Kiris-nebã vɩɩm la b tʋʋma tigissã na-kẽndr sebr not-rãmbã
TƲƲLG RASEM A 7-13
D SẼN BÃNG BIIBLÃ KARENG PƲGẼ | 1 SÃMWƐLL 12–13
“Wuk-m-meng wata ne paoogre”
Tɩtaam wata ne paoogre
17 D sã n na n ges pipi, tõe n wõnda a Sayull bee bʋʋm. Lebr menga, Wẽnnaam nin-buiidã ra bee “toog pʋgẽ,” “b bɛɛba rig-b lame,” tɩ b ra rigda, saagr sẽn kayã yĩnga. (1 Sãmwɛll 13:6, 7) Sɩd-sɩda, pa wẽng tɩ d rɩk sardo, yɛlã sã n kõt sor ne rẽ ye. La tẽeg-y t’a Zeova tõe n karma sũyã n yã bũmb nins sẽn tusd tõnd tɩ d tʋmdẽ wã. (1 Sãmwɛll 16:7) Woto yĩnga, tõe t’a yãa yɛl kẽer a Sayull wɛɛngẽ b sẽn pa togs vẽeneg Biiblã pʋgẽ ye. Wala makre, a Zeova ra tõe n yãame t’a Sayull yãgbã ra yaa wuk-m-meng yĩnga. Tõe t’a Sayull sũurã yika wʋsgo, yẽ sẽn yaa Israyɛll fãa rĩmã sẽn da segd n gũ ned a sẽn da get t’a yaa no-rɛɛs sẽn yaa nin-kẽem kʋdr bal sẽn viigd a goamã! Sẽn ya a soab fãa, a Saull tagsame t’a Sãmwɛll sẽn kaoosã kõt-a-la sor t’a maan yɛlã a toore, n pa tũ noy nins b sẽn da kõ-a tɩ yaa vẽenegã ye. A baasgã yɩɩ bõe? A Sãmwɛll pa pẽg a Sayull sẽn dɩk a toorẽ sardã ye. Sẽn yaa lebende a lenga a Sayull hal sõma n yeele: “Yãmb rĩunga ka na n yaas ye. . . . Tɩ bõe, yãmb ka sak Zusoaba [a Zeova, NW] ye.” (1 Sãmwɛll 13:13, 14) Ka yɛsa, tɩtaamã waa ne paoogre.
Yãmb sakrã nooma a Zeova wʋsgo
8 Biiblã kibar ning sẽn gomd rĩm a Sayull yellã wilgdame tɩ sakr sɩd tara yõod wʋsg Wẽnnaam nifẽ. A Sayull naamã sɩngrẽ, a ra yaa sik-m-meng soaba, n da pʋd n ‘tagsdẽ t’a yaa bilfu.’ La kaoosg zugẽ, bũmb nins a sẽn wa n yik n maandẽ wã wilgame t’a lebga wuk-m-meng soab la a tar tags-kɛga. (1 Sãmwɛll 10:21, 22; 15:17) A Sayull da wa n segd n tɩ zaba ne Filisti nebã, t’a Sãmwɛll yeel-a t’a yals t’a wa kõ a Zeova maand la a wilg-a a sẽn tog n maanega. La a Sãmwɛll wa n kaoosda waoong tɩ nin-buiidã sɩng sãeegre. A Sayull sẽn yã rẽ wã, a yik n “yõoga maandã” a toore. La woto sãama a Zeova sũuri. A Sãmwɛll wa n waame tɩ rĩmã bao n na n kõ a meng bʋʋm, n yeel tɩ yaa a sẽn kaoosã yĩng la yẽ ‘modg a meng’ n yõog maandã n na n bao a Zeova sõngre. A Sayull yamẽ, maoongã kũun yõod n yɩɩd a Sãmwɛll noorã sakre. A ra yeel-a lame t’a yals tɩ yẽ wa kõ maoongã. Rẽ n so t’a Sãmwɛll yeel-a woto: “Yãmb maana yalemdo. Yãmb ka sak Zusoaba noor ye.” A Sayull sẽn kɩɩs a Zeova wã, a sũur sãama wʋsg ne-a t’a wilg t’a pa ye nong-a ye.—1 Sãmwɛll 10:8; 13:5-14.
D bʋgs Wẽnnaam Gomdã zug neere:
Yãmb na n tũu sor-wilgr ning a Zeova sẽn kõt-yã bɩ?
15 Tõe tɩ nin-kãensã tagsame tɩ sã n yaa ninsaal n yaa b rĩma, b sẽn na n ne-a wã yĩng na n kɩtame tɩ b tõe n maneg n teeg-a sõma n yɩɩd b sẽn teeg a Zeova to-to wã. La sã n yaa rẽ, sɩd yaa bõn-zaalg la b sẽn da pʋgdã! Bala rẽ tõe n kɩtame t’a Sʋɩtãan tõog tɩ b tʋlg bõn-zaals a taaba. Wala makre, b rĩm dãmbã tõe n wa kɩtame tɩ b pʋʋs bõn-naandse. Sẽn pʋʋsd-b bõn-naandsã tudgame n tagsdẽ tɩ b sẽn ne b wẽnnaam dãmbã sẽn maan ne raad wall kugã kɩtame tɩ b tõe n teegd-b n yɩɩg b sẽn tõe n teeg Wẽnnaam a Zeova sẽn naan bũmba fãa tɩ b yaool n pa ne-a wã. La wa tʋm-tʋmd a Poll sẽn yeelã, bõn-naandsã nebã sẽn pʋʋsdã yaa “zaalem.” (1 Kor. 8:4) B pa ne, b pa wʋmde, b pa tõe n gom wall b maan bũmb ye. Yaa sɩd tɩ y tõe n yã-b-la ne nif la y sɩɩs-b menga. La baasgo, y sã n pʋʋsd-ba, yaa bõn-zaals la y pʋgda, la na n wã-y lame.—Yɩɩl 115:4-8.
