Kiris-nebã vɩɩm la b tʋʋma tigissã na-kẽndr sebr not-rãmbã
YƲƲM-VẼKR RASEM A 2-8
D bʋgs Wẽnnaam Gomdã zug neere:
w01 15/4 26 s. a 3-4
Yãmb tõe n paama tõogre, baa ne b sẽn wub yãmb to-to
Baa ne a Zoziyas yɛlã sẽn da pa tolg n yaa sõma a yãadmẽ wã, a maana sẽn yaa tɩrg a Zeova nifẽ. A naamã tolg n yɩɩ sõma, hal tɩ b yeel Biiblã pʋgẽ yaa: “Sẽn deng rĩm a Zoziyaase, rĩm a to ka zĩnd sẽn sak n tũ Sẽn-Ka-Saab ne a sũur fãa, la ne a yamã fãa, la a pãngã fãa wa a Moyiis tõogã sẽn yeelã ye. La a Zoziyaas loogr poore, rĩm a to sẽn wẽnd yẽnda ka tol n zĩnd ye.”—2 Rĩm-dãmbã 23:19-25.
A Zoziyas sɩd kõta neb nins fãa sẽn maood ne zu-loe-kɛgems b yãadmẽ wã mak-sõngo! Yam bʋg la d tõe n dɩk a kibarã pʋgẽ? Bõe n sõng a Zoziyas t’a bãng n yãk so-sõngã la a kell n paa a zugu?
YƲƲM-VẼKR RASEM 16-22
D SẼN BÃNG BIIBLÃ KARENG PƲGẼ | 1 KIBAYÃ 1–3
“Biiblã pa soalem sebr ye”
w09 1/9 14 s. a 2
A Ãdem ne a Awa sɩd zĩndame bɩ?
D rɩk wala makre, zʋɩf-rãmbã yaab rãmb yʋy b sẽn sõdg tɩ be 1 Kibayã 1–9 la a Luk evãnzillã sak a 3 wã pʋgẽ. Neb nins yʋy b sẽn sõdg be wã yaa zamaan 48 la zamaan 75 nebã. A Luk sõdga a Zeezi yaab rãmba yʋya, tɩ 1 Kibay sebrã gomd Israyɛll nin-buiidã rĩm-dãmbã la b maan-kʋʋdbã yelle. Sɛb a yiibã fãa pʋsẽ, b sõdga neb yʋy sẽn yi yʋya. Wala makre, a Salomo, a Davɩɩd, a Zakoob, a Izak, a Abrahaam, a Nowe, la sẽn na n baase, a Ãdem. Sɛb a yiibã fãa pʋsẽ, neb nins fãa yʋy b sẽn sõdgã sɩd zĩndame. Sẽn paase, yaa a Ãdem yʋʋrã la b sõdge, wa tõnd pipi yaab sẽn sɩd zĩndi.
w09 1/9 14-15
A Ãdem ne a Awa sɩd zĩndame bɩ?
Wala makre, d gom Biiblã zãmsg a yembr sẽn tar yõod wʋsg yelle, sẽn kẽnd-b wẽnd-dotẽ fãa la bal nifẽ. Wa Biiblã sẽn wilgã, a Zeezi kõ a vɩɩmã sẽn zems zãnga, tɩ yao n fãag nebã ne b yel-wẽnã. (Matiye 20:28; Zã 3:16) Wa d sẽn mi wã, b sã n yeel tɩ ned yaoo yaood n dol bũmbu, rat n yeelame t’a kõo bũmb wall ligd sẽn zems ne bũmb ning sẽn sãamã, bɩ bũmb ning b sẽn deegã. Rẽ n so tɩ b yeel Biiblã pʋgẽ t’a Zeezi “yao yaood ning sẽn da segd n yao” wã. (1 Tɩmote 2:6) D tõe n soka d meng yaa: Yao yaood ning sẽn da segd n yao wã võor yaa bõe? B yeta Biiblã pʋgẽ yaa: “Yaa wa sẽn tũ ne a Ãdem tɩ nebã fãa kiidẽ wã. Woto me, na n tũu ne Kiristã tɩ nebã fãa paam vɩɩm.” (1 Korẽnt rãmbã 15:22) A Zeezi sẽn kõ a vɩɩmã sẽn zems zãngã tɩ yɩ maoong neb nins sẽn yaa sakdbã yĩnga, zemsa ne a Ãdem vɩɩmã sẽn da zems zãnga a sẽn bõnã, a sẽn maan yel-wẽnd Edɛn zẽedã zĩigẽ wã. (Rom dãmbã 5:12) Yaa vẽeneg t’a Ãdem sã n da sɩd pa zĩndi, Kirist maoongã ra pa na n tall võor ye.
