Kiris-nebã vɩɩm la b tʋʋma tigissã na-kẽndr sebr not-rãmbã
© 2023 Watch Tower Bible and Tract Society of Pennsylvania
SẼOOG RASEM A 3-9
D SẼN BÃNG BIIBLÃ KARENG PƲGẼ | ƐSDRAS 4–6
“Ra n gɩdg-y tʋʋmdã ye”
w86 1/2 29, zĩ-gũbrã s. a 2-3
A Zeova ra bee ne kãsem-dãmbã
Zʋɩf-rãmbã kẽer sẽn yi Babilon n lebg n wa wã poore, yʋʋm 16 n zĩnd tɩ b pa tʋm ye. No-rɛɛs a Aaze ne a Zakari modgame n na n keng Zʋɩf-rãmbã raood tɩ b bas b kʋɩɩngã. Rẽ kɩtame tɩ b lebs n sɩng a Zeova roogã meebo. La pa yã n kaoos la Pɛrs nanambs kẽer gɩdg tʋʋmdã ye. Bɛɛbã sok-b lame yaa: “Ãnda n kõ yãmb noor tɩ y me ro-kãngã?”—Ɛsdras 5:1-3.
B sẽn da na n leok-b to-to wã ra tara yõod wʋsgo. Kãsem-dãmbã sã n da bas tɩ bɛɛbã kẽes-b rabeem, wẽnd-doogã lebs n me wã ra na n tiig n yalsame. Kãsem-dãmbã sã n da wẽ no-koeemd ne nanambs kãens n yik b sũuri, b ra tõe n kɩtame tɩ b yals tʋʋmdã zĩig pʋgẽ. Rẽ n so tɩ kãsem-dãmbã bãng n leok bɛɛbã, la ne bʋgsem. Sãmbg kae tɩ yaa guvɛrneer a Zorobabɛll la maan-kʋʋdb kãsem a Zozuwe n lʋɩ taoor ye. B tẽega nanambsã noor ning rĩm a Sirus sẽn da kõ hal daar zãra, tɩ wilgdẽ tɩ Zʋɩf-rãmbã ra tara sor n na n tʋm tʋʋmdã. Nin-kãens sẽn da mi tɩ Pɛrs rĩmã sã n yiis noore, a ka tol n tõe n toeemã yĩnga, b yãka yam n pa na n kɩɩs rĩmã noor ye. Rẽ n so tɩ b bas tɩ b kell n tʋm tʋʋmdã. Kaoosg zugẽ, rĩm a Daryuus me yiisa noor sẽn kõt sor tɩ b kell n kẽng taoor ne tʋʋmdã!—Ɛsdras 5:11-17; 6:6-12.
D bʋgs Wẽnnaam Gomdã zug neere
w93 15/6 32 s. a 3-5
Yãmb tõe n kɩsa sɩd ne Biiblã sẽn yeta bɩ?
Yɩɩ Tars la b kud lagfã. Tars yaa tẽng sẽn da be rũndã-rũndã Tirki wã yaang sẽnese. Yɩɩ Pɛrs guvɛrneer a Mazayus naamã sasa la b kud lagfã, yʋʋm kobs-tã la zak sẽn deng a Zeezi rogmã. Lagfã zugu, b gʋlsame t’a yaa soolem ning sẽn be “Kʋɩlgã rʋʋndã” guvɛrneere, rat n yeel tɩ Efrat kʋɩlgã rʋʋndã.
