Kiris-nebã vɩɩm la b tʋʋma tigissã na-kẽndr sebr not-rãmbã

SƖPAOLG RASEM A 7-13

D SẼN BÃNG BIIBLÃ KARENG PƲGẼ | 2 RĨM-DÃMBÃ 5–6

“Sẽn be-b ne tõndã sõor yɩɩda sẽn be-b ne bãmba”

w13 15/8 30 s. a 2

A Eliize yãa bugum saar-dãmba: La yãmba?

Bɛɛbã sẽn gũbg a Eliize Dotan wã, a kell n paa sɩɩ. Bõe yĩnga? Bala a ra tẽeda a Zeova ne a sũur fãa. Yaa tɩlɛ tɩ tõnd me tall tẽeb a woto buudu. Woto wã, bɩ d pʋʋs Wẽnnaam n kos-a a vʋʋsem sõngã sẽn na yɩl n paam tẽebo, la vʋʋsem sõngã biis a tãabã.—Luk 11:13; Gal. 5:22, 23.

SƖPAOLG RASEM 14-20

D SẼN BÃNG BIIBLÃ KARENG PƲGẼ | 2 RĨM-DÃMBÃ 7–8

“A Zeova maana bũmb nebã sẽn da pa tẽed tɩ na n maaname ye”

it-1 729

A Eliize

La kaoosg zugẽ, a Bɛn-hadaad yiib-n-soabã wa n gũbga tẽngã ne pãnga, tɩ kɩt tɩ ned ra pa tõe n kẽ bɩ n yi Samari ye. So-kãnga pa fãadb la a tʋm tɩ b tɩ zu teed ye. B sẽn gũbg tẽngã, vɩɩmã ra tolg n lebga toogo, hal tɩ b taas rĩmã tɩ pag n wãb a bi-riblã. Rĩm a Zoram sẽn yaa a Akaab yagengã, wall “nin-kʋʋr bi-riblã,” a wẽename t’a na n kʋ a Eliize. La pʋleng ning a sẽn maan n pa reng n tagsã pa na n pids ye. A Zoram ne a tãb-biis naabã sẽn ta no-rɛɛsã zakẽ wã, a Zoram yeelame t’a pa le tar saagr t’a Zeova na n sõng-b lame ye. A Eliize yeela rĩmã t’a bas a yam tɩ vẽk-m-beoogã rɩɩbã na n yɩɩ zũna. Tãb-biisã naab yaala a Eliize pʋleng ning a sẽn pʋlmã wɛɛngẽ, tɩ kɩt t’a Eliize yeel-a yaa: ‘Fo na n yãa bõn-kãngã ne f nifu, la f kõn dɩ-a ye.’ A Zeova kɩtame tɩ Siiri nebã wʋm bʋrg b tãb-sikẽ wã. Kɩtame tɩ b ra tẽed tɩ tẽns-tẽns sẽn lagem taab sodaas n da wat n na n zab ne bãmba. B zoeeme n bas b tãb-sikã, ne rɩbd buud toor-toorã sẽn da be be wã. Rĩmã sẽn wʋm tɩ Siiri nebã yik n zoeeme wã, a yãka a tãb-biis naabã t’a na n gũ Samari tẽngã rig-noore. La Israyɛll nebã komã sẽn da tarã sẽn wa n kẽng n na n tɩ zu teedã Siiri nebã tãb-sikẽ wã, b tab-a lame n kʋ. Dẽnd a yãa rɩɩbã, la a pa rɩ-a ye.—2 Rĩm. 6:24–7:20.

