kosgã wilgame tɩ b ra pa le rat t’a Zeova mengã yɩ b rĩm ye. (1 Sãm. 8:4-8) Yaa sɩd tɩ nin-buiidã ra bee bʋʋm, b sẽn da gũud tɩ Wẽnnaam wa lulg Rĩung wa sẽn zems ne pʋleng ning a sẽn pʋlem a Abrahaam la a Zakoobã, tɩ d zoe n togs yĩngrã. B sẽn da gũud rẽ wã ra tika bãngr-gomd ning a Zakoob sẽn togs a Zida wɛɛngẽ wã, a sẽn wa n dat n ki wã (Sɩng. 49:8-10), a Zeova sẽn togs Israyɛll nebã goam nins b sẽn yi Ezɩptã poore (Yik. 19:3-6), Tõogã kaoolã goamã (Tõo. 17:14, 15), la baa koɛɛg ning Wẽnnaam sẽn kɩt t’a Balaam taasã zugu (Sõd. 24:2-7, 17). A Sãmwɛll ma a Ann sẽn da maand sɩd ne a Zeova wã goma bũmb ning b sẽn da gũudã yell pʋʋsg pʋgẽ. (1 Sãm. 2:7-10) La a Zeova ra nan pa vẽneg a “raabã yel-soalgdgã” Rĩungã wɛɛngẽ zãnga, a ra nan pa wilg wakat ning takɩ a sẽn na n lugl Rĩungã, pa rẽ bɩ Rĩungã sẽn na n yɩ to-to, wall neb nins sẽn na n zĩnd Rĩungã pʋgẽ, la a sã n na n zĩnda tẽngã zug bɩ saasẽ ye. Dẽnd nin-buiidã sẽn kos rĩm sẽn yaa ninsaala, ra yaa wuk-m-menga.
A tõoga toog baa ne sũ-sãamsã
18 A Sãmwɛll pʋʋsa a Zeova n togs-a yellã. Ges-y a Zeova sẽn leok to-to. A yeelame: “Maan bũmb nins fãa bãmb sẽn yeel foomã. Tɩ bõe, ka foom la b kɩɩsẽ ye. Yaa maam la b ka le rat tɩ m leb n yɩ b rĩma.” A Zeova gomdã belsa a Sãmwɛll wʋsgo. Baasgo, wilgame tɩ yaa Wẽnnaam sẽn tõe fãa wã la b paoog hal tɩ loog noore. A Zeova yeela a no-rɛɛsã t’a wilg Israyɛll nebã b yam-yãkrã sẽn na n wa ne zu-loees ninsã. Baa a Sãmwɛll sẽn keoog-bã, b kell n yeela woto: “Tõnd rata rĩm bala.” Wa raasenkamã, a Sãmwɛll kell n saka Wẽnnaam a Zeova n tɩ zae ned ning a sẽn yãk t’a na n yɩ b rĩmã.—1 Sãm. 8:7-19.
A Zeova wilgame t’a naamã sɩd ka to ye!
9 Israyɛll nebã yɛl sẽn yɩ to-to rẽ poorã wilgda vẽeneg t’a Zeova sẽn yeel-bã yaa sɩda. Ninsaalbã sẽn sɩng naam dɩɩb Israyɛll tɛkã, nin-buiidã paama zu-loees wʋsgo. Sẽn yɩɩd fãa, rĩmã sã n da pa sakd a Zeova. Woto kɩtame tɩ neb nins sẽn pa mi a Zeova wã naam sẽn pa tol n yãkd nengã pa lingd tõnd ye. Yaa sɩd tɩ nanambs kẽer mi n pʋʋsdame n kot Wẽnnaam t’a sõng-b tɩ b tõog tɩ laafɩ la bãan zĩnd b nin-buiidã sʋka. La rẽ yĩnga, Wẽnnaam na sak n sõng neb sẽn pa rat n sak a naamã sɩda?—Yɩɩl 2:10-12.
D bʋgs Wẽnnaam Gomdã zug neere:
Bõe yĩng tɩ d segd n deeg lisgu?
13 D segd n tuubame n yaool n deeg lisg n lebg a Zeova Kaset rãmba. Tuubgã yaa bũmb ned sẽn yãkd a toorẽ yam n maan ne a sũur fãa t’a na n tũu Kirist Zeezi. Neb a woto basda b pĩnd tʋʋm wẽnsã n yãk yam ne pa vigsd n na n maan sẽn yaa tɩrg Wẽnnaam nifẽ. Gʋlsg Sõamyã pʋgẽ, Hebre la Gerɛk gom-biis nins sẽn gomd tuubgã yellã võor yaa lebge, toeeme. A rat n yeelame tɩ f bas manesem wẽnga, n lebg n tũ Wẽnnaam. (1 Rĩm dãmba 8:33, 34) Tuubg baoodame tɩ d “maan sẽn zems yam tekr tʋʋma.” (Tʋʋma 26:20) A baoodame tɩ d bas ziri tũudmã, tɩ d vɩɩmd tɩ zems ne Wẽnnaam noyã, la d sak a Zeova zãng-zãnga. (Tõodo 30:2, 8-10; 1 Sãmwɛll 7:3) Tõnd sã n tuubi, d tagsgã, d bõn-datɩ wã la d zʋgã toeemdame. (Ezekɩɛll 18:31) D ‘basda d pĩnd tʋʋma,’ nin-paalgã sã n wa ledg wẽn-kɩɩsgã manesem.—Tʋʋma 3:19; Efɛɛz rãmba 4:20-24; Kolos rãmba 3:5-14.
