A Zeezi ne a karen-biisã yii Zeruzalɛm tẽnẽ wã zaabre, n leb Betani sẽn be Oliiv tɩɩs tãngã yaangã. Tõe t’a Zeezi siga a zo-rãmb a Lazaar ne a Maari la a Mart nengẽ.

Vẽkembeoogã sẽn yɩ Nizã rasem 11 wã, a Zeezi ne a karen-biisã yika yibeoog n na n leb Zeruzalɛm wẽnd-doogẽ wã. Yɩɩ a yaoolem kẽnd wẽnd-doogẽ wã. A sẽn moon koɛɛgã zãma sʋk baraarã me n yɩ tɛkem-tɛkem. Rẽ zugẽ a maana Pakã ne a karen-biisã, la a lugl a kũumã tẽegre, tɩ nebã yaool n na n wa yõk-a, n nams-a hal n kʋ-a.

B sẽn yi Betani n tũud Oliiv tɩɩs tãngã sor n dabd Zeruzalɛmmã, a Pɩyɛɛr yãa tɩɩgã a Zeezi sẽn kãab a yɩ tɩ zaamẽ wã. A yeela a Zeezi yaa: “Karen-saamba, ges-y-yã! Kankangã yãmb sẽn dag n kãab wẽngã, a kʋɩɩme.”—Mark 11:21.

Bõe yĩng t’a Zeezi kɩt tɩ tɩɩgã kʋɩ? A togsa a võorã n yeele: “Mam yeta yãmb sɩda, tɩ yãmb sã n tar tẽeb n ka sãmbdẽ, yãmb na n maana bũmb ning sẽn maan kankangã, la ka rẽ bal ye. Yãmb sã n yeel tãn-kãngã t’a yik a sẽn beẽ wã n kẽ ko-kãsengã pʋgẽ, a na n yɩɩ a woto bala. Yãmb sẽn na n pʋʋs n kos bũmb ning fãa ne tẽebo, y na n paamame.” (Matye 21:21, 22) A ra zoe n togsa rẽ. Bala sẽn pa kaoose, a wilgame tɩ tẽeb tõe n kɩtame tɩ ned tõog n yẽrg tãnga.—Matye 17:20.

A Zeezi sẽn kɩt tɩ tɩɩgã kʋɩ wã, yaa sẽn na n wilg a karen-biisã tɩ b segd n tẽe Wẽnnaam. A yeelame: “Bũmb ning fãa yãmb sẽn na pʋʋs n kose, bɩ y tẽ tɩ y reeg-a lame, la yãmb na yã t’a pidsame.” (Mark 11:24) Neb nins fãa sẽn tũud a Zeezi wã segd n dɩka yam gom-kãngã pʋgẽ. A sẽn yeel a tʋm-tʋmdbã woto wã zemsame, bala bũmb nins sẽn da na n maan rẽ poorã na n maka b tẽebã. Kankangã kʋɩɩb leb n wilgda bũmb a to.

Kankangã vãad ra kɩtame tɩ yaa wa a tara biisi. Nif gesgẽ me, ra yaa wa Israyɛll nebã tara tẽebo. Yaool n yaa belgre. Wẽnnaam ra maana kaool ne-ba, tɩ wõnd b ra sakd n tũuda a tõogã. La buudã fãa la bal yel-manesmã wilgdame tɩ b ka tar tẽebo, la tɩ b tʋʋmã biis pʋd n pa sõma ye. B pa sak n tẽ Wẽnnaam Biigã meng ye. Dẽnd a Zeezi sẽn kɩt tɩ kankangã sẽn pa wom biisã kʋɩ wã, wilgda Israyɛll buudã me baasg sẽn na n yɩ to-to, b sẽn pa tar tẽeb la b pa tʋmd tʋʋm-sõma wã.

A Zeezi ne a karen-biisã wa n taa Zeruzalɛm. A Zeezi kẽnga wẽnd-doogẽ wã n na n tɩ zãms nebã wa a sẽn minim n maandẽ wã. Maan-kʋʋdbã kãsem-dãmb ne kãsem-dãmb ket n tẽra a Zeezi sẽn dig ligd tekdbã tɩ zaamẽ wã. B sok-a-la woto: “Yãmb maanda bõn-kãens ne no-bʋgo, la ãndã n kõ yãmb noor tɩ y maane?”—Mark 11:28.

A Zeezi yeel-b lame: “Mam na n soka yãmb sokr a yembre. Leok-y maam tɩ mam na yaool n togs yãmb mam sẽn paam noorã zĩig ning n maand bõn-kãensã. A Zã lisgã yii arzãn [“saasẽ,” MN] bɩ, bɩ ninsaalb nengẽ? Leok-y maam.” A sokrã yaa bẽdga, hal tɩ maan-kʋʋdbã kãsem-dãmb ne kãsem-dãmb pa mi b sẽn na n yeel ye. B yẽsa ne taab woto: “Tõnd sã n leok t’a yii arzãna, bãmb na n yeelame tɩ la yaa wãn tɩ tõnd ka tẽ-a? La tõnd sã n yeel t’a yii ninsaalb nengẽ, ha!” B sẽn yeel woto wã yaa b sẽn zoet kʋʋngã, “bala, nebã rag n tẽedame t’a Zã sɩd yaa Wẽnnaam no-rɛɛs hakɩɩka.”—Mark 11:29-32.

Kɩɩsdbã pa tõog n leok a Zeezi sokrã ne pʋ-peelem ye. B yeelame: “Tõnd ka mi ye.” Rẽ la a Zeezi yeel-b yaa: “Mam me kõn togs yãmb mam sẽn paam noorã zĩig ning n maand bõn-kãensã ye.”—Mark 11:33.

A Zeezi keta wẽnd-doogẽ wã. Sẽn pa kaoose, maan-kʋʋdbã kãsem-dãmb ne kãsem-dãmb sok-a lame n na n bãng a sẽn paam noor zĩig ning n maand yel-soalmã. La a sok-b-la sokr n bẽd-ba. Rẽ kɩtame tɩ b pa le mi b sẽn yet ye. Rẽ poore a wẽe yel-bũnd sẽn wilgd b sẽn sɩd yaa neb nins buudã.

A Zeezi yeelame: “Dao a yembr n dag n tar a kom-dibli a yiibu. Yẽnda goma ne pipi soabã n yeel-a: ‘M biiga, kẽng n tɩ tʋm m reezẽ tɩɩs pʋʋgẽ wã rũndã.’ La a leokame: ‘Mam ka na n kẽng ye.’ La yẽnda teka yam n kẽnge. Ba wã goma ne yiib-n-soabã n yeel yẽnda me a woto bala. La bi-kãng leokame n yeele: ‘M baaba, mam na n kẽngame.’ La a yaool n ka kẽng ye. Bãmb b yiibã sʋka, bʋg n maan a ba wã raabo?” (Matye 21:28-31) Yaa vẽeneg tɩ yaa pipi soabã.

A Zeezi yeela sẽn kɩɩsd-b yẽ wã yaa: “Mam yeta yãmb sɩd-sɩd tɩ yaood dɛɛgdbã ne pʋg-yoaadbã na n denga yãmb Wẽnnaam soolmã pʋgẽ.” Yaood dɛɛgdbã ne pʋg-yoaadbã ra pa tũud Wẽnnaam ye. La wa pipi biigã sẽn wa n tek yamã, bãmb me wa n teka yam n lebg wẽn-tũudba. Tũudmã taoor dãmb yaa wa bi-ribl a yiib-n-soabã. B yetame tɩ b tũuda Wẽnnaam, tɩ yaool n pa sɩd ye. A Zeezi yeela woto: “A Zã waa yãmb nengẽ n wilg yãmb tɩrlem sore, la yãmb ka tẽ yẽnda ye. La yaood dɛɛgdbã ne pʋg-yoaadbã tẽe yẽnda. La baa ne yãmb sẽn yã bõn-kãngã, yãmb yam ka tek tɩ y tẽ-a ye.”—Matye 21:31, 32.

Dẽ poore, a Zeezi leb n wẽe yel-bũnd a to, n wilg tɩ pa tũudmã taoor dãmb sẽn pa tũud Wẽnnaamã bal la yellã ye. Yaa b sẽn pʋd n yaa nin-wẽnsã. A yeelame: “Dao a yembr n dag n sel a reezẽ tɩɩse, n wẽ yãgr n gũbg-a, n tuk reezẽ rãam wẽkr boko la a me gãosgo. La yẽnda gũnug-a-la ne reezẽ tɩ-koaadba la a bas n tog sore. La bõn-bɩʋʋng sẽn ta, yẽnda tʋma tʋmtʋmd reezẽ tɩ-koaadbã nengẽ t’a tɩ reeg a pʋɩɩr n wa n kõ-a. La bãmb yõka yẽnda n pãbe, n dig-a t’a lebg a nug-zaala. La yẽnda leb n tʋma tʋmtʋmd a to bãmb nengẽ, la b pãba yẽ zugã n yaal-a. Yẽnda tʋma a tãab soaba, la b kʋʋ yẽnda. La yẽnda tʋma neb a taab wʋsgo, la b pãba kẽere, n kʋ kẽere.”—Mark 12:1-5.