La bõe yĩng tɩ d gomd gʋlsem ning sẽn be lagfã zugã yelle? Bala d yãta goam sẽn wõnd woto Biiblã pʋgẽ. Ɛsdras 5:6–6:13 wã pʋgẽ, b gomda sɛb Pɛrs rĩm a Daryuus ne guvɛrneer yʋʋr sẽn boond t’a Tatenayi sẽn gʋls n tool taab yelle. Sɛbã pʋsẽ, b gomda Zʋɩf-rãmbã sẽn da lebg n met Zerizalɛm wẽnd-doogã yelle. A Ɛsdras ra yaa Wẽnnaam Tõogã seb-gʋlsd sẽn tar minim sõma. Dẽnd d tõe n kɩsa sɩd t’a sẽn da gʋlsd bũmb ninsã segd n yɩɩ kɛpɩ, la sɩda. Ɛsdras 5:6 la 6:13 wã pʋgẽ, a boola a Tatenayi tɩ ‘Kʋɩlgã rʋʋndã guvɛrneere.’
A Ɛsdras gʋlsa gom-kãensã yʋʋmd 460 S.D.Z.R sẽnese. Yaa na maan yʋʋm 100 nand tɩ b kud lagfã. Neb kẽer tõe n tagsdame tɩ togs b sẽn da boond pĩnd wẽndẽ nin-kãseng to-to wã pa bũmb sẽn tar yõod wʋsg ye. La sã n mikame tɩ d tõe n kɩsa Biiblã gʋlsdb sɩd baa yel-bõoneg pʋsẽ, pa segd n kɩt tɩ d maneg n kɩs sɩd ne goam a taabã b sẽn gʋlsã sɩda?
SẼOOG RASEM 10-16
D SẼN BÃNG BIIBLÃ KARENG PƲGẼ | ƐSDRAS 7–8
“A Ɛsdras manesmã kɩtame t’a Zeova paam waoogre”
si 76 s. a 5
Biiblã sebr 13 soabã—1 Kibayã
5 Ned ra kae n zems ne gʋls kiba-kãensã sẽn yaa sɩdã seb-yɛng pʋg n ta a Ɛsdras ye. “A Ɛsdras ra yãka yam a sũur pʋgẽ n na n vaees a Zeova Tõogã la a tũ-a, la a zãms nebã Tõogã noyã la a goamã Israyɛlle.” (Ɛsd. 7:10) A Zeova ra tũnugda ne vʋʋsem sõngã n sõngd-a. Pɛrs rĩmã sak n deegame t’a Ɛsdras yamã yita Wẽnnaam nengẽ, n kõ-a tʋʋm-kãsems a sẽn segd n tɩ tʋm Zida soolmẽ wã. (Ɛsd. 7:12-26) Rẽnd a Ɛsdras sẽn da paam tɩ Wẽnnaam kõ-a noorã, n paas rĩmã sẽn da kõ-a naamã yĩnga, a ra tõe n gesa sɛb nins sẽn da be wã pʋsẽ, n bãng n gʋls kiba-kãensã.
it-1 1155 8
Sik-m-menga
A sõngdame tɩ d kelgd saglse. Ned sẽn sikd a meng Wẽnnaam taoor tõe n paamame tɩ Wẽnnaam wilg-a sore. A Ɛsdras ra segd n lʋɩɩ rap tusr la kobs-nu la zak taoore, n paas maan-kʋʋdba, Netinim-dãmba, pagb la kamb tɩ b yi Babilon n wa Zerizalɛm. Woto ra yaa tʋʋm-kãsenga. Sẽn paase, b ra zãada sãnem la wanzuri wʋsg n na tɩ nags Zerizalɛm wẽnd-doogã. B ra rata koglg so-toakã sasa, la a Ɛsdras ra pa rat n kos Pɛrs rĩmã tãb-biis sẽn na n yãag-ba, tɩ wa yaa wa a teega ninsaal pãng ye. Sẽn deng rẽ me, a ra yeela rĩmã yaa: “Tõnd Wẽnnaamã sẽn yaa sõmblem soabã bee ne neb nins sẽn baood-a wã.” Rẽ n so t’a moon no-loeere, sẽn na yɩl tɩ nin-buiidã sik b mens a Zeova taoore. B pʋʋsa Wẽnnaam n kos sõngre, t’a leok-b n kogl-b so-toakã sẽn pa yɩ nana wã tõr ne bɛɛbã la fãadbã, tɩ b ta ne laafɩ. (Ɛsd. 8:1-14, 21-32) No-rɛɛs a Dãniyɛll sẽn da be yembd Babilonnã paamame tɩ Wẽnnaam maan-a lohorem wʋsgo, n tʋm malɛk t’a wa vẽneg a meng ne-a, bala a Dãniyɛll sika a meng Wẽnnaam taoor n bao t’a wilg-a sore, la a bao bãngre.—Dãn. 10:12.
SẼOOG RASEM 17-23
D SẼN BÃNG BIIBLÃ KARENG PƲGẼ | ƐSDRAS 9–10
“Kɩɩsgã wata ne toodo”
w09 1/10 10 s. a 6
Bõe la a Zeova rat tɩ tõnd maane?
D sã n yãk yam n sakd Wẽnnaam, d na n paama barka. A Moyiiz yeelame yaa: “La y sak . . . noyã mam sẽn togsd yãmb rũndã wã, y mens neer yĩnga.” (Vɛrse 13) Sɩd-sɩda, noy nins fãa a Zeova sẽn kõt tõndã, bũmb nins fãa a sẽn dat tɩ d maanã, yaa tõnd mens neer yĩnga. Ra tõeeme n pa yɩ woto sɩda? Biiblã yeelame tɩ “Wẽnnaam yaa nonglem.” (1 Zã 4:8) Rẽnd noy nins a sẽn kõt tõndã pa tõe n pa paas d vɩɩmã noom ye. (Ezayi 48:17) D sã n maand bũmb nins fãa a Zeova sẽn dat tɩ d maanã, d na n gila zu-loees wʋsg rũndã-rũndã. Leb n na n kɩtame tɩ d wa paam bark toor-toor sẽn ka sɛte, Wẽnnaam Rĩungã naam sasa.
SẼOOG RASEM 24-30
D SẼN BÃNG BIIBLÃ KARENG PƲGẼ | NEEMI 1–2
“Zĩig pʋgẽ, mam pʋʋsame”
be 177 s. a 4
Ra gʋls-y y sẽn na n yeelã fãa sebr zug ye
Ned sã n tiig n sok-y sokr y sẽn tẽed bũmb ninsã zugu, bõe n tõe n sõng-y tɩ y bãng n leoke? Rɩk-y-yã a Neemi togs-n-taare. A reng n pʋʋsa a sũurẽ n yaool n leok sokr ning rĩm a Artazɛgzɛs sẽn sok-a wã. (Nee. 2:4) Rẽ poor bɩ y yɩ tao-tao n tags y sẽn na n gom bũmb ning yell pʋdg-pʋdgã y yamẽ. Ad bũmb a tãab y sẽn tõe n deng n tagse: 1) Yãk-y bõn-yɛng wall bũmb a yiib y sẽn na n wilg a võore (Y tõe n yãka yam n gom bũmb kẽer sẽn be Comment raisonner à partir des Écritures sebrã pʋgẽ yelle). 2) Yãk-y vɛrse nins y sẽn na n tik n wilg y sẽn gomd bũmb ning yellã võore. 3) Tags-y n ges-y y sẽn na n sɩng goamã ne gũusg to-to sẽn na yɩl tɩ sẽn sok-a sokrã sak n kelge. Rẽ poor bɩ y sɩng goama.
D bʋgs Wẽnnaam Gomdã zug neere
w86 15/2 25
Tũudum hakɩɩkã pãng paasdame
Ayo. Bala a Neemi ra sɩng n pʋʋsda Zerizalɛm sẽn sãamã wɛɛngẽ “wĩndg la yʋng” hal sẽn kaoose. (1:4, 6) A Neemi sẽn wa n paam segb n na n gom a sẽn dat n lebs n me Zerizalɛm lalsã yell ne rĩm a Artazɛgzɛsã, a leb n pʋʋsame. Rẽnd a maana bũmb a sẽn da zoe n maan naoor wʋsgo. A Zeova leoka a pʋʋsgã, tɩ kɩt tɩ b kõ-a sor t’a tɩ maneg Zerizalɛm lalsã.
D sẽn tõe n dɩk yam ninga: A Neemi baoome t’a Zeova wilg-a sore. Tõnd me sã n wa segd n yãk yam n maan bũmb sẽn tar yõod wʋsgo, d segd n ‘wɩnga ne pʋʋsgo,’ la d tũ sor ning a Zeova sẽn na n wilg-dã.—Rom dãmbã 12:12.
SA-SIK RASEM A 7-13
D SẼN BÃNG BIIBLÃ KARENG PƲGẼ | NEEMI 5–7
“A Neemi ra rat n sõnga nebã, pa nebã na sõng-a ye”
w02 1/11 27 s. a 3
Neb sẽn teel tũudum hakɩɩkã pĩnd wẽndẽ, la rũndã-rũndã
A Neemi pa rɩk a sẽkã la a bãngrã bal n teel tũudum hakɩɩkã ye. A teel-a-la ne a paoongã me. A yãka a meng ligd n lebs n da a Zʋɩf-taas b sẽn da koos yembdo. A penga neb ligd n pa rogl yõod ye. A zɩ n “weoog” Zʋɩf-rãmbã, n yeel tɩ b kõ-a bũmb nins guvɛrneer sẽn segd ne wã, baa a sẽn da tar sor n na n maan dẽ wã ye. Baasgo, a ra sakdame tɩ neb ‘koabg la pis-nu ra naagd-a n dɩtẽ, n paas neb nins sẽn da yit bu-zẽmsã tẽns pʋsẽ n wat n kaagd bãmbã.’ Daar fãa, a ra kɩtdame tɩ b “kʋ loalga, pe-nobds a yoob la bõn-yɩgdɩ” n segendẽ tɩ neb nins sẽn wat a nengẽ wã rɩtẽ. Sẽn paase, rasem piig fãa, a ra kɩtdame tɩ b wa ne “divẽ buud toor-toor hal wʋsgo.” A ra raada woto fãa ne a meng ligdi.—Neemi 5:8, 10, 14-18.
SA-SIK RASEM 14-20
D SẼN BÃNG BIIBLÃ KARENG PƲGẼ | NEEMI 8–9
“Sũ-noog ning a Zeova sẽn kõtã yaa yãmb pãnga”
D bʋgs Wẽnnaam Gomdã zug neere
it-1 151 s. a 7
Arameyẽ
Zʋɩf-rãmbã sẽn yi yembd Babilon n lebg n wa wã yʋʋm wʋsg poore, maan-kʋʋd a Ɛsdras karma Tõogã sebr tɩ Zʋɩf-rãmbã sẽn tigim taab Zerizalɛmmã kelge, tɩ Levi buudã neb kẽer bilg nin-buiidã rẽ võore. Neemi 8:8 yetame: “B kell n zẽka b koees n karem sebrã, rat n yeel tɩ Wẽnnaam Tõogã pʋgẽ, n da bilgd a võorã sõma la b kɩtdẽ tɩ b sẽn karemdã võor lebgd vẽenega. Woto, b sõnga nin-buiidã tɩ b wʋm bũmb ning b sẽn karmã võore.” B sẽn yeel tɩ b ra bilgda Tõogã võorã, tõe tɩ rat n yeelame tɩ b ra lebgda Ebre wã ne Arameyẽ, bala wõnda yaa buud-gom-kãng la Zʋɩf-rãmbã ra gomd b sẽn wa n be Babilonnã. Sãmbg sẽn kae, rat n yeelame me tɩ b maaga b yĩng n bilg Tõogã võor sẽn na yɩl tɩ baa Zʋɩf-rãmb nins sẽn wʋmd Ebre wã tõog n wʋm bũmb ning b sẽn karemdã sẽn sɩd rat n yɛɛlga.
SA-SIK RASEM 21-27
D SẼN BÃNG BIIBLÃ KARENG PƲGẼ | NEEMI 10–11
“B sak n monga b meng bũmb kẽer a Zeova yĩnga”
w98 15/10 22 s. 13
Zerizalɛm sẽn sak a yʋʋre
13 Sard ning Wẽnnaam pĩnd wẽndẽ nin-buiidã sẽn dɩk ne b sũur fãa a Neemi wakatẽ wã sõng-b lame tɩ b segl b mens n wa maan tigri, Zerizalɛm lalsã sẽn wa n me n sa wã. La bũmb a to n da be tɩ b segd n ges a yell tao-tao. Zerizalɛm sẽn gũbg ne lal-bedr n tar rig-noy 12 masã wã, ra lebga tɩlɛ t’a nebã sõor paase. Baa Israyɛll neb kẽer sẽn da be a pʋgẽ wã, “tẽngã ra yaa yaleng la bedre, tɩ nebã sõor da paoodẽ.” (Neemi 7:4) Sẽn na yɩl n welg yel-kãnga, nin-buiidã “maana bãnd sẽn na yɩl n kɩt tɩ ned a ye neb piig zug wa zĩnd Zerizalɛm sẽn yaa tẽn-sõngã.” Nebã sẽn sak n teel yam-yãk-kãngã kɩtame tɩ nin-buiidã ning “neb nins fãa sẽn sak ne yamleoog n na n zĩnd Zerizalɛmmã” barka. (Neemi 11:1, 2) Woto pa mak-sõng n kõ rũndã-rũndã wẽn-tũudb nins yɛl sẽn kɩt tɩ b tõe n yik n tɩ sõng zĩis nins b sẽn dat kiris-neb tẽeb sẽn bi sõngrã sɩda?
w86 15/2 26
Tũudum hakɩɩkã pãng paasdame
Ned sã n da na n yik n bas a rogem-pʋɩɩr n tɩ zĩnd Zerizalɛm, a ra segd n yiisa ligdi, la a bõn bũmb kẽer me. Zerizalɛm tẽngã pʋgẽ vɩɩm me ra pa nana, a nebã sẽn da segd zu-loees toor-toorã yĩnga. Rẽ n so tɩ neb a taabã ges tɩ sẽn sak-b n na n kẽng ne yamleoogã toga ne pẽgre. Yaa vẽeneg tɩ b pʋʋsa a Zeova t’a ning-b barka.
SA-SIK RASEM 28–BÕN- BƖƲƲNG RASEM A 3
D SẼN BÃNG BIIBLÃ KARENG PƲGẼ | NEEMI 12–13
“D maan sɩd ne a Zeova, d zo-rãmbã yãkr wɛɛngẽ”
it-1 100 s. a 8
Amon nebã
B sẽn dig a Tobiya n yiis wẽnd-doogã zakẽ wã poore, b karma Wẽnnaam noor ning sẽn be Tõod 23:3-6 pʋgẽ, n wilgd tɩ Amon ne Mowaab nebã pa segd n kẽ Israyɛll nin-buiidã sʋkã la b tũ no-kãnga. (Nee. 13:1-3) Yaa na maan yʋʋm tusr sẽn deng rẽ la b kõ no-kãnga, bala Israyɛll nebã sẽn wa n kolgd kãabg tẽngã, Amon ne Mowaab nebã zãgsame tɩ b kõn sõng-b ye. Neb wʋsg ra tagsdame tɩ woto rat n yeelame tɩ nin-kãens ra pa tõe n lebg Israyɛll buudã neba, n tar lohorem ning rẽ sẽn wat ne wã ye. La woto ra pa rat n yeel tɩ Amon ne Mowaab ned ra pa tõe n naag Israyɛll nebã wall a zĩnd b sʋka, n paam n dɩ bark nins Wẽnnaam nin-buiidã sẽn paamdã yõod ye. D sã n ges b sẽn sõdg a Zelɛk sẽn yaa ned ning yell d sẽn zoe n gomã n naag a Davɩɩd gãndaadã sʋkã, n paas kibar ning sẽn gomd Mowaab pag a Rut yellã, d bãngda rẽ vẽenega.—Rut 1:4, 16-18.
w96 15/3 16 s. a 6
D wilg tɩ d yaa neb sẽn maand sɩda
6 D sã n maand sɩd ne Wẽnnaam a Zeova, d pa na n yõg zood ne ned ning fãa sẽn yaa a bɛ ye. Rẽ n so tɩ karen-biig a Zak gʋls yaa: “Yãmb a yoaadba, yãmb pa mi tɩ zood ne dũniyã yaa beem ne Wẽnnaam la? Woto wã, ned ning fãa sẽn dat n lebg dũniyã zoa lebgda Wẽnnaam bɛya.” (Zak 4:4) D ratame n maan sɩd wa rĩm a Davɩɩde. A ra yeelame yaa: “Zeova, mam pa kis sẽn kis-b yãmbã sɩda? Mam yam pa yi sẽn kɩɩsd-b yãmbã sɩda? Mam tolg n kis-b-la ne m sũur fãa. B lebga mam bɛɛb meng-menga.” (Yɩɩn-sõamyã 139:21, 22) D pa rat n yõg zood ne yel-wẽn-maandb nins fãa sẽn maand yel-wẽnã ne yamleoogã baa a yembr ye. Bala tõnd ne bãmb bõn-daabã pa a yembr ye. D sẽn maand sɩd ne Wẽnnaamã segd n gɩdga tõnd tɩ d ra bao a Zeova bɛ baa a yembr zoodo, tɩ yaa vẽeneg-vẽenega, wall ne televiziõ wã maasem ye.
D bʋgs Wẽnnaam Gomdã zug neere
it-2 359 s. a 8
Yɩɩla
Wẽnd-doogẽ wã, yɩɩlã ra yaa bũmb sẽn tar yõod wʋsgo. Rẽ yaa vẽenega, Gʋls-sõamyã wã vɛrse-rãmb wʋsg sẽn gomd yɩɩn-yɩɩndbã yell to-to wã pʋgẽ, la b sẽn da “pa kõ bãmb tʋʋm a taab” Levi buudã neb a taabã sẽn da tʋmdã yĩnga. B maana woto sẽn na yɩl tɩ b tõog n kẽes b toog zãng-zãng b tʋʋmdã pʋgẽ. (1 Kib. 9:33) B kell n welg-b-la toor Levi buudã neb sʋka, bala b sẽn wa n na n sõd neb nins sẽn yi Babilon n leb Zerizalɛmmã, b sõda yɩɩn-yɩɩndbã toore. (Ɛsd. 2:40, 41) Baa Pɛrs rĩm a Artazɛgzɛs (Lõngme) mengã maana bũmb b neer yĩnga. A kɩtame tɩ bãmb ne sul a taab neb ra pa yaood ‘lampo, fadgo, la sor yaood’ ye. (Ɛsd. 7:24) Kaoosg zugẽ, rĩmã yiisa noor yɩɩn-yɩɩndbã wɛɛngẽ, n yeel tɩ b “kõt-b yaood daar fãa wa sẽn zems sẽn yaa tɩlɛ ne-bã.” Baa ne b sẽn yeel tɩ yaa a Artazɛgzɛs n yiis noorã, wõnda yaa a Ɛsdras n kõ noorã, bala a Artazɛgzɛs ra kõ-a-la tõog t’a tõe n maan dẽ. (Nee. 11:23; Ɛsd. 7:18-26) Rẽnd baa yɩɩn-yɩɩndbã fãa sẽn da yaa Levi buudã neba, zemsame tɩ Biiblã gomd b yell wa b yaa neb sull toore, n yeel tɩ “Levi buudã neb ne yɩɩn-yɩɩndbã.”—Nee. 7:1; 13:10.