TƲƲLG RASEM 14-20
D SẼN BÃNG BIIBLÃ KARENG PƲGẼ | 1 SÃMWƐLL 14–15
“Sakr yɩɩda maando”
Yãmb sakrã nooma a Zeova wʋsgo
4 Yaa sɩd tɩ sẽn yaa a Zeova n naan bũmba fãa wã, tõnd tarmã fãa yaa yẽ n so. Rẽ wã, tõnd ye tara bũmb d sẽn tõe n kõ-a bɩ? N-ye, bũmb sẽn yaa sõma hal wʋsg la tõnd tar n tõe n kõ-a. Bõn-kãng yaa bõe? Saglg ning sẽn pʋgdã wilgd-d-la sẽn yaa bũmb ninga. Be, b yet-d-la woto: “M biiga, maan yam n kõ maam sũ-noogo, tɩ m paam n leok sẽn paoogd-a maamã.” (Yelbũna 27:11) Ad tõnd sã n sakd Wẽnnaam, noom-a-la wʋsg wa kũun d sẽn kõt-a. Baa ne tõnd sẽn yit zĩis toɛy-toɛya, tɩ d bãngrã la d yɛlã pa yen wã, d sã n sakd Wẽnnaam, d wilgdame t’a Sʋɩtãan sẽn dõd ãdem-biisã n yeel tɩ b baa a ye pa tõe n kell n sak Wẽnnaam toog pʋgẽ wã pa sɩd ye. Ad woto sɩd yaa zu-no-kãseng n kõ-do!
7 Rẽ wɛɛngẽ, d tẽeg tɩ pĩnd wẽndẽ, a Zeova ra yeela Israɛll nebã tɩ sakr yɩɩda rũmsã maand b sẽn da kõt-a wã menga. (Yelbũna 21:3, 27; Oze 6:6; Matɩe 12:7) La sẽn yaa yẽ n da kos tɩ b kõt maand kãensã, bõe yĩng t’a yeel-b woto? A võorã yaa tɩ yaa bũmb ning sẽn kɩt t’a soab kõt maoongã n tar yõod n yɩɩda. A soab segd n kõo maoongã a sẽn tʋll n ta Wẽnnaam yamã yĩnga. A pa segd n maan rẽ tɩ yaa b minung bal ye. Ned sẽn tũud Wẽnnaam sã n sɩd rat n ta a yam, a na n modg n tũuda a noyã fãa. Bũmb ning Wẽnnaam sẽn nong n tɩ yɩɩd tõnd sẽn tõe n kõ-a, pa maandã ye, yaa d sakrã.
8 Biiblã kibar ning sẽn gomd rĩm a Sayull yellã wilgdame tɩ sakr sɩd tara yõod wʋsg Wẽnnaam nifẽ. A Sayull naamã sɩngrẽ, a ra yaa sik-m-meng soaba, n da pʋd n ‘tagsdẽ t’a yaa bilfu.’ La kaoosg zugẽ, bũmb nins a sẽn wa n yik n maandẽ wã wilgame t’a lebga wuk-m-meng soab la a tar tags-kɛga. (1 Sãmwɛll 10:21, 22; 15:17) A Sayull da wa n segd n tɩ zaba ne Filisti nebã, t’a Sãmwɛll yeel-a t’a yals t’a wa kõ a Zeova maand la a wilg-a a sẽn tog n maanega. La a Sãmwɛll wa n kaoosda waoong tɩ nin-buiidã sɩng sãeegre. A Sayull sẽn yã rẽ wã, a yik n “yõoga maandã” a toore. La woto sãama a Zeova sũuri. A Sãmwɛll wa n waame tɩ rĩmã bao n na n kõ a meng bʋʋm, n yeel tɩ yaa a sẽn kaoosã yĩng la yẽ ‘modg a meng’ n yõog maandã n na n bao a Zeova sõngre. A Sayull yamẽ, maoongã kũun yõod n yɩɩd a Sãmwɛll noorã sakre. A ra yeel-a lame t’a yals tɩ yẽ wa kõ maoongã. Rẽ n so t’a Sãmwɛll yeel-a woto: “Yãmb maana yalemdo. Yãmb ka sak Zusoaba noor ye.” A Sayull sẽn kɩɩs a Zeova wã, a sũur sãama wʋsg ne-a t’a wilg t’a pa ye nong-a ye.—1 Sãmwɛll 10:8; 13:5-14
D bʋgs Wẽnnaam Gomdã zug neere:
D rɩk a Zeova togs-n-taare, n yɩ nimbãan-zoɛtba
10 La yell ning pʋgẽ, pa zems tɩ d wilg nimbãan-zoeer ye. Wala makre, a Zeova ra yeela rĩm a Sayull t’a kʋ Amalɛk nebã fãa sẽn da yaa Israyɛll bɛɛbã, la b rũmsã fãa. La a Sayull basa Amalɛk rĩm a Agaag ne rũms kẽer n pa kʋ ye. Tõe t’a ra tagsdame t’a sẽn maanã yaa nimbãan-zoeere, la yaa a Zeova noor la a kɩɩs-yã. Kɩtame t’a Zeova yeel t’a pa na n le yɩ rĩm ye. (1 Sãm. 15:3, 9, 15) A Zeova yaa bʋ-kaood sẽn kaood bʋʋd tɩrga. A mii sẽn be nebã sũyẽ wã. Sã n pa zems t’a kʋm ned nimbãanega, a miime. (Wiis. 2:17; Eze. 5:11) Ka la bilfu, a na n sãama neb nins fãa sẽn pa rat n sak-a wã. (2 Tes. 1:6-10) Wakat kãnga, a pa na n zoe nin-wẽng baa a ye nimbãaneg ye. A na n sãam-b lame, la a fãag nin-tɩrsã, tɩ wilg t’a kʋmda nin-tɩrsã nimbãanega.