D bʋgs Wẽnnaam Gomdã zug neere:

it-2 108 s. a 7

Fɩtlã

A Davɩɩd yagens nins sẽn yɩ rĩm-dãmbã. Yaa Wẽnnaam a Zeova n yãk a Davɩɩd t’a yɩ rĩm Israyɛll soolmẽ wã. Sẽn paase, a Zeova wilg-a-la sore, t’a tõog n tall yam n wilg nin-buiidã sore, la a yɩ taoor lʋɩt sõngo, nin-buiidã yĩnga. Yaa rẽ yĩng la b sẽn bool-a tɩ “Israyɛll fɩtlã.” (2 Sãm. 21:17) Kaool ning a Zeova sẽn maan ne a Davɩɩd rĩungã wɛɛngẽ wã, a pʋlmame yaa: “Fo naamã na n yalsa kãenkãe wakat fãa.” (2 Sãm. 7:11-16) Sɩd me, a Davɩɩd yagens nins sẽn yɩ nanamsã, ne a bi-ribl a Salomo maasmã yɩɩ “fɩtlã” Israyɛll nebã yĩnga.—1 Rĩm. 11:36; 15:4; 2 Rĩm. 8:19; 2 Kib. 21:7.

SƖPAOLG RASEM 21-27

D SẼN BÃNG BIIBLÃ KARENG PƲGẼ | 2 RĨM-DÃMBÃ 9–10

“A Zehu tʋma ne raoodo, ne a sũur fãa la ne yẽesem”

w11 15/11 3 s. a 2

A Zehu teela tũudum hakɩɩkã ne a sũur fãa

B bobla a Zehu tʋʋmde, Israyɛll nebã yɛlã sẽn da pa lebd be wã sasa. Yaa a Zezabɛll sẽn da yaa nin-wẽngã, n yaa a Akaab pʋg-kõorã la rĩm a Zoram sẽn da rɩt naamã ma wã raabã n da maand soolmã tõr pʋgẽ. A pirsa nebã tɩ b bas a Zeova tũudmã n pʋʋsd a Baale, a kʋʋ Wẽnnaam no-rɛɛsdbã, a ra ‘waoogda wẽn-naandse,’ la “a bʋgd bagre,” tɩ rẽ ra tudgd nebã. (2 Rĩm. 9:22; 1 Rĩm. 18:4, 13) A Zeova kõo noor tɩ b menes a Akaab roogã rãmb fãa, a Zoram ne a Zezabɛll sẽn naage. Yaa a Zehu n da segd n lʋɩ taoor n maan rẽ.

w11 15/11 4 s. a 2-3

A Zehu teela tũudum hakɩɩkã ne a sũur fãa

A Zehu tõdgame t’a kõn togs koe-taasdb a yiibã b sẽn tʋm a nengẽ wã bũmb ye. Rẽ poore, a sega rĩm a Zoram ne a Akaziya sẽn yaa Zida rĩmã la ned ning a sẽn maan kaool ne wã me. B ned kam fãa ra bee a saar pʋgẽ. A Zoram sokame yaa: “Zehu, yaa noogo?” La a Zehu leokame: “Na n yɩ a wãn n yɩ noog tɩ yãmb ma a Zezabɛll ket n waoogd wẽn-naandse, la a bʋgd bagre?” A Zehu sẽn leok-a to-to wã kɩtame t’a Zoram wẽnemd n na n zoe. La a Zehu ra tʋʋla wʋsgo. A rɩka tãp n yãag n tão a Zoram tɩ kõs a sũurã t’a lʋɩ a saarã pʋgẽ n ki. Baa ne a Akaziya sẽn zoe n na n põsã, a Zehu wa n pʋgl-a lame n kɩt tɩ b kʋ-a.—2 Rĩm. 9:22-24, 27

A Akaab roogã ned ning sẽn da pʋgd tɩ b segd n kʋ wã ra yaa rĩm-paok a Zezabɛlle, sẽn da yaa nin-wẽngã. A Zehu bool-a lame tɩ “pʋg-yoogo.” Sɩd ra zemsame. A Zehu sẽn ta Zizreyɛllã, a yãa a Zezabɛll sẽn da get roogã võorẽ. A Zehu pa bao n na n wẽ no-koeemd ne-a ye. A kɩtame tɩ na-yirã neb rɩk-a a sẽn da beẽ wã n lob tẽnga. Rẽ poore, a Zehu taba pʋg-kãngã sẽn da tudg Israyɛll tõrã ne a wed-moosã. Rẽ poor me, a Zehu kʋʋ nin-wẽng a Akaab roogã neb a taaba.—2 Rĩm. 9:30-34; 10:1-14.

