Kiris-nebã vɩɩm la b tʋʋma tigissã na-kẽndr sebr not-rãmbã
© 2023 Watch Tower Bible and Tract Society of Pennsylvania
BÕN-BƖƲƲNG RASEM 11-17
D SẼN BÃNG BIIBLÃ KARENG PƲGẼ | ƐSTƐƐR 3–5
“Sõng-y y taabã tɩ b tʋmd ne b sũy fãa”
it-2 345 s. a 5
A Mardose
A zãgsame t’a kõn sulg n wõgemd a Haman taoor ye. Rẽ poore, a Asuerus zẽka Agaag buudã rao a Hamanne, n kɩt t’a lebg yẽ pʋgdga. A Asuerus kõo noor tɩ tʋm-tʋmdb nins fãa sẽn gũud rignoyã sulgd n wõgemded a Haman taoore, a sẽn da lebg rĩmã pʋgdgã yĩnga. A Mardose zãgsame t’a kõn wõgemde, n wilg tɩ yaa a sẽn yaa Zʋɩfã yĩnga. (Ɛst. 3:1-4) Bũmb ning a sẽn yeelã wilgdame tɩ yaa a sẽn da yaa Zʋɩf sẽn dɩk a meng n kõ a Wẽnnaam a Zeova wã yĩnga. A ra miime tɩ wõgemd a Haman taoor pa bũmb maaneg sẽn yaa bõn-zaalle, wa Israyɛll nebã sẽn da maan to-to pĩndã, neb nins sẽn da tar naamã taoorã ye. (2 Sãm. 14:4; 18:28; 1 Rĩm. 1:16) A Mardose sẽn zãgs t’a kõn sulg n wõgemd a Haman taoorã ra tara võore. Tõe t’a Haman ra yaa Amalɛk buudã neda. A Zeova yaool n da wilgame tɩ yẽ mengã na n zaba ne Amalɛk nebã “zãmaan woo zãmaana.” (Yik. 17:16; ges-y HAMÂN.) Dẽnd a Mardose sẽn zãgs t’a kõn sulg n wõgemd a Haman taoorã yaa a sẽn da rat n maan sɩd ne Wẽnnaamã yĩnga, la pa politik yell ye.
it-2 345 s. a 7
A Mardose
A Zeova tũnuga ne-a n fãag Israyɛll nebã. Rĩmã sẽn wa n kõ noor tɩ b kʋ soolmã Zʋɩf-rãmbã fãa wã, a Mardose ra kɩsa sɩd t’a Zeova sẽn ges t’a Ɛstɛɛr paam n be na-yirã, yaa sẽn na yɩl n fãag Zʋɩf-rãmbã sasa kãnga. A sõnga a Ɛstɛɛr t’a bãng zɩɩb kãseng ning sẽn da rog a zugã, la a wilg-a a sẽn tõe n maan to-to n ta rĩmã yam n tõog n kos a sõngre. Baa ne sẽn da tõe n tũ ne a yõorã, a sak n maana a Mardose sẽn yeelã.—Ɛst. 4:7–5:2.