TƲƲLG RASEM 21-27
D SẼN BÃNG BIIBLÃ KARENG PƲGẼ | 1 SÃMWƐLL 16–17
‘Yaa a Zeova n so zabrã’
Tẽebo: Zʋg-sõng sẽn sõngd ned t’a tall raoodo
Yɩɩn-sõamyã 27 wã pʋgẽ, a Davɩɩd wilga sẽn sõng yẽ t’a tẽebã tall pãngã. (Vɛrse a 1) A bʋgsa bũmb kẽer a sẽn yã a vɩɩmã pʋgẽ, la a Zeova sẽn maan a bɛɛbã bũmb ningã. (Vɛrse a 2, 3) A sũur da nooma wʋsg ne sɛk-roogã sẽn yaa a Zeova waoogr zĩigã. (Vɛrse a 4) A ra kẽnda be n naagd a tẽed-n-taasã n waoogd Wẽnnaam. (Vɛrse a 6) A ra pelgda a pʋg n pʋʋsd a Zeova, n baood-a ne a sũur fãa. (Vɛrse a 7, 8) A ra ratame me tɩ Wẽnnaam zãms-a a noyã. (Vɛrse 11) A Davɩɩd nifẽ, tẽeb ra tara yõod wʋsgo, hal t’a sok tɩ yẽ yell yɩtẽ-la wãna, a sã n da pa tarẽ tẽebo?—Vɛrse 13, Traduction du monde nouveau.
Yãmb me sã n tall yam la minim-sõma nins yell a Davɩɩd sẽn gom Yɩɩn-sõamyã 27 pʋgẽ wã, y tõe n paama a tẽebã buudu. Sẽn yaa bãngr hakɩɩk n wat ne tẽebã, y sã n wɩngd ne Biiblã zãmsgo, la bũmb nins siglgã sẽn yiisd n wɛgsd Biiblã goamã me zãmsgo, na n yɩɩ nana tɩ y tall zʋg-sõng kãngã vʋʋsem sõngã sẽn sõngd ned t’a bɩɩsã. (Yɩɩn. 1:2, 3) Zãmsg fãa sasa bɩ y bʋgsdẽ. Ned pa tõe t’a sũur wa noom ne a Zeova sẽn yeele, a sã n pa bʋgs ye. Y sũurã sã n maneg n noom ne a Zeova, y na n dat n bɩɩsda y tẽebã. Rẽ na n kɩtame tɩ y tigimd ne y tẽed-n-taasã n waoogd-a, la y togsd neb a taabã bark nins y sẽn gũudã. (Ebre. 10:23-25) Bũmb sẽn wilgd me tɩ ned tara tẽebo, yaa a sẽn na n ‘pʋʋsd n pa basdẽ.’ (Luk 18:1-8) Rẽ wã, “pʋʋsd-y wakat fãa,” n kɩs sɩd t’a Zeova “geta yãmb yelle.” (1 Tes. 5:17; 1 Pɩy. 5:7) Tẽebã sõngdame tɩ d maand sẽn segde, tɩ sẽn segdã maaneg le paasd d tẽebã.—Zak 2:22.
D segl d menga, tɩ b sã n wa namsd-d tũudmã yĩng bɩ d tõog toogo
11 B sã n wa namsd tõnd d tũudmã yĩnga, yɩl n yals kãn-kãe, yaa tɩlɛ tɩ d tall raoodo. Yãmb sã n neẽ tɩ y pa tar raood woto, bõe la y tõe n maane? Tẽeg-y tɩ raood hakɩɩkã pa be ne y woglem wall y bedrem, y yãoog pãng wall y tõog ye. D tẽeg a Davɩɩd sẽn wa n na n zab ne a Golyatã. Nin-kãngã taoore, a Davɩɩd ra paooda wʋsgo, a ra pa baa fʋɩ, n leb n da pa tar zab-teed woto ye. A Davɩɩd ra pa zãad sʋʋg meng ye. Baa ne rẽ, a ra tara raood wʋsgo. A talla raoodo, n wudg tao-tao n na n tɩ zab ne nin-wobgã sẽn da wukd a mengã.
