Kiris-nebã vɩɩm la b tʋʋma tigissã na-kẽndr sebr not-rãmbã
© 2023 Watch Tower Bible and Tract Society of Pennsylvania
SƖPAOLG RASEM A 6-12
D SẼN BÃNG BIIBLÃ KARENG PƲGẼ | ZOOB 13–14
“Ninsaal sã n ki, a tõe n le vɩɩmdame bɩ?”
w99 15/10 3 s. a 1-3
D baoome n na n wogl ninsaal yõorã
NA MAAN yʋʋm 3500 woto, b wilga Biiblã pʋgẽ tɩ ninsaal vɩɩmã yaa koɛɛga. Baa ne sẽn kaoos woto wã, neb sẽn na n kɩɩs gomdã rũndã-rũndã wã sõor pa waoog ye. Hal n tãag masã, ninsaalbã getame tɩ b vɩɩmã sẽn kaoosd to-to wã pa sek ye. B bi-bɩɩlmã wakat pa kaoosde, rẽ poore, b kʋʋndame n wa baas n ki. Rẽ n kɩt tɩ b ket n maand bũmb toor-toor sẽn na yɩl n wogl ninsaal yõore.
A Zoob wakatẽ wã, Ezɩpt nebã ra wãbda rũmsã lambiisã sẽn na yɩl n le lebg kom-bɩɩse. La rẽ maaneg ra yaa zaalem. Pĩnd wẽndẽ wã, bũmb a ye sẽn da tar yõod n tɩ yɩɩd bãngdbã nifẽ yaa b tõog n maan tɩ-koom buud sẽn tõe n wogl ninsaal yõorã. Bãngdb wʋsg ra tagsdame tɩ b sã n tõog n toeem bũmb kẽer tɩ b lebg sãnem, na n kɩtame tɩ b vɩ n pa kiidẽ, la tɩ b sã n dɩt sãnem laas pʋsẽ, na n tõog n wogla ninsaal yõorã. Pĩnd wẽndẽ Sinoaamb kẽer b sẽn da boond tɩ taoïstes ra tagsdame tɩ b sã n bʋgsdẽ, n maand yĩn-wɩsgre, pa rẽ bɩ n dɩt rɩɩb buud toor-toore, b na n tõog n toeema ninsaal yĩngã sẽn tʋmd to-to wã, n paam n vɩ n pa kiidẽ ye.
A Juan Ponce de León sẽn yɩ Ɛspayn bãngdã yʋʋr yiime, bala a ra tẽedame tɩ ko-bũndum n be tɩ ned sã n yũud bɩ a pa kʋʋndẽ ye. Logtor a yembr sẽn zĩnd na maan yʋʋm 300 woto yeela a sebr a ye (Hermippus Redivivus) pʋgẽ tɩ b ning kom-pugli nins sẽn nan pa mi raoã ro-bil pʋgẽ sẽo-bila sẽn wat waoodã ne tʋʋlgã sʋkã wakate, n kok b vʋʋsmã b sẽn yiisdã n ning bugtells pʋsẽ, tɩ rẽ la b na n tall n wogl ninsaal yõorã. Bõn-kãensã baa a yembr maaneg pa yãk neng ye.
w15 15/4 32 s. a 1-2
B sã n kɛɛg tɩɩga, a na n le tobame bɩ?
D SÃ N na n mak Libã sɛɛdr tɩɩg ne Olɩɩv tɩɩga [Olea europaea], Olɩɩv tɩɩgã pa zem baa fʋɩ ye. La Olɩɩv tɩɩsã tara tõog n tõe n vɩɩmd n kaoose, baa ne zu-loe-kɛgemse. Olɩɩv tɩɩs kẽer tata yʋʋm 1000. Olɩɩv tɩɩg yẽgr tõe n le toba a toore, baa b sã n kɛ a sɛɛgã. A yẽgã sã n ket n vɩ, a wat n tobame.
