A Zeezi ne a karen-biisã sẽn yi Zeriko n wa Betani wã, b gãanda be yʋnd a tãabo. La Nizã rasem 10 sẽn yaa tẽnẽ daarã, b yika yibeoog pĩnd n teesd Zeruzalɛm. Kom n da tar a Zeezi. A wa n yãa kankanga, n kẽng n na n tɩ yãk kankama. A paamame bɩ?

Ra yaa tʋʋlg kiuugã baasgẽ, tɩ yaool n yaa sigr kiuugã la kankamã wakate. La kankangã ra zoe n tobame. Dẽnd a Zeezi tagsame tɩ tɩɩgã woma pĩnda, la a pa yã baa fʋɩ. Tɩɩgã vãad belgda neda. A Zeezi yeela kankangã yaa: “Ned kõn leb n dɩ fo biis yɛs ye.” (Mark 11:14) Zĩig pʋgẽ, tɩɩgã sɩnga kʋɩɩbo. Yɩɩ vẽkembeoogã la karen-biisã wʋm a Zeezi sẽn kãab tɩɩgã võore.

Pa kaoos la a Zeezi ne a karen-biisã ta Zeruzalɛm ye. A Zeezi kẽnga wẽnd-doogẽ wã. A zĩnda be tɩ zaamẽ, n maag a yĩng n ges bũmb ning fãa sẽn be beenẽ wã. La so-kãngã wã, a pa ges bal ye. A maana bũmb a sẽn da maan yʋʋm a tãab sẽn looge, yʋʋmd 30 Pakã sasa. (Zã 2:14-16) A riga “neb nins sẽn be beenẽ n koosdẽ, la neb nins sẽn be beenẽ n daadẽ wã.” A “leeba ligd tekdbã taabl-dãmba, ne wan-koaasdbã goeelse.” (Mark 11:15) A pa bas meng tɩ ned pasg wẽnd-doogã zak pʋgẽ ne teedo, bala nebã ra rɩka be n maan b so-koɛɛga.

Bõe yĩng t’a Zeezi rig neb nins sẽn da tekd ligd la b koosd rũms wẽnd-doogẽ wã? A yeelame: “Rẽ yĩnga, b ka gʋls tɩ ‘b na n boola mam doogã tɩ pʋʋsg roog buud fãa yĩng’ sɩda? La yãmb maan-a lame t’a lebg wagda geongo.” (Mark 11:17) A Zeezi sẽn bool nin-kãensã tɩ wagda wã, a bee bʋʋm. Bala ned sã n da wa na n da rũng n maan maoongo, b koosda toogo. Sã n yaa ne a Zeezi tagsgo, b sẽn maandã yaa wagdem bɩ fãabo.

Maan-kʋʋdbã kãsem-dãmbã, tõog karen-saam-dãmbã n paas kãsem-dãmbã sẽn wʋm bũmb ning a Zeezi sẽn maanã, b le sɩngame n baood b sẽn na n maan n kʋ-a. La ra yaa toog tɩ b paam-a, bala nebã ra kaoogd n wata a nengẽ n na n kelg-a.

Zʋɩf-rãmbã, n paas neb sẽn da tuub n sak zʋɩf-rãmbã tũudmã waa Pakã. Wala makre, gɛrk-rãmba. B wa n kosa a Filip n na n yã a Zeezi, la tõe tɩ yaa a Filip yʋʋrã sẽn yaa ne gɛrkã. A ra pa mi a sã n tog n tɩ yeela a Zeezi ye. Rẽ n so t’a gom ne a Ãndere. Bãmb b yiibã n tũ taab n tɩ togs a Zeezi. Wõnda a ra keta wẽnd-doogẽ wã wakat kãnga.

A Zeezi ra miime t’a kũumã keta rasem a wãn bala. Dẽnd pa wakat kãng la a na n bao n maan nebã sẽn datã, bɩ n bao yʋʋr ye. Rẽ n so t’a leok tʋm-tʋmdb a yiibã ne yel-bũndi, n yeel-b yaa: “Wakat taame tɩ ninsaal Bi-riblã tog n paam waoogre. Mam yeta yãmb sɩd-sɩd tɩ ka-buug sã n ka kẽ tãndẽ n pa be n ki, a paada a yembre. La a sã n ki, a womda biis wʋsgo.”—Zã 12:23, 24.

Ka-beell tõe n wõnda bũmb sẽn ka yõodo, sẽn yaa a yembrã yĩnga. La b sã n bʋd-a t’a ki, a bundame n yi, n wa lebg kaaf n wom ka-bɛɛla. Woto me, a Zeezi a ye n yaa ninsaal sẽn pa tar yel-wẽnde. A sã n kell n sak Wẽnnaam n tãag a kũum, na n kɩtame tɩ neb ka tɛk wa tõog n paam vɩɩm sẽn kõn sa, neb sẽn na n sak n mong b meng bũmb wʋsg wa yẽ. A meng yeela woto: “Ned ning sẽn nong a vɩɩm menesd-a lame. La ned ning sẽn na kisg a vɩɩm dũni-kãngã pʋgẽ, a na n bĩng-a-la wakat sẽn kõn sa wã yĩnga.”—Zã 12:25.

A Zeezi ra pa tagsd a meng yell bal ye. A yeela woto: “Ned sã n dat n tʋm mam yĩnga, bɩ a tũ maam. La mam sẽn be zĩig ninga, mam tʋmtʋmdã me na n bee be. Ned sã n tʋmd mam yĩnga, m ba na n waooga a soaba.” (Zã 12:26) Woto yaa bark meng-menga! Sɩd me, neb nins Wẽnnaam sẽn na n waoogã na n paam n naaga Kirisã n dɩ naam saasẽ Rĩungã pʋgẽ.

A Zeezi ra tagsda b sẽn na n nams-a, hal t’a ki kũ-toaagã. Rẽ kɩtame t’a yeele: “Sũ-sãang n tar maam. La mam na n yeelame tɩ bõe? Mam na n yeela m ba tɩ b fãag maam ne wakat-kãng bɩ?” A Zeezi ra pa rat n maan tɩ Wẽnnaam daabã vaal ye. A yeelame: “La hal tɩ ta moasã, yaa wakat-kãng yĩng la mam wa-yã.” (Zã 12:27) A Zeezi saka Wẽnnaam sẽn dat fãa, hal n sak n ki tɩ yɩ maoongo.

Nizã kiuugã rasem 10 sẽn yɩ tẽnẽ daarã, a Zeezi zĩnda wẽnd-doogẽ wã. A goma a kũumã sẽn da kolgã yelle. A ra maanda yɩɩre, a kũumã sẽn na n sãam Wẽnnaam yʋʋrã. Rẽ n so t’a yeel yaa: “M ba, waoog-y y yʋʋrã!” Koe-kãseng yii saasẽ n yeele: “Mam waooga m yʋʋrã, la m na n le waoog-a lame yɛsa.”—Zã 12:27, 28.

Nebã yɛɛsame. Kẽer ra tẽedame tɩ yaa saagã n tãse, tɩ sãnda yetẽ tɩ “malɛɛk n gom ne a Zeezi.” (Zã 12:29) La yaa a Zeova koɛɛgã la b sẽn wʋmã. Pa pipi la woto Wẽnnaam sẽn zĩnd saasẽ n gom tɩ neb wʋme, a Zeezi sẽn wa n be tẽngã zugã ye.

Yʋʋm a tãab la pʋɩ-sʋk woto, a Zeezi lisgã sasa, a Zãmbatiis wʋma Wẽnnaam sẽn zĩnd saasẽ n yeele: “Ada yaa mam Bi-ribl-nongr sẽn ta mam yam zãnga.” Yʋʋmd 32 Pakã poor me, a Zeezi tedga a Zak ne a Zã la a Pɩyɛɛr taoore. Baraarã, bãmb b tãabã fãa wʋma Wẽnnaam sẽn yeel yaa: “Ada yaa mam Bi-ribl-nongr sẽn ta mam yam zãnga. Kelg-y-yã-a.” (Matye 3:17; 17:5) Dẽnd yaa naoor a tãab-n-soab masã la Wẽnnaam zĩnd saasẽ n gome. La so-kãnga wã, neb wʋsg n wʋme.

A Zeezi yeelame: “Ka mam yĩng la koɛɛgã sẽn gom tɩ yãmb wʋmã ye, yaa yãmb yĩnga.” (Zã 12:30) Koɛɛgã yɩɩ kaset t’a Zeezi sɩd yaa Wẽnnaam Biiga, Mesi ning sẽn da tog n wa-a wã.

Sẽn paase, a Zeezi sẽn kell n sak Wẽnnaam a vɩɩmã tõrã wilgda ninsaal sẽn tog n vɩɩmd to-to, la wilgdẽ me t’a Sʋɩtãan sẽn yaa dũniyã naabã segda ne sãoongo. A Zeezi yeelame: “Moasã yaa dũni-kãngã bʋʋd wakate. Moasã, b na n diga dũni-kãngã naabã n bas yɩnga.” B sẽn na n kʋ a Zeezi wã pa rat n yeel tɩ b tõog-a lame ye. Yẽ n pʋd n tõoge. Bõe yĩng tɩ d yet woto? A mengã yeelame: “B sã n wa n zẽk maam tɩ m bas tẽn-gãongã, mam na n taka nebã fãa [“neb buud fãa,” MN] tɩ b wa m nengẽ.” (Zã 12:31, 32) Sɩd me, a Zeezi sẽn na n sak n ki ra-lukã zugã, na n paka sor tɩ neb wʋsg lebg yẽ neba, n wa paam vɩɩm sẽn kõn sa.

A Zeezi sẽn yeel tɩ b na n wa zẽka yẽ wã, kʋʋngã yeela woto: “A Moyiis tõogã wilga tõnd tɩ Kirisã paada wakat sẽn kõn sa. Bõe tɩ yãmb yetẽ tɩ yaa tɩlɛ tɩ b zẽk Ninsaal Bi-riblã? Ninsaal Bi-ribl-kãng yaa ãnda?” (Zã 12:34) Baa nebã sẽn wʋm Wẽnnaam mengã koɛɛgã, tɩ bũmb wʋsg me ra wilgd t’a Zeezi sɩd yaa Wẽnnaam Biiga, la Mesi wã, wʋsg pa sak n deeg ye.

A Zeezi le yeel-b lame tɩ yẽ yaa “vẽenem.” (Zã 8:12; 9:5) A yeela kʋʋngã woto: “Vẽenemã ket n bee yãmb sʋk wakat bilf yĩnga. Yãmb sẽn tar vẽenemã wakate, bɩ y kẽne, tɩ lik bida da wa n ling yãmb ye. . . . Wakat ning yãmb sẽn tar vẽenemã, bɩ y tẽ-a, tɩ y na lebg vẽenem kamba.” (Zã 12:35, 36) Rẽ poore a Zeezi loogame, bala pa Nizã rasem 10 daar la a tog n ki ye. Yaa Nizã rasem 14 sẽn yaa Pakã daarã la b na n zẽk-a, rat n yeel tɩ n ka-a raoog zugu.—Galat-dãmbã 3:13.

A Zeezi sẽn moon koɛɛgã tɩ zʋɩf-rãmbã pa tẽ-a wã, pidsa gomd Biiblã sẽn da togse. A Ezayi pĩnd n togsame tɩ nebã ra na n lebga wa zoense, la tɩ b sũyã na n diglmame, tɩ rẽ kɩt tɩ b pa sak n tek yam n paam maagr ye. (Ezayi 6:10; Zã 12:40) Sɩd me, baa ne bũmb wʋsg sẽn wilgd t’a Zeezi n yaa fãagda, n tõe n kɩt tɩ b paam vɩɩmã, zʋɩf-rãmb wʋsg maana yalemd n pa sak n deeg ye.

La a Nikodɛm ne a Zozɛf sẽn yit Arimate wã ne nanambs wʋsg sak n “tẽe a Zeezi.” La rẽ yĩnga, nin-kãensã na n kell n talla tẽeb bɩ, bɩ b na n komsa raoodo, b sẽn yɛɛsd b na n wa rig-b n yiis karen-doogẽ wã, bɩ b sẽn ‘nong ninsaalbã waoogrã’ yĩnga?—Zã 12:42, 43.

A Zeezi mengã wilga tẽ yẽndã wã võore. A yeelame: “Sẽn tẽed-a maam ka tẽed maam ye, yaa sẽn tʋm-a maamã la a tẽeda, la sẽn yãa maam yãa sẽn tʋm-a maamã.” Koɛɛg ninga Wẽnnaam sẽn tʋm a Zeezi t’a wa taas nebã yaa yõor yelle, hal t’a Zeezi meng yeel yaa: “Sẽn tõdg-a maam la a ka reegd mam goamã, a tara a bʋ-kaooda: Goam nins mam sẽn goma n na n kao yẽnda bʋʋd yaoolem daare.”—Zã 12:44, 45, 48.

Baraarã, a Zeezi baasa sõsgã n yeel woto: “Mam goamã ka yit mam nengẽ ye. La m ba, sẽn tʋm-a maamã, bãmb b toor n wilg maam m sẽn tog n yeel la m gome. La mam miime tɩ bãmb noorã yaa vɩɩm sẽn kõn sa.” (Zã 12:49, 50) A Zeezi ra miime tɩ pa na n kaoos la a raag a zɩɩmã tɩ yɩ maoongo, neb nins sẽn na n tall tẽeb ne yẽ wã fãagr yĩnga.—Rom-dãmbã 5:8, 9.