Neb nins sẽn kelgd a Zeezi wã wʋma a yel-bũndã võor bɩ? Tõe tɩ b tẽega Wẽnnaam sẽn kɩt tɩ no-rɛɛs a Ezayi togs bũmb ningã. A yeelame: “Saasẽ-Pãng-Soabã reezẽ tɩɩs pʋʋgã yaa Israyɛll nebã. La tɩɩs nins bãmb sẽn dag n nongã yaa Zʋʋda nebã. Sẽn-Ka-Saab rag n tagsdame tɩ b na n yãnda zemsg beenẽ, la b mika zɩɩm daagr bala!” (Ezayi 5:7) A Zeezi yel-bũndã pʋgẽ, a Zeova n yaa reezẽ pʋʋgã soaba, tɩ Israyɛll buudã yaa reezẽ pʋʋgã, tɩ Wẽnnaam tõogã yaa yãgrã sẽn gũbg pʋʋgã. A Zeova tʋma no-rɛɛsdba, tɩ b na n zãms a nin-buiidã la b sõng-b tɩ b tʋʋmã yɩ sõma.

La a Zeova sã n tʋm “tʋmtʋmd” “tɩ-koaadbã” nengẽ fãa, b namsda a soaba, wall b kʋ-a menga. A Zeezi yeela woto: “Nin-yend tãa n dag n ket [reezẽ tɩɩs pʋʋgã soabã] sẽn tõe n tʋme: A bi-ribl-nongre. Yẽnda yaool n tʋma yẽnda n tagsdẽ: ‘B na n waooga mam biigã.’ La reezẽ tɩ-koaadb kãens yẽsa ne taab n yeele: ‘Yaa yõwã n na n soog a ba wã paoongã. Wa-y tɩ d kʋ-a tɩ paoongã lebg tõnd dẽnda.’ La bãmb yõka yẽnda n kʋ.”—Mark 12:6-8.

Masã, a Zeezi sok-b lame: “Woto wã, reezẽ tɩɩs pʋʋgã soab na n maana bõe?” (Mark 12:9) Tũudmã taoor dãmb leoka woto: “A na n kɩtame tɩ nin-wẽns-kãens ki nimbãan-kũum, la a rɩk pʋʋgã n peng koaadb a taab sẽn na kõ yẽnda reezẽ wã a bɩʋʋng wakate.”—Matye 21:41.

B kaoo b mens bʋʋd n pa bãng ye. Bala bãmb me naaga “koaadbã” a Zeova sẽn gũnug a “reezẽ tɩɩs pʋʋgã” sẽn yaa Israyɛll nin-buiidã. Bũmb wʋsg la a Zeova ra rat tɩ koaadbã maane. Wala makre, a ra ratame tɩ b tẽ a Biigã sẽn yaa Mesi wã. A Zeezi gesa tũudmã taoor dãmb n yeel-b yaa: “Yãmb nan ka karem gʋls-sõamyã koe-kãngã la? Kugr ninga tãn-metbã sẽn zãgsã lebga roogã pãng kugri, a soakã zĩigẽ wã. Yaa Zu-soabã n kɩt t’a yɩ a woto, la a yaa bõn-kãseng tõnd nifẽ.” (Mark 12:10, 11) Rẽ poor la a Zeezi yeel-b vẽeneg yaa: “Yaa woto yĩnga mam yeta yãmb tɩ b na n deega Wẽnnaam soolmã yãmb nugẽ n kõ buud a to sẽn na wom soolmã biisi.”—Matye 21:43.

Tõog karen-saam-dãmbã ne maan-kʋʋdbã kãsem-dãmb bãngame tɩ “yaa bãmb yĩng la a Zeezi sẽn wẽ yel-bũn-kãngã wã.” (Luk 20:19) Rẽ kɩtame tɩ b rat ne b sũy fãa masã n kʋ a Zeezi, ned ning sẽn na n wa “soog a ba wã paoongã.” La b ra zoeta kʋʋngã, bala nin-kãens nifẽ, a Zeezi yaa no-rɛɛsa. Rẽ n so tɩ b pa bao n na n kʋ-a zĩig pʋgẽ ye.

A Zeezi koe-moonegã kolgda saabo. La a ket n pukda tõog karen-saam-dãmbã ne maan-kʋʋdbã bãongo, ne a yel-bũnã maasem. Rẽ n so tɩ b rat-a n kʋ. (Luk 20:19) La a Zeezi ra nan pa puk b bãong n sa ye. A wẽe yel-bũnd a to.

Ad a sẽn yeele: “Arzãn [“saasẽ,” MN] soolem wẽnda wa rĩm sẽn maan pʋg-peegr tigr a bi-ribl yĩnga. Yẽnda tʋma a tʋmtʋmdb tɩ b tɩ yeel neb nins yẽnda sẽn dag n boolã tɩ b wa, la b dag n ka rat n wa ye.” (Matye 22:2, 3) A Zeezi sẽn gom “arzãn soolem” yell yel-bũndã sɩngrẽ wã yĩnga, ‘rĩmã’ tog n yaa Wẽnnaam a Zeova. La rĩmã bi-riblã yaa ãnda? Rĩmã sẽn bool neb ninsã makda ãnd dãmba? Rĩmã bi-riblã yaa a Zeezi, sẽn wẽed-a yel-bũndã, tɩ b sẽn bool-b rãmbã yaa neb nins sẽn na n tɩ naag-a n dɩ naam saasẽ soolmẽ wã.

Rĩmã sẽn deng n bool neb ninsã makda ãnd dãmba? Yaa zʋɩf-rãmbã. Bãmb la a Zeezi ne a tʋm-tʋmdbã reng n taas Rĩungã koɛɛga. (Matye 10:6, 7; 15:24) Yʋʋmd 1513 sẽn deng a Zeezi rogmã, b buudã tõr saka tõogã kaoolã. Dẽnd bãmb n yɩ pipi n paam n da na n lebg “maan-kʋʋdb soolem.” (Yikri 19:5-8) La wakat bʋg la b bool-ba, n yeel-b tɩ b wa ‘pʋg-peegr tigrã’? Yaa yʋʋmd 29 soabã, a Zeezi sẽn wa n sɩng n moond saasẽ soolem koe-noogã.

B sẽn bool Israyɛll nebã, wʋsg manesem yɩɩ wãna? A Zeezi yeelame tɩ “b dag n ka rat n wa ye.” Tũudmã taoor dãmb fãa la bala, n paas tẽngã neb wʋsg pa sak n tẽ t’a Zeezi la Mesi wã, la Rĩm ning Wẽnnaam sẽn yãkã ye.

La a Zeezi wilgame tɩ baasgo, zʋɩf-rãmbã na n le paamame tɩ b bool-ba. A yeelame tɩ rĩmã leb n tʋma tʋm-tʋmdb a taab n yeel-b tɩ b kẽng neb nins yẽnda sẽn dag n boolã nengẽ, n tɩ yeel-b yaa: “Mam segla tigrã rɩɩb n sɛ, mam kʋʋ m nag-nobdse, la m rũm-nobdse. Bũmba fãa seglame n sɛ. Wa-y pʋg-peegr tigrã.” A Zeezi paasa woto: “La b sẽn ka nand boolgã yĩnga, b loogame. Bãmba rãmb kẽnga b pʋtẽ, tɩ bãmba rãmb kẽng leebgo. La neb a taabã yõga tʋmtʋmdbã n nams-ba, la b kʋ-ba.” (Matye 22:4-6) Woto bilgda bũmb ning sẽn da na n maane, b sã n wa lugl kiris-neb tigingã. Wakat kãnga, zʋɩf-rãmbã ra ket n tõe n paam n kẽe Wẽnnaam soolmẽ wã. La b wʋsg pa sak ye. B pʋd n namsa ‘rĩmã tʋmtʋmdbã.’—Tʋʋmã 4:13-18; 7:54, 58.

Israyɛll nebã sẽn maan woto wã, bõe n paam-ba? A Zeezi yeelame: “Rĩmã sũur yikame t’a tʋm a tãb-biisã tɩ b tɩ sãam nin-kʋʋdb kãense, la b yõog b tẽngã bugum.” (Matye 22:7) Sɩd me, yʋʋmd 70 soabã, Rom-dãmbã wa n sãama Zeruzalɛm sẽn yaa “b tẽngã.”

Rĩmã sẽn bool nebã tɩ b zãgsã, rat n yeelame t’a pa na n le bool neb a taab bɩ? Ayo. Yel-bũndã pʋgẽ, a Zeezi paasame: “Dẽ, [rĩmã] yaool n yeela a tʋmtʋmdbã yaa: ‘Pʋg-peegrã tigr seglame n sɛ. La neb nins mam sẽn boolã dag n ka zems tɩ rɩ-a ye. Woto wã, kẽng-y so-tiisẽ wã n tɩ bool neb nins fãa yãmb sẽn na yã wã tɩ b wa.’ Tʋmtʋmdbã saa soayã zut n tigs neb nins fãa b sẽn yã wã, nin-wẽns la nin-sõamyã, hal tɩ tigrã roog pid ne neba.”—Matye 22:8-10.

Kaoosg zugẽ, tʋm-tʋmd a Pɩyɛɛr wa n tʋma tʋʋmd sẽn wõnd woto. A sõnga bu-zẽms neba, rat n yeel tɩ neb sẽn ka zʋɩf-rãmb bɩ n pa naag neb nins sẽn tuub n sak zʋɩf-rãmbã tũudmã, tɩ b lebg kiris-neb hakɩɩka. Yʋʋmd 36 soabã, a Korney sẽn yaa Rom sodaas naabã ne a zakã rãmb paama vʋʋsem sõngã, tɩ rẽ kõ-b sor tɩ b tõe n kẽ saasẽ soolmã pʋgẽ.—Tʋʋmã 10:1, 34-48.