w11 15/11 5 s. a 3-4

A Zehu teela tũudum hakɩɩkã ne a sũur fãa

Yaa sɩd t’a Zehu raaga zɩɩm wʋsgo. La Biiblã pʋgẽ, b wilgdame t’a yɩɩ raood soaba, ned sẽn sõng Israyɛll nebã tɩ b paam b mens ne a Zezabɛll la a zakã rãmb sẽn da namsd nin-buiidã. Israyɛll taoor lʋɩt sã n da rat n tõog n maan woto, ra yaa tɩlɛ t’a yɩ ned sẽn tar raoodo, sẽn tʋmd ne a sũur fãa la sẽn tar yẽesem. B yeela sebr a yembr sẽn bilgd Biiblã goam võor pʋgẽ yaa: “Ra yaa tʋʋm-toogo, la b tʋm-a-la sõma. B sã n da na n tʋm tʋʋmdã ne bʋgsem, yaa vẽeneg tɩ b ra pa na n tõog t’a Baal tũudmã menem Israyɛll soolmẽ wã ye.”

Sãmbg kae tɩ rũndã-rũndã yɛl kẽer pʋgẽ, y tõe n neeme tɩ yaa tɩlɛ ne kiris-nebã tɩ b biis zʋg-sõmã sãnda a Zehu sẽn da tare. Wala makre, d manesem na n yɩ-a a wãn d sã n wa tʋll n maan bũmb a Zeova sẽn gɩdge? D segd n talla raood la yẽesem, n zãag d mens ne rẽ tao-tao. Tõnd wẽn-sakrã wɛɛngẽ, d pa segd n bas tɩ bũmb kẽ tõnd ne a Zeova sʋk ye.

D bʋgs Wẽnnaam Gomdã zug neere:

w11 15/11 5 s. a 6-7

A Zehu teela tũudum hakɩɩkã ne a sũur fãa

Tõe t’a Zehu ra tẽedame tɩ sẽn na yɩl tɩ Israyɛll soolmã kell n welg toor ne Zida soolmã, ra yaa tɩlɛ tɩ soolem a yiibã me welg toor tũudmã wɛɛngẽ. Wa Israyɛll pĩnd rĩm-dãmbã, a kell n kẽnga taoor ne sanem nag-bilã pʋʋsgo, sẽn na yɩl n kell n welg soolem a yiibã neb ne taaba. La rẽ ra na n wilgame t’a pa tẽed a Zeova zãnga, sẽn yaa soab ning sẽn yãk-a t’a lebg rĩmã.

A Zeova pẽga a Zehu, bala a ‘maana sẽn yaa tɩrg a nifẽ.’ La a Zehu “ka sak Sẽn-Ka-Saab sẽn yaa Israyɛll Wẽnnaamã tõodã ne a sũur fãa ye.” (2 Rĩm. 10:30, 31) D sã n tags bũmb nins fãa a Zehu sẽn maan pĩndã yelle, tõe tɩ bũmb ning b sẽn yeelã lingda tõndo, la yaa kaeto. Rẽ kõta tõnd yam. D pa segd n tags tɩ d sã n paam n lebg a Zeova zoa, d pa segd n ket n maand modgr ye. Daar fãa, yaa tɩlɛ tɩ d maand sɩd ne a Zeova, n zãmsd a Gomdã, n bʋgsd a zugu, la d pʋʋsd-a ne d sũur fãa. Woto wã, bɩ d modg n ket n tũud a Zeova Tõogã ne d sũur fãa.—1 Kor. 10:12.

