Kiris-nebã vɩɩm la b tʋʋma tigissã na-kẽndr sebr not-rãmbã
© 2025 Watch Tower Bible and Tract Society of Pennsylvania
SẼOOG RASEM A 7-13
D SẼN BÃNG BIIBLÃ KARENG PƲGẼ YEL-BŨNÃ 21
Sagls sẽn tõe n sõng-y tɩ y paam sũ-noog y kãadmã pʋgẽ
w24 05 30 s. 13
Y sẽn tõe n bao n bãng taab to-to, tɩ sõng-y tɩ y yãk yam-sõngo
13 Y bao n bãng taabã segd n kaoosa wakat a wãna? Naoor wʋsgo, d sã n pa reng n tags sõma n yãk yam n maan bũmbu, pa baasd neer ye. (Yel. 21:5) Rẽnd y segd n tũu taab n kaoos tɩ sek y na bãng taab sõma. La y pa segd n bas tɩ kaoos zaalem ye. Biiblã yetame me yaa: “Ned sã n gũud bũmb tɩ kaoosd n pa watẽ, sãamda a sũuri.” (Yel. 13:12) Sẽn paase y sã n tũ taab n kaoos wʋsgo, pag ne rao lageng tʋlsmã tõe n wa paama pãnga, tɩ lebg toog tɩ y tõog y mense. (1 Kor. 7:9) Wall tɩ y tagsd y sẽn tũ taab n kaoos to-to wã yellã, sok-y y meng yaa: ‘Bõe la m ket n dat n bãng m to wã zug sẽn na yɩl n bãng n yãk yam?’
w20 07 3-4 s. a 3-5
Ra tags-y tɩ y tara yõod tɩ loog ye
3 A Zeova lugla kãadmã n dat tɩ pag ne a sɩd paam sũ-noogo. La b fãa sẽn pa zems zãngã yĩnga, mo-yõs pa tõe n pa zĩnd ye. A Poll pʋd n yeelame tɩ neb nins sẽn kẽed kãadmã na n paama zu-loeese. (1 Kor. 7:28) Nina tõe n tagsdame tɩ yẽ ne a pagã wall a sɩdã sẽn da pa kẽẽ kãadem ne taab n são, bala b zabda taab wakat fãa. B sã n tagsd wa dũniyã rãmba, b na n yɩɩ tao-tao n tags tɩ yellã tɩɩm yaa b sẽn na n kao b kãadmã bala. B na n getame tɩ sẽn são yaa ned fãa bao a meng bala.
4 D segd n gũusame tɩ d yamã ra wa yi d kãadmã ye. D miime tɩ Biiblã wilgame tɩ yaa pag bɩ rao sã n yo la a to wã tar sor n tõe n kao kãadmã. (Mat. 5:32) Rẽ wã, zu-loees nins yell a Poll sẽn gomã sã n wa paam-do, d pa segd n bas tɩ wuk-m-meng wa kɩt tɩ d tags tɩ: ‘Mam pagã bɩ m sɩdã pa get m yell sõma ye. A pa nong-m wa sẽn segdã ye. Sã n da yaa ne ned a to la m sẽn kẽ kãadmã, tõe tɩ m sũ-noogã yɩɩgẽ woto.’ Ned sã n tagsd woto, yaa a mengã yell bal n pak-a. Yel-kãngã buud pʋgẽ, dũniyã nebã na n sagla yãmb tɩ y maan y sũurã raabo, baa na n tũu ne y kãadmã kaoobo. La Biiblã yetame yaa: “Ra bao-y y mens nafr bal ye. Bao-y y taabã nafr me.” (Fili. 2:4) A Zeova sẽn datã yaa y kell n pa ne taaba, pa y kao y kãadmã ye. (Mat. 19:6) A ratame tɩ y reng n tags yẽ yelle, pa yãmb mengã yell ye.
5 Pag ne a sɩd segd n nonga taab la b waoogd taaba. (Karm-y Efɛɛz rãmb 5:33.) Biiblã yeta tõnd tɩ d nang pãng ne kũun n yɩɩd reegre. (Tʋʋ. 20:35) Bõe n na n sõng pag ne a sɩd tɩ b wilgd tɩ b nonga taab la b waoogd taaba? Yaa sik-m-mengã. Pag ne a sɩd sã n yaa sik-m-mens rãmba, b ned kam fãa na n ‘baooda a to nafre,’ n pa baood a meng nafr ye.—1 Korẽnt rãmbã 10:24.