A Zeezi wilgame tɩ pa neb nins fãa sẽn sak boollã n wa wã la “rĩmã” na n bas tɩ b naag n maan tigrã ye. A yeelame: “Rĩmã kẽeme n na n ges nebã sẽn paam boolgã, la a yãnda rao a yembr be sẽn ka yer pʋg-peegrã tigr fuug ye. A yeel-a lame: ‘M zoa, fo maana a wãn n wa n kẽ ka n ka yeelg pʋg-peegrã tigr fuugu?’ La raoã ka tõog n leok tɩ bũmb ye. Dẽ, rĩmã yeela tʋmtʋmdbã yaa: ‘Sẽb-y-yã a nao wã ne a nusã, n lob-a lik bida sẽn be yɩngã pʋgẽ. Yãbr la yẽn wãbr na n zĩnda be.’ Bala, b sẽn bool b rãmbã yaa kʋʋng wʋsgo, la b sẽn tũus b rãmbã sõor paoodame.”—Matye 22:11-14.

Tõe tɩ tũudmã taoor dãmb ra pa wʋmd a Zeezi sẽn yeel bũmb ningã fãa võor ye. Baa ne rẽ, b sũyã puuda ne-a, tɩ b tolg n dat ne b sũy fãa masã n menes nin-kãngã sẽn ningd-b yãndã.

A Zeezi bɛɛbã sẽn yaa tũudmã taoor dãmbã sũy yikame, bala a wẽe yel-bũn sẽn wilgd tɩ b yaa nin-wẽnse. Fariizẽ-rãmbã zemsa taab masã n na n bẽd a Zeezi a goamã pʋgẽ, n paam n yõk-a n kẽng Rom guvɛrneerã taoore. Rẽ n so tɩ b kõ b neb kẽer ligdi, tɩ b na n tɩ bẽd-a.—Luk 6:7.

B sẽn tʋm-b rãmbã tɩ yeela a Zeezi yaa: “Karen-saamba, tõnd miime tɩ yãmb gomda tɩrlem la y zãmsd nebã ne tɩrlem, la tɩ yãmb ka tũusd neb ye. La yãmb zãmsda nebã Wẽnnaam sor wa sẽn zems sɩdã. Tõnd tara noor tɩ yao rĩm a Sezaar yõor yaood bɩ? Bɩ d ka tare?” (Luk 20:21, 22) A Zeezi bãnga b sɩlmã. A ra miime tɩ b ratame bal n bẽd-a. A sã n da yeel tɩ pa zems tɩ b yao yõor yaoodã, b tõe n dõd-a lame t’a yaa Rom naamã bɛ. La a sã n da yeel tɩ b segd n yaoome, nin-buiidã sẽn da kis Rom taoor dãmbã ra tõeeme n pa wʋm a gomdã võore, n yik b sũy ne-a. Woto wã, a Zeezi na n leokame tɩ bõe?

A Zeezi yeelame: “Zãmb dãmba, bõe tɩ y bẽt maam? Wilg-y maam ligd ning yãmb sẽn tar n yaood yõor yaoodã.” La b kõ-a-la deniye a yembre, t’a sok-b woto: “Maasmã ne gʋlsmã sẽn be lagfã zugã yaa ãnda rẽnda?” B leokame tɩ yaa a Sezaar dẽnda. Dẽ a Zeezi yeel-b lame: “Sã n yaa woto, bɩ y lebs Sezaar bũmb ning sẽn yaa Sezaar dẽnda, la y lebs Wẽnnaam bũmb ning sẽn yaa Wẽnnaam dẽnda.”—Matye 22:18-21.

A Zeezi gomdã ling-b lame, tɩ b ka tar b sẽn na n yeele, n kong n bas-a la b looge. La nan pa sa ye. B ra ket n baooda b sẽn na n maaneg n bẽd-a. Fariizẽ-rãmbã sẽn mak n pa tõogã, tũudmã sull a to taoor dãmb n wa. Yaa Saduusẽ-rãmbã.

Saduusẽ-rãmbã pa tẽed kũum vʋʋgrã ye. B wa n soka a Zeezi n na n bãng kãadmã yell sẽn na n yɩ to-to kũum vʋʋgrã poore. B yeela a Zeezi woto: “Karen-saamba, a Moyiis yeelame tɩ ned sã n ki n ka bas biiga, a ba-biig na n deega pʋg-kõorã n dog kamb a ba-biigã sẽn ki wã yĩnga. La ba-biis a yopoe n dag n be tõnd sʋka. Kãsmã peega paga, la a kiime. La a sẽn ka paam biig yĩnga, a basa a pagã ne a yao wã. Yiib soabã me yɩɩ a woto, tɩ ta tãab soabã, hal tɩ ta b yopoe wã fãa. Bãmb fãa sẽn ki n sa, pagã me kiime. Kũum vʋʋgrã wakate, bʋg ba-biisã a yopoe wã sʋk n na n soog pagã? Bãmb fãa la sẽn tall-a wã la!”—Matye 22:24-28.

A Zeezi miime tɩ Saduusẽ-rãmbã sakda goam nins a Moyiiz sẽn gʋlsã. Rẽ n so t’a tik rẽ n leok-ba. A yeelame: “Ka yãmb sẽn ka wʋmd gʋls-sõamyã, wall Wẽnnaam pãngã võor yĩng la yãmb tudg-y sɩda? Bala, kũum vʋʋgr wakate, raop ka na n leb n dɩgs pagba, pagb me ka na n kuil sɩdba. Bãmb na n yɩɩ wa malegsã sẽn be arzãnã [“saasẽ,” MN]. La ne kũum vʋʋgrã yelle, yãmb nan ka karem a Moyiis sebrã pʋgẽ, Wẽnnaam sẽn gom ne a Moyiis tuugã sẽn wit bugmã sɛɛgẽ n yetẽ wã la?: ‘Mam yaa a Abrahaam Wẽnnaam, a Izak Wẽnnaam la a Zakoob Wẽnnaam.’ Wẽnnaam ka kũum Wẽnnaam ye, b yaa nin-vɩɩs Wẽnnaam. Ad yãmb tudgrã yaa kãsenga!” (Mark 12:24-27; Yikri 3:1-6) A Zeezi leoorã linga kʋʋngã hal wʋsgo.

A Zeezi sẽn leok Fariizẽ-rãmbã ne Saduusẽ-rãmbã to-to wã kɩtame tɩ b ka tar b sẽn yet ye. Rẽ n so tɩ b naag taab masã n na n bẽd-a. Tõog karen-saamb a yembr soka a Zeezi yaa: “Karen-saamba, tõodã sʋka, bʋg n yaa kãseng n yɩɩda?”—Matye 22:36.

A Zeezi leokame: “Pipi soabã la woto: ‘Israyɛlle, kelge, Sẽn-Ka-Saab yaa tõnd Wẽnnaam, Sẽn-Ka-Saab yaa b yembr bal tãa. Bɩ f nong Sẽn-Ka-Saab sẽn yaa fo Wẽnnaamã ne f sũur fãa, la f yalẽ fãa la f yamã fãa la ne f pãngã fãa.’ Tõog ning sẽn pʋgd-a yẽnda la woto: ‘Nong f to wa f menga.’ Tõog ka be sẽn yɩɩd bãmbã ye.”—Mark 12:29-31.

Tõog karen-saambã sẽn wʋm a Zeezi leoorã, a yeelame: “Karen-saamba, y gomd yaa sɩda. Wẽnnaam sɩd yaa b yembr tãa, la a to ka be kal bãmb bala, la tɩ nong bãmb ne f sũur fãa la f yam fãa la f pãng fãa, la tɩ nong f to wa f menga, a yɩɩda maand sẽn yõogd bugum la maand a taabã fãa.” A Zeezi sẽn yã tɩ raoã leoka ne yamã, a yeel-a lame: “Fo ka zãr ne Wẽnnaam soolem ye.”—Mark 12:32-34.

Rasem a tãabã fãa, rat n yeel tɩ Nizã rasem a 9, 10 ne 11 wã, a Zeezi zãmsa nebã wẽnd-doogẽ wã. Kẽer kelga a goamã hal tɩ b sũy yaa noogo. Wala makre, tõog karen-saambã sẽn wa n sok n na n bãng tõog ning sẽn yaa kãseng n yɩɩdã. La tũudmã taoor dãmb yẽ sũy ra pa noom ye. B ‘ned baa a yembr ka saag n leb n sok a Zeezi bũmb ye.’

Tũudmã taoor dãmb pa tõog n sãam a Zeezi yʋʋre, b pa tõog me t’a yeel bũmb sẽn na n kɩt tɩ b tall-a n kẽng Rom guvɛrneerã taoor ye. (Luk 20:20) Ket n yaa Nizã rasem 11. A Zeezi keta wẽnd-doogẽ wã. Masã wã, yẽ n sok tũudmã taoor dãmbã sokre, n na n wilg-b yẽ sẽn sɩd yaa ned ninga. A sok-b lame yaa: “Yãmb tagsda bõe ne Kirisã yelle? B yaa ãnda biiga?” (Matye 22:42) B leokame t’a Davɩɩde. Nebã ra miime tɩ Kirisã bɩ Mesi wã na n yɩɩ a Davɩɩd yagenga.—Matye 9:27; 12:23; Zã 7:42.

A Zeezi sok-b-la woto: “La yɩta a wãn t’a Davɩɩd gom ne Sɩɩg-sõng pãng n bool bãmb tɩ Zu-soaba? Bãmb yeelame: ‘Zu-soabã yeela mam Zu-soabã yaa:’ ‘Zĩnd mam dɩtgo, hal tɩ m kɩt tɩ f tab f bɛɛbã.’ A Davɩɩd sã n boonda bãmb tɩ Zu-soaba, bãmb leb n yɩta wãn n yaa yẽnda biiga?”—Matye 22:43-45.