WAO-FUGDG RASEM 28–TƲƲLG RASEM A 6
D SẼN BÃNG BIIBLÃ KARENG PƲGẼ | 1 SÃMWƐLL 9–11
“Sɩngrẽ wã, a Sayull ra yaa sik-m-meng soaba”
D kẽn ne d Wẽnnaamã ne sik-m-menga
11 Tags-y n ges-y bũmb ning sẽn paam rĩm a Sayullã. Sɩngrẽ wã, a ra yaa bi-bɩɩg sẽn yaa sik-m-meng soaba. A ra pa get t’a sãoo a taabã, a ra pa tẽed t’a zemsa ne naam me ye. (1 Sãm. 9:21; 10:20-22) La tarẽ-n-tarẽ, a wa n lebga wuk-m-meng soaba. A zʋg-wẽngã puka a sẽn lebg rĩmã poor bilfu. Daar a ye, a gũu a Sãmwɛll n wa getẽ t’a kaoosdame. A pa tall sũ-mar ye. A pa sik a meng n gũ t’a Zeova wa maan bũmb n sõng a nin-buiidã ye. A maana maoong sẽn yõogd bugum, n yaool n da pa tar sor n na n maan rẽ ye. Woto kɩtame t’a Zeova sũur pa le noom ne-a, t’a reeg naamã n bas-a. (1 Sãm. 13:8-14) D sã n dɩk yam kiba-kãngã pʋgẽ, n gũusd n da wa maan bũmb d sẽn pa tar sor n na n maane, wilgdame tɩ d yaa yam soaba.
Wãn to la d tõe n kell n tall mong-m-meng yam?
8 Israyɛll rĩm a Sayull kibarã wilgdame tɩ rat-m-ye tõe n kɩtame tɩ d pa le tall mong-m-meng yam ye. A sẽn wa n sɩng a naamã rɩɩbã t’a ra yaa sik-m-meng soaba. (1 Sãm. 9:21) Wala makre, baa sẽn da yaa Wẽnnaam n kõ-a naamã, Israyɛll neb n paoog-a. La a kell n sĩndame n pa sibg nin-kãens ye. (1 Sãm. 10:27) Rĩm a Sayull saka Wẽnnaam vʋʋsem sõngã sor-wilgri, n lʋɩ Israyɛll nebã taoor tɩ b zab ne Amo nebã n tõoge. La a sika a menga, n wilg tɩ yaa a Zeova n fãag-ba.—1 Sãm. 11:6, 11-13.
w95 15/12 10 s. a 1
Amon nebã: Buud b sẽn maan neere, tɩ b maan sẽn yaa wẽng n lebse
A Zeova maana Amon nebã neere, tɩ b le maan sẽn yaa wẽng n lebse. La a Zeova pa bas yel-kãngã b sẽn maan tɩ wilgd-b b beemã taal ye. “A Sayull sẽn wʋm gom-kãense [a Nahaas goamã], Wẽnnaam Sɩɩgã kẽe yẽnda, la a sũurã yika hal wʋsgo.” Ne Wẽnnaam vʋʋsem sõngã maasem, a Sayull tigma tãb-biis bãmb 330 000 n tɩ zab ne Amon nebã n kɩt tɩ b sãeege, hal tɩ “ned ka leb n tũ a to ye.”—1 Sãmwɛll 11:6, 11.
D bʋgs Wẽnnaam Gomdã zug neere:
Pipi Sãmwɛll sebrã tags-kãsemse
9:9—B sẽn yet tɩ “b ra boonda Wẽnnaam no-rɛɛsdba tɩ bãngdba” rat n yeelame tɩ bõe? Gom-kãngã tõe n wilgdame tɩ no-rɛɛsdbã tʋʋmd sẽn da na n tall pãng n yɩɩd a Sãmwɛll wakatẽ wã la Israɛll rĩm dãmbã wakatã yĩnga, gom-biig ning sẽn yaa “no-rɛɛsã” n ledg gom-biig ning sẽn yaa “bãngdã.” B gesa a Sãmwɛll wala no-rɛɛsdbã pipi soaba.—Tʋʋma 3:24.