12 Bõe yĩng t’a Davɩɩd tall raood woto? A ra kɩsa sɩd ne a sũur fãa t’a Zeova bee ne-a. (Karm-y 1 Sãmwɛll 17:37, 45-47.) A Davɩɩd pa ges a Golyat bedrmã la a woglmã, n mak a meng ne-a ye. A sẽn da pʋd n tagsd n yɩɩdã yaa a Golyat sẽn pa baa fʋɩ a Zeova taoorã. Kiba-kãngã wilgda tõnd bõe? Tõnd me sã n kɩs sɩd t’a Zeova sẽn yaa pãng sẽn ka to soabã bee ne-do, la tɩ d bɛɛbã pa baa fʋɩ a taoore, d na n talla raoodo. (2 Kib. 20:15; Yɩɩn. 16:8) La bõe la d tõe n maan masã menga, n paam raood n paas tɩ namsgã nan pa wa?
Kãsem-dãmbã yaa ‘tʋmd-n-taas tõnd sũ-noog yĩnga’
14 Dũniyã gill zugu, a Zeova nin-buiidã ket n tũud-a-lame, baa a Sʋɩtãan ne a poorẽ dãmbã sẽn wat ne zu-loeesã. Tõnd neb kẽer maoa ne zu-loe-kɛgemse. La wa a Zeova sẽn kõ a Davɩɩd pãng t’a tõog a Goliatã, nin-kãens me teeg-a-la zãng-zãng n tõog n mao ne b zu-loeesã. Wakat ninga, wõnda zu-loeesã yɩɩda d pãnga, tɩ d rat n koms raoodo. Sã n wa lebg woto, zu-loees kẽer d sẽn da tõe n mao ne tõe n tõog-d lame. La sasa kãng bala, kãsem-soab ning tõe n yãa d sẽn koms raoodã n kõ-d sagls tɩ sõng-d tɩ d ket n tũud Wẽnnaam ne sũ-noogo. Tõnd sʋkã neb wʋsg paama sõngr a woto buudu. Saam-bi-poak sẽn tar yʋʋm 60 la zak n yaa so-pakd yeela woto: “Wakat n zĩnd tɩ mam yĩnsã ra yaa bʋg-bʋge, tɩ koe-moonegã ra kõt-m yaamse. La kãsem-soab n yã m keelmã sẽn boogã, n wa sõs ne maam Biiblã zug n kõ-m saglse, tɩ m tũ tɩ naf-ma.” A paasa woto: “Kãsem-soabã sẽn yã m zu-loɛɛgã n wa keng m daoodã, a wilgame tɩ m yell pak-a lame.” D sũur yaa noogo, d sẽn tar kãsem-dãmb sẽn get-d yell wakat fãa n sõngd-d wa a Abisayi sẽn sõng a Davɩɩdã.
D bʋgs Wẽnnaam Gomdã zug neere:
it-2 905-906
A Sayull
Yaa bõn-kãngã poore, ne b sẽn yãk a Davɩɩd t’a na n wa lebg Israyɛll rĩmã poore, la a Zeova vʋʋsem sõngã yi n bas a Sayulli. Rẽ tɛka, “sɩ-wẽng Sẽn-Ka-Saab sẽn tʋm n wa n kẽ-a, n kẽesd-a rabeem-kãsenga.” A Zeova vʋʋsem sõngã sẽn yi n bas a Sayullã, a Zeova basame tɩ sɩ-wẽng kẽ-a, tɩ kɩt t’a Sayull ra pa le tar sũur pʋgẽ bãane, la kɩt me t’a tagsa wã la bũmb nins a sẽn da mamsd a yamẽ wã lebg wẽnga. A Sayull sẽn pa sak a Zeova wã wilgame t’a sũurã tagsg ra yaa wẽnga. Kɩtame t’a Zeova vʋʋsem sõngã ra pa tõe n kogl-a bɩ n sõng-a ye. La sẽn mik t’a Zeova basame tɩ “sɩ-wẽng” ledg a vʋʋsem sõngã n kẽ a Sayull n da kẽesd-a rabeemã, b ra tõe n yeelame tɩ yaa ‘sɩ-wẽng a Zeova sẽn tʋme.’ Rẽ n so t’a Sayull tʋm-tʋmdbã ra yetẽ tɩ yaa “Wẽnnaam sɩ-wẽnga.” A Sayull tʋm-tʋmd a ye n kõ-a saglga, t’a kos t’a Davɩɩd wat na-yirã n wa wẽed kʋnde, t’a paam yolsgo, “sɩ-wẽngã” sã n wa namsd-a.—1 Sãm. 16:14-23; 17:15
TƲƲLG RASEM 28–TƲƲL-NIF RASEM A 3
D SẼN BÃNG BIIBLÃ KARENG PƲGẼ | 1 SÃMWƐLL 18–19
“D kell n yɩ sik-m-meng soaba, baa d sã n wa tõog n maan bũmbu”
Teeg-y Wẽnnaam vʋʋsem sõngã, y sã n wa maood ne vɩɩmã yɛl sẽn toeemdã
4 Pa kaoos la pe-kɩɩm-kãngã yʋʋr yi Israyɛll tẽngã fãa ye. B bool-a lame t’a wa yɩ rĩmã sõgen la a wẽed pɛndg t’a kelgdẽ. A kʋʋ sodaag a Golyat sẽn da yaa nin-wobg sẽn yaa nin-toaag tɩ Israyɛll sodaas sẽn tar zabr minim meng ra zoet-a wã. B sẽn yãk a Davɩɩd t’a yɩ sodaasã taoor soabã, a zaba ne Filisti nebã n tõoge. Nin-buiidã ra nong-a lame. B maana yɩɩl n pẽg-a. Sẽn deng rẽ, rĩm a Sayull sagend a ye n bilg bi-bɩɩg a Davɩɩd wa ned sẽn “mi kʋnd wẽeb sõama,” la wa “gãndaoog n tar pãng zabr pʋgẽ. Yẽ mii goama la a yaa rasãnga.”—1 Sãmwɛll 16:18; 17:23, 24, 45-51; 18:5-7.