Fariizẽ-rãmbã ka leok ye. Bala b ra saagdame t’a Davɩɩd yageng sẽn yaa ninsaal n na n wa fãag-b Rom dãmbã nugẽ. A Zeezi tika a Davɩɩd goam nins sẽn be Yɩɩn-sõamyã 110:1, 2 pʋgẽ wã, n wilg tɩ Mesi wã naam na n yɩɩga ninsaal naam. A yaa a Davɩɩd Zu-soaba, la a na n wa zĩnda Wẽnnaam dɩtg n dɩ naam. A Zeezi sẽn leok bɛɛbã to-to wã kɩtame tɩ b ka le tar b sẽn na n yeel ye.

A Zeezi karen-biisã ne neb a taab n da kelgde. Rẽ n so t’a Zeezi keoog-b tɩ b gũus ne tõog karen-saam-dãmbã la Fariizẽ-dãmbã. Nin-kãensã “bee a Moyiis zĩigẽ,” rat n yeel tɩ b ninga b mens a Moyiiz zĩigẽ n na n zãms nebã Wẽnnaam tõogã. Rẽ n so t’a Zeezi sagl a kɛlgdbã woto: “Maan-y bũmb nins b sẽn na n yeel yãmbã, la y tũ bũmb nins b sẽn na n zãms yãmbã, la y ra maan wa bãmb sẽn maandã ye. Bala, bãmb yetame la b yaool n ka maandẽ ye.”—Matye 23:2, 3.

Rẽ poore, a Zeezi wilgame tɩ b sɩd yaa zãmb dãmba. A yeelame: “Bãmb maanda b pʋʋsgã gãn tɩ yaa yalemse.” Zʋɩf-rãmb sãnda ra gʋlsa tõogã goam kẽer n ning tʋgd pʋsẽ n teeg b rĩy bɩ n sẽb b kamse. Fariizẽ-rãmbã ra maanda b tʋgdã tɩ yaa bɛda, n dat tɩ nebã tẽ tɩ bãmb tũuda tõogã sõma. Sẽn paase, b ra kɩtame tɩ b “futã zerd yaa wogdo.” Yaa sɩd tɩ Israyɛll nebã ra segd n ninga b futã noy zerdo, la Fariizẽ-rãmbã ra maandame tɩ loog noore. (Sõdbo 15:38-40) B ra maanda woto fãa “nebã nin gesg yĩnga.”—Matye 23:5.

Baa a Zeezi karen-biisã me tõe n wa ratame n bao yʋʋre. Rẽ n so t’a Zeezi sagl-b woto: “La yãmba, ra kɩt-y tɩ nebã boond yãmb tɩ karen-saamb ye. Bala, yãmb karen-saamb yaa a yembr tãa, la yãmb fãa yaa ba-biisi. Da bool-y ned baa a yembr tãa dũni ka tɩ ba ye. Bala, ned a yembr tãa n yaa yãmb ba, soab ning sẽn be-a saasẽ wã. Da kɩt-y tɩ nebã bool yãmb tɩ taoor dãmb ye. Bala, ned a yembr tãa n yaa taoor soaba, yaa Kirisi.” La karen-biisã manesem segd n yɩɩ wãna? A Zeezi yeel-b lame: “Sẽn yaa-a kãseng n yɩɩd yãmb sʋkã, bɩ a yɩ yãmb tʋmtʋmda. Ned sã n zẽk a menga, b na n sik-a lame, la ned sã n sik a menga, b na n zẽk-a lame.”—Matye 23:8-12.

Rẽ poore, a Zeezi wilgame tɩ tõog karen-saam-dãmbã ne Fariizẽ-rãmbã sẽn yaa zãmb dãmbã na n paama toogo. A yeelame: “Yãmba, tõog karen-saam-dãmbã, la Fariizẽ-dãmb sẽn yaa zãmb dãmbã, yãmb na paam toogo! Bala, yãmb pagda arzãn [“saasẽ,” MN] soolmã tɩ nebã ka tõe n kẽ ye. Yãmb mensã ka kẽede, la yãmb ka basd neb nins sẽn dat n kẽ wã me tɩ b kẽ ye.”—Matye 23:13.

A Zeezi ninga Fariizẽ-rãmbã taale, bala, b ra pa lʋɩɩsd bũmb niis sẽn tar yõod a Zeova nifẽ wã taoor ye. A wilgame tɩ b wẽnemda tõogã wa b sẽn date. Wala makre, b ra yetame: “Ned sã n wẽen ne wẽnd doogã, ka tar yell ye, la a sã n wẽen ne sãnemã sẽn be wẽnd doogẽ wã, yaa tɩlɛ t’a pidsi.” Woto wilgdame tɩ b ra yaa wa zoense, bala bãmb nifẽ, sãnemã sẽn be wẽnd-doogẽ wã tara yõod n yɩɩd wẽnd-doogã, zĩig ning b sẽn kẽnd n pʋʋsd a Zeova wã. Sẽn paase, b ra “basda bũmb ning sẽn yaa kãseng n yɩɩd fãa tõogã pʋgẽ: yaa nimbãan-zoeere la sɩd maanego.”—Matye 23:16, 23; Luk 11:42.

A Zeezi yeelame tɩ Fariizẽ-rãmbã yaa “tɛtb sẽn yaa zoense,” la tɩ b “yoogda koom n kokd dũmpigli, n yaool n vend yʋgemde.” (Matye 23:24) Rũmpigl sã n da lʋɩ b rãamẽ b yoogdame, bala tõogã yeelame t’a yaa rẽgdo. La b ra pa tũud tõogã noy nins sẽn yaa kãsems n yɩɩdã, tɩ yaa wa b sẽn vend yʋgemd sẽn yaa bedr n yɩɩd rũmpiglã. Yʋgemd me yaool n da yaa rũng sẽn yaa rẽgdo.—Maan-kʋʋre 11:4, 21-24.

A Zeezi keta wẽnd-doogẽ wã, la yaa a yaoolem. A ra ket n pukda tõog karen-saam-dãmbã ne Fariizẽ-rãmbã bãongo, n yeel vẽeneg tɩ b yaa zãmb dãmba. A yeel-b lame: “Yãmb nedgda ko-yũudum wamd ne laag poore, tɩ b pʋsã yaool n pid ne fãab la yĩng ratem sakre. Fariizẽ sẽn yaa zoanga, deng n nedg ko-yũudum wamdã ne laagã pʋg tɩ yɩ yɩlemde, tɩ b poayã me na yɩ yɩlma.” (Matye 23:25, 26) Fariizẽ-rãmbã ra maanda bũmb nins tõogã sẽn yet tɩ b maan sẽn na yɩl tɩ b yĩnsã yɩ yɩlma, n dat tɩ nebã tẽ tɩ b yaa yɩlma. La b toog ra kae ne bãmb mensã sẽn tog n yɩ neb nins b sũurã pʋgẽ wã ye. Bala b sũyã ra pa sõma ye.

B ra meta no-rɛɛsdbã yaad hal n nagsdẽ, tɩ rẽ me wilgdẽ tɩ b sɩd yaa zãmb dãmba. La wa a Zeezi sẽn yeelã, b yaa “neb nins sẽn kʋ-b Wẽnnaam no-rɛɛsdbã kamba.” (Matye 23:31) Sɩd me, b sẽn da maand b sẽn tõe fãa n na kʋ a Zeezi wã wilgda rẽ.—Zã 5:18; 7:1, 25.

A Zeezi wilga sẽn na n paam tũudmã taoor dãmba, b sã n pa tek yam n kos sugri. A yeelame: “Wiisã! Wag-toos buudu! Yãmb na n yɩɩ a wãn n põs bug-tẽng [“Zeyɛn,” MN] sɩbgrã?” (Matye 23:33) Bok n da pẽ Zeruzalɛm tɩ b boond tɩ Hinom longo, tɩ nebã ra yõogd sagd be. Rẽ yell la a Zeezi sẽn gomdã. Yaa makr sẽn wilgd tɩ sãoong zãng-zãng n gũud tõog karen-saam-dãmbã ne Fariizẽ-rãmbã sẽn yaa nin-wẽnsã.

A Zeezi karen-biisã yẽ na n yɩɩ “Wẽnnaam no-rɛɛsdba, la yam dãmba, la tõog karen-saam-dãmba,” a yʋʋrã yĩnga. Woto wã, tũudmã taoor dãmb na n maan-b-la bõe? A Zeezi yeelame: ‘Yãmb na n kʋʋ [mam karen-biisã] kẽere, n ka kẽer da-pɩgs [“ra-lugs,” MN] zutu. Yãmb na n pãba b taabã karen-dotã pʋse, la y na n namsa bãmb tẽng-tẽnga. Sẽn na yɩlẽ tɩ nin-tɩrsã fãa zɩɩm sẽn daag dũniyã zugã, sẽn sɩng ne a Abɛll tɩ ta a Berikɩya biig a Zakari yãmb sẽn kʋ wã zɩɩm taal zĩnd yãmb zutu.’ A yeel-b-la vẽeneg yaa: “Sɩd-sɩda, mam yeta yãmb tɩ bõn-kãens fãa na n waa zamaan-kãngã nebã zutu.” (Matye 23:34-36) Gom-kãensã pidsa yʋʋmd 70 soabã, Rom sodaasã sẽn wa n sãam Zeruzalɛm la b kʋ zʋɩf-rãmb tusa wã.

A Zeezi sẽn tags yel-beedã sẽn na n paam zʋɩf-rãmbã, a sũurã sãamame t’a yeele: “Zeruzalɛm! Zeruzalɛm! Fo sẽn kʋʋd Wẽnnaam no-rɛɛsdba, la f lobd neb nins b sẽn tʋm fo nengẽ wã kugã! Naoor wʋsgo mam dag n tʋlg n tigsa f kambã wa no-yãang sẽn põgended a no-bi a pɩgsẽ, la yãmb ka sak ye. Gese, b na n basa y roogã vɩʋʋg ne-yã.” (Matye 23:37, 38) Tõe tɩ sẽn wʋm-b a Zeezi goamã soka b mens sẽn yaa ‘roog’ ning yell la a gomda. Yaa wẽnd-do-kãsengã sẽn be Zeruzalɛmmã bɩ? Bala wõnda Wẽnnaam mengã n da gũud roogã.