“Maan sũ-noog ne pag ninga fo sẽn peeg f bi-bɩɩlem wakatã”
13 La sã n mik tɩ yaa kẽed-n-taasã sẽn tar manesem ning ne taabã n kɩt tɩ zu-loees beẽ? Rẽnda b modg n yaool n paam zu-loeesã tɩɩm. Wala makre, tõe tɩ b nong n gomd n sãamda taab sũyã. (Yelbũna 12:18) Wala sõsg ning sẽn loogã sẽn wilgã, rẽ tõe n waa ne yelle. Yel-bũnd a ye n be Biiblã pʋgẽ n yetẽ tɩ “fo sã n be weoogẽ n são fo sẽn na n be yir ne pʋg-yoogo.” (Yelbũna 21:19) Yãmb sã n yaa pag bɩ y sok y meng woto: ‘Rẽ yĩnga mam manesmã kɩtdame tɩ mam sɩdã pa tõe n zĩnd n sõs ne maam bɩ?’ Biiblã yeta sɩdbã woto: “Bɩ y nong y pagba, la y ra maan gãgs ne bãmb ye.” (Kolos rãmba 3:19) Yãmb sã n yaa rao bɩ y sok y meng woto: ‘Rẽ yĩnga mam manesmã wilgdame tɩ m pa nong m pagã, tɩ rẽ kɩt t’a baood ned a to bɩ?’ Yaa sɩd tɩ ned baa a ye pa tar bʋʋm n na n yo ye. La kẽed-n-taag sẽn tõe n wa yo wã yĩnga, kẽed-n-taasã segd n zĩnda ne taab n pelg b pʋs n gom b zu-loeesã yell n bao b tɩɩm.
D bʋgs Wẽnnaam Gomdã zug neere
Vẽnegr nins sẽn tɩ loe ne Wẽnnaam Rĩungã lebga yel-sɩda
9 A Zezi pa leb n yaa ninsaal bal sẽn zao bõn-bil ye, masã a yaa Rĩm sẽn tar pãnga. B bilg-a lame t’a zao wed-moaaga, tɩ rẽ yaa goam sẽn makd zabr Biiblã pʋgẽ. (Yelbũna 21:31) Wilgri 6:2 yetame: “Mam gesame, la haya! mam yãa wed-pɛɛlga. La sẽn zao-a weefa tara tãpo, la b kõo yẽ maanfo, la a kẽngame, [n yaa tõogda, n na n tɩ baas a tõogrã, NW].” Sẽn paase, yɩɩl gʋlsd a Davɩɩd gʋlsa woto a Zezi wɛɛngẽ: “[A Zeova] na n kɩtame tɩ y zĩnd Siõ n tẽeg y naam dasaar n dɩ naam y bɛɛba sʋka.”—Yɩɩl Sõamyã 110:2
SẼOOG RASEM 14-20
D SẼN BÃNG BIIBLÃ KARENG PƲGẼ YEL-BŨNÃ 22
Sagls sẽn tõe n sõng-yã kambã wubr wɛɛngẽ
Sõng-y y kambã tɩ b sã n wa bɩ, bɩ b tũ Wẽnnaam?
7 Yãmb sã n kẽe kãadem, n magd n na n dog kamba, bɩ y sok y meng yaa: ‘D yaa sik-m-mens rãmba, neb sẽn nong a Zeova, hal t’a na n sak n yãk-d tɩ d ges bi-pɛɛlg yell sɩda?’ (Yɩɩn. 127:3, 4) Yãmb sã n zoe n yaa roagda, bɩ y sok y meng yaa: ‘Mam sõngda m kambã tɩ b bãng tɩ b segd n tʋmda wʋsg bɩ?’ (Koɛ. 3:12, 13) ‘Mam maanda m sẽn tõe fãa n kogend m kambã ne bõn-wẽns nins sẽn be a Sʋɩtãan dũniyã pʋgẽ wã bɩ?’ (Yel. 22:3) Y pa tõe n kogl y kambã ne vɩɩmã yɛlã fãa ye. Yaa bũmb sẽn pa tõe. La y tõe n sõng-b-la bilf-bilf la ne nonglem, tɩ b wa tõe n bao sagls Wẽnnaam Gomdã pʋgẽ n tõog n mao ne vɩɩmã yɛla. (Karm-y Yel-bũn 2:1-6.) Wala makre, y zakã ned sã n wa yãk yam n bas a Zeova tũubu, bɩ y sõng y kambã tɩ b bãng bũmb ning sẽn kɩt tɩ tar yõod wʋsg tɩ d kell n maan sɩd ne a Zeova wã, sã n yaa ne Biiblã. (Yɩɩn. 31:24) Pa rẽ bɩ ned b sẽn nong sã n maan kaalem, bɩ y wilg-b Biiblã vɛrse-rãmb sẽn tõe n sõng-b tɩ b tõog toogo.—2 Kor. 1:3, 4; 2 Tɩm. 3:16.