Bãng-y sẽn tũud-a a Zeova ne sẽn pa tũud-a wã n bake
6 Neb kẽer wukda b mense, b neerem, b pãnga, b naam wall b yʋʋr sẽn yi yĩnga, pa rẽ bɩ minim b sẽn tar mizikã wɛɛngẽ yĩnga. Tõe me tɩ yaa bũmb sãnda la b tõogd n maandẽ, hal tɩ nebã pẽgd-ba. A Davɩɩd ra tara woto fãa, la a kell n yɩɩ sik-m-meng soaba. A sẽn kʋ a Golyatã poore, rĩm a Sayull rɩka a bi-pugl n kõ-a t’a maan a paga. La a Davɩɩd yeelame yaa: “Mam yaa ãnda, la mam buudã ne m ba wã zak rãmb yaa ãnda rãmb Israyɛll buudã sʋka, tɩ mam na n lebg rĩmã rɛɛmba?” (1 Sãm. 18:18) Bõe n sõng a Davɩɩd t’a kell n yɩ sik-m-meng soaba? A ra miime tɩ yaa a Zeova sẽn sik a meng n ‘sulg n ges’ yẽ wã yĩng la a sẽn tar zʋg-sõma, la tõog ne minim n tõe n maan bũmb kẽerã. (Yɩɩn. 113:5-8) A ra miime tɩ bõn-sõma nins fãa a sẽn tarã yaa a Zeova n kõ-a.—Ges-y 1 Korẽnt-rãmb 4:7.
7 Rũndã-rũndã me, a Zeova nin-buiidã maoodame n na n kell n yɩ sik-m-mens rãmb wa a Davɩɩde. D sẽn mi tɩ baa ne a Zeova sẽn yaa pãng sẽn-ka-to soabã, a yaa sik-m-meng soabã noom-d-la wʋsgo. (Yɩɩn. 18:35, MN) D maoodame n tũud saglg Biiblã sẽn kõ. Ad b sẽn yeele: “Bɩ y yelg nimbãan-zoeer meng-menga, la sõmblem, la sik-m-menga, la sũ-bʋgsem, la sũ-mar wa futu.” (Kol. 3:12) D miime me tɩ “nonglem ka fʋʋmd a menga, a ka maand wilg-m-menga.” (1 Kor. 13:4) Nebã sã n neẽ tɩ d yaa sik-m-mens rãmba, tõe n kɩtame tɩ b rat n bao n bãng a Zeova. Wa saam-bi-poak yel-manesem sẽn tõe n kɩt t’a sɩd sẽn pa tũud a Zeova wa sak n tũ-a wã, tõnd me sik-m-mengã tõe n sõngame tɩ nebã rat n tũ a Zeova.—1 Pɩy. 3:1, 2
D bʋgs Wẽnnaam Gomdã zug neere:
it-2 670-671
No-rɛɛsa
Baa ne sẽn yaa a Zeova n da yãkd no-rɛɛsdbã n kõt-b a vʋʋsem sõngã, bũmb pa wilgd tɩ b sã n da na n gom fãa yaa vʋʋsem sõngã n vẽnegd-b tɩ b gomd ye. Wẽnnaam vʋʋsmã ‘ra wata b zug’ sasa ninga, n vẽnegd-b koees nins b sẽn segd n taasã. (Eze. 11:4, 5; Mii. 3:8) Wẽnnaam vʋʋsmã sã n da wa b zugu, yaa wa pirsd-b lame, n kɩtdẽ tɩ b gomda. (1 Sãm. 10:10; Zer. 20:9; Amoos 3:8) B pa maan bũmb toor-toor sẽn da yaa toor zall bal ye. Yaa vẽeneg tɩ b sẽn da gomd to-to wã la b yel-manesmã me ra yaa toor zalle. Rẽ tõe n sõnga tõnd tɩ d wʋm b sẽn yeel tɩ ‘maand no-rɛɛsdb manesmã’ võore. (1 Sãm. 10:6-11; 19:20-24; Zer. 29:24-32; ges-y Tʋʋ. 2:4, 12-17; 6:15; 7:55.) B sẽn da tʋmd b tʋʋmdã ne b sũur fãa la ne yẽesmã kɩtame tɩ neb a taabã ra get tɩ b tara manesem sẽn yaa toore. Yaa wa no-rɛɛs ning sẽn kẽng tãb-biisã nanambs taoorã, b sẽn wa n yãk a Zehu t’a na n lebg rĩma. Nanambsã sẽn bãng tɩ raoã yaa no-rɛɛsã, b sak n kelga a koɛɛgã neere. (2 Rĩm. 9:1-13; ges-y Tʋʋ. 26:24, 25.) A Sayull sẽn wa n digd a Davɩɩdã, Wẽnnaam kɩtame t’a ‘maand no-rɛɛs manesem.’ A yeesa a futu, la a lʋɩ n vãbend n pa be “daarã ne yʋngã tõre.” Yaa vẽeneg tɩ sasa kãnga, a Davɩɩd zoeeme n põse (1 Sãm. 19:18–20:1) La woto pa rat n yeel tɩ no-rɛɛsdbã ra wae n yeesda b futã n kẽnd zaala, bala Biiblã kibay wilgdame tɩ pa woto ye. Biiblã kibay a yiib pʋgẽ me la b gom no-rɛɛsdb sẽn yees b fut n kẽn zaal yelle. La b ned kam fãa maana woto bõn-daab yĩnga. Ra yaa b bãngr-goamã zĩis kẽer mamsgo. (Eza. 20:2-4; Mii. 1:8-11) Biiblã pa wilg a Sayull sẽn yees a futã n da yaa zaalã võor ye. Tõe tɩ yaa sẽn da na n wilg-a t’a yaa ninsaal bala, b sẽn deeg a naamã fut n base, t’a pa tõe n maan baa fʋɩ a Zeova naamã la a pãnga taoore, wall bʋʋm a taab yĩnga.