A Zeezi paasa woto: “Bala, mam yeta yãmb tɩ yãmb ka na n leb n yãnd maam yɛs hal tɩ ta wakat ning yãmb sẽn na n yeele: ‘Bark bee soab ning sẽn wat ne Zu-soabã yʋʋrã zugu.’ ” (Matye 23:39) A lebg n dɩka goam nins sẽn be Yɩɩn-sõamyã 118:26 pʋgẽ wã, n yeele: “Bark bee ned ning sẽn wat-a ne Sẽn-Ka-Saab yʋʋrã zugu! Tõnd bee Sẽn-Ka-Saab roogẽ wã n ningd yãmb zut barka.” B sã n wa sãam wẽnd-doogã, ned kõn le kẽng be pʋʋsg yĩng ye.

A Zeezi yikame masã n tɩ zĩnd ligdã ningr kogendã sẽn beẽ wã. Koglg fãa tara võ-bil tɩ nebã ningd ligdã. A Zeezi zĩi n geta zʋɩf-rãmbã sẽn ningd ligdã. Arzegs rãmbã ra ‘ningda ligd wʋsgo.’ A wa n yãa pʋg-kõor sẽn yaa naong soab sẽn wa n ning “lagd-bãooneg a yiib sẽn zems tãma.” (Mark 12:41, 42) A Zeezi miime tɩ pʋg-kõorã kũun nooma Wẽnnaam wʋsgo.

A boola a karen-biisã n yeel-b yaa: “Mam yeta yãmb sɩd-sɩd tɩ pʋg-kõ-kãngã sẽn yaa naong soabã kõome n yɩɩd neb nins fãa sẽn ning ligd ligdã koglgẽ wã.” Bõe yĩng t’a yet woto? A paasame: “Bãmb ned kam fãa tʋm n yõngame n ningi, la yẽ sẽn ka tarã, a pɩɩsa a meng zãng n kɩse, hal a rɩɩb ligdi.” (Mark 12:43, 44) Pʋg-kõorã tagsa wã la a manesmã yaa toor fasɩ ne tũudmã taoor dãmba.

Ket n yaa Nizã rasem 11. A Zeezi sẽn yi wẽnd-doogẽ wã daar-n-kãnga, a pa tol n le kẽ be ye. La yẽ ne a karen-biisã sẽn wa n loogdẽ wã, b nin-yend n yeel-a yaa: “Karen-saamba, ges-y roogã kugã neerlem la meebã!” (Mark 13:1) Sɩd me, kug kẽer b sẽn tall n me wẽnd-doogã yaa bɛd-bɛda, tɩ nebã neẽ tɩ roogã tara pãnga, la t’a na n kaoosame. La a Zeezi sẽn yeelã tog n linga nebã. A yeelame: “Fo nee ro-kãsems kãensã? Kugr baa a yembr kõn pa a to zug b sẽn kõn leeb n lub ye.”—Mark 13:2.

A Zeezi sẽn togs gom-kãensã poore, yẽ ne a tʋm-tʋmdbã pasga Kidrõ longã, n tɩ rʋ Oliiv tɩɩs tãngã. Wa n lebga yẽ ne a Pɩyɛɛr la a Ãndere ne a Zak la a Zã n zĩ n sõsda. B tool n nee wẽnd-doogã sẽn yaa kãsengã.

Yaa Nizã rasem 11 wã sẽn yaa talaat daarã, la wĩndgã kolga lʋɩɩse. A Zeezi tẽng zug tʋʋmdã me rabda a saabo. A ra zãmsda nebã wẽnd-doogẽ wã wĩndga, tɩ yʋng sã n ta, bɩ a yi tẽngã n tɩ gãand zĩig a to. Nin-buiidã ra nonga a Zeezi goamã, hal n wat a nengẽ wẽnd-doogẽ wã yibeoog pĩnd n na n kelg-a. (Luk 21:37, 38) La masã a Zeezi bee Oliiv tɩɩs tãngã zug ne a tʋm-tʋmdb a naase. Yaa a Pɩyɛɛr ne a Ãndere la a Zak ne a Zã.

Bãmb b naasã waame n na n yã a Zeezi, bala b ra tagsda a sẽn gom wẽnd-doogã yellã. Sẽn pa kaoose, a yeelame tɩ roogã kugr baa a yembr kõn pa a to zug ye. La pa rẽ bal ye. A ra leb n yeel-b lame yaa: “Bɩ yãmb me segl n sɛ. Bala, Ninsaal Bi-riblã na n waa wakat ning yãmb sẽn ka tagsd tɩ b na n waame wã.” (Luk 12:40) Sẽn paase, a ra goma “daar ning Ninsaal Bi-riblã sẽn na n puk b mengã” yelle. (Luk 17:30) Rẽ yĩnga a sẽn yeel woto wã, a ra gomda wẽnd-doogã sãoong yell bɩ? Tʋm-tʋmdbã ra rat n bãnga woto fãa. B yeel-a lame yaa: “Togs-y tõnd wakat ning bõn-kãens fãa sẽn na n zĩndã, la bãnd ning sẽn na n wilg tɩ yãmb watame la tɩ dũni na n sɛɛme wã.”—Matye 24:3.

Tõe tɩ b ra tagsda wẽnd-doogã bãmb sẽn tool n neẽ wã sẽn na n sãamã yelle. B ra ratame me n bãng Ninsaal Bi-riblã waoong wakate. Tõe tɩ b tẽega a Zeezi sẽn wẽ yel-bũnd n yeel tɩ “na-biig a yembr n da yi n kẽng tẽng sẽn zãr n na n tɩ reeg naam la a wa” wã. (Luk 19:11, 12) B ra ratame me n bãng bũmb nins sẽn na n sõng nebã tɩ dũniyã sɛɛb wakat sã n wa tat bɩ b bãngã.

A Zeezi leoorã pʋgẽ, a togsa yɛl buud toor-toor sẽn na n yɩ bãnde, n wilg wakat ning b sẽn na n sãam Zeruzalɛm ne a wẽnd-doogã. La pa rẽ bal ye. A sẽn togs bũmb ninsã me na n wa sõnga kiris-neb a taaba, tɩ b bãng tɩ yẽ sɩnga a naamã rɩɩbo, la tɩ dũniyã saab kolgame.

Sẽn wa n beẽ-beẽ, tʋm-tʋmdbã yãame t’a Zeezi sẽn da reng n togsã pidsdame. Sɩd me, yɛl wʋsg n sɩng pidsg b nifẽ. Woto kɩtame tɩ yʋʋm 37 poore, rat n yeel tɩ yʋʋmd 70 soabã, b sẽn wa n na n sãam Zeruzalɛm ne a wẽnd-doogã, kiris-neb nins sẽn da yaa gũusdbã ra segl n saame, bala b ra zoe n nee yɛl nins sẽn da wilgd tɩ sãoongã kolgame wã. La pa a Zeezi sẽn da reng n togsã fãa n pids yʋʋm 37 wã pʋgẽ ye. Woto wã, yaa yel-bʋs masã la sẽn na n wilg t’a Zeezi sɩnga naam rɩɩb saasẽ wã? A Zeezi vẽnega rẽ me n togs a tʋm-tʋmdbã.

A Zeezi yeelame tɩ b na n “wʋmame tɩ b gomd zab yelle,” la b “wʋm zab rãamde,” la tɩ “soolem na n yika zabr ne soolem a to, tɩ rĩung yik ne rĩung a to.” (Matye 24:6, 7) A yeelame me tɩ “tẽn-digimdg kãsems na n zĩndame, la bã-longds ne kom na n zĩnda zĩig-zĩiga.” (Luk 21:11) A Zeezi keooga a karen-biisã woto: “B na n yõga yãmba, n nams-yã.” (Luk 21:12) A wilgame me tɩ ziri no-rɛɛsdb n na n yik n belg neb wʋsgo, tɩ wẽnema na n paasame, la tɩ neb wʋsg nonglem na n boogame. Sẽn paase, a Zeezi yeela woto: “Wẽnnaam soolmã koe-no-kãngã na n moona dũni gill fãa, tɩ yɩ kaset soolem toay-toayã fãa nebã yĩnga. Dẽ, wakat sɛɛb na yaool n ta.”—Matye 24:14.

Yaa sɩd t’a Zeezi sẽn deng n togsã sʋka, yɛl kẽer n pids nand tɩ Rom-dãmbã sãam Zeruzalɛm, tɩ kẽer me pids sãoongã sasa. La rẽ yĩnga, a Zeezi goamã ra na n le pidsa wakat a to bɩ? Yãmb nee yɛl sẽn maand masã menga, tɩ yaa kaset t’a Zeezi sẽn da reng n togsã pidsdame bɩ?

A Zeezi sẽn wa n sõdgd yɛl nins sẽn na n yɩ bãndã, a goma “sũ-sãoong bõn-wẽngã” yelle. (Matye 24:15) Yʋʋmd 66, bõn-wẽngã yɩɩ Rom sodaasã sẽn kẽ tẽngã, n da zãad b darpo-rãmbã sẽn tar b bõn-naandsã imaaz-rãmbã. B gũbga tẽngã n sãam a lalsã zĩis kẽere. (Luk 21:20) Dẽnd “sũ-sãoong bõn-wẽngã” ra yasa zĩig a sẽn da pa segd n yalsẽ, bala zʋɩf-rãmbã ra geta b tẽngã wa ‘zĩ-sõngo.’

