M komsda raood zu-loees taoor bɩ?

Fo komsda raood zu-loees taoor bɩ? Fo maooda ne zu-loees nins sẽn pʋgdã a ye bɩ?

• F ned sẽn maan kaalem

• Bãag sẽn tõt saabo

• Sabab-wẽnga

Vaeesdb kẽer wilgame tɩ pa zu-loe-kɛgeng taoor bal la f segd n tõog toog ye. Baa zu-loees nins d sẽn maood ne daar fãa wã tõe n kɩtame tɩ d lʋɩ bãaga. Rẽ n so tɩ tar yõod tɩ f tall raoodo, sẽn yaa zu-loɛɛg ning fãa taoore, wall a sẽn yaa kɛgeng to-to fãa.

• Tall raood zu-loees taoor dat n yeelame tɩ bõe?

• Bõe yĩng tɩ f segd n tall raood zu-loees taoore?

• F maanda wãn n tall raood zu-loees taoore?

• Kom-bɩɩs a taab sẽn yete

Tall raood zu-loees taoor dat n yeelame tɩ bõe?

Ned sẽn pa komsd raood yɛl sã n wa toeeme, wall a sã n wa paam zu-loeese, a maooda ne-b n tõoge. Ned sẽn tar daood paamda zu-loees wa neb a taabã, la a tõogda toogo. Tõe t’a mi n yɛɛsame, la a pa komsd raood ye.

Bõe yĩng tɩ f segd n tall raood zu-loees taoore?

• Bala zu-loees pa tõe n pa wa ye. Biiblã yetame yaa: “Pa sẽn tʋʋl-bã n tõogd zoees wakat fãa . . . ye. Leb n pa sẽn tar-b minimã yɛl n yãkd neng wakat fãa ye. Bala wakat buud fãa, yel-lingdem tiigd n paamda b fãa.” (Koɛɛg soaba 9:11) Woto rat n yeelame tɩ bõe? Nin-sõma meng namsdame. Wakat ninga pa f sẽn maan bũmb sẽn yaa wẽng yĩng ye.

• F sã n tar raoodo kogend-f lame. Lekoll a ye taoor soab yeelame: “Karen-biis wʋsg n wat mam biruẽ wã ne sũ-sãang wʋsg la ne nintãm, b sẽn pa tʋm sõma ɛgzame sasa yĩnga, wall b sẽn togs bũmb b zug rezo sosiyo-rãmbã pʋgẽ tɩ pa yɩ-b noog yĩnga.” A paasame tɩ bõn-kãensã sẽn wõnd yel-bõonesã tõe n kɩtame, tɩ karen-biig wa maand yɩɩr tɩ loog nugu, wall a wa “maood ne sũ-sãams sẽn kɩt t’a yam yi a menga.”a

• F sã n tar raoodo, na n sõng-f-la masã la f bɩʋʋngã zugẽ. Vɩɩmã sẽn wat ne yɩɩr ninsã wɛɛngẽ, a Richard Lerner yeelame: “Ned sã n dat t’a sã n wa lebg kãsem bɩ a vɩɩmã yaa sõma la tar barka, yaa a sẽn na n tõog n maood ne rũndã-rũndã yɩɩrã. Bũmb sẽn tõe n sõng kãsem t’a vɩɩmã yɩ sõma la tall barka, yaa a sẽn na n tall raood n maood ne zu-loeesã, n yãkd a sẽn dat n wa maanega, wall a toeem bũmb kẽer sẽn na yɩl t’a magbã pidi.”b

F maanda wãn n tall raood zu-loees taoore?

• Tags n ges yellã kɛglem sẽn ta zĩig ninga. Bao n bãng sã n yaa yel-bil bɩ yel-kãsenga. Biiblã yeelame: “Yalem wilgda a sũ-puugr zĩig pʋgẽ, la gũus-m-meng soab pa tagsd b sẽn tʋʋs-a wã yell ye.” (Yel-bũnã 12:16) Pa zu-loeesã fãa n segd n sãam f sũur wʋsg ye.

  “Mam karen-bi-taasã nong n yẽgemda yel-bõones wɛɛngẽ tɩ yaa wa yaa yel-kãsemse. B zo-rãmbã sẽn be rezo sosiyo-rãmbã zutã sã n teel-b b manesmã pʋgẽ, yãngda b yellã. Kɩtdame tɩ yaa toog tɩ b tall manesem sẽn zems yellã taoore.”—A Joanne.