Roagdba, sõng-y y kambã tɩ b wa nong a Zeova
17 Sɩng-y tɩ b ket n paoodẽ. Roagdbã sã n sɩng b kambã sõngr tɩ b ket n paoodẽ, rẽ n são. (Yel. 22:6) A Tɩmote makrã wilgda rẽ. A wa n tũuda tʋm-tʋmd a Poll n togd soay n moond koɛɛgã. La yaa a ma a Eniis ne a yaab-poak a Loyiis sẽn zãms-a a Zeova noyã ‘hal a yãadmẽ’ wã yĩnga.—2 Tɩm. 1:5; 3:15.
18 A Zãnkolood ne a pag a Piyis sẽn be Kodivoaarã tõog n wuba b kambã tɩ b wa nong a Zeova, n tũud-a. Yaa kamb a yoobe. Bõe n sõng-ba? B rɩka a Eniis ne a Loyiis togs-n-taare. Ad b sẽn yeele: “D zãmsa d kambã a Zeova noyã hal b yãadmẽ. D sɩnga b rogmã poor bala.”—Tõo. 6:6, 7.
19 Rɩk a Zeova noyã n “zãms” y kambã rat n yeelame tɩ bõe? Rat n yeelame tɩ y wilg-ba, la y tẽegd-ba, n maand woto n yɩlemdẽ. Sẽn na yɩl n tõog n maand rẽ, yaa tɩlɛ tɩ roagdbã yãt sẽk n sõsd ne b kambã. Roagdb kẽer sã n wilgd biig bũmb n yɩlemdẽ tɩ baas n pa kẽedẽ, sãamda b sũuri. La b tog n ninga b yamẽ tɩ rẽ n na n sõng tɩ b tõog tɩ b kambã wʋm Wẽnnaam goamã võore, la b sak n tũ.
w06 1/4 9 s. a 4
Roagdba, kõ-y y kambã mak-sõngo
Biig fãa ratame n maand a sẽn date. La kamb kẽer yaa tõatba. Yaa b sẽn yeel tɩ b ra maanã la b maanda. (Sɩngre 8:21) Bõe la roagdbã tõe n maane? Biiblã yetame yaa: “Yalemd tara pãng biig sũurẽ, la kiblg rasaar n na n kɩt t’a yi n zãag ne-a.” (Yel-bũnã 22:15) Neb kẽer getame tɩ sagl-kãngã pa le tar yõod rũndã-rũndã ye. Yaa sɩd tɩ Biiblã gɩdga nen-kɛglem la namsg buud fãa. La gom-bil ning b sẽn lebg tɩ ‘kiblg rasaarã’ makda sor ning roagdbã sẽn tar n tõe n kibl b kambã. La b sã n wa kibind-ba, b segd n wilg-b-la vẽeneg tɩ b sẽn maanã pa sõma, la b maan rẽ ne nonglem wa sẽn zems b sẽn tagsd tɩ yaa sõma ne biigã, la sẽn na yɩl t’a wa paam vɩɩm sẽn ka sɛta.—Ebre-rãmbã 12:7-11.
D bʋgs Wẽnnaam Gomdã zug neere
Maan-y sũ-noog ne tʋʋm nins y sẽn zoe n tarã
11 Tõnd me tõe n paama sũ-noog wʋsgo, d sã n wɩsg d meng n tʋmd tʋʋm nins fãa d sẽn tar a Zeova siglgã pʋgẽ wã. Tʋmd-y koe-moonegã tʋʋmd wʋsgo, la y kẽesd y mens sõma tigingã tʋʋmã pʋsẽ. (Tʋʋ. 18:5; Ebre. 10:24, 25) Segend-y y mens sõma tigissã yĩnga, la y kõt leoor sẽn kengd raoodo. B sã n kõ-y sõsg Kiris-nebã vɩɩm la b tʋʋma tigsg sasa, bɩ y ges rẽ wa bũmb sẽn tar yõod wʋsgo. B sã n wa kos-y tɩ y sõng ne tʋʋmd ning tigingã pʋgẽ, bɩ y wilg tɩ y yaa ned sẽn maand bũmb fãa a wakate, la ned b sẽn tõe n teege. Ra tags-y tɩ tʋʋmd ning b sẽn kõ yãmbã yõod pa waooge, la tɩ pa baood tɩ y rɩk sẽk wʋsg n tʋm ye. Modg-y tɩ y minimã paase. (Yel. 22:29) Y sã n tʋmd a Zeova tʋʋmdã ne y sũur fãa, zood ning y sẽn tar ne-a wã pãng na n paasdame, tɩ y sũ-noogã me paasdẽ. (Gal. 6:4) Sẽn paase, na n yɩɩ nana ne-y tɩ y maan sũ-noog ne neb a taabã, b sã n wa kõ-b tʋʋmd yãmb sẽn da rat tɩ b kõ-yã.—Rom. 12:15; Gal. 5:26.