A Zeezi paasame: “Wakat kãnga, to-kãseng n na n zĩndi, la a buud ka zĩnd hal dũni sɩngr wakat tɩ ta masã ye, la a buud kõn tol n zĩnd yɛs ye, abada.” Yʋʋmd 70 soabã, Rom sodaasã sɩd sãama Zeruzalɛm sẽn yaa zʋɩf-rãmbã zĩ-sõngã, la b sãam a wẽnd-doogã. Yɩɩ to-kãsenga, hal tɩ neb tusa ki. (Matye 4:5; 24:21) B ra zɩ n sãam zʋɩf-rãmbã tẽng woto ye. Zabr ra zɩ n kʋ b buudã neb woto fãa ye. Sãoon-kãng kɩtame tɩ zʋɩf-rãmbã sẽn da sigl to-to n tũud Wẽnnaam na maan yʋʋm kobsã sãame. Sã n yaa woto, dẽnd a Zeezi bãngr-gomdã sẽn na n le wa pidsã wẽnem n na n yɩɩge.

SAABÃ WAKATE, NEBÃ PA NA N LE KƖS TAAB SƖD YE

A Zeezi wilga a tʋm-tʋmdbã yɛl nins sẽn na n wilg tɩ yẽ reega naam, la tɩ dũniyã saab kolgame wã. La pa tek rẽ bal ye. A keoog-b lame tɩ b ra tẽ ‘belgr kiris-rãmb la belgr no-rɛɛsdbã’ ye. La a yeel tɩ nin-kãens na n baoome n na n belg nebã, la tɩ b na n datame meng n ‘tudg nin-tũusdsã.’ (Matye 24:24) La nin-tũusdsã pa na n bas tɩ b tudg-b ye. Nebã na n yãa “belgr kiris-rãmbã” ne nifu, la a Zeezi naamã reegr na n yɩɩ bũmb ninsaal nif sẽn pa tõe n yã.

A Zeezi goma to-kãseng ning sẽn na n zĩnd dũniyã sɛɛb wakatã yelle, n yeel woto: “Wĩndgã na n sobgame, kiuugã peelem kõn leb n zĩnd ye, ãdsã na n yii yĩngr n sʋʋge, la saasẽ pãens na rigimdi.” (Matye 24:29) Gom-kãensã kẽesa tʋm-tʋmdbã rabeem. B ra pa mi yɛlã sẽn da na n yɩ to-to wã takɩ ye. La b ra neeme tɩ yel-beed n wate.

Yel-beedã sã n wa sɩnge, ninsaalbã na n maana wãna? A Zeezi yeelame: “Rabeem na n kʋʋ ninsaalba, bãmb sẽn gũud bũmb ning sẽn na n wa dũni zugã yĩngã. Bala, yĩngr pãens na n digimdame.” (Luk 21:26) A gom-kãensã wilgdame tɩ wakat kãng toogã buud ka to ye.

La a Zeezi kenga a tʋm-tʋmdbã sũy n wilg-b tɩ ‘Ninsaal Bi-riblã sã n wa zao sawat n wat ne pãn-kãseng la ne ziiri,’ pa nebã fãa n na n wiis ye. (Matye 24:30) A ra zoe n wilgame tɩ “nin-tũusdsã yĩnga,” Wẽnnaam na n ninga a nugu. (Matye 24:22) La bõe la wẽn-sakdbã tog n maane, b sã n wa yã yel-kãsems nins a Zeezi sẽn togsã? A kenga sẽn tũud-b yẽ wã, n yeel yaa: “La bõn-kãens sã n sɩng n watẽ, bɩ y roog la y nak n gese, bala, yãmb fãagrã kolgame.”—Luk 21:28.

La kiris-neb nins sẽn na n vɩɩmd wakat kãngã na n maana wãn n bãng tɩ dũniyã saab taa n saame? A Zeezi rɩka makr ne kankanga, n yeel woto: “Kankang sã n wa n tãood wil-poala, n sɩng n tobdẽ, yãmb miime tɩ sig-noy kolgame. Woto me, yãmb me sã n wa n yãnd bõn-kãensã fãa, bɩ y bãng tɩ Ninsaal Bi-riblã kolgame la b bee dignoorẽ. Sɩd sɩda, mam yeta yãmb tɩ zamaan-kãngã kõn sa tɩ bõn-kãensã fãa ka maan ye.”—Matye 24:32-34.

Dẽnd sẽn tũud-b a Zeezi wã sã n wa ne tɩ bãndã pidsdame, b tog n bãngame tɩ saabã kolgame. Bũmb la a Zeezi togs-yã, n na n keoog kiris-neb nins sẽn na n vɩɩmd wakat kãngã.

A Zeezi yeela woto: “Sã n yaa ne a daarã la a wakatã, ned baa a yembr ka mi ye: malegsã sẽn be arzãnã [“saasẽ,” MN] ka mi, Bi-riblã ka mi. Yaa d ba wã bal n mi. Bũmb ning sẽn zĩnd a Nowe wakatã n na n zĩnd Ninsaal Bi-riblã waoong wakat me. Bala, rasem nins sẽn deng sãoong sa-kãsengã, nebã dag n dɩtame la b yũuda, n kẽed kãadem la b yiisd b kamb kãadem, hal tɩ ta daar ning a Nowe sẽn kẽ koom koglgã pʋgẽ wã. Bãmb dag n ka tẽed yell hal tɩ sãoong sa-kãsengã wa n kãag bãmb fãa. Na n yɩɩ a woto me Ninsaal Bi-riblã waoong wakate.” (Matye 24:36-39) A Zeezi tẽega a kɛlgdbã t’a Nowe wakatẽ wã, saagã nii dũniyã gill zugu. Dũniyã saab wakat me, sãoongã na n taa zĩig fãa.

Tʋm-tʋmdbã sẽn kelg a Zeezi Oliiv tɩɩs tãngã zugã, b tog n bãngame tɩ yaa tɩlɛ tɩ b yɩ gũusdba. A Zeezi yeel-b lame yaa: “Gũus-y y mens tɩ rɩ-n-tɩk wall rã-tɩgre, la vɩɩmã yɛl yɩɩr da wa n zɩsg yãmb sũyã ye, la tɩ ra-kãng ra wa n ling yãmb wa zĩm-gãmbre, bala, ra-kãng na n waa n linga neb nins fãa sẽn be tẽn-gãongã fãa zugã. Dẽ yĩnga, bɩ y neend la y pʋʋs wakat fãa tɩ yãmb tõe n paam pãng n põs bũmb nins fãa sẽn tog n wa wã, la y tõog n yals Ninsaal Bi-riblã taoore.”—Luk 21:34-36.

A Zeezi le wilgame t’a sẽn deng n togs yɛl ninsã na n zĩnda dũniyã gill zugu. Pa yɛl sẽn na n maan yʋʋm a wãn pʋgẽ bal ye. Leb n pa na n yɩ Zeruzalɛm bala, bɩ yɛl sẽn na n paam zʋɩf-rãmbã bal ye. A yeelame tɩ “na n waa n linga neb nins fãa sẽn be tẽn-gãongã fãa zugã.”

A Zeezi yeelame tɩ na n yɩɩ tɩlɛ t’a karen-biisã gũ, la b gũusi, la b segl b mense. Sẽn na yɩl n wilg tɩ rẽ tara yõod wʋsgo, a le rɩka makre. A yeelame: “Bãng-y tɩ yir soab sã n dag n bãngẽ wagdr sẽn na n wa yʋngã wakat ninga, a dag n na n gũume la a ka na n bas-a t’a poog a roogã ye. Woto yĩnga, yãmb me segl n sɛ, bala, Ninsaal Bi-riblã na n waa wakat ning yãmb sẽn ka tagsd tɩ b na waame wã.”—Matye 24:43, 44.

Rẽ poore, a Zeezi togsa a karen-biisã bũmb sẽn na yɩl tɩ b yam gãande. A yeelame tɩ yẽ sẽn togs bũmb ningã sã n wa sɩng pidsgu, rẽ tɩ “tʋmtʋmd” sẽn gũusda, la sẽn tar yẽesem n be. A togsa kibar tʋm-tʋmdbã sẽn da tõe n mams b yamẽ nana-nana. A yeelame: “Tʋmtʋmd bʋg n tar yam n yaa sɩd soaba, t’a soaalã lʋɩɩs-a a nebã taoore, t’a tõe n kõ-b rɩɩb wakat fãa sẽn segde? Tʋmtʋmd-kãng soaalã sã n lebg n wa n mik t’a maanda a woto, tʋmtʋmdã sũur na n yɩɩ noogo. Sɩd-sɩda, mam yeta yãmb t’a soaalã na n kɩtame t’a soog bũmb nins fãa yẽnda sẽn tarã.” La tʋm-tʋmdã sã n lebg nin-wẽnga, n sɩng n pãbd a tʋmd-n-taasã, a soaalã na n wa “sɩbg-a-la sõama.”—Matye 24:45-51; ges-y Luk 12:45, 46 me.

A Zeezi gom-kãensã pa rat n yeel tɩ sẽn tũud-b yẽ wã sʋka, neb n na n lebg sull sẽn tar yam-wẽng ye. Bõe la a ra rat t’a karen-biisã maane? A ra ratame tɩ b yɩ gũusdba, la b tʋm ne yẽesem. A rɩka makr a to tɩ b wʋm rẽ võor sõma.