D bʋgs Wẽnnaam Gomdã zug neere:
it-1 977 s. a 2-3
Yaab-rãmb roogo
Pagb yʋya. B ra mi n sõdga pagb kẽer yʋy n naag yaab-rãmbã roogo, sã n mik tɩ bʋʋm beeme. Sɩngr 11:29, 30 pʋgẽ, b sõdga a Sarayi (Sara) yʋʋrã. Tõe tɩ yaa yageng ning b sẽn pʋlmã sẽn da tog n yi yẽ pendẽ wã, tɩ pa a Abrahaam pag a to wã pendẽ wã yĩnga. Tõe tɩ b sẽn sõdg a Milka yʋʋr vɛrse-kãngã pʋgẽ wã me, yaa a sẽn da yaa a Izaak pag a Rebeka yaab-poakã yĩnga, tɩ wilgdẽ t’a Rebeka yaab-rãmbã roog yaa a Abrahaam buudã sʋka, bala a Izaak ra pa segd n dɩk pag buud a taabã neb sʋk ye. (Sɩng. 22:20-23; 24:2-4) Sɩngr 25:1 wã pʋgẽ, b sõdga a Abrahaam pag a to yʋʋr sẽn boond t’a Ketura. Woto wilgdame t’a Abrahaam lebs n kẽe kãadem ne pag a to a Sara kũumã poore. Wilgdame me t’a Abrahaam ra ket n tõe n doga biiga, baa a Zeova sẽn da maan yel-solemd t’a tõog n dog biigã sẽn ta yʋʋm pis-naas la zak woto wã. (Rom. 4:19; Sɩng. 24:67; 25:20) Leb n wilgdame tɩ rogem n be Madiyã nebã la Araab-rãmbã ne Israyɛl nebã sʋka.
B sõdga a Leya, a Rasɛll n paas a Zakoob pʋg-rɩkdsã ne kamb nins b sẽn dogã yʋy me. (Sɩng. 35:21-26) Woto sõngda tõnd tɩ d wʋm Wẽnnaam sẽn tall manesem ning ne kom-kãens kaoosg zugẽ wã võore. B sõdga pagb a taab yʋy yaab-rãmbã roog sɛb pʋsẽ, bʋʋm sẽn wõnd woto yĩnga. Wakat ninga, b tõe n sõdga pagb yʋya, sã n mik tɩ na n tũu ne bãmb tɩ ned paam rogem-pʋɩɩre. (Sõd. 26:33) Wala makre, b sõdga a Tamaare, a Rahaab la a Rut yʋʋre. Pʋg-kãensã fãa kibar pʋgẽ, bũmb takɩ n wilgd bʋʋm ning sẽn kɩt tɩ b sõdg b ned kam fãa yʋʋr n naag a Zeezi Kirist sẽn yaa Mesi wã yaab-rãmbã roogo. (Sɩng. 38; Rut 1:3-5; 4:13-15; Mat. 1:1-5) Pagb a taab yʋy me la b sõdg n naag yaab-rãmbã roog tɩ be 1 Kibay 2:35, 48, 49; 3:1-3, 5.
YƲƲM-VẼKR RASEM 23-29
D SẼN BÃNG BIIBLÃ KARENG PƲGẼ | 1 KIBAYÃ 4–6
“Mam pʋʋsgã wilgda bõe mam mengã zugu?”
w10 1/10 23 s. a 3-7
A ‘Kelgda pʋʋsgo’
A Yabɛɛs ra yaa ned sẽn nong pʋʋsgo. A pʋʋsgã sɩngrẽ, a kosa a Zeova t’a ning-a barka. Rẽ poore, a kosa bũmb a tãab sẽn wilgd t’a sɩd tara tẽebo.
Pipi, a Yabɛɛs pʋʋsa Wẽnnaam n kos-a t’a “yalg a soolma.” (Vɛrse 10) Nin-kãngã b sẽn da nand wʋsgã ra pa rat-tɩ-loog soaba, bɩ ned sẽn tʋlgd a taabã bũmbu. Yaa vẽeneg t’a sẽn kos bũmb ningã yaa nebã yĩnga, la pa soolma yĩng ye. Tõe t’a sẽn kosã yaa soolmã na yalge, tɩ neb wʋsg tõe n zĩnd a pʋgẽ n tũ Wẽnnaam sɩd-sɩdã.
Yiibu, a Yabɛɛs kosa Wẽnnaam t’a tẽeg a “nug” n kogl-a. Ka wã, Wẽnnaam nugã makda a pãngã, a sẽn tar n sõngd neb nins sẽn tũud-a wã. (1 Kibayã 29:12) Wẽnnaam nug ka koɛɛg ne neb nins sẽn wilgd tɩ b tẽed-a lame wã ye. Rẽ n so t’a Yabɛɛs teeg-a, sẽn na yɩl t’a pʋʋsgã paam reegre.—Ezayi 59:1.
Tãabo, a pʋʋsa Wẽnnaam n yeel-a t’a “zãag-a ne toog la namsg buud fãa.” A gomdã wilgdame t’a sẽn kos bũmb ningã pa sẽn na yɩl n põs zu-loees ye. Yaa sẽn na yɩl tɩ zu-loeesã ra lim-a, bɩ n tõog t’a sũurã sãam wʋsg ye.
A Yabɛɛs sẽn pʋʋs to-to wã wilgdame tɩ tũudum hakɩɩkã yell pak-a lame, la t’a ra tẽed-a soab ning sẽn kelgd pʋʋsgã la t’a teeg-a lame. Wãn to la a Zeova leok a pʋʋsgã? Ad kibarã sẽn baas to-to: “Dẽ, Wẽnnaam maana a sẽn kosã n kõ-a.”
YƲƲM-VẼKR RASEM 30–WAO-FUGDG RASEM A 5
D SẼN BÃNG BIIBLÃ KARENG PƲGẼ | 1 KIBAYÃ 7–9
“Ne a Zeova sõngre, yãmb na n tõog n tʋma tʋʋm sẽn pa nana”
w11 15/9 32 s. a 7
Y sã wa maood ne zu-loeese, y tõe n dɩka a Fineyaas togs-n-taar bɩ?
Pĩnd wẽndẽ Israyɛll nin-buiidã sʋka, a Fineyaas ra tara tʋʋm wʋsgo, la a talla raoodo, yam la a teeg Wẽnnaam n tõog n mao ne a zu-loeesã. A Fineyas sẽn ges a Zeova nin-buiidã yell neerã yĩnga, a taa a Zeova yam. Na maan yʋʋm 1000 poore, a Zeova vẽnega a ɛsdraas t’a gʋls yaa: “La a Eleyazaar biig a Fineyaas n dag n yaa b naaba. Sẽn-Ka-Saab rag n bee ne a Fineyaase.” (1 Kib. 9:20) Wẽnd na kɩt tɩ yɩ woto ne neb nins fãa sẽn lʋɩt taoor a Zeova nin-buiidã sʋka, la ne kiris-neb nins fãa sẽn maand sɩd ne-a wã.
WAO-FUGDG RASEM A 6-12
D SẼN BÃNG BIIBLÃ KARENG PƲGẼ | 1 KIBAYÃ 10–12
D bʋgs Wẽnnaam Gomdã zug neere:
it-1 492 s. a 5-6
Sũurã
D tũ a Zeova ne d “sũur fãa zãnga.” Sẽn na yɩl tɩ ned sũur tʋm sõma, sũurã segd n tara laafɩ. La d yamã tõe n pʋɩya zĩis a yiibu. A Davɩɩd pʋʋsa Wẽnnaam n yeel yaa: “Kɩt-y tɩ m paam tagsg a yembr bala, sẽn yaa tɩ m zoe yãmb yʋʋrã.” Woto wilgdame tɩ ned tõe n tara yam a yiibu, la rẽ bee ne a yɛllã sẽn yaa to-to pa rẽ bɩ a sẽn nong bũmb ninsã. (Yɩɩn. 86:11) Ned a woto tõe n tara yam a yiibu, n pa tar yẽesem a Zeova tũubã pʋgẽ ye. (Yɩɩn. 119:113; Vẽn. 3:16) Ned a woto na n datame n tũ zu-sobend dãmb a yiibu, wall a yet bũmb n bas n tagsd bũmb a to yelle. (1 Kib. 12:34; Yɩɩn. 12:3) A Zeezi wilgame tɩ pʋ-lik a woto sẽn yit sũurẽ wã yaa wẽng wʋsgo.—Mat. 15:7, 8.
Ned sẽn dat n ta Wẽnnaam yam pa segd n tall yam a yiib ye. A segd n tũ-a-la ne a sũur fãa zãnga. (1 Kib 28:9) D segd n maana modgr wʋsgo, bala sũurã pida ne zãmbo, n tõe n kɩt tɩ d tʋll n maan sẽn yaa wẽnga. (Zer. 17:9, 10; Sɩng. 8:21) Ad bũmb kẽer sẽn tõe n sõng-d tɩ d tũ Wẽnnaam ne d sũur fãa: D pʋʋsd ne d sũur fãa (Yɩɩn. 119:145; Wiis. 3:41), d zãmsd Wẽnnaam Gomdã daar fãa (Ɛsd. 7:10; Yel. 15:28), d moond koe-noogã ne yẽesem, (ges-y Zer. 20:9), la d tũud neb nins sẽn tũud a Zeova ne b sũur fãa n wã.—Ges-y 2 Rĩm. 10:15, 16.