SẼOOG RASEM 21-27
D SẼN BÃNG BIIBLÃ KARENG PƲGẼ YEL-BŨNÃ 23
Sagls sẽn yaa sõma rãamã yũub wɛɛngẽ
Tall-y tagsg sẽn zems rãamã yũub wɛɛngẽ
5 Yaa wãn to ne ned sẽn na n yũud rãam n gũusd n pa suud tɩ yaa vẽeneg nebã nifẽ? Neb kẽer tõe n yũu rãam wʋsg tɩ nebã pa ne t’a yũume n su ye. La tags tɩ woto pa yell sɩd yaa belgre. (Zeremi 17:9) Bilf-bilfu, rãamã tõe n wa kula ned t’a lebg ‘rã-yũuda,’ bɩ rãam yamba. (Tɩt 2:3) A Caroline Knapp gʋlsame n wilg sẽn tõe n yɩ to-to tɩ ned wa lebg rã-yũudã wɛɛngẽ. A yeelame tɩ “rãam pa kuus ned zĩig pʋgẽ ye, yaa bilf-bilfu.” Rã-yũur sɩd yaa bẽd-kʋʋdg sẽn solge!
6 Ges-y a Zezi keoog-kãngã me: “Bɩ y gũus y mense n da sak tɩ yão-beed ne rã-yũuri la vɩɩm kãnga yɛla pak yãmb tɩ ra-kãng wa ling yãmb ye. Tɩ bõe, a na n wa linga neba fãa sẽn be dũniyã zuga wa kũusri.” (Luk 21:34, 35) Pa tɩlae tɩ ned yũ rãam n su tɩ yaool n kɩt t’a zʋm yĩngã bɩ tẽebã wɛɛngẽ ye. Yaa wãn to, a Zeova daarã sã n wa mik nin-kãng yel-kãngã pʋgẽ?
Tũ-y Wẽnnaam noyã rãamã yũub wɛɛngẽ
Kiris-nebã yẽ tara sagl-sõma, d Naandã sẽn nong-dã sẽn kõ-do. Wala makre, a yeela tõnd tɩ rãamã yũ tɩ loogã wata ne zu-loe-kɛgemse. Tõe tɩ y karma Yel-bũn 23:29-35 wã sẽn bilgd ned sẽn yũ rãam manesem sẽn yaa to-to, la zu-loees nins rãamã sẽn wat ne wã. A Dãniyɛll sẽn yaa kãsem-soab n be Eropã tẽega a vɩɩmã sẽn da yaa to-to nand t’a lebg kiris-nedã yell n yeel yaa: “Mam da minim n yũuda rãamã tɩ loogdẽ. Rẽ kɩtame tɩ mam yãk yam n maan bũmb kẽer tɩ pa yɩ sõma ye. M sã n mi n tẽeg bõn-kãens sãnda yelle, m sũurã ket n sãamdame.”
D bʋgs Wẽnnaam Gomdã zug neere
Karemdbã sogsgo
Wala makre, ned sã n yaa bedr tɩ looge, tõe n wilgdame t’a yaa yão-beed soaba. La pa wakat fãa la bedrem yaa yão-beed bãnd ye. Bedrem sẽn loog noor tõe n yɩɩ bãaga. A leb n tõe n yaa rog-ne. Bũmb d sẽn pa segd n yĩm me yaa tɩ bedrem sẽn loog noor yaa yĩng yalẽ, la yão-beed yaa zʋgo. Ned sẽn yaa bedr tɩ loog yaa ned sẽn nob tɩ looge, la yão-be-ned yaa ned sẽn nong n dɩtẽ tɩ loogd nugu. Dẽnd b pa tõe n yeel tɩ ned yaa yão-beed soab a sẽn yaa bedr tɩ loog yĩng ye. Yaa nedã sẽn tar manesem ning rɩɩb taoorã n wilgd bal t’a yaa yão-beed soaba. Ned bedrem tõe n zemsame bɩ a yaa bãanega, t’a yaool n yaa yão-be-neda. Sẽn paase, nebã tagsg sẽn tɩ loe ne bedrmã bɩ yaok ning sẽn zemsã pa a yembr zĩig fãa ye.