A Zoob ra kɩsa sɩd zãng-zãng tɩ baa a sã n ki, a na n le vɩɩmdame. (Zoob 14:13-15) A rɩka makr ne tɩɩga, tõe tɩ ra yaa Olɩɩv tɩɩga, n na n wilg t’a kɩsa sɩd zãng tɩ Wẽnnaam tara tõog n na n vʋʋg-a. A Zoob yeelame yaa: “Bala baa tɩɩg meng tara saagre. B sã n kɛɛg-a, a na n le tobame.” Saag sã n wa sɩng niib n kɩt tɩ war-kãseng sa, Olɩɩv tɩɩg sɛɛg sẽn kʋɩ yẽg tõe n le tobame, “n tão wil wa tɩ-polle.”—Zoob 14:7-9.
it-2 443 s. a 2
Sulunsuka
Sulunsuk bedrem sẽn toeemd to-to n wa baas n menemã bee ne wĩntoogã sẽn kẽnd to-to wã. D tõe n dɩka sulunsuk sẽn toeemd to-to n wa baas n menemã n mak ne ninsaal vɩɩmã sẽn yaa koɛɛg to-to wã. (1 Kib 29:15; Zoob 8:9; 14:1, 2; Yɩɩn. 102:11; 144:4; Koɛ. 6:12; 8:13) Biiblã pʋgẽ, b sã n yeel tɩ ned ray “yaa wa zaabr maasem,” rat n yeelame tɩ pa na n kaoos la a soabã ki ye. (Yɩɩn. 102:11; 109:23) Tẽngã sẽn yilemd a meng zugã yĩnga, wĩntoogã sẽn kẽnd to-to wã kɩtame tɩ sulunsuk bedrem la a sẽn be zĩig ningã toeemd wakat fãa. La a Zeova yẽ pa toeemd ye. Wa a Zeezi karen-biig a Zak sẽn yeelã: “Yẽ pa tekde, la a pa toeemd wa maasem sẽn kẽndã ye.”—Zak 1:17.
SƖPAOLG RASEM 13-19
D SẼN BÃNG BIIBLÃ KARENG PƲGẼ | ZOOB 15–17
“A Elifaaz goamã wilgda d sẽn pa segd n bels ned to-to”
w05 15/9 26 s. a 4-5
D zãag d mens ne tags-kɛgã!
Naoor a tãabã fãa a Elifaaz sẽn gomã pʋgẽ, a wilgame tɩ Wẽnnaam yaa dem-dem wʋsgo, la tɩ bũmb nins fãa a nin-buiidã sẽn maandã pa tat a yam zãng ye. A Elifaaz yeela a Zoob yaa: “Gese! A pa kɩs a tʋm-tʋmdbã sɩd ye. A nifẽ, a malɛgsã yaa koangdba.” (Zoob 4:18) A Elifaaz wa n yeela Wẽnnaam wɛɛngẽ yaa: “Yẽ pa kɩs sẽn yaa-b sõamyã sɩd ye. La baa saasã pa yɩlemd a nifẽ ye.” (Zoob 15:15) Sẽn paase, a sokame yaa: “Fo sã n yaa nin-tɩrga, Sẽn-tõe-a-fãa wã toor beeme la?” (Zoob 22:3) A Bildaad sak n deegame t’a Elifaaz goamã yaa sɩda. A yeelame yaa: “Baa kiuugã meng pa peel a [Wẽnnaam] nifẽ, la ãdsã me pa yɩlem ye.”—Zoob 25:5.
D segd n gũusame n da wa tall tagsg a woto buud ye. Tõe n wa kɩtame tɩ d tagsd tɩ Wẽnnaam yaa dem-dem ne tõndo. D sã n tar tagsg a woto buudu, tõe n sãama tõnd ne a Zeova zoodã. Sẽn yɩɩd fãa, d sã n tar tagsg a woto buudu, d manesem na n yɩɩ wãna, b sã n wa kibl tõndo? Wall tɩ d sik d meng n sak kiblgã, d ‘sũurã na n puuga ne a Zeova,’ d tõe n talla sũ-kẽk me. (Yel-bũnã 19:3) Ad sɩd na n yɩɩ kaeto tẽebã wɛɛngẽ!
SƖPAOLG RASEM 20-26
D SẼN BÃNG BIIBLÃ KARENG PƲGẼ | ZOOB 18–19
“Ra tol-y n raag-y y tẽed-n-taasã n bas ye”
w90 1/9 22 s. 20
Yãmb modgdame n dat n paaam tʋʋm a taab tigingã pʋgẽ bɩ?
20 Kãsem-dãmb sull segd n sak n deegame tɩ b sã n deeg kãsem-soab bɩ kãsem-sõngd tʋʋmde, tõe n kɩtame t’a maand yɩɩre, baa a soabã sã n yãka yam n bas a tʋʋmdã. B sã n pa yiis a soabã tigingã pʋgẽ, tɩ kãsem-dãmba neẽ t’a sũur sãamame, b segd n sõng-a-la ne nonglem, t’a paam raood kengre. (1 Tesalonik rãmbã 5:14) B segd n sõng-a lame t’a bãng t’a tara yõod tigingã pʋgẽ. Baa sã n yɩɩ tɩlɛ tɩ b sagl-a, pa segd n kaoos wʋsg tɩ ned sẽn yaa sik-m-meng soaba, la sẽn wilg t’a sũur nooma ne saglsã le paam tɩ b kõ-a tʋʋm kẽer tigingã pʋgẽ ye.
D bʋgs Wẽnnaam Gomdã zug neere
w94 1/10 32
Gom-noog sẽn tar pãng to-to
La a Zoob mengã sẽn wa n dat raood kengrã, a Elifaaz ne a tũud-n-taasã pa togs-a goam sẽn kengd raood ye. B ninga a Zoob tall zu-loees nins a sẽn da maood ne wã yĩnga, n yetẽ t’a maana yel-wẽn n yaool n solg n pa togs ye. (Zoob 4:8) Biibl a yembr (The Interpreter’s Bible) pʋgẽ, b yeelame yaa: “A Zoob sẽn da rat yaa tɩ ned kʋm a nimbãanega. La a sẽn da wʋmdã bal yaa tũudum yɛl goam sẽn pa sɩda, la goam sẽn ningd-a taale.” A Zoob sẽn da kelgd a Elifaaz ne a tũud-n-taasã goamã, a sũurã sãama wʋsgo. Kɩtame t’a leok-b n yeel yaa: “Yãmb na n yikda mam sũurã n namsd maam ne y goamã n tãag dabʋre?”—Zoob 19:2 2.
D pa tol n dat tɩ d tẽed-n-taag sũur sãam t’a yãbe, d sẽn togs-a goam n pa reng n tags yĩnga. (Ges-y Tõodo 24:15.) Biiblã yeta tõnd yaa: “Zɩlemd tõe n kɩtame tɩ ned vɩɩmd wall a ki. Neb nins sẽn nong goamã na n dɩɩ b biisi.”—Yel-bũnã 18:21.
SƖPAOLG RASEM 27–YƲƲM-SAR RASEM A 3
D SẼN BÃNG BIIBLÃ KARENG PƲGẼ | ZOOB 20–21
D bʋgs Wẽnnaam Gomdã zug neere
w95 1/1 9 s. 19
D paam tõogr a Sʋɩtãan ne a tʋʋmã zugu
19 D bãng tɩ wẽn-tũud a Zoob ra segd n mao ne ‘tagsa sẽn namsd-a,’ a Sʋɩtãan sẽn tũnug ne a Elifaaz la a Sofaar n taase. (Zoob 4:13-18; 20:2, 3) Rẽ kɩtame t’a Zoob ra tar ‘toogo.’ A ‘gomame n pa tagse,’ ‘rabeem-kãsengã’ sẽn da kẽ-a wã wɛɛngẽ. (Zoob 6:2-4; 30:15, 16) A Elihu maaga a yĩng n kelg a Zoob la a sõng-a ne a sũur fãa t’a bãng a Zeova sẽn yaa yam-kãseng soabã sẽn get yɛlã to-to wã. Rũndã-rũndã me, kãsem-dãmb nins sẽn yaa wʋmdbã wilgdame tɩ neb nins sũy sẽn sãamã yell pak-b lame. B pa togsd goam sẽn na n “nams” nin-kãens ye. La wa a Elihu, b maagda b yĩng n kelgd-ba, n sõod-b kaam sẽn bukd b sũyã, rat n yeel tɩ b tẽegd-b-la bũmb nins sẽn be Wẽnnaam Gomdã pʋgẽ wã. (Zoob 33:1-3, 7; Zak 5:13-15) Dẽnd ned ning fãa sẽn zãmsd zãms-yoodo, tɩ b yaa sɩd bɩ ziri, pa rẽ bɩ b sã n yɛɛsd-a “ne zãmsdo, la ne vẽnegr toor-toor” wa sẽn yɩ to-to ne a Zoobã, nin-kãng soabã tõe n paama belsg tigingã pʋgẽ, ne Gʋls-sõamyã maasem.—Zoob 7:14; Zak 4:7.
YƲƲM-SAR RASEM A 4-10
D SẼN BÃNG BIIBLÃ KARENG PƲGẼ | ZOOB 22–24
“Ninsaal tõe n tall yõod Wẽnnaam nifẽ?”
w05 15/9 27 s. a 1-3
D zãag d mens ne tags-kɛgã!
A Elifaaz sẽn yeel tɩ Wẽnnaam yaa dem-dem wʋsgã, rat n yeelame me tɩ ninsaalbã pa tar yõod a nifẽ ye. A Elifaaz sẽn wa n gomd noor a tãab-n-soabã, a sokame yaa: “Ninsaal tõe n tall yõod Wẽnnaam nifẽ? Ned sẽn tar yam tõe n nafa Wẽnnaam sɩda?” (Zoob 22:2) Sã n yaa ne a Elifaaze, ninsaal ka tar yõod Wẽnnaam nifẽ ye. A Bildaad me togsa goam sẽn wõnd woto. A sokame yaa: “Wãn to la ninsaal sẽn yaa kiidã tõe n yɩ tɩrg Wẽnnaam taoore, bɩ wãn to la ninsaal pag sẽn dogã tõe n pa tall taale?” (Zoob 25:4) Sã n yaa ne b goamã, a Zoob sẽn da yaa kiidã ra pa tõe n yɩ tɩrg Wẽnnaam taoor ye.
Rũndã-rũndã me, neb kẽer tara tags-kɛg b mensã zugu. Bũmb toor-toor n tõe n kɩt tɩ yaa woto. Wala makre, b sẽn wub-b to-to wã, vɩɩmã zu-loeesã, bu-welsgã la kis-taabã. La a Sʋɩtãan ne a zĩn-dãmbã me namsda nebã, tɩ b sũy yaa noogo. B sã n tõog tɩ ned tags tɩ bũmb nins fãa a sẽn maandã pa tat Wẽnnaam sẽn tõe fãa wã yam, kɩtdame tɩ b tõe n koms a soabã raood nana-nana. Tarẽ-n-tarẽ, nin-kãng tõe n wa bʋdg n basa tẽebã, hal n zãag a meng ne Wẽnnaam ning sẽn vɩ wã.—Ebre-rãmbã 2:1; 3:12.
D yʋʋmã sẽn vẽsgdã, la laafɩ wã zu-loees tõe n kɩtame tɩ d pa le tõe n maan bũmb kẽer ye. Tõe n wõnda tʋʋm nins d sẽn tʋmd Rĩungã yĩngã masã wã tolg n yaa bilfu, d sã n mak rẽ ne tʋʋm nins d sẽn da tʋmd Rĩungã yĩngã, d sẽn wa n yaa bi-bɩɩgã, n tar keelem la laafɩ wã sasa. Tara yõod tɩ d bãng t’a Sʋɩtãan ne a zĩn-dãmbã ratame tɩ tõnd tagsdẽ tɩ bũmb nins fãa d sẽn maandã pa tat Wẽnnaam yam zãng ye! D segd n zãaga d meng ne tags-kɛg a woto buudu.
w95 15/2 27 s. a 6
Mak-sõng d sẽn tõe n welg d zu-loeesã to-to wã wɛɛngẽ
A Zoob zo-rãmb a tãabã sãama a sũuri, ne b mensã tagsgã. B goamã pa wilg tɩ b ra tara yam ning sẽn yit Wẽnnaam nengẽ wã ye. A Elifaaz maaname tɩ loog noor menga. A yeelame t’a ‘Zeova pa kɩs a tʋm-tʋmdbã sɩda,’ la t’a toor ka be ne a Zoob sã n yaa nin-tɩrg bɩ a ka nin-tɩrg ye. (Zoob 4:18; 22:2, 3) Ad sɩd yaa goam sẽn komsd raood meng-menga, la sẽn yaa ziri fasɩ! Pa lingr la a Zeova sẽn wa n kibl a Elifaaz ne a tũud-n-taas a tãabã gom-kãngã b sẽn togs tɩ pa sɩda yĩnga. A yeel-b lame yaa: “Yãmb pa togs sɩd mam zug ye.” (Zoob 42:7) La goam nins sẽn tolg n yaa wẽng n yɩɩdã ra keta taoore.
D bʋgs Wẽnnaam Gomdã zug neere
w04 15/7 21-22
Modgd-y n dat n wa paam tʋʋm a taab tigingã pʋgẽ, tɩ waoog y Naandã
D tags n ges a Zeova sẽn naan ãndũniyã to-to. B sẽn yeel Biiblã pʋgẽ tɩ “zaabr zĩndame, tɩ yibeoog zĩnda,” wilgdame t’a Zeova naana bũmb fãa a wakate. (Sɩngre 1:5, 8, 13, 19, 23, 31) Bũmb fãa naaneg fãa sɩngrẽ, a ra zoe n mii a sẽn dat n maan daar-n-kãnga, bɩ a bõn-daabã sẽn yaa a soab daar-n-kãnga. Dẽnd Wẽnnaam sɩd pidsa a bõn-daabã, n naan bũmb fãa. (Vẽnegre 4:11) A Zoob ra yeelame yaa: “Yẽ [a Zeova] sã n dat n maan bũmbu, a maandame.” (Zoob 23:13) “Wẽnnaam gesa bũmb nins fãa a sẽn maanã,” n yeel tɩ ra yaa “sõma wʋsgo.” Yaa vẽeneg t’a sũur yɩɩ noog wʋsgo.—Sɩngre 1:31.
Sẽn na yɩl tɩ tõnd bõn-daabã tõog n pidsi, tõnd me segd n data ne d sũur fãa n pids-ba. Bõe n na n sõng-d tɩ d rat ne d sũur fãa n pids d bõn-daabã? Baa ne a Zeova sẽn da nan pa sɩng tẽngã naanegã, a ra zoe n nee a baasgã sẽn na n yɩ to-to. Ra na n yɩɩ zĩ-neere, sẽn na n sõng t’a yʋʋrã paam waoogr la ziiri. Woto me, tõnd me sã n bʋgsd d bõn-daabã pidsg sẽn na n wa ne nafa ninsã zugu, na n sõng-d lame tɩ d maneg n dat ne d sũur fãa n pids d bõn-daabã. Yɩɩ woto ne a Tony. A ra tara yʋʋm 19. A zɩɩ n yĩm a sũur sẽn yɩ noog to-to, a sẽn kẽng pipi Erop deluwɛst n tɩ gil n ges a Zeova Kaset rãmbã Betɛll ye. Rẽ tɛka, a Tony ra sokda a meng yaa: ‘Ned sã n vɩ zĩig a woto pʋgẽ, n tʋmd be, a vɩɩmã na n yɩɩ wãna?’ A Tony ra ket n tagsda bõn-kãng yelle, n da maand modgr sẽn na yɩl n pids a bõn-daabã. A sũur sɩd yɩɩ noog wʋsgo, bala yʋʋm a wãn poore, b sakame t’a na n kẽng n tɩ tʋmd Betɛllẽ!
YƲƲM-SAR RASEM 11-17
D SẼN BÃNG BIIBLÃ KARENG PƲGẼ | ZOOB 25–27
“Yɩ burkĩnã pa rat n yeel tɩ d yɩ ned sẽn zems zãng ye”
it-1 1194 s. a 5
Burkĩndi
A Zoob. Yaa vẽeneg t’a Zoob vɩɩmda a Zozɛf kaalmã poore, n tall n tãag a Moyiiz wakatẽ wã sʋka. Biiblã goma a Zoob yelle, n yeel yaa: “A ra yaa nin-tɩrga, [Ebre., tam] n yaa ned sẽn pa tar taale. Yẽ ra zoeta Wẽnnaam, n zãagd a meng ne wẽnga.” (Zoob 1:1; ges JOB.) Ninsaalbã burkĩndã tara loees ne no-koeemd ning sẽn be Wẽnnaam a Zeova ne a Sʋɩtãan sʋkã. Bũmb sẽn wilgd rẽ vẽeneg yaa sokr ning Wẽnnaam sẽn sok a bɛ a Sʋɩtãan a Zoob wɛɛngẽ, malɛgsã sẽn wa n kẽ n yals Wẽnnaam taoor saasẽ t’a Sʋɩtãan me wa kẽ wã. A Sʋɩtãan yeelame t’a Zoob sẽn tũud Wẽnnaamã pa ne yam-sõngo, tɩ pa a sẽn nong-a wã yĩng la a tũud-a, la tɩ yaa a meng nafr yĩng bala. Sã n yaa ne yẽ, a Zoob ra pa burkĩn ye. A Zeova kõo a Sʋɩtãan sor t’a kɩt t’a Zoob bõn bũmb nins a sẽn tarã, a kamba sẽn naage. La a Sʋɩtãan pa tõog t’a Zoob bas a burkĩndã ye. (Zoob 1:6–2:3) Rẽ poore, a yeelame t’a Zoob sẽn tõogd toog baa ne a kambã kaalmã, la a sẽn bõn a paoongã, yaa a sẽn dat n fãag a meng vɩɩmã yĩnga. (Zoob 2:4, 5) Rẽ poor me, a Sʋɩtãan loba a Zoob nod-tãoodse. A Zoob pagã da ratame t’a Zoob kɩɩs Wẽnnaam. A Zoob zo-rãmbã sẽn da pa wʋmd Wẽnnaam noyã la a raabã võorã wɩd-a lame la b yaal-a. (Zoob 2:6-13; 22:1, 5-11). La baa ne rẽ, a Zoob yeel-b lame t’a ra pa na n tol n bas a burkĩndã ye. A yeelame yaa: “Hal n tãag m kũum, mam kõn bas m burkĩndã ye! Mam na n kell n gãda m tɩrlmã, m kõn tol n bas-a ye. Mam sã n ket n vɩ, m sũurã pa na n ning-m taal ye.” (Zoob 27:5, 6) A sẽn kell n tall a burkĩndã, a wilgame tɩ Wẽnnaam bɛ wã yaa ziri-yagda.
YƲƲM-SAR RASEM 18-24
D SẼN BÃNG BIIBLÃ KARENG PƲGẼ | ZOOB 28–29
“Yãmb tara yʋ-noog wa a Zoob bɩ?”
it-2 1144 s. 10
Fu-yerdɩ
B rɩka makr ne fu-yerdɩ wã n na n bilg bũmb toor-toor võore. Fuug ning tõe n sõngame tɩ b bãng ned sẽn be siglg ning pʋgẽ, pa rẽ bɩ sull ning neb a sẽn teende. Woto me, Biiblã pʋgẽ, b mi n dɩka makr ne fu-yerdɩ wã n na n wilg ned ning sẽn yelg-a wã yam-yãkre, la tʋʋm nins a sẽn tʋmde, tɩ zems ne fuugã a sẽn yelgã. Yɩɩ woto ne makr ning a Zeezi sẽn dɩk yi-kãadem fuugã wɛɛngẽ wã. (Mat. 22:11, 12; ges COIFFURE; SANDALE.) Vẽnegr 16:14, 15 wã pʋgẽ, tõnd Soaal a Zeezi Kirist sagla tõnd tɩ d gũus n da wa gũs tẽebã wɛɛngẽ, tɩ kɩt tɩ d pa le yaa Wẽnnaam sɩd-sɩdã kaset soab ye. Rẽ tõe n yɩɩ kaeto, “Wẽnnaam Sẽn-tõe-a-fãa wã ra-kãsengã zabrã” sẽn kolgdã sasa.
w09 1/2 15 s. a 3-4
Yʋʋr sẽn tar võore
Yʋʋr ning b sẽn kõ tõnd d sẽn wa n yaa bi-pɛɛlgã wɛɛngẽ, d ra pa tar d sẽn maand ye. La yaa tõnd mengã manesmã n na n wilg d sã n tara yʋ-noogo, bɩ d pa tar yʋ-noogo. (Yel-bũnã 20:11) Bɩ y sok y meng yaa: ‘A Zeezi ne tẽn-tʋmdbã sã n da paama segb n na n pʋd maam yʋʋre, yʋ-bʋg la b na n pʋd maam? Yʋ-bʋg n na n wilg zʋg-sõng ning mam sẽn bɩɩs n tɩ yɩɩda, pa rẽ bɩ n wilg mam sẽn yaa ned ning buudã?’
Sok-kãngã baoodame tɩ d maneg n tags a zug neere. Bõe yĩnga? Rĩm a Salomo sẽn da yaa yam soabã yeelame yaa: “F sẽn na n tar yʋ-noog n são arzɛk wʋsgo.” (Yel-bũnã 22:1) Yaa vẽeneg tɩ d sã n tar yʋ-noog zĩig ning d sẽn beẽ wã, yaa bũmb sẽn tar yõod wʋsgo. La sẽn yɩɩd fãa d sã n tar yʋ-noog Wẽnnaam taoore, d na n wa paama bark sẽn kõn sa. Wãn to? Wẽnnaam pʋlmame t’a na n gʋlsa neb nins sẽn zoet-a wã yʋy a ‘tẽegr sebrã’ pʋgẽ, la a wa kõ-b vɩɩm sẽn kõn sa wã.—Malaki 3:16; Vẽnegre 3:5; 20:12-15.
D bʋgs Wẽnnaam Gomdã zug neere
g00 8/7 11 s. a 3
Mi n yõgemd-y y noore. Na n paasa y laafɩ wã!
Rẽ yĩnga, ned sã n yõgemd a noor ne-yã toeemda bũmb bɩ? Yãmb tẽra ned sẽn yõgemd a noor ne-yã, tɩ kɩt tɩ y paam sũur pʋgẽ bãan bɩ? Bɩ ned sẽn pa yõgemd a noor ne-yã tɩ kɩt tɩ y sũur yiki, pa rẽ bɩ y tagsdẽ t’a raag-y lame n bas bɩ? Hakɩɩka, ned sã n yõgemd a noor ne-yã, toeemda bũmbu. Nafda neb a yiibã fãa: Ned ning sẽn yõgemd a noorã, la ned ning b sẽn yõgemd b noor ne-a wã. Biiblã pʋgẽ, a Zoob yeela a bɛɛbã yaa: “Mam sã n da yõgemd m noor ne-ba, b ra pa tẽed ye. Mam nengã vẽenem ra kengda b pelse.” (Zoob 29:24) Tõe t’a Zoob “nengã vẽenem” wilgda a sũ-noogã.
YƲƲM-SAR RASEM 25-31
D SẼN BÃNG BIIBLÃ KARENG PƲGẼ | ZOOB 30–31
“A Zoob sẽn maan to-to n kell n yɩ yɩlemd a tagsã pʋgẽ”
w08 1/9 11 s. a 4
Tags-y ‘bũmb ning sẽn na n paam-yã yelle’
Nand tɩ y tũ sor a woto buudu, sok-y y meng yaa: ‘So-kãngã rebda yɛ?’ Y sã n maag y yĩng n deng n tags ‘bũmb ning sẽn na n paam-yã yelle,’ tõe n gɩdga yãmb tɩ y ra wa yãk yam n maan bũmb sẽn na n wa ne zu-loe-kɛgems ye. Neb nins sẽn yãk yam n maand b toog kae ne a Zeova noyã la a saglsã sẽn yaa wa sor zug pano-rãmbã paamda zu-loees buud toor-toore. Wala makre, kẽer bẽeda SIDA wã la taoor bãas a taaba, kẽer rɩkda pʋs n yaool n pa rata, sãnda yiisda pʋsã, kẽer zood ne b taabã sãamdame, tɩ sãnda sũur-kaset pa le tʋmd sõma ye. Tẽn-tʋmd a Poll wilga neb nins sẽn yoodã baasgã sẽn na n yɩ to-to wã vẽenega. A yeelame tɩ b “pa na n paam Wẽnnaam Rĩungã” ye.—1 Korẽnt rãmbã 6:9, 10.
D bʋgs Wẽnnaam Gomdã zug neere
w05 15/11 11 s. a 3
D sẽn tõe n maag d yĩng n kelg ned ne nonglem to-to
A Zoob tũud-n-taasã ra wʋma a Zoob goamã, sẽn yɩɩd naoor piiga. La a Zoob yeelame yaa: “M da nongẽ-la ned sẽn na n kelg maam!” (Zoob 31:35) Bõe yĩng t’a yeel woto? Bala b kelga a Zoob la b pa bels-a baa bilfu. A Zoob yell ra pa pak-ba, b ra pa rat me n wʋm a tagsa wã võor ye. Yaa vẽeneg tɩ b pa maag b yĩng n kelg-a, n wilg tɩ b kʋmda a nimbãaneg ye. La tẽn-tʋmd a Pɩyɛɛr sagla tõnd yaa: “Bɩ y fãa tall yam a yembre, n kʋmd taaba, n tar saam-biir nonglem, n zoet taab nimbãaneg la y tar sik-m-menga.” (1 Pɩyɛɛr 3:8) Wãn to la d tõe n wilg tɩ d kʋmda d taabã nimbãanega? Bũmb a ye yaa d sẽn na n wilg tɩ d taabã sẽn tagsd bũmb ningã paka tõndo, la d bao n wʋm b tagsgã võore. D sã n togs-b goam sẽn wilgd tɩ d kʋmda b nimbãanega, na n sõngame tɩ b bãng tɩ b yell pak-d lame. Wala makre, “yellã sãamda sũuri,” bɩ “yellã sɩd namsa foom.” Bũmb a to me d sẽn tõe n maan yaa d sẽn na n lebg n dɩk a soabã goamã ne d mengã gom-biisi, tɩ wilg tɩ d wʋmda a soabã sẽn yetã võore. Maag f yĩng n kelg ned ne nonglem rat n yeelame tɩ f maag f yĩng n kelg a sẽn yetã. La pa rẽ bal ye. F segd n maaga f yĩng n bao n wʋm a sẽn yetã võore.