A Zeezi ket n zĩi ne a tʋm-tʋmdbã, n leokd b sẽn sok n na n bãng bãnd sẽn na n wilg t’a waame, la tɩ dũniyã saab kolgame. A wẽe yel-bũnd n keoog-ba. Yaa a sã n wa sɩng a naamã rɩɩb la bũmb nins a sẽn yeel yel-bũndã pʋgẽ wã na n pidsi, tɩ sẽn na n vɩɩmd-b wakat kãngã maan kaseto.

A Zeezi sɩnga a goamã n yeel woto: “Arzãn [“saasẽ,” MN] soolem na n yɩɩ wa pa-kuil-n-dãmb piig sẽn dɩgs b fɩtl dãmb n yi n na n tɩ seg pʋg-paal sɩdã. Bãmb sʋkã, neb a nu yaa yalemba, tɩ nu wã ya yam dãmba.”—Matye 25:1, 2.

A Zeezi pa rat n yeel tɩ yẽ karen-biis nins sẽn na n kẽng saasẽ n tɩ rɩ naamã sʋka, pʋɩ-sʋk na n yɩɩ yalemb tɩ pʋɩ-sʋk yɩ yam dãmb ye. A ra rat n wilgame tɩ b ned fãa tõe n yãka yam n segl a meng sõma n kell n gũ, wall a bas tɩ bũmb tiis-a. A Zeezi ra kɩsa sɩd tɩ ned fãa tõe n kell n saka Wẽnnaam n wa paam a barka.

Yel-bũndã pʋgẽ, pʋg-sadb piigã fãa kẽngame n na n tɩ seg pʋg-paalã sɩda, la b naag n maan kãadem kibsã. Pʋg-paalã sɩd sã n wa watẽ, pʋg-sadb piigã ra tog n yõgna b fɩtl dãmbã tɩ sorã yɩ vẽenem, t’a tõog n peeg a pagã n ta roog ning a sẽn segl a yĩnga. Woto waoogda pʋg-paalã sɩda. La yɩɩ woto la pʋg-sadbã maan bɩ?

A Zeezi wilga woto: “Yalembã sẽn na n dɩgs b fɩtl dãmbã, b ka zɩ kaam ye. La yamã rãmb rɩgsa b fɩtl dãmbã, la b zɩ kaam ne tʋgdo. La pʋg-paal sɩdã sẽn kaoos waoongã, gõeem yõka b fãa tɩ b gũsi.” (Matye 25:3-5) Pʋg-sɩdã pa wa tao-tao wa b sẽn da tẽedã, hal tɩ pʋg-sadbã fãa gũsi. Tõe tɩ tʋm-tʋmdbã tẽega a Zeezi sẽn da wẽ yel-bũndi, n yeel tɩ na-biig n da kẽng tẽng sẽn zãr n ‘na n tɩ reeg naam la a wa’ wã.—Luk 19:11-15.

Pʋg-sadb piigã yel-bũndã pʋgẽ, a Zeezi wilga bũmb ning sẽn maane, pʋg-paalã sɩd sẽn wa n watẽ wã. A yeelame: “Kɛleng n zẽk yʋn-sʋkã n yeele: ‘Pʋg-paalã sɩd watame! Yi-y n seg-y-yã-a.’” (Matye 25:6) La rẽ yĩnga pʋg-sadbã fãa ra segla neer n gũud pʋg-paalã sɩd bɩ?

Ad a Zeezi sẽn yeele: “Dẽ, pa-kuil-n-dãmb kãens fãa yikame n maneg b fɩtl dãmba. Yalembã kosa yam dãmbã tɩ b yãk b kaamã bilf n kõ-b tɩ bãmb fɩtl dãmbã sɩnga kũum. Yam dãmbã leok-b lame n yeele: ‘Ayo! Ka na n sek tõnd ne yãmb me ye. Kẽng-y ka-koaasdbã nengẽ n tɩ ra y mens yĩng tɩ rẽnda n são.’”—Matye 25:7-9.

Pʋg-sadb a nu wã sẽn yaa yalembã pa segl b mens neer n gũ pʋg-paalã sɩd ye. Kaamã wa n saa b fɩtl dãmbã pʋsẽ tɩ yɩ tɩlɛ tɩ b tɩ bao. A Zeezi yeelame: “Bãmb sẽn wa n kẽnd n na n tɩ ra wã, pʋg-paalã sɩd taame. Pʋg-sadb nins sẽn dag n segl n sɛ wã tũu yẽnda n kẽ kãadmã tigr doogẽ, la b paga kʋɩlengã. Pa-kuil-n-dãmb a taabã yaool n wa waame n yeele: ‘M soaala! M soaala! Pak-y tɩ d kẽ!’ La a leoka bãmb yaa: ‘Sɩd-sɩdã, mam ka mi yãmb ye.’” (Matye 25:10-12) B sẽn pa segl b mens neer n gũ wã, sɩd yɩɩ kaeto!

Tʋm-tʋmdbã bãngame tɩ pʋg-paal sɩdã makda a Zeezi. Daar a ye, a ra goma yẽ mengã yell n yeel t’a yaa pʋg-paal sɩda. (Luk 5:34, 35) La pʋg-sadb nins sẽn tar yamã makda ãnd dãmba? Vugri a Zeezi goma neb nins sẽn na n paam n dɩ naam saasẽ soolmã pʋgẽ wã yelle, n yeel woto: “Bɩ y sẽb y sees sẽbdse, la y yõgen y fɩtl-dãmba.” (Luk 12:32, 35) Dẽnd tʋm-tʋmdbã bãngame tɩ pʋg-sadbã makda sẽn na n tũ-b a Zeezi ne b sũy fãa wa bãmbã. La a Zeezi sẽn wẽ yel-bũndã yaa sẽn na yɩl tɩ b bãng bõe?

A Zeezi togsa a sẽn dat tɩ b bãngã vẽenega. A baasa a yel-bũndã n yeel woto: “Bɩ y gũ! Bala, yãmb ka mi daarã, wall wakatã ye.”—Matye 25:13.

Sãmbg kae t’a Zeezi ratame tɩ sẽn tũud-b yẽ ne b sũy fãa wã bãng tɩ yaa tɩlɛ tɩ b segl b mens neer n gũud yẽ. A waoongã pa tõe n vaal ye. Dẽnd wa pʋg-sadb a nu wã sẽn tall yamã, yaa tɩlɛ tɩ bãmb me segl b mens neer n gũ-a, n da wa yĩm tɩ b na n tɩ rɩɩ naam saasẽ ye. Sã n pa rẽ b wat n konga b keoorã.

A Zeezi keta Oliiv tɩɩs tãngã zug ne a tʋm-tʋmdb a naasã. A le wẽe yel-bũnd a to. B sẽn da be Zeriko rasem a wãn sẽn loogã, a wẽe min-dãmbã yel-bũndã, n wilg tɩ na n kaoosa wʋsg tɩ Wẽnnaam yaool n lugl a soolmã. Yel-bũnd ning a sẽn na n togs-b masã wã wõnda min-dãmbã yel-bũndã. Na n vẽnega a tʋm-tʋmdbã n paase, bala b ra sokame n na n bãng bãnd sẽn na n wilg a waoongã la dũniyã saab wakate. Yel-bũndã wilgdame tɩ sẽn tũud-b a Zeezi wã tog n tʋma tʋʋmd ning a sẽn kõ-bã ne yẽesem.

A Zeezi sɩnga a yel-bũndã, n yeel tɩ saasẽ soolem “na n yɩɩ wa rao a yembr sẽn dat n tog sore, n bool a tʋm-tʋmdbã, n dɩk a paoongã n pʋɩ-ba.” (Matye 25:14) A Zeezi ra zoe n wẽe yel-bũndi, n wilg tɩ yẽ mengã yaa wa rao sẽn tog sor n “na n tɩ reeg naam.” Rẽ sõnga tʋm-tʋmdbã tɩ b bãng tɩ yel-bũn-kãngã pʋgẽ me, ket n yaa yẽ la rao ning sẽn dat n tog sorã.—Luk 19:12.

A Zeezi wilgame tɩ nand tɩ raoã looge, a rɩka a paoongã n pʋɩ a tʋm-tʋmdbã. Yʋʋm a tãab la pʋɩ-sʋkã fãa, a Zeezi moona Wẽnnaam soolem koe-noogã, la a wilg a karen-biisã b sẽn tog n moon to-to. Masã a loogrã kolgame, la a kɩsa sɩd tɩ karen-biisã na n yõd n maana wa yẽ sẽn wilg-bã.—Matye 10:7; Luk 10:1, 8, 9; Zã 4:38; 14:12.

Raoã pʋɩɩ a paoongã wãn-wãna? A Zeezi yeelame: “A kõo ned a yembr talã a nu, n kõ a yiib soabã talã a yiibu, la a kõ tãabẽ soabã talã a yembre, n zems ned kam fãa sẽn tõe n tall n tʋme, la a bas n tog sore.” (Matye 25:15) Bõe la tʋm-tʋmdbã na n dɩk talã rãmbã b sẽn kõ-bã n maane? Rẽ yĩnga, b na n tʋma ne b sũy fãa tɩ b zu-soabã paoongã fɩɩg bɩ?

A Zeezi yeela a karen-biisã woto: “A sẽn loog bal yee, la sẽn deeg-a talã a nu wã loog-yã, n tɩ tall-b n leeb n paam yõod talã a nu n paase. Sẽn deeg-a talã a yiibã me maana a woto, n paam yõod talã a yiib n paase. La sẽn deeg-a talã a yembr tãa wã tɩ tuka bok tẽnga, n bus a zu-soabã ligdi.” (Matye 25:16-18) B zu-soabã sã n lebg n wa, bõe n na n maane?

A Zeezi yeelame: “Sẽn wa n kaoose, tʋmtʋmd-kãens zu-soabã waame n zĩnd ne-b n na n geele.” (Matye 25:19) Pipi tʋm-tʋmdã ne yiib-n-soabã tʋmame, tɩ “zems ned fãa sẽn tõe.” B ned kam fãa tʋma ne yẽesem, tɩ b zu-soabã sẽn da kõ-b bũmb ningã fɩɩge. Sẽn deeg-a talã a nu wã paama a nu n paase, tɩ sẽn deeg-a talã a yiibã me paam a yiib n paase. Bãmb wakatẽ wã, talã a ye ra yaa yʋʋm 19 tʋʋmd yaoodo. Zu-soabã pẽga tʋm-tʋmdb a yiibã. A yeela b ned fãa woto: “Yaa sõama, tʋmtʋmd sõng sẽn maand sɩda! Fo maana sɩd ne bũmb bilfu, la mam na n kɩtame tɩ fo ges bũmb wʋsg yelle. Wa n paam pʋɩɩr ne f zu-soabã sũ-noogo.”—Matye 25:21.

La tʋm-tʋmd ning sẽn deeg talã a ye wã pa maan wa a taabã ye. A yeelame: “Zu-soaba, mam dag n miime tɩ yãmb yaa nen-kɛgeng soaba, n kẽedb y sẽn ka bʋdẽ, la y wʋkd y sẽn ka yɛdgẽ ye. Dẽ n kɩt tɩ rabeem yõk maam tɩ mam kẽng n tuk bok tẽng n solg y talã wã. Ad-y y talã! Deeg-y-yã-a.” (Matye 25:24, 25) A pa tɩ bĩng ligdã bãnkẽ t’a zu-soabã tõe n paam yõod ye. Woto wã, a sẽn yãk yam n maan bũmb ningã yaa zu-soabã paoong kõn fɩɩg yĩnga.

Dẽnd zu-soabã sẽn yeel t’a yaa “tʋmtʋmd-wẽng sẽn yaa kʋɩɩmã” zemsame. Zu-soabã kɩtame tɩ b reeg a sẽn tarã n kõ tʋm-tʋmd sẽn sak n tʋm ne yẽesm. Zu-soabã yeela woto: “B na n kõo ned ning sẽn tar-a wã t’a paam hal wʋsgo, la sẽn ka tar-a wã, b na n deega baa bũmb bilf ning a sẽn tarã n bas-a.”—Matye 25:26, 29.

Bũmb wʋsg la a Zeezi togs a karen-biisã tɩ b ra tõe n tags rẽ zugu, n paas yel-bũn-kãngã a sẽn da wẽ wã. B ra neeme t’a Zeezi kõ-b-la tʋʋmd sẽn tar yõod wʋsgo. Yaa b moon koɛɛgã la b maan karen-biisi. Yaa zu-zẽkr menga. Dẽnd a ratame tɩ b tʋm tʋʋmdã ne b sũy fãa. A Zeezi ra pa tagsd tɩ koɛɛgã mooneg pʋgẽ, ned fãa tʋʋmd tog n zema a to ye. Wa yẽ meng sẽn yeel yel-bũndã pʋgẽ wã, tog n zemsa “ned kam fãa sẽn tõe.” Woto pa rat n yeel tɩ ned sã n yaa “kʋɩɩma,” n pa maand a sẽn tõe sẽn na yɩl tɩ Zu-soabã paoong fɩɩge, nooma a Zeezi ye.

Bũmb ning a Zeezi sẽn na n yeel-b masã wã tog n kɩtame tɩ tʋm-tʋmdbã yam gãande. A yeelame: “B na n kõo ned ning sẽn tar-a wã t’a paam hal wʋsgo.”

A Zeezi keta Oliiv tɩɩs tãngã zugu. A wẽe yel-bũn n gom pʋg-sadb piiga, la talã rãmb yelle, n na n sõng a tʋm-tʋmdbã tɩ b bãng bãnd ning sẽn na n wilg yẽ waoongã, la dũniyã saab wakatã. Bõe la a Zeezi na n yeel n baas a sõsgã? A wẽe yel-bũndi, n gom piis ne bʋʋs yelle.

A Zeezi yeela woto: “Ninsaal Bi-riblã sã n wa ne b ziirã, la ne b malegsã fãa, b na n zaoonda b ziir geerã zugu.” (Matye 25:31) Sãmbg kae tɩ yaa a Zeezi mengã yell la a sẽn gomd yel-bũndã pʋgẽ wã. Naoor wʋsgo, a boola a meng tɩ “Ninsaal Bi-riblã.”—Matye 8:20; 9:6; 20:18, 28.

Wakat bʋg la a Zeezi yel-bũndã na n pidsi? Yaa a sã n wa ‘wa ne a ziirã’ la ne a malɛgsã, n zaoond ‘a ziir geerã zugu.’ A zoe n yeelame tɩ b na n wa yãa “Ninsaal Bi-riblã sẽn zao sawat n wat ne pãn-kãsenga la ne ziiri,” la ne a malɛgse. La na n yɩɩ wakat bʋgo? A yeelame tɩ na n yɩɩ “ra-kãens toogã zugẽ” bala. (Matye 24:29-31; Mark 13:26, 27; Luk 21:27) Dẽnd a Zeezi yel-bũndã na n pidsa wakat ning a sẽn na n wa ne a ziirã. Bõe la a na n maan wakat kãnga?

A yeelame: “Ninsaal Bi-riblã sã n wa . . . , soolem toay-toayã fãa nebã na n tigma bãmb taoore. Bãmb na n welga nebã ne taab wa rũm-kɩɩm sẽn welgd piis ne bʋʋsã. Bãmb na n ninga piisã b rɩtgo, la b ning bʋʋsã b goabga.”—Matye 25:31-33.

A Zeezi wilgame tɩ piisã a sẽn na n ning a rɩtgã na n paama lohorem. Ad a sẽn yeele: “Dẽ, Rĩmã na n yeela sẽn be-b bãmb dɩtgã yaa: ‘Yãmb dãmb sẽn tar m ba wã barkã, wa-y-yã! Reeg-y soolmã sẽn dag n segl yãmb yĩng hal dũni naaneg wakatã tɩ yɩ y pʋɩɩre.’” (Matye 25:34) Bõe yĩng tɩ piisã na n paam Rĩmã lohorem?

Ad Rĩmã meng sẽn yeele: “Bala, kom yõka maam, la yãmb kõo maam rɩɩb tɩ m dɩ. Ko-yũud yõka maam, la yãmb kõo maam koom tɩ m yũ. Mam dag n yaa sãana, la yãmb sika maam y yiri. Mam dag n yaa beelle, la yãmb kõo maam fuug tɩ m yeelge. Mam dag n yaa bãada, la yãmb waa n gesa maam. Mam dag n bee bi-bees roogẽ, la yãmb waa n gesa maam.” “Nin-tɩrsã” b sẽn mak ne piisã sokame n na n bãng Rĩmã sẽn yeel tɩ bãmb maan-a-la neer woto wã võore, t’a leok yaa: “Wakat ning fãa yãmb sẽn maan bõn-kãens kom-kãensã sẽn yaa bõoneg n yɩɩda, la b ya mam ba-biisã, yaa maam la yãmb maan yã.” (Matye 25:35, 36, 40, 46) Pa saasẽ la nin-tɩrsã maan bõn-kãensã, bala bãad-rãmb bɩ neb kom sẽn tar pa be be ye. Dẽnd tog n yaa bũmb nins fãa b sẽn maan tẽngã zug n sõngd Kirisã ba-biisã.

La bʋʋsa Rĩmã sẽn na n ning a goabgã yẽ? A Zeezi yeelame: “Dẽ poore, [Rĩmã] na n yeela neb nins sẽn be-b bãmb goabgã yaa: ‘Yãmb dãmb kãab-wẽng sẽn be y zutã, zãag-y ne maam! Kẽng-y bugum sẽn paad wakat sẽn kõn sa wã pʋgẽ, bugum ning sẽn segl sʋtãanã ne a malegsã yĩngã. Bala, kom yõka maam, la yãmb ka kõ maam dɩɩb tɩ m dɩ ye. Ko-yũud yõka maam, la yãmb ka kõ maam koom tɩ m yũ ye. Mam dag n yaa sãana, la yãmb ka sik maam y yir ye. Mam dag n yaa beelle, la yãmb ka kõ maam fuug tɩ m yeelg ye. Mam dag n yaa bãada, la mam zĩnda bi-bees roogẽ tɩ yãmb ka wa n ges maam ye.’ ” (Matye 25:41-43) Nin-kãensã sɩd zemsa ne sɩbgre, bala b ra segd n sõnga Kirisã ba-biisã sẽn be tẽngã zugã la b pa sõng-b ye.

Tʋm-tʋmdbã bãngame tɩ bʋʋdã sẽn watã na n yɩɩ sãoong sẽn kõn sa, pa rẽ bɩ vɩɩm sẽn kõn sa. A Zeezi yeelame: “La [Rĩmã] na n leoka bãmb yaa: ‘Sɩd-sɩda, mam yeta yãmb tɩ wakat ning fãa yãmb sẽn tõdg n ka maan kom-kãens sẽn yaa bõoneg n yɩɩd fãa wã ned a yembr bõn-kãense, yaa maam la yãmb ka maane.’ La nin-kãens na n kẽe sɩbgr sẽn kõn sa pʋgẽ, la nin-tɩrsã na n kẽe vɩɩm sẽn kõn sa wã pʋgẽ.”—Matye 25:45, 46.

A Zeezi sẽn leok a karen-biisã to-to wã na n kɩtame tɩ sẽn tũud-b yẽ wã tõog n tags bũmb wʋsg zugu, tɩ sõng ned fãa t’a tags a yel-manesmã ne a tʋʋm-tʋmdɩ wã zugu.