SẼOOG RASEM 28–SA-SIK RASEM A 3
D SẼN BÃNG BIIBLÃ KARENG PƲGẼ YEL-BŨNÃ 24
Segl-y y meng zu-loees yĩnga
Bɩ y yals kãn-kãe tẽebã pʋgẽ n da vigs ye
15 Zãmsd-y Wẽnnaam Gomdã la y bʋgsd a zugu. Tɩɩg yẽg sã n sũd tẽngã sõma, a tara pãnga. Woto me, tõnd tẽebã sã n yẽbg Wẽnnaam Gomdã zug sõma, d na n tõog n yalsa kãn-kãe. Tɩɩg sã n bɩtẽ a yẽgã sũt n paasdame, la b yɛdgdẽ. D sã n karemd Biiblã la d bʋgsd a zugu, paasda d tẽebã pãnga, la kɩtdẽ tɩ d maneg n kɩs sɩd tɩ Wẽnnaam noyã la sõma n yɩɩda. (Kolo. 2:6, 7) Tags-y n ges-y-yã a Zeova noyã, a saglsã la a koglgã sẽn naf neb nins sẽn tũ-a pĩnd wẽndẽ wã to-to. Wala makre, Wẽnnaam sẽn wa n vẽneg a Ezekɩyɛll t’a yã wẽnd-doogã, a maaga a yĩng n ges malɛkã sẽn magd wẽnd-doogã to-to wã. Vẽnegrã a Ezekɩyɛll sẽn yã wã kenga a raoodo, la sõngd tõnd tɩ d bãng d sẽn tõe n tũ noy nins a Zeova sẽn gãneg tũudum hakɩɩkã wɛɛngẽ wã to-to. (Eze. 40:1-4; 43:10-12) Tõnd me sã n bao sẽk n zãms Wẽnnaam Gomdã yel-zulumsã la d tags b zugu, na n naf-d lame.
Tall-y sũ-noog baa toog wakate
12 Yelbũn 24:10 (Sebr Sõngo) yeta woto: “Yɩɩr sã n tar-fo, bɩ f ra bas raood ye, ka rẽ f pãng na n lebga komslem.” Yel-bũnd a to me yeta woto: “Ned sũur sã n sãame, a neng gãnemdame.” (Yel. 15:13) Kiris-neb kẽer sũy sãama hal tɩ kɩt tɩ b bas Wẽnnaam Gomdã kareng la a zug bʋgsgo. B pʋʋsgã lebga rok-m-zugẽ, la tõe meng tɩ b wa n zãaga b mens ne b tẽed-n-taasã. Woto wilgda vẽeneg tɩ d sã n bas tɩ d sũ-sãang kaoos wʋsgo, tõe n wã-d lame.—Yel. 18:1, 14.
13 Sẽn paase, d sã n tẽed tɩ d yɛlã na n wa manegame, tõe n sõng-d lame tɩ d bas rẽ yell tagsgo, la d tagsd yɛl a taab sẽn noogd d sũur yelle. A Davɩɩd ra yeelame t’a Zeova raabã maaneg kõta yẽ sũ-noogo. (Yɩɩl 40:8, MN) D yɛlã sã n wa pa wa d sẽn da rat to-to wã, d pa segd n bas Wẽnnaam daabã maaneg sẽn kõt-d sũ-noogã ye. Bãng-y tɩ ned sã n tʋmd tʋʋm sẽn kõt-a sũ-noogo, boogda a sũ-sãamsã. A Zeova yeta tõnd tɩ d sã n karemd a Gomdã la d bʋgsd d sẽn karemdã zugu, d na n paama sũ-noogo. (Yɩɩl 1:1, 2; Zak 1:25) D sã n wa karemd Biiblã wall d sã n be tigissẽ wã, d wʋmda “gom-nood” sẽn kengd d raood la noogd d sũuri.—Yel. 12:25; 16:24.
Karemdbã sogsgo
Yel-bũn 24:16 yetame: “Nin-tɩrg tõe n lʋɩɩ naoor a yopoe, la a na n leb n yikame. La toog na n luba nin-wẽnga.” Rẽ yĩnga, vɛrse-kãngã gomda ned sẽn na n maand yel-wẽnd n yɩlemdẽ, tɩ wakat fãa bɩ Wẽnnaam kõt-a sugr bɩ?
Sɩd-sɩdã, vɛrse-kãngã pa rat n yeel woto ye. Vɛrse wã sẽn gomd lʋɩɩs yellã yaa ned sẽn na n segd zu-loees wʋsgo, tɩ ne rẽ fãa bɩ a yikdẽ, rat n yeel t’a kelld n tõogda toogo.
Dẽnd woto fãa wilgdame tɩ Yel-bũn 24:16 pa gomd wẽngã pʋgẽ lʋɩɩs yell ye. A gomda ned sẽn na n paamd zu-loees n yɩlemdẽ yelle. Dũni-wẽn-kãnga pʋgẽ, nin-tɩrg tõe n maooda ne bãaga, wall yɛl a taaba. Goosneema wã tõeeme meng n namsd-a wʋsg a tũudmã yĩnga. La a tõe n basa a yam tɩ Wẽnnaam teend-a lame, la t’a na n sõng-a lame t’a kell n yals kãn-kãe. Rẽ yĩnga, yãmb pa tar kaset sẽn wilgd tɩ sɩd yaa woto ne Wẽnnaam nin-buiidã? D kɩsa sɩd t’a Zeova “kokda sẽn lʋɩtbã, la b yikda neb nins pãng sẽn sɛ wã.”—Yɩɩn. 41:2-4; 145:14-19.