TƲƲL-NIF RASEM A 4-10
D SẼN BÃNG BIIBLÃ KARENG PƲGẼ | 1 SÃMWƐLL 20–22
“Y sẽn tõe n yɩ zo-sõng to-to”
D bɩɩs d zoodã ne d tẽed-n-taasã, nand tɩ dũniyã saab ta
18 Rũndã-rũndã, d tẽed-n-taasã maooda ne zu-loees toor-toore. Wala makre, sabab-wẽnsã namsda d tẽed-n-taas wʋsgo. Kẽer me nengẽ, yaa zab n yik b tẽngẽ wã. Yɛl a woto sasa, d tõe n deega b kẽer d zakẽ. Nina me tõe n kõo ligd bɩ bũmb ning n sõng-ba. La d fãa tõe n pʋʋsa a Zeova, n kos-a t’a sõng-ba. D sã n bãng tɩ d tẽed-n-taag n koms raoodo, wakat ninga, d pa mi d sẽn na n yeel-a bɩ n tall manesem ning ne-a ye. D fãa yaool n tara d sẽn tõe n maan n sõng-a sõma! D tõe n baoo sẽk n tɩ zĩnd n sõs ne-a. A sã n wa togsd tõnd a yelle, d tõe n kelga neere, tɩ wilg tɩ d kʋmd-a lame. D tõeeme me n gom Biiblã vɛrse ning sẽn belsd tõnd n tɩ yɩɩdã yell ne-a. (Eza. 50:4) Pa bũmb ning d sẽn na n maanã la sard ye. D zoa wã we n bãng t’a yel-pakr fãa wakate, d na n sõng-a lame. Traduction du monde nouveau wã pʋgẽ, Yel-bũn 17:17 wã yetame: “Ned zoa hakɩɩk nong-a-la wakat fãa, a yaa a ba-biig sẽn dog toog wakat yĩnga.”
Kẽn-y-yã a Zeova soayã zutu
7 A Zeova ratame tɩ d yɩ zo-rãmb b sẽn tõe n teege. (Yel. 17:17) Rĩm a Sayull biig a Zonatã ra yõga zood ne a Davɩɩde. B yeelame t’a Zonatã sẽn wa n wʋm t’a Davɩɩd kʋ a Golyatã, a “sũur yɩɩ noog ne a Davɩɩd t’a nong-a wa a menga.” (1 Sãm. 18:1, 3) A Sayull sẽn wa n dat n kʋ a Davɩɩdã menga, a Zonatã sakame n tɩ togs-a t’a zoe. Rẽ poore, a Zonatã ne a Davɩɩd sega taab n maan kaoola. A goma ne a Sayull a Davɩɩd yell meng t’a ra na n kʋ-a. La ne rẽ fãa, zo-rãmb a yiibã ye sega taab n paas b zoodã pãnga. (1 Sãm. 20:24-41) A Zonatã sẽn tɩ ges a Davɩɩd yaoolmã, a kenga a Davɩɩd sũur n yeel-a “tɩ Wẽnnaam na n sõng-a lame.”—1 Sãm. 23:16-18.
Yɩ-y zo-rãmb hakɩka, baa nonglem sẽn kae dũni kãngã pʋgẽ wã
11 Yɩ-y zoa hakɩka. Rĩm a Salomo yeelame tɩ ‘zood kẽer n be n yaa noog n yɩɩd rogem.’ (Yel. 18:24b) Tõe t’a Salomo sẽn wa n yet woto wã, t’a ra tagsda a ba a Davɩɩd ne a Zonatã zoodã yelle. (1 Sãm. 18:1) Rĩm a Sayull da ratame t’a biig a Zonatã wa ledg-a n yɩ Israyɛll rĩma. La a Zonatã ra sakame tɩ yaa a Davɩɩd n segd n wa yɩ rĩmã, bala yaa yẽ la a Zeova yãk-yã. A Zonatã ra pa maand sũ-kiir ne a Davɩɩd wa a Sayull ye. Nebã sẽn da pẽgd a Davɩɩdã pa yik a sũuri, la a leb n pa tẽ a Sayull sẽn dõd a Davɩɩd bũmb ningã ye. (1 Sãm. 20:24-34) Rẽ yĩnga d yaa wa a Zonatã bɩ? D zoa sã n paam zu-noog tʋʋmd tigingã pʋgẽ, d sũur noomame bɩ? A sã n wa paam zu-loɛɛga, d belsd-a lame la d sõngd-a bɩ? Ned sã n wa wɩt yãmb zoa, y yɩta tao-tao n tẽ a goamã bɩ, bɩ y sõngda y zoa wã wa a Zonatã?
D bʋgs Wẽnnaam Gomdã zug neere:
Pipi Sãmwɛll sebrã tags-kãsemse
21:12, 13. A Zeova ratame tɩ d tʋm ne d yam-tagsgã neer n mao ne vɩɩmã zu-loeese. A kõo tõnd a Gomdã vʋʋsem sõng sẽn vẽneg tɩ b gʋlsã, sẽn kɩt tɩ d tõe n yɩ gũusdba, n paam bãngr la d tõe n tags neere. (Yelbũna 1:4) D leb n tara kiris-neb kãsem dãmbã sõngre.
TƲƲL-NIF RASEM 18-24
D SẼN BÃNG BIIBLÃ KARENG PƲGẼ | 1 SÃMWƐLL 23–24
“Tall-y sũ-mar n gũ a Zeova”
Teeg-y Wẽnnaam vʋʋsem sõngã, y sã n wa maood ne vɩɩmã yɛl sẽn toeemdã
8 A Davɩɩd zãgsame t’a kõn maan a Sayull wẽng ye. A sẽn da tar tẽeb la sũ-marã, a basa yɛlã a Zeova nugẽ. Rĩmã sẽn yi tãngã bokẽ wã poore, a Davɩɩd bool-a lame n yeele: “Bɩ Zusoaba bʋ tõnd bʋʋdo. Yaa Zusoabã n na n dol yãmb n kõ-ma, mam yẽ kõn sɩɩs yãmb ye.” (1 Sãmwɛll 24:13) Baa ne a Davɩɩd sẽn da mi t’a Sayull da ka bʋʋmã, a pa rok a sũur ye. A leb n pa gom a Sayull wẽng bɩ n tʋʋs-a ye. Yɛl a taab pʋsẽ, a Davɩɩd yõka a meng n pa bao n dok a sũur ye. La a basame t’a Zeova wa rems yɛlã.—1 Sãmwɛll 25:32-34; 26:10, 11.
Bɩ d bas tɩ “sũ-mar maan a tʋʋmd n baase”
15 Wẽnnaam vẽnega a Zak t’a yeel woto: “Yaa tɩlae tɩ sũ-mar maan a tʋʋmd n baase.” Tʋʋm-bʋg la sũ-mar sẽn segd n maan n baasã? A segd n kɩtame tɩ ‘d bɩ n zems zãnga, tɩ bũmb da paoog tõnd ye.’ (Zak 1:4, Wẽnnaam Sebre, 1983) Naoor wʋsgo, d zu-loeesã mi n kɩtame tɩ d pãn-komsem kẽer puki, tɩ d bãng tɩ zĩis sãnda la d segd n demse. D sã n tõog toog zu-loe-kãens pʋgẽ, na n sõng-d lame tɩ d maneg n dɩk Kirisã togs-n-taare. Wala makre, tõe tɩ d maneg n lebg maag-m-meng soaba, n nand bũmb nins d sẽn tarã, la d bɩɩs nimbãan-zoeere.
16 Sẽn mik tɩ d sã n tõog toog zu-loees taoore, sõngdame tɩ d bɩɩs zʋg-sõma wã, d sã n wa tar zu-loeese, d pa na n sak n maan bũmb sẽn pa zems ne a Zeova raabã sẽn na yɩl n paam yolsg ye. Wala makre, y sã n wae n tagsda yoob yell bɩ y mao tɩ rẽ ra kɩt tɩ y yo ye. Kos-y-yã a Zeova t’a sõng-y tɩ y yiis tags-kãens y yamẽ wã. Rẽ na n sõng-y lame tɩ y bɩɩs yõk-m-menga. Y zakã ned sã n namsd-y y tẽebã yĩng bɩ y ra koms raood ye. Kell-y n modg-y ne a Zeova raabã maanego. Rẽ na n sõng-y lame tɩ y maneg n kɩs a Zeova sɩda. Ra yĩm-y tɩ d sã n dat n ta Wẽnnaam yam, yaa tɩlɛ tɩ d maan sũ-mar ye.—Rom. 5:3-5; Zak 1:12.
D bʋgs Wẽnnaam Gomdã zug neere:
Ra sak-y tɩ baa fʋɩ kɩt tɩ y kong keoorã ye
11 D sã n modg n nong d taabã ne d sũur fãa la d maand-b neere, na n sõngame tɩ d ra maan sũ-kiir ye. Ad Biiblã sẽn yeele: “Nonglem tara sũ-mare, nonglem sõngda neb a taaba, a ka maand sũ-kiir ye.” (1 Kor. 13:4) Sẽn na yɩl n da wa yɩ sũ-ki-neda, yaa tɩlɛ tɩ bũmb fãa pʋgẽ bɩ d mao n bãng a Zeova raabo. A ratame tɩ d getẽ tɩ tõnd ne d tẽed-n-taasã fãa, rat n yeel tɩ tigingã nebã fãa yaa yĩng a yembr wila. Woto, d na n tõogd n wilgdame tɩ d nonga d tẽed-n-taasã. Sɩd me, Biiblã yeelame yaa: “A yembr sã n paam waoogre, b fãa naagda yẽnda n kɩdemdẽ.” (1 Kor. 12:16-18, 26) D to sã n paam bõn-songo, wall yaa bũmb la a tõog n maane, d pa na n maan sũ-kiir ye. D na n naag n maana sũ-noogo. D tẽeg rĩm a Sayull biig a Zonatã yelle. Wẽnnaam sẽn yãk a Davɩɩd t’a na n wa ledg a Sayullã, a Zonatã pa maan sũ-kiir ye. A pʋd n kenga a Davɩɩd raoodo, n wilg-a tɩ yẽ be a poorẽ. (1 Sãm. 23:16-18) Rẽ yĩnga, tõnd me pa tõe n maan wa a Zonatã, n nong d taabã la d maand-b neer sɩda?
TƲƲL-NIF RASEM 25–SIG-NOY PIPI DAARE
D SẼN BÃNG BIIBLÃ KARENG PƲGẼ | 1 SÃMWƐLL 25–26
“Yãmb maanda yɛlã yãg-yãg n pa reng n tags bɩ?”
A tʋma ne yam
10 Manesem bʋg la a Davɩɩd sodaasã sẽn mi zabr sõma wã ra tar ne pe-kɩɩmbã? B ra tõe n maand-b-la pãng n yãkd piis kẽere. La b pa maan woto ye. B pʋd n da kogenda pe-kɩɩmbã ne b piisã fãa. (Karm-y 1 Sãmwɛll 25:15, 16.) Pe-kɩɩmbã ne b piisã ra mi n paamda yɛl weoogẽ wã, bala we-rũms sẽn tõe n yõg piisã ra bee be. Sẽn paase, Israyɛll todsã sẽn da pa zãr ne be wã yĩng kɩtame tɩ wagda la fãadb ra nong n namsd pe-kɩɩmbã.
11 Yɩl n tõog n dɩlg neb kʋʋngã rasempʋɩɩgẽ wã pa nana ye. Rẽ n so t’a Davɩɩd wa tʋm neb piig tɩ b kẽng a Naball nengẽ n bõos sõngre. A sẽn tʋm-b wakat ningã zemsame, bala yaa wakat kãng la nebã wõrsd b piisã kõbdo. Sasa kãngã, b kõta taab kũun la b naagd taab n maand sũ-noogo. A Davɩɩd maaga a yĩng me n bao gom-nood a nebã sẽn tog n tɩ yeel a Naball. A pʋd n yeel-b lame tɩ b tɩ yeel-a t’a “biig a Davɩɩd” n tʋm-ba. Tõe tɩ yaa sẽn na n waoog a Naball a sẽn kẽem yẽ wã yĩnga. A Naball leokame tɩ bõe?—1 Sãm. 25:5-8.
12 A sũurã yikame. Tʋm-tʋmd ning sẽn da gomd ne a Abigayillã yeelame t’a Naball “waag-b-la no-beedo.” A zãgsa fasɩ t’a pa na n kõ-b a rɩɩbã, a koomã la a nemdã ye. A yaala a Davɩɩde, n yeel t’a yaa yamb sẽn bas a zu-soab n zoetẽ. Tõe t’a kisga a Davɩɩd wa a Sayull sẽn kisg-a to-to wã. B baa a ye ra pa get a Davɩɩd wa a Zeova sẽn da get-a to-to wã ye. Wẽnnaam da pa get a Davɩɩd wa yamb sẽn yaa tõat ye. A ra nong-a lame, n miẽ t’a na n lebga Israyɛll rĩma.—1 Sãm. 25:10, 11, 14, Sebr Sõngo.
A tʋma ne yam
18 A Abigayill yeelame tɩ yel-kãngã pʋgẽ yẽ n konge, la a kos sugri. A mengã sak n deegame t’a sɩdã yaa yalma, wa a yʋʋrã sẽn dat n yɛɛlgã. Tõeeme t’a ra ratame t’a Davɩɩd bãng t’a sã n sɩbg ned a woto, a na n sãama a yʋʋr zaalem. A wilgame t’a kɩsa sɩd t’a Davɩɩd yaa a Zeova tʋm-tʋmda, la t’a zabda “Zu-soabã zaba.” A sẽn yeel tɩ “Zu-soabã sã n . . . kɩt tɩ y lebg Israyɛll naabã,” wilgdame me t’a ra miime t’a Zeova pʋlma a Davɩɩd naam. Sẽn paase, a yeela a Davɩɩd t’a ra maan bũmb sẽn na n kɩt t’a paam zɩɩm samde, bɩ sẽn na n kɩt t’a sũur-kasetã wa ningd-a taal ye. (Karm-y 1 Sãmwɛll 25:24-31.) Gom-nood tek woto!
D bʋgs Wẽnnaam Gomdã zug neere:
A tʋma ne yam
16 A Abigayill sẽn maan bũmb ningã yaa a sɩdã zu-sobend kɩɩsg bɩ? Ayo. D tẽeg t’a Naball tʋʋsa a Zeova tʋm-tʋmd a sẽn zae, tɩ rẽ ra tõe n yɩ sabab t’a Naball zakã nebã sẽn da pa tar taalã ki. La a Abigayill sã n da pa maanẽ bũmbu, rẽ yĩnga a ra na n naaga a sɩdã n paam taal bɩ? Yel-kãngã pʋgẽ, a ra segd n saka a Wẽnnaamã n yɩɩd a sɩdã.