SƖPAOLG RASEM 28–YƲƲM-SAR RASEM A 4

D SẼN BÃNG BIIBLÃ KARENG PƲGẼ | 2 RĨM-DÃMBÃ 11–12

D bʋgs Wẽnnaam Gomdã zug neere:

it-2 1185-1186

A Zowas

Man-kʋʋd-kãsmã a Zehozada sẽn wa n ket n vɩ, n yaa wa a Zowas ba n sagend-a wã, rĩm a Zowas sẽn da yaa bi-bɩɩgã ra paamda tõogre. A sẽn wa n tar yʋʋm 21 a kẽe kãadem. A kẽe kãadem ne pagb a yiibu. Pag a yembr yʋʋr ra yaa a Zewowadan. Ne pʋg-kãens maasem, a Zowas lebga kom-dibli la kom-pugli ba. Woto, mesi wã sẽn da na n yi a Davɩɩd yagensã sʋkã neb sõor le paama pãnga. Bala ra ketẽ la bilf bal t’a Davɩɩd yagensã meneme.—2 Rĩm. 12:2-4; 2 Kib. 24:1-3; 25:1.

YƲƲM-SAR RASEM A 5-11

D SẼN BÃNG BIIBLÃ KARENG PƲGẼ | 2 RĨM-DÃMBÃ 13–15

“D sã n modg ne d sũur fãa, wata ne bark zem-bala”

w13 1/11 11 s. a 5-6

“Neb nins sẽn baood bãmb ne b sũy fãa wã roanda”

Ãnd-dãmb la a Zeova ronda? Tẽn-tʋmd a Poll yeelame t’a ronda “neb nins sẽn baood bãmb ne b sũy fãa wã.” Sebr a yembr b sẽn yiis Biiblã lebgdb yĩng pʋgẽ, b wilgame tɩ Grɛk gom-bil ning b sẽn lebg tɩ “baood ne b sũy fãa” wã pa rat n yeel tɩ “yi yɩng n tɩ bao” ye. Pʋd n dat n yeelame tɩ pẽneg Wẽnnaam bɩ n tũ Wẽnnaam. Sebr a to me wilgdame tɩ Grɛk gom-bilã b sẽn pʋd to-to wã wilgdame tɩ d segd n maana modgr hal wʋsgo. Hakɩɩka, a Zeova ronda neb nins sẽn tar tẽeb sẽn kɩt tɩ b nong-a ne b sũy fãa, la b tũud-a ne yẽesmã.—Matiye 22:37.

Wãn to la a Zeova rond neb nins sẽn maand sɩd ne-a wã? A pʋlmame t’a na n kõo tõnd vɩɩm sẽn kõn sa tẽngã sẽn na n wa lebg arzãna pʋgẽ. Rẽ wilgda a sẽn yaa kõat to-to la a sẽn nong tõnd to-to. (Vẽnegre 21:3, 4) Baa masã menga, neb nins sẽn baood a Zeova ne b sũy fãa wã paamda bark zembala. Ne a vʋʋsem sõngã sõngre, la yam ning b sẽn paamd a Gomdã pʋgẽ wã, b vɩɩmã yaa noogo, tɩ b paamd bark buud toor-toore.—Yɩɩn-sõamyã 144:15; Matiye 5:3.

YƲƲM-SAR RASEM 19-25

D SẼN BÃNG BIIBLÃ KARENG PƲGẼ | 2 RĨM-DÃMBÃ 18–19

“Tõnd bɛɛbã sẽn baood n na n koms tõnd raood to-to”

w10 15/7 13 s a 8

“Da zoe rabeem ye. Mam na n sõnga yãmba”

A Rabsake goma ne sɩlem sẽn na yɩl n kɩt tɩ nebã maand sãmbse. A yeelame yaa: “La ka Wẽnnaam-kãng maoong kʋʋb zĩisã ne tẽn-kugã la foom a Ezekɩyaas sẽn dag n sãame? . . . Yaa Sẽn-Ka-Saab n yeel maam yaa: ‘Zab ne tẽn-kãngã n sãam-a.’” (2 Rĩm. 18:22, 25) Dẽnd a Rabsake yeelame t’a Zeova pa na n zab n sõng a nin-buiidã, tɩ bala a sũur pa noom ne-b ye. La ra pa sɩd ye. A Zeova sũur da nooma ne a Ezekɩyaas la ne zʋɩf nins sẽn lebg n sɩng tũudum hakɩɩkã tũubã.—2 Rĩm. 18:3-7.