D bʋgs Wẽnnaam Gomdã zug neere
Karemdbã sogsgo
Pĩnd wẽndẽ wã, rao sã n da rat n lugl bɩ n “me [a] zaka,” rat n yeel tɩ n kẽ kãadem, a ra segd n deng n soka a meng woto: “Rẽ yĩnga mam segla m meng sõma n tõe n zã paga, tɩ d sã n wa paam kamb me bɩ m tõog n ges b yell bɩ?” Nand t’a kẽ kãadem, bũmb la a segd n deng n maane. Rẽnda a reng n ges a pʋʋgã bɩ a koodã yelle. Rẽ n so tɩ Biiblã lebgr a yembr (Today’s English Version) tolg n lebg yel-bũndã woto: “Ra me f zak n lugl f yir tɩ f nan pa tuk pʋʋgo, la tɩ f pa kɩs sɩd tɩ f na n tõog n dɩlga neb ye.” Rẽ yĩnga d segd n tũu sagl-kãngã rũndã-rũndã me bɩ?
N-ye. Rao sẽn dat n kẽ kãadem segd n deng n segla a meng sõma n wa tõog n tʋk kãadmã sẽn wat ne zɩɩb ninsã. A segd n tʋmame. Sã n pa mikame t’a yaa koamsa. La yaa vẽeneg tɩ rao tʋʋm-pakr pa tek ges t’a zakã rãmb paam dɩɩbo, fut la teed a taab bal ye. Wẽnnaam Gomdã wilgame tɩ rao segd n kõta a zakã rãmb bõn-kãensã, n pidsd b tʋlsem a taabã la a get b tẽebã yelle, la tɩ rao sã n pa maan dẽ, a wẽnem yɩɩda ned sẽn pa be tẽeb pʋgẽ. (1 Tɩm. 5:8) Woto yĩnga, bi-bɩɩg sã n wa segend n dat n kẽ kãadem, a segd n soka a meng sogs-kãensã: “Rẽ yĩnga mam segla m meng n na n wa tõog tɩ m zakã rãmb paam bũmb nins sẽn yaa tɩlae ne-bã bɩ? M na n tõog n gesa b yell tũudmã wɛɛngẽ bɩ? Mam na n tõog n zãmsda Biiblã ne m pagã la m kambã n pa vaandẽ bɩ?” Wẽnnaam Gomdã sɩd wilgdame tɩ yaa tɩlae tɩ zak-soab fãa modg n maan woto.—Tõo. 6:6-8; Ef. 6:4.
Dẽnd bi-bɩɩg sẽn dat n kẽ kãadem segd n tagsa Yelbũn 24:27 saglgã zug neere. Pʋg-sad me segd n deng n soka a meng n ges a sã n seglame n na n tõog n ges rao la kamb yell sõma. La rao ne pag sẽn kẽ kãadem sã n dat kamba, b segd n soka b mens n ges b sã n na n tõog n zãa kamba. (Luk 14:28) Wẽnnaam nin-buiidã sã n tũud sagl-kãensã, sõngd-b lame tɩ b gind zu-loeese, la kɩtdẽ tɩ b zagsã vɩɩm tar barka.
SA-SIK RASEM A 4-10
D SẼN BÃNG BIIBLÃ KARENG PƲGẼ YEL-BŨNÃ 25
Sagls sẽn tõe n sõng tõnd d no-goamã wɛɛngẽ
Gomd-y goam sẽn nafd y taabã
6 Yel-bũn 25:11 sẽn yeel bũmb ningã wilgdame tɩ d sã n dat n gome, sɩd tara yõod tɩ d bao wakat sẽn zemse. Be, b yeela woto: “Gomd sẽn gom a wakat yaa wa b sẽn dõog sãnem tɩ-biis wanzuri zugu.” B sã n dɩk sãnem n dõog tɩ wõnd tɩɩg bila, yaa neere. B sã n dɩk rẽ n naag wanzuri n yõge, paasda a neermã. Woto me, d sã n bãng n gom wakat sẽn zemse, d goamã na n talla yamleoogo, la naf d kɛlgdã. Wãn to?