• Rɩk yam neb a taabã nengẽ. Biiblã pʋgẽ yel-bũnd a ye n yet yaa: “Kut n saasd kutu. Woto me, ned n sõngd a zoa t’a toeem n lebg sõma n paase.” (Yel-bũnã 27:17) D tõe n dɩka yam neb nins sẽn zoe n mao ne zu-loe-kɛgemsã nengẽ.

  “F sã n sõsd ne neb a taaba, f mikdame tɩ b maoo ne zu-loe-kɛgems wʋsg n tõoge. Sõs ne-b n bãng b sẽn maan la b sẽn pa maan n tõog n mao ne b zu-loeesã.”—A Julia.

• Tall sũ-mare. Biiblã yeelame: “Nin-tɩrg tõe n lʋɩɩ naoor a yopoe, la a na n le yikame.” (Yel-bũnã 24:16) Pa zĩig pʋgẽ la f tõe n sak n deeg tɩ f yɛlã toeemame ye. Dẽnd f sũurã sã n mi n wa sãame, pa segd n ling-f ye. Bũmb ning sẽn tar yõod yaa f le yiki.

  “F sã n wa maood ne zu-loɛɛga, pa zĩig pʋgẽ la f sũ-sãangã na n sa ye. Tõe n kaoosame. M bãngame tɩ yaa bilf-bilf la f sũ-sãangã wat n sa.”—A Andrea.

• Yɩ sõm-mita. Biiblã yeelame: “Wilg-y tɩ y yaa sõm-mitba.” (Kolos rãmbã 3:15) Baa f zu-loɛɛgã sẽn yaa kɛgeng to-to fãa, wakat fãa bũmb bee f sẽn tõe n tik n maan sũ-noogo. Tags bũmb a tãab sẽn kõt-f sũ-noog yelle.

  “F sã n wa maood ne zu-loɛɛga, yaa toog tɩ f pa sok f meng yaa: ‘Bõe yĩng tɩ bõn-kãngã paam maam?’ Ned sẽn yaa raood soab pa tagsd a zu-loeesã yell wakat fãa ye. A tara yam-sõngo, la a maand sũ-noog ne bũmb ning a sẽn tarã, la a sẽn tõe n maanã.”—A Samantha.

• Kɩt tɩ f sẽn tarã sek-fo. Tẽn-tʋmd a Poll yeelame: “Mam zãmsa kɩt tɩ m sẽn tarã sek-ma, baa mam yɛlã sẽn wa n yaa a soaba.” (Filip rãmbã 4:11) A Poll zu-loeesã ra yɩɩda a nugu. La bũmb ning a sẽn da tõe n maan a zu-loeesã pʋgẽ wã ra bee ne yẽ. A Poll yãka yam n na n kɩt t’a sẽn tarã sek-a.

  “Bũmb a ye m sẽn bãng yaa tɩ m sã n wa paam zu-loɛɛga, manesem ning m sẽn na n tall zĩig pʋgẽ wã pa sõma wakat fãa ye. M yãka yam n na n tall yam-sõng zu-loɛɛg buud fãa taoore. Rẽ na n nafa maam ne neb a taabã.”—A Matthew.

• Pʋʋse. Biiblã yeelame: “Lob f zɩɩbã a Zeova zugu, t’a na teel-fo. A pa na n tol n bas nin-tɩrg t’a lʋɩ ye.” (Yɩɩn-sõamyã 55:22) Pʋʋsgã pa bũmb sẽn sõngd ned bal t’a yam gãand ye. Yaa goam f sẽn gomd ne f Naandã ‘sẽn get f yellã.’—1 Pɩyɛɛr 5:7.

  “M pa segd n mao ne zu-loɛɛg m yembr ye. M sã n pelg m pʋg n pʋʋs Wẽnnaam n togs-a m zu-loeesã, la m pʋʋs-a bark bũmb nins a sẽn maan n kõ maamã yĩnga, m sũ-sãamsã satame tɩ m tagsd bũmb nins a Zeova sẽn maan n kõ maamã yell n tɩ yɩɩda. Pʋʋsgã tara yõod wʋsgo.”—A Carlos.