yb74 176 s. a 2

Babg a 2—Alemayn

B sẽn da boond b rãmb tɩ SS ra wae n tũnugda ne manesem sẽn pa sõma sẽn na yɩl n paam tɩ ned sak n tik a nug b sebrã zugu. Naoor wʋsgo, nin-kãens sã n tik b nug n sa, SS rãmb ra lebgdẽ n zabda ne nin-kãense, n namsd-b n yɩɩd pĩnda. A Karl Kirscht kõta rẽ kaseto. A yeelame yaa: “Kã de kõnsãntrasiyõ rãmbẽ wã, yaa a Zeoava Kaset rãmbã la b ra namsd n tɩ yɩɩda. B ra tagsdame tɩ b sã n maan woto, b na n tõogame tɩ b tik b nug bãmb sebrã zugu. B kosa tõnd naoor wʋsg tɩ d maan woto. Neb kẽer tika b nug b sebrã zugu, la b wʋsgã fãa nengẽ, yɩɩ tɩlɛ tɩ b gũ hal sẽn yɩɩd yʋʋmde, n yaool n na n paam tɩ b yiis-ba. Sasa kãngã, SS rãmb ra wae n yãand-b-la zãma wã taoore, n boond-b tɩ munafigse, rabɛɛmã, la b ra modgd-b tɩ b kẽn b tẽed-n-taaasã taoore, n yaool n na n bas-b tɩ b yi kã de kõnsãntrasiyõ wã.”

D bʋgs Wẽnnaam Gomdã zug neere:

it-1 170 s. a 3

Tẽn-vaeesgã

Wala makre, Biiblã pʋgẽ b wilgame tɩ Asiiri rĩm a Senakeriib kom-dibli a yiib n kʋ-a. Yaa a Adramelɛk ne a Sarezɛɛre. La a Senakeriib bi-ribl a to n ledg-a naam geerã zugu. Yaa a Esar-Hadon. (2 Rĩm. 19:36, 37) Babilon nebã kibarã wɛɛngẽ, b gʋlsa kug-walg a yembr zug tɩ Tebɛt kiuug rasem pisi wã daare, a Senakeriib bi-ribl n kʋ-a gũdgr sasa. A Berose sẽn yɩ Babilon maan-kʋʋd yʋʋmd 200 S.D.Z.R ne a Naboniid sẽn yɩ Babilon rĩm yʋʋmd 500 S.D.Z.R me yeela woto. B wilgame tɩ yaa a Senakeriib bi-ribl a ye bal n kʋ-a. La sẽn na pa kaoos woto, b yãa seb-pĩndem a Esar-hadon sẽn ledg a Senakeriibã sẽn gʋlse. A wilga seb-pĩndmã pʋgẽ vẽenega, t’a ba-biisã yika zabr ne b ba wã, n kʋ-a, la b zoe. A Philip Biberfeld yeela bũmb rẽ wɛɛngẽ, sebr a yembr yʋʋr sẽn boond tɩ Universal Jewish History (Yʋʋmd 1948, Vol. I, s.n. 27) pʋgẽ. A yeelame yaa: “Babilon nebã kibayã wɛɛngẽ, a Nabonid ne a Berose sẽn togs bũmb ninsã pa sɩd ye. Yaa Biiblã kibarã bal n yaa sɩda. A Esar sẽn gʋls bũmb ning seb-pĩndmã pʋgẽ wã kõta kaset rẽ wɛɛngẽ vẽenega. Sẽn paase, a sẽn togs bũmb ning Babilon ne Asiiri kibayã wɛɛngẽ wã yaa sɩd n yɩɩd bũmb nins b sẽn togs Babilon sɛbã pʋsẽ wã. Rẽ yaa kaset sẽn tar yõod wʋsgo, lebs n vaees baa rũndã-rũndã bũmb kẽer b sẽn maan vaeesg n yã tɩ pa zems ne Biiblã sẽn yetã wɛɛngẽ.”

YƲƲM-SAR RASEM 26–YƲƲM-VẼKR PIPI DAARE

D SẼN BÃNG BIIBLÃ KARENG PƲGẼ | 2 RĨM-DÃMBÃ 20–21

“Pʋʋsg sẽn kɩt t’a Zeova maan bũmb n sõnge”

ip-1 394 s. 23

Rĩm b sẽn keo a tẽebã yĩnga

²³ A Senakeriib sẽn wa n na n zab ne Zida pipi wã, a Ezekɩyaas ra bẽeda bã-kɛgenga. A Ezayi yeel-a lame t’a na n kiime. (Ezayi 38:1) Rĩmã sẽn da tar yʋʋm 39 wã sũur sãama wʋsgo. A ra pa maand yɩɩr yẽ mengã yĩnsã laafɩ wɛɛngẽ bal ye. A ra maanda yɩɩr nin-buiidã beoog-daar yĩng me. Zerizalɛm ne Zida ra bee yell pʋgẽ, bala Asiiri nebã ra gũbg-b lame. A Ezekɩyaas sã n da maan kaalem, ãnda soab n na n lʋɩ taoor tɩ b tɩ zabe? Wakat-kãng t’a Ezekɩyaas ra pa tar bi-ribl sẽn na n ledg-a n dɩ naam ye. A Ezekɩyaas pʋʋsa a Zeova ne a sũur fãa, n kos-a t’a zoe a nimbãanega.—Ezayi 38:2, 3.

g01 22/7 13 s. a 4

Wãn to la pʋʋsgã tõe n sõng maam?

Pĩnd wẽndẽ wã, neb kẽer sẽn da tar tẽeb paamame tɩ Wẽnnaam leok b pʋʋsgã vẽeneg-vẽenega, wall ne yel-solemd maasem. Wala makre, rĩm a Ezekɩyaas sẽn wa n bãng t’a bẽeda bãag sẽn na n tũ ne a yõore, a kosa Wẽnnaam t’a fãag-a. Wẽnnaam leok-a lame yaa: “Mam wʋma f pʋʋsgã, mam yãnda fo nintãmã. Ade, mam na n maaga f bãagã.” (2 Rĩm-dãmbã 20:1-6) Pagb la rap a taab me sẽn da zoet Wẽnnaam paamame t’a maan bũmb n sõng-ba. —1 Sãmwɛll 1:1-20; Dãniyɛll 10:2-12; Tʋʋma 4:24-31; 10:1-7.

D bʋgs Wẽnnaam Gomdã zug neere:

it-2 240 s. a 1

Niivo

B tõe n talla niivo n me roog tɩ zemse, wall n ges a sã n na n kaoosame. A Zeova ra pĩnd n togsa Zerizalɛm nebã sẽn da lebg tõatbã t’a na n na n ‘sãama Zeruzalɛm wa a sẽn sãam Samaari tẽngã, la a sarm-a wa a sẽn sarem a Akaab roogã.” Wẽnnaam maka Samari nebã la rĩm a Akaab roogã rãmba, n mik tɩ b yam tagsa wã la b yel-manesmã yaa wẽnse, tɩ kɩt t’a sãam-ba. Woto me, Wẽnnaam na n kao Zerizalɛm ne a rĩm-dãmbã bʋʋdo, n vẽneg b tʋʋm-wẽnsã, la a kɩt tɩ b sãam tẽngã. Yel-kãensã fãa maana yʋʋmd 607 S.D.Z.R (2 Rĩm. 21:10-13; 10:11) Ne a Ezayi maasem, a Zeova togsa Zerizalɛm rĩm wẽnsã la nin-tʋʋdbã bũmb ning sẽn na n paam-ba. A yeelame yaa: “Mam vigla zemsg tɩ yaa makdga, la tɩrlem tɩ yaa zemsg makdga.” Noy nins b sẽn lugl tɩrlem hakɩɩkã la zemsgã wɛɛngẽ wã na n wilga b rãmb nins sẽn da sɩd tũud Wẽnnaam la sẽn pa tũud-a wã, tɩ baas ne koglgo, wall saoongo.—Eza. 28:13-19.