7 D sã n pa bao wakat sẽn zems n gome, nebã tõeeme n pa wʋm d gomdã võore, wall b pa sak n deeg d sẽn yeelã ye. (Karm-y Yel-bũn 15:23.) Wala makre, yʋʋmd 2011 tʋʋlg kiuugã, tẽn-digimdg ne sunami n zĩnd Zapõ soolmẽ wã, n sãam galʋ-tẽns wʋsgo. Neb tus piig la a nu la zak n ki. Baa a Zeova Kaset rãmb wʋsg roagdb la b zo-rãmb sẽn maan kaalmã, b ra rat n tika Biiblã goam n bels sẽn be-b sũ-sãams pʋsẽ wa bãmbã. La b miime tɩ tẽngã neb wʋsg yaa budist-rãmba, n tẽed tɩ ned sã n ki a lebgd n tɩ roga zĩig a to. B pa mi Biiblã sẽn yetã, n pa tẽed kũum vʋʋgrã me ye. Saam-biisã bãngame tɩ wakat kãnga, sẽn são yaa b sẽn na n tik Biiblã goam n bels-ba, la b wilg yel-beed a woto sẽn paamd baa nin-sõma wã võore. B sã n da na n gom kũum vʋʋgrã yelle, tõe n waa ne no-koɛɛma, n pa naf nebã ye.
Gomd-y goam sẽn nafd y taabã
15 Tõnd sẽn gomd to-to wã me tara yõod wʋsgo. A Zeezi sẽn wa n sõsd ne nebã Nazarɛt karen-doogẽ wã, b “fãa dag n kɩta bãmb kaset n pẽgd bãmba, gom-sõamy nins sẽn dag n yit bãmb noorẽ wã yĩnga.” (Luk 4:22) D sã n gomd ne bʋgsem, tõe n kɩtame tɩ nebã kelg-d ne yamleoogo, n sak n deeg d sẽn yetã. (Yel. 25:15) D sã n nand d taabã, n pa rat n maan bũmb n sãam b sũur me, d na n tõogd n gomda ne-b ne bʋgsem. A Zeezi ra maanda woto. Daar a ye, neb kʋʋng n modg wʋsg sẽn na yɩl n paam n kelg a goamã. A sẽn yã rẽ wã, b nimbãaneg yõk-a lame, t’a “zãms-b bũmb wʋsgo.” (Mark 6:34) Baa a bɛɛbã sẽn wa n tʋʋd-a wã, a pa tʋʋs n lebs ye.—1 Pɩy. 2:23.
16 D sã n wa gomd ne ned d sẽn minim wʋsgo, tõe n yɩɩ toog tɩ d gom ne bʋgsem. D tõe n getame tɩ pa tɩlɛ tɩ d gũus ne d goamã ye. Wala makre, d sã n wa gomd ne d zakã rãmb wall d zo-rãmbã tigingã pʋgẽ, tõe n yɩɩ woto. La rẽ yĩnga, a Zeezi ra getame tɩ yẽ ne a karen-biisã sẽn minim taabã, a tõe n goma ne-b wa a sẽn dat bɩ? Ayo. B sẽn wa n wẽed no-koɛɛm n dat n bãng sẽn yaa-a kãseng n yɩɩdã, a goma ne-b ne bʋgsem, la a rɩk makr ne bi-bilf sẽn na yɩl tɩ b toeem yam. (Mark 9:33-37) Kãsem-dãmbã tõe n dɩka a Zeezi togs-n-taare, n sagend b tẽed-n-taasã “ne sũ-bʋgsem.”—Gal. 6:1.
D kengd taab raood masã n yɩɩd pĩndã
10 Pa kãsem-dãmbã bal n segd n kengd b tẽed-n-taasã raood ye. A Poll sagla kiris-nebã fãa tɩ b mao tɩ gomd sã n na n yi b noorẽ bɩ yɩ “gom-sõng sẽn na sõng ned t’a bɩ la a wa ne bark neb nins sẽn wʋmdã zutu.” (Efɛ. 4:29) D ned kam fãa segd n mi n tags n gesa d taabã sẽn dat sõngr ninga, la d sẽn tõe n maan n sõng-bã. No-rɛɛs a Ezayi ra yeela Israyɛll nebã yaa: “Keng-y nus nins sẽn ka tar pãngã, la paas-y rũm nins sẽn keoosdã pãnga.” (Eza. 35:3; Ebre. 12:12, 13) D yaa kãsem tɩ d yaa biiga, d fãa tõe n kenga d tẽed-n-taasã raood ne d no-goamã.