BÕN-BƖƲƲNG RASEM 25–ZĨ-LIKR PIPI DAARE
D SẼN BÃNG BIIBLÃ KARENG PƲGẼ | ƐSTƐƐR 9–10
“A tũnuga ne a zu-sobendã n sõng a nin-buiidã”
it-2 346 s. a 1
A Mardose
A Mardose lebga rĩmã pʋgdga, n paam tɩ rĩmã yãk a nugbĩngã a sẽn tar n ningd bãndã n kõ-a. A Ɛstɛɛr kɩtame t’a Mardose na n get a Haman zakã yelle, bala rĩmã ra rɩka a Haman zakã n kõ-a. Rẽ poore, a Mardose tũnuga ne zu-sobend ning rĩmã sẽn kõ-a wã n yiis no-paall sẽn wilgd tɩ Zʋɩf-rãmbã tara sor n tõe n zab n fãag b mense. Ne Zʋɩf-rãmbã, no-kãng ra na n waa ne fãagr la sũ-noogo. Pɛrs soolmã neb wʋsg teela Zʋɩf-rãmbã. Adaar kiuugã rasem 13 wã sẽn da yaa daar ning b sẽn na n tũ noorã sẽn ta wã, mikame tɩ Zʋɩf-rãmbã ra zoe n segl n saame. Soolem toor-toorã nanambs fãa, guvɛrneer-dãmbã taoor dãmbã, guvɛrneer-dãmbã ne neb nins sẽn da get rĩmã tʋʋmã yellã ra bee a Mardose poorẽ, bala a Mardose ra yaa rĩmã pʋgdga. Suuzã, b yãka daar a to n paas zabrã yĩnga. Pɛrs soolmẽ wã, yaa Zʋɩf-rãmbã bɛɛb sẽn yɩɩd bãmb 75000 la b kʋ, a Haman kom-dibli piigã sẽn naage. (Ɛst. 8:1–9:18) A Ɛstɛɛr kõo sor t’a Mardose kɩt tɩ yʋʋmd fãa bɩ b maand tigr Adaar kiuugã rasem piig la a naasã ne piig la a nu wã daare. Yaa ra-kãens la b sẽn boond tɩ “Purim tigrã.” Ra yaa kɩdeng la sũ-noog raya, ray b sẽn segd n yãkd rɩɩb n kõt taaba, la b kõt naong rãmbã kũuni. Zʋɩf-rãmbã sakame n na n maand tigrã, la b kɩt tɩ b yagensã la neb nins fãa sẽn na n wa naag-bã maand woto. A Mardose sẽn da yaa rĩmã pʋgdg soolmã pʋgẽ wã yĩnga, Zʋɩf-rãmbã sẽn da rɩk b mens n kõ Wẽnnaamã ra waoogd-a lame. A kell n tʋma nin-buiidã neer yĩnga.—Ɛst. 9:19-22, 27-32; 10:2, 3.
it-2 628 s. a 4
Purim
Bõn-daabo. Baa ne neb kẽer sẽn yet tɩ Zʋɩf-rãmbã sẽn maand Purim tigrã to-to rũndã-rũndã wã pa tar loees ne tũudmã yɛlã, la tɩ tigrã sasa nebã mi n maandame tɩ loog noorã, sɩngrẽ wã, b sẽn wa n lugl tigrã, ra pa woto la nebã maand ye. A Mardose ne a Ɛstɛɛr fãa ra tũuda a Zeova sẽn yaa Wẽnnaam sɩd-sɩdã. Dẽnd tigrã b sẽn luglã ra yaa a Zeova waoogr yĩnga. D tõe n yeelame tɩ yaa Wẽnnaam a Zeova n fãag Zʋɩf-rãmbã wakat kãnga, bala yaa a Mardose sẽn da tũud a Zeova n maand sɩd ne-a wã yĩng la b sẽn da rat n kʋ Zʋɩf-rãmbã. Tõe t’a Haman ra yaa Amalɛk buudã neda. A Zeova yaool n da kãaba tẽn-kãng nebã wẽnga, n yeel t’a na n sãam-b lame. A Mardose tũu Wẽnnaam sẽn da yeelã, n zãgs t’a kõn sulg n wõgemd a Haman taoor ye. (Ɛst. 3:2, 5; Yik. 17:14-16) Sẽn paase, a Mardose sẽn togs a Ɛstɛɛr goam ninsã (Ɛst. 4:14) wilgdame t’a ra teega Wẽnnaam sẽn yaa pãng sẽn ka to soabã, t’a na n fãag Zʋɩf-rãmbã. A Ɛstɛɛr me sẽn loe noor n yaool n na n kẽng rĩmã taoor n tɩ kos-a t’a wa kibs a sẽn maan a yĩngã wilgdame t’a ra kota Wẽnnaam sõngre.—Ɛst. 4:14, 16.
cl 101-102 s.12-13
“Bɩ y yɩ Wẽnnaam togs-n-taase,” y sẽn tar y zu-sobendã n tʋmd to-to wã wɛɛngẽ
12 A Zeova yãka yel-gɛtb tɩ b lʋɩt taoor kiris-nebã tigingã pʋgẽ. (Ebre-rãmbã 13:17) Nin-kãens sẽn tar minimã tũnugda ne zu-sobend ning Wẽnnaam sẽn kõ-bã n sõngd bãgrã la b get a yell neere. Rẽ yĩnga, rat n yeelame tɩ kãsem-dãmbã segd n sooga b tẽed-n-taasã ne pãng bɩ? A bada! Kãsem-dãmbã segd n talla tagsg sẽn zemse, zu-sobend ning b sẽn tar tigingã pʋgẽ wã wɛɛngẽ. (1 Pɩyɛɛr 5:2, 3) Biiblã pʋgẽ, b yeta yel-gɛtbã yaa: ‘Kɩɩm-y Wẽnnaam tigingã a sẽn da ne a meng Biigã zɩɩmã.’ (Tʋʋma 20:28) Rẽ yaa bʋʋm-kãseng sẽn kɩt tɩ kãsem-dãmbã segd n tall sũ-bʋgsem ne tigingã ned kam fãa.
13 D rɩk makr rẽ wɛɛngẽ. Y zoa meng-meng n kos yãmb tɩ y ges bũmb a sẽn nand wʋsg yell neere. Yãmb miiime t’a yiisa ligd wʋsg n da bõn-kãnga. Rẽ yĩnga, yãmb pa na n ges bõn-kãng yell neer sɩda? Woto me, Wẽnnaam yãka kãsem-dãmbã, n kõ-b tʋʋmd sẽn yaa ges tigingã neb a sẽn nand wʋsgã yelle, tɩ b mak-b ne piisã. (Zã 21:16, 17) A Zeova nanda a piisã hal wʋsgo. Sɩd me, a ra-b-la ne a bi-ribl yendã sẽn yaa a Zeezi Kiristã zɩɩmã sẽn tar yõod wʋsgã. A Zeova ra tõeeme n pa ra a piisã ne a bi-ribl yendã zɩɩm ye. Kãsem-dãmb nins sẽn yaa sik-m-mens rãmbã ningda rẽ b yamẽ, n tar manesem sẽn zems ne a Zeova piisã.
ZĨ-LIKR RASEM A 9-15
D SẼN BÃNG BIIBLÃ KARENG PƲGẼ | ZOOB 4–5
“Zãag-y y mens ne kibay nins b sẽn yelgd tɩ pa sɩdã”
it-1 725 s. a 2
A Elifaaze
2. A Zoob zo-rãmb a tãabã nin-yende. (Zoob 2:11) Yaa Teman raoã. Wõnda a ra yaa Elifaaz ning yell b sẽn gom yĩngrã yagenga. Sã n yaa rẽ, a yaa a Abrahaam yagenga, la a kĩ ne a Zoobe. Yẽ ne a yagensã ra wukda b mens b yamã yĩnga. (Zer. 49:7) “Belsdb” a tãabã sʋka, wõnda yaa a Elifaaz n da yaa nin-kãsenga, la ziir soaba, tɩ wilgdẽ tɩ tõe tɩ yẽ yʋʋmã n da yɩɩd a taabã. B sõsgã sasa, yẽ n da rengd b fãa n gomda. Leb n yaa yẽ n gom wʋsg n yɩɩd a taabã.
w05 15/9 26 s. a 2
Zãag-y y mens ne tagsã sẽn pa sõma!
A Elifaaz tẽega bũmb sẽn maan tɩ yaa yel-solemd n yeel yaa: “Bũmb n pɩʋʋg mam nengã taoore, tɩ m yĩn-kõabnengã yiki. A yalsame, la m pa bãng a sẽn wõnd a soab ye. Mam nifã ra nee sulunsuku. Yɩɩ sɩɩ, la rẽ poore m wʋma koɛɛga.” (Zoob 4:15, 16) Malɛk bʋg buud n kɩt t’a Elifaaz sẽn da tagsd to-to wã toeeme? Goam nins a Elifaaz sẽn togs n ning a Zoob taalã wilgdame tɩ ra pa Wẽnnaam malɛk ye. (Zoob 4:17, 18) Ra yaa malɛk wẽnga. Rẽ n so t’a Zeova sũur puug ne a Elifaaz la ne a zo-rãmb a yiibã, b sẽn pa togs sɩdã yĩnga. (Zoob 42:7) Hakɩɩka, zĩn n da so a Elifaaze. A sẽn togs goam ninsã wilgdame t’a tagsgã ra pa zems ne Wẽnnaam rẽndã ye.
w10 15/2 19 s. a 5-6
Zãag-y y mens ne ziri nins a Sʋɩtãan sẽn yelgdã
A Sʋɩtãan tũnuga ne a Elifaaz sẽn da yaa a Zoob zo-rãmb a tãabã nin-yendã n wẽ no-koeemde, n wilg tɩ ninsaalbã ka võor Wẽnnaam nifẽ ye. A yeela a Zoob tɩ ninsaalbã yaa “neb nins sẽn be tãnd rotẽ tɩ b yẽbgrã be tomẽ, tɩ b bedsg yaa nana wa mogdã n yɩɩda. B bedsd-b-la fasɩ yibeoog n tãag zaabre. B kiida wakat fãa yĩng tɩ ned baa a ye toog kae ye.”—Zoob 4:19, 20.
Gʋls-sõamyã wã pʋgẽ, b maka tõnd ne “tãnd laas” sẽn tõe n wã nana-nana. (2 Kor. 4:7) Tõnd yaa ka-pãng rãmba, bala d roga ne yel-wẽndã, n yaa neb sẽn pa zems zãnga. (Rom. 5:12) A Zeova sã n foos a nus n bas tõndo, a Sʋɩtãan na n tõoga tõnd nana-nana. La d sẽn yaa kiris-nebã, d paamda a Zeova sõngre. Baa ne d sẽn yaa ka-pãng rãmbã, d tara yõod wʋsg Wẽnnaam nifẽ. (Eza. 43:4) Sẽn yɩɩd fãa, a Zeova kõta a vʋʋsem sõngã neb nins sẽn kot-a wã. (Luk 11:13) Ne a vʋʋsem sõngã maasem, a kõta tõnd “pãng ning sẽn yɩɩd ninsaal rẽndã,” tɩ kɩtdẽ tɩ d tõogd n maood ne zu-loees nins fãa a Sʋɩtãan sẽn wat ne wã. (2 Kor. 4:7; Fili. 4:13) La d sã n kɩɩs a Sʋɩtãana, n kell n tall d “tẽebã kãn-kãe,” Wẽnnaam na n kɩtame tɩ d yals kãn-kãe, la a kõ-d pãnga. (1 Pɩy. 5:8-10) Dẽnd d pa segd n zoe a Sʋɩtãan ye.
ZĨ-LIKR RASEM 16-22
D SẼN BÃNG BIIBLÃ KARENG PƲGẼ | ZOOB 6–7
“Y sã n wa getẽ tɩ vɩɩmã zu-loeesã yɩɩda y pãnga”
g 1/12 16-17
Y yamã sã n wa yi vɩɩmã
Baa y zu-loɛɛgã sã n wa wõnda pa tar tɩɩm, tẽeg-y tɩ y pa y yembr ye. Nebã fãa la bal maooda ne zu-loees buud toor-toore. Biiblã yetame yaa: “Bõn-naandsã fãa naaga taab n wõosdẽ, la b naag taab n namsdẽ.” (Rom dãmbã 8:22) Baa sã n wõnda y zu-loɛɛgã pa tol n tõe n paam tɩɩm wakat bilf pʋgẽ, naoor wʋsgo, wat n paama tɩɩm kaoosg zugẽ. La nananda, bõe la d tõe n maan tɩ sõng-do?
Gom-y y zu-loɛɛg yell ne y zoa hakɩɩka. Biiblã yetame yaa: “F zoa hakɩɩk nong-f-la wakat fãa. A yaa f ba-biig f sẽn tõe n teeg yel-pakr wakate.” (Yel-bũnã 17:17) A Zoob sẽn yaa nin-tɩrg ning yell b sẽn gomd Biiblã pʋgẽ wã togsa a taabã sẽn da be a sũurẽ, a sẽn wa n maood ne zu-loeesã. A Zoob yeelame yaa: “Mam yam yii m vɩɩmã. Mam pa na n bas m yẽgengã ye. Mam na n goma m toogã sẽn yaa kãsengã pʋgẽ!” (Zoob 10:1) D sã n gom d zu-loɛɛgã yell ne d taabã, tõe n kɩtame tɩ d yɩɩrã booge, la sõng tɩ d tagsg sẽn yaa to-to zu-loɛɛgã zugã toeeme.
Pelg-y y pʋg n pʋʋs Wẽnnaam. Neb kẽer tagsdame tɩ pʋʋsgã yaa bũmb sẽn sõngd ned bal t’a yam gãande. La Biiblã sẽn yetã yaa toore. Yɩɩn-sõamyã 65:2 wã pʋgẽ, b boonda Wẽnnaam a Zeova tɩ “Soab ning sẽn wʋmd pʋʋsgã,” tɩ 1 Pɩyɛɛr 5:7 wã yet t’a “geta yãmb yelle.” Naoor wʋsgo, Biiblã wilgdame tɩ teeg Wẽnnaamã yaa bũmb sẽn tar yõod wʋsgo. Wala makre:
“Teeg a Zeova ne f sũur fãa, la f ra teeg f meng bãngr ye. Fo sẽn maand fãa pʋgẽ bɩ f tags a yelle, la a na kɩt tɩ f soayã yɩ tɩrse.”—YEL-BŨNÃ 3:5, 6.
“A kõta sẽn zoet-b yẽ wã b sẽn dat tɩ sekdẽ. A wʋmda b sẽn kelemd n kot sõngrã, n fãagd-ba.”—YƖƖN-SÕAMYÃ 145:19.
“Ad bas-m-yam ning tõnd sẽn tar ne Wẽnnaamã: Yaa tɩ sẽn wa n yaa bũmb ning fãa la d kos tɩ zems ne a raabã, a kelgda tõndo.”—1 ZÃ 5:14.
“A Zeova zãra ne nin-wẽnsã, la a kelgda nin-tɩrsã pʋʋsgo.”—YEL-BŨNÃ 15:29.
Yãmb sã n togs Wẽnnaam zu-loees nins y sẽn maood ne wã, a na n sõng-y lame. Be bʋʋm la Biiblã sẽn sagend tõnd n yetẽ yaa: “Teeg-y-yã-a wakat fãa. Togs-y-yã-a bũmb nins sẽn be y sũurẽ wã.”—Yɩɩn-sõamyã 62:8.
ZĨ-LIKR RASEM 23-29
D SẼN BÃNG BIIBLÃ KARENG PƲGẼ | ZOOB 8–10
“Wẽnnaam nonglem-kãsengã kogenda tõnd ne a Sʋɩtãan zirẽ-beedã”
w15 1/7 12 s. a 3
D tõe n sɩd taa Wẽnnaam yam bɩ?
A Zoob mao ne zu-loees buud toor-toore. Ra wõnda zu-loe-kãens pa zems ye. A tagsgã ra pa zems ye. A ra tagsdame tɩ Wẽnnaam toog kae ne a sã n maanda sɩd ne-a bɩ a sã n pa maand sɩd ne-a. (Zoob 9:20-22) A Zoob ra kɩsa sɩd zãng-zãng ne a tɩrlmã, hal tɩ neb a taabã nifẽ, ra wõnda a yetame tɩ yẽ tɩrlmã yɩɩda Wẽnnaam.—Zoob 32:1, 2; 35:1, 2.
ZĨ-LIKR RASEM 30–SƖPAOLG RASEM A 5
D SẼN BÃNG BIIBLÃ KARENG PƲGẼ | ZOOB 11–12
“Bũmb a tãab d sẽn tõe n maan n paam yam tɩ naf-do”
it-2 851 s. a 5
Yam
Yam ning sẽn yit Wẽnnaam nengẽ wã. B sã n gomd yam yelle, d tõe n yeelame tɩ yaa Wẽnnaam a Zeova “a ye tãa n yaa yam soabã.” (Rom. 16:27; Vẽn. 7:12) Ned sẽn tar bãngr mii bũmb kẽere. Sẽn mik t’a Zeova n yaa Naandã, n be “hal wakat sẽn ka sɩngr n tɩ ta wakat sẽn ka saabo” (Yɩɩn. 90:1, 2), a mii bũmb nins fãa sẽn be ãndũniyã pʋgẽ wã, b sẽn tʋmd to-to wã la b sõorã sõma hal n tãag masã. Ãndũniyã bũmb fãa sẽn tũud noy ninsã yaa yẽ n lugli. Yaa no-kãens la ninsaalbã teeg n maand b vaeesgã, la b maand bũmb toor-toore. No-kãens sã n da kae, ninsaalbã ra pa na n bãng b sẽn maande, b ra pa na n paam bũmb me b sẽn tõe n tik n maan bũmb toor-toorã ye. (Zoob 38:34-38; Yɩɩn. 104:24; Yel. 3:19; Zer. 10:12, 13) Yaa vẽeneg tɩ noy nins a sẽn lugl sõma la wẽngã wɛɛngẽ wã sõngda ninsaalbã tɩ b tõe n paam sũur pʋgẽ bãane, tɩ b tõe n bãng n yãk yam, la b tõe n paam tɩ b vɩɩmã tall barka. (Tõo. 32:4-6; ges-y JÉHOVAH [Wẽnnaam ning sẽn lugl noy sõma la wẽngã wɛɛngẽ].) Bũmb kae a sẽn pa tõe n wʋm a võor ye. (Eza. 40:13, 14) Baa ne a Zeova sẽn tõe n bas tɩ bũmb kẽer sẽn pa zems ne a noyã sẽn yaa tɩrsã maandẽ hal n paam pãng wakat bilf pʋgẽ wã, yaa yẽ n so wakatã, n mi a sẽn na n maan to-to tɩ yɛlã baasgã zems ne a raabo, tɩ bũmb nins a sẽn togsã me pids n pa vaal ye.—Eza. 55:8-11; 46:9-11.
D bʋgs Wẽnnaam Gomdã zug neere
w08 1/8 11 s. a 5
Yẽsd-y ne kom-bɩɩsã
▪ ‘Mam modgdame n na n wʋm m biigã goamã võor bɩ?’ Zoob 12:11 wã yetame yaa: “Tʋbr ka kelgd goam n ges wa zɩlemd sẽn lembd rɩɩbã sɩda?” Sẽn yɩɩd fãa, yaa masã meng la y segd n kelg y bi-riblã bɩ y bi-puglã goamã n bao n wʋm b võor sõma. Naoor wʋsgo, kom-bɩɩsã gomda pada. Wala makre, y bi-ribã wall y bi-puglã tõe n yeela yãmb yaa: “Yãmb ket n geta maam wa yãaga!” bɩ “yãmb zɩ n kelg maam ye!” A sẽn yeel tɩ “ket” bɩ “zɩ” wã pa zems ye. La ra ning-y rẽ y yamẽ ye. Bãng-y tɩ tõe t’a sẽn yeel bũmb ningã pa wa yãmb sẽn tagsdã ye. Wala makre, y biigã sã n yeel yãmb tɩ “yãmb ket n geta yẽ wa yãaga,” tõe n dat n yeelame “t’a tagsdame tɩ yãmb pa kɩs-a sɩd ye.” A sã n yeel yãmb me yaa: “Yãmb zɩ n kelg maam ye.” Tõe n dat n yeelame “t’a rat n togsa yãmb sẽn be a sũurẽ.” Bao-y n wʋm-y b goamã võore.