Kiris-nebã vɩɩm la b tʋʋma tigissã na-kẽndr sebr not-rãmbã
SẼOOG RASEM 18-24
D SẼN BÃNG BIIBLÃ KARENG PƲGẼ | 2 SÃMWƐLLE 22
“D teeg a Zeova n paam sõngre”
cl 19 s. 11
Rẽ yĩnga, yãmb tõe n sɩd ‘kolga Wẽnnaam sɩda’?
11 Bũmb a ye yaa d sẽn na n mi tɩ Wẽnnaam yaa “pãn-tõ-kãseng soabã.” (Ezayi 40:26) La bũmb a to me yaa d sẽn na n bãng a sẽn fãag Israyɛll nebã to-to mog-miuugẽ wã, la a sẽn sõng-b to-to we-rasempʋɩɩgẽ wã na maan yʋʋm 40 pʋgẽ wã. Mams-y y yamẽ mog-miuugã koom sẽn welg zĩis a yiibã! Mams-y n ges-y nin-buiidã sẽn kẽnd tẽn-koɛɛngã zugu, tɩ koomã sẽn welgã yas wa lal-bɛd goabg la rɩtgo. Tõe tɩ nin-buiidã fãa sõor taa neb milyõ a 3. (Yikri 14:21; 15:8 ) Y tõe n yãa kaset sẽn wilgd t’a Zeova geta a nin-buiidã yell neer we-rasempʋɩɩgẽ wã. Koom n pusg pĩig zug n yi. Rɩɩb sẽn yaa pɛɛlg wa baning n puk tẽn-gãongã zugu. (Yikri 16:31; Sõdbo 20:11 ) A Zeova pa wilg bal t’a tara pãng ye. A talla a pãngã me n sõng a nin-buiidã. Rẽ yĩnga, d sẽn mi tɩ d pʋʋsgã tata Wẽnnaam sẽn yaa pãn-kãseng soaba, la sẽn yaa “tõnd zĩ-soalgdga, d pãnga,” la tɩ “yel-pakr pʋga, bãmb sõngda tõnd wakat fãa” wã, pa kengd raood sɩda?—Yɩɩn-sõamyã 46:2.
SẼOOG RASEM 25-31
D SẼN BÃNG BIIBLÃ KARENG PƲGẼ | 2 SÃMWƐLLE 23–24
“Yãmb sẽn kõt bũmb ninsã sɩd yaa bũmb y sẽn sak n mong y mens bɩ?”
it-1 153
A Arona
Wõnda a Arona kõo zĩigã, niigã la raadã zaalem, maoongã yĩnga. La a Davɩɩd pẽdgame n na n da bõn-kãense. 2 Sãmwɛll 24:24 kibarã wilgdame t’a Davɩɩd raa zɛɛgã la niigã wakɩ-koeems pis-nu (dolaar 110). La 1 Kibay 21:25 wã kibarã wilgdame t’a Davɩɩd raa zĩigã sãnem kilo piiga (sẽn zems dolaar 77000). Sẽn gʋls-a 2 Sãmwɛll sebrã gomda tẽn-kugrã meebã zĩig la maoongã teedã raabã ligd yell bala. Dẽnd raabã ligdã a sẽn togsã yaa bõn-kãensã fãa ligdã. La sẽn gʋls-a 1 Kibay sebrã gomda zĩigã raabo, la wẽnd-doogã b sẽn wa n me zĩigẽ wã yelle. (1 Kib. 22:1-6; 2 Kib. 3:1 ) Sẽn mik tɩ wẽnd-doogã tõr meebã zĩig ra yaa yaleng wʋsgã, wõnda sãnem kilo piigã yaa zĩ-kãngã raabã ligdi. Pa zĩ-kɩdgã a Davɩɩd sẽn da ra n me tẽn-kugrã ye.
SA-SIK PIPI DAARE-RASEM A 7
D SẼN BÃNG BIIBLÃ KARENG PƲGẼ | 1 RĨM-DÃMBÃ 1-2
“Yãmb dɩkda yam y kongrã pʋgẽ bɩ?”
it-2 870 s. a 4
A Salomo
A Adoniza ne a poorẽ dãmbã sẽn da baood n na n deeg naamã wʋma yɩɩlã b sẽn da yɩɩnd Gihon sẽn pa tolg n zãr wʋsg ne zĩig ning b sẽn beẽ wã, la nin-buiidã sẽn kelemdẽ n yetẽ yaa: “Wẽnd na kaoos rĩm a Salomo.” Kɩtame tɩ rabeem yõk-ba, tɩ b zoe. A Salomo pa bao n na n dok a sũuri, tɩ wa sãam a yʋʋr a naamẽ sɩngrẽ ye. A sẽn maan woto wã yɩɩ laafɩ ning sẽn na n wa zĩnd a naamã sasa wã reng-lɛmbga. Sã n yaa a Adoniza n da lebg rĩma, yaa vẽeneg t’a ra na n kʋʋ a Salomo. A Adoniza zoeeme n kẽng sɛk-roogẽ wã, n na n tɩ soonde. Dẽ, a Salomo tʋma neb tɩ b tɩ taas a Adoniza koɛɛga, la b tall-a n wa a taoore. A Salomo yeela a Adoniza t’a sã n pa maan sẽn yaa wẽnga, a na n kell n vɩɩmdame. Rẽ poore, a Salomo bas-a lame t’a kuil a zakẽ wã.—1 Rĩm. 1:41-53.
SA-SIK RASEM A 8-14
D SẼN BÃNG BIIBLÃ KARENG PƲGẼ | 1 RĨM-DÃMBÃ 3-4
“Yam yõodo”
D bʋgs Wẽnnaam Gomdã zug neere:
w98 1/2 11 s. 15
A Zeova yaa Wẽnnaam sẽn maand kaoolã
15 A Zeova sẽn wa n sigl a Abraham yagensã tɩ b yaa nin-buiid n tũud a Tõogã, a ning-b-la barka, wa a sẽn da pʋlem a Abrahammã. Yʋʋmd 1473 S.D.Z.R., a Zozuwe sẽn ledg a Moyiizã talla Israyɛll nebã n kẽ Kanaã soolmẽ wã. B sẽn pʋɩ soolmã n kõ buud toɛy-toɛyã pʋgd-pʋgdgã yɩɩ bũmb sẽn pids a Zeova sẽn da pʋlem t’a na n kõo a Abraham yagensã soolmã. Israyɛll nebã sẽn wa n sakd a Zeova wã, a pidsa a pʋlengã, n sõng-b tɩ b tõog b bɛɛbã. Yɩɩ woto, sẽn yɩɩd fãa rĩm a Davɩɩd naamã sasa. A Davɩɩd biig a Salomo wakatẽ wã, kaool ning a Zeova sẽn da maan ne a Abrahammã neng a tãab-n-soab n paam pidsgu. “Zʋʋda ne Israyɛll nebã sõor dag n yaa wʋsg wa bĩisrã sẽn be ko-kãsengã noorã. Bãmb dag n dɩtame la b yũuda, la b maand sũ-noogo.”—1 Rĩm. 1:41-53.
SA-SIK RASEM 15-21
D SẼN BÃNG BIIBLÃ KARENG PƲGẼ | 1 RĨM-DÃMBÃ 5–6
“B mee wẽnd-doogã ne b pãng fãa, la ne b sũur fãa”
w11 1/2 15
Yãmb ra miime bɩ?
Libã sɛɛdr tɩɩsã ra yaa tɩɩs yʋʋr sẽn yi, b sẽn kaoosdã yĩnga, b neermã la b raadã yũ-noogã yĩnga. Sẽn paase, raadã ra tara pãng wʋsgo, hal tɩ mogd la bõn-yɩgdɩ a taab pa tõe-b ye. Dẽnd a Salomo mee wẽnd-doogã ne meeb teed nins sẽn yaa sõma n tɩ yɩɩda. Baa ne sɛɛdr tɩɩsã sẽn da pid Libã tãensã, rũndã-rũndã, yaa bãmb b wãn bal n ket zĩig-zĩiga.
it-1 411
Sɛɛdre
B sẽn da tʋmd wʋsg woto ne sɛɛdr tɩɩsã raadã wilgdame tɩ yɩɩ tɩlɛ tɩ b paam tʋm-tʋmdb tusã sẽn na n kɛɛd tɩɩsã, n wʋkd-b n tũud Mideterane mogrã n kẽnd Tɩɩr bɩ Sɩdõ, la b sẽb-b n tũnug mogrã tɩ ta Zope. Rẽ poore, b wʋkd-b lame n tũ sorã n tall n kẽng Zerizalɛm. B tõog n maana woto, bala kaool n da be a Salomo ne a Hiram sʋka. (1 Rĩm. 5:20-32; 2 Kib. 2:2-9) Raadã ra ket n wata Zerizalɛm, hal tɩ b yeel tɩ rĩm a Salomo naamã sasa, a kɩtame tɩ ‘sɛɛdr tɩɩsã raad lebg wʋsg wa wom-seese.’—1Rĩm. 10:27; ges-y Eza. 9:8, 9.
it-2 1047 s. a 7
Wẽnd-doogã
A Salomo sẽn wa n sigl tʋʋmdã, a yãka rap bãmb 30000 Israyɛll soolmẽ wã. Kiuug fãa, a ra tʋmda bãmb 10000 Libã soolmẽ wã, tɩ b tɩ tʋm kiuugu, la b lebg n wa vʋʋs kiis a yiib b zagsẽ. (1 Rĩm. 5:27, 28) A Salomo yãka ‘sãambã’ sʋk neb bãmb 70 000 tɩ b yaa kug-zɩtba, la neb bãmb 80 000 tɩ b yaa kug-pɛɛsdba. (1 Rĩm. 5:29; 9:20, 21; 2 Kib. 2:1) A Salomo yãka rap bãmb 550 tɩ b get a tʋʋmã yelle. La wõnda a yãka tʋʋm taoor dãmb bãmb 3 300 tɩ b sõngd nin-kãense. (1 Rĩm. 5:30; 9:22, 23) Wõnda nin-kãensã sʋka, bãmb 250 n da yaa Israyɛll nebã, tɩ bãmb 3 600 yaa “sãamb” Israyɛll soolmẽ wã.—2 Kib. 2:16, 17.
D bʋgs Wẽnnaam Gomdã zug neere:
g 5/12 17, zĩ-gũbrã
Biiblã bãngr-goamã pidsda kɛpɩ: Pipi babgo
A SẼN TOGSD YƐLÃ SẼN ZĨND SASA NINGÃ ZEMSA KƐPƖ
1 Rĩm-dãmb 6:1 wã pʋgẽ, makr n be be n wilgd tɩ Biiblã sẽn togsd yɛlã sẽn zĩnd sasa ningã zemsa kɛpɩ. Vɛrse wã pʋgẽ, b wilgda sasa ning Rĩm a Salomo sẽn sɩng wẽnd-doogã meeb tʋʋm Zerizalɛmmã. B yetame: “Rĩm a Salmo sẽn wa n na n sɩng Sẽn-Ka-Saab roogã meebã, rẽ tɩ yaa Israyɛll nebã sẽn yi Ezɩpt yembdã pʋg tɩ yʋʋm kobs-naas la pis-nii. La wakat-kãng yaa a Salmo sẽn deeg naamã tɩ yʋʋm naaslẽ. Dag n yaa yʋʋmdã kiuug a yiib soabã b sẽn boond tɩ Zɩɩv kiuugã pʋga.”
Biiblã wilgdame tɩ rĩm a Salomo naamã yʋʋm a naas-n-soabã yɩɩ yʋʋmd 1034 S.D.Z.R. D sã n sɩng ne yʋʋm-kãng n sõd yʋʋm 479 n leb poorẽ, d tata yʋʋmd 1513 S.D.Z.R. Yaa yʋʋm-kãng la Israyɛll nebã sẽn yi yembd Ezɩptã.
SA-SIK RASEM 22-28
D SẼN BÃNG BIIBLÃ KARENG PƲGẼ | 1 RĨM-DÃMBÃ 7
“Ra-lugds a yiib sẽn sõngd tõnd tɩ d bãng bũmb ninga”
w13 1/12 13 s. a 3
‘Yãmb na n yãkda zũud tãmsã pʋse’
Rĩm a Salomo tʋma ne zũuda wʋsgo, n maan Zerizalɛm wẽnd-doogã bũmb kẽere. Zũudã fãa la bala ra yaa a ba a Davɩɩd n paame, a sẽn wa zab ne Siiri nebã n tõogã. (1 Kib. 18:6-8 ) “Sĩn-bedrã” b sẽn maan tɩ maan-kʋʋdbã ra waasd b mens be wã ra tõe n deega koom litr 66000, tɩ tõe t’a zɩslmã me ra kolga kilo tus 30. (1 Rĩm. 7:23-26, 44-46 ) Rẽ poore, b maana zũud ra-lugds bɛd a yiib sẽn da be wẽnd-doogã noore. Ra-luk fãa zãntlem rat n taa metr a 8, la b tar zũud pugli, tɩ b zãntlmã yɩɩd metr a 2. Ra-lugdsã pʋgẽ wã ra yaa vɩɩdo, tɩ b taglmã ta sãntimetr a 7 la pʋɩ-sʋka, tɩ b sã n vilimd a ye fãa ne wĩir n soge, bɩ tõe n kolg metr a 2. (1 Rĩm. 7:15, 16; 2 Kib. 4:17 ) D sã n geel zũudã b sẽn tall n maan bõn-kãensa wã, sɩd yɩɩ wʋsg meng-menga.
it-1 355
Boaaze, yiib-n-soabã
B maana zũud ra-lugds bɛd a yiibu, a Salomo wẽnd-do-kãsengã noore. B pʋda ra-luk ning sẽn be nug-goabg sẽnes n tɩ yɩɩdã tɩ Boaaze. Tõe tɩ rat n yeelame tɩ “ne pãnga.” B pʋda ra-luk ning sẽn da be nug-rɩtgã tɩ Yakĩn, sẽn dat n yeel tɩ “Bɩ a [Zeova] vigl kãn-kãe.” Dẽnd d sã n yals tɩ d nengã tees yaang sẽnese, n na n naag gom-kãensã taab n karem rɩtg n debd goabga, karengã na n yɩɩ: ‘Bɩ a [Zeova] vigl [wẽnd-doogã] kãn-kãe ne pãnga.’—1 Rĩm. 7:15-21; ges-y CHAPITEAU.
D bʋgs Wẽnnaam Gomdã zug neere:
it-1 257
Koom soobo
Yaa tɩlɛ ne neb nins sẽn tũud a Zeova wã tɩ b yɩ yɩlma, b sã n dat tɩ b sẽn tũud-a to-to yɩ sõng la yɩlemd a nifẽ. B sẽn da sigl yɛlã to-to sɛk-roogẽ wã, la b sẽn wa sigl wẽnd-doogã tʋʋm to-to kaoosg zugẽ wã wilgda rẽ. Maan-kʋʋdb kãsem a Aarõ ne a kom-dibli wã tʋʋmã sɩngr daare, b so-b-la koom nand tɩ b yelg fut nins b sẽn segd n yelg n tʋm b tʋʋmdã. (Yik. 29:4-9; 40:12-15; Maan. 8:6, 7) Sẽn na yɩl n waas b naoã la b nusã, maan-kʋʋdbã ra toogda koomã zũud sĩngã sẽn da be sɛk-roogã zakã pʋgẽ wã. Kaoosg zugẽ, b ra toogda koomã zũud sĩn-bedrã sẽn da be a Salomo wẽnd-doogẽ wã. (Yik. 30:18-21; 40:30-32; 2 Kib. 4:2-6) Paasg daarã, maan-kʋʋdb kãsmã ra sooda naoor a yiibu. (Maan. 16:4, 23, 24) Neb nins sẽn da talld a Azazɛll boɛɛgã, rũmsã b sẽn kʋ maandã kɛlã, la loal-miuugã b sẽn kʋ maoongã n yiis sik-zĩigã kɩrengã ra segd n pegsa b futã la b so koom n yaool n leb wa sik-zĩigẽ wã.—Maan. 16:26-28; Sõd. 19:2-10.
SA-SIK RASEM 29–BÕN-BƖƲƲNG RASEM A 4
D SẼN BÃNG BIIBLÃ KARENG PƲGẼ | 1 RĨM-DÃMBÃ 8
“A Salomo pʋʋsa zãma taoor ne a sũur fãa la ne sik-m-menga”
w99 15/1 17 s. a 7-8
Zẽkd-y y nusã n teesd Wẽnnaam ne kɩs-sɩda
7 D pʋʋsda zãma taoore, tɩ d yaa d yembre, Biiblã saglg sẽn tar yõod d sẽn segd n ning d yamẽ yaa tɩ d segd n talla sik-m-meng soab yam. (2 Kib. 7:13, 14) A Zeova wẽnd-doogã sẽn da be Zerizalɛmmã pakr daare, rĩm a Salomo pʋʋsa zãma wã taoor ne sik-m-menga. A Salomo ra tõogame n me ro-kãseng buud b sẽn da zɩ n me tẽngã zugu. La baa ne rẽ, a pʋʋsa ne sik-m-menga, n yeel yaa: “Dẽ yĩnga, Wẽnnaam sɩd tõe n zĩnda dũniyã zug la? Yĩngr ne a yalmã, a ka tõe n deeg yãmb a Wẽnnaam ye. Dẽ, roog ning mam sẽn me wã na n maana a wãn n tõog n deeg yãmba!”—1 Rĩm. 8:27.
8 D sã n wa pʋʋsd neb a taabã yʋʋr yĩnga, d segd n yɩɩ sik-m-mens rãmba, wa a Salomo. D sẽn pʋʋsd to-to wã pa segd n kɩt tɩ yaa tõnd la nebã get ye. La d koe-zomã tõe n wilgame tɩ d yaa sik-m-mens rãmba. D sã n pʋʋsd ne sik-m-menga, d pa na n maan tɩ loog noore, wall n gom gom-bɛd ye. D sã n pʋʋsd ne sik-m-menga, sõngdame tɩ nebã tagsd Soab ning tõnd sẽn pʋʋsd-a yell n tɩ yɩɩda. Pa tõnd la b na n getẽ ye. (Matiye 6:5) Sẽn paase, d sẽn yet bũmb nins d pʋʋsg pʋgẽ wã wilgda d sã n yaa sik-m-meng soaba. D sã n pʋʋsd ne sik-m-menga, d pa na n gomd tɩ yaa wa tõnd kota Wẽnnaam t’a maan yɛl kẽer wa tõnd sẽn datã ye. D na n pʋd n kosa a Zeova t’a maan yɛlã tɩ zems ne a raabã. Yɩɩn-gʋlsdã kõo mak-sõng manesem ning d sẽn segd n tallã wɛɛngẽ. A pʋʋsame n kos yaa: “Sẽn-Ka-Saabo, d wẽed-y-la kãntɩɩga, wa-y n fãag-y-do! Sẽn-Ka-Saabo, d kotame tɩ y kõ-d tõogre!”—Yɩɩn. 118:25; Luk 18:9-14.