D bʋgs Wẽnnaam Gomdã zug neere
Y sã n yaa sũ-bʋgsem soaba, y tara pãnga
3 F sã n yaa nin-bʋgsgo, neb kẽer tagsdame tɩ f ka pãng ye. La pa woto ye. Zu-loɛɛg taoore, yɩl n tõog f meng baooda raoodo. Sũ-bʋgsem naaga “vʋʋsem sõngã biisi.” (Gal. 5:22, 23) Wakat ninga, b mi n pʋda Gɛrk gom-bil ning b sẽn lebg tɩ “sũ-bʋgsmã” n na n bilg weoogẽ wed-moaag b sẽn yõk n nome. Mams-y n ges-y weoogẽ wed-moaag sẽn lebg bʋgsgo. Baa a sẽn lebg bʋgsgã a ket n tara pãnga. Tõnd sẽn yaa ninsaalbã, wãn to la d tõe n bɩɩs sũ-bʋgsem la d kell n tall pãnga? D pa tõe n maan dẽ ne d meng pãng ye. D segd n pʋʋsa Wẽnnaam n kos-a vʋʋsem sõngã, tɩ sõng-d tɩ d bɩɩs zʋg-sõng-kãngã sẽn be yamleoogã. Kibay wʋsg n be n wilgd tɩ rẽ tõeeme. A Zeova Kaset rãmb wʋsg tõog n leoka kɩɩsdb ne bʋgsem tɩ neb sẽn da get pẽge. (Karm-y 2 Tɩmote 2:24, 25.) Wãn to la y tõe n yɩ sũ-bʋgsem soaba?
SA-SIK RASEM 11-17
D SẼN BÃNG BIIBLÃ KARENG PƲGẼ YEL-BŨNÃ 26
Zãag-y y meng ne ned sẽn yaa ‘yalma’
it-2 602 s. a 1
Saaga
Yʋʋmdã wakat toor-toorã. Kãabg tẽngẽ wã, yʋʋmdã ra tara wakat a yiibu. Woto rat n yeelame tɩ ra yaa saag sẽn niid wakate, la saag sẽn pa niid wakate. (Ges-y Yɩɩn. 32:4; Sal. yɩɩl. 2:11) Tʋʋl-nif kiuugã pʋɩ-sʋkã n tɩ tãag zi-likr kiuugã pʋɩ-sʋkã, saagã ra pa niid wʋsg ye. Ra yaa kẽegb sasa tɩ saagã ra pa wae n niid ye. Yel-bũn 26:1 wilgdame tɩ kẽebgã wakate, saagã ra pa niid ye. (Ges-y 1 Sãm. 12:17-19.) Sẽoogã wakate, saagã ra pa niid daar fãa ye. Ray kẽer menga, a ra pa kʋɩt ye. Wakat kãng me sẽn yaa waood wakatã, saagã sã n pãb-fo, pa yãt n kaoos la f sɩng rigb ye. (Ɛsd. 10:9, 13) Rẽnd f sã n paam zĩig f sẽn tõe n soonde, f sũur nooma wʋsgo.—Eza. 4:6; 25:4; 32:2; Zoob 24:8
w87 1/10 19 s. 12
Kiblgã womda laafɩ biisi
12 Neb kẽer segda ne sɩbgr wa Yel-bũn 26:3 sẽn yetã. A yetame yaa: “Sãbsg yaa wed-moaag yĩnga, salbr yaa bõang yĩnga, tɩ rasaar yaa yalem poor yĩnga.” Wakat ninga, a Zeova ra basda Israyɛll sẽn da yaa a nin-buiidã, tɩ b nams b manesem wẽngã yĩnga. Biiblã yetame: “Yɩɩ b sẽn da tõdg Wẽnnaam gomdã yĩnga. B paooga Sẽn ka-a to wã saglgã. Dẽ, Wẽnnaam kɩtame tɩ b namse, sẽn na yɩl tɩ b sik b mense. B lʋɩɩme, tɩ ned kae n na n sõng-b ye. B boola a Zeova n kos sõngr b toogã pʋgẽ. A fãag-b-la b yel-pakrã pʋgẽ.” (Yɩɩn-sõamyã 107:11-13) La neb kẽer sẽn ka tar yamã, riglma b sũyã n pa sakd kiblg ye. Biiblã goma rẽ yell n yeel yaa: “B sã n dems ned naoor wʋsg t’a kell n diglim a sũuri, b na n wa tiig n sãam-a lame tɩ tɩɩm kae ye.”—Yel-bũnã 29:1.
it-1 357 s. a 3
Woabga
Yel-bũndi. Rĩm a Salomo yeelame yaa: “Wa ned sẽn pogl a nao [tɩ kɩt t’a lebg woabga], ned sẽn yũud nen-kɛglem, yaa wa ned sẽn kɩs yalem sɩd n bobl-a tʋʋmde.” Sɩd-sɩda, ned sẽn dɩk a tʋʋmd n bobl yalem wãada a menga, bala tʋʋmdã pa na n yãk neng ye. A mii vẽeneg t’a tʋʋmdã pa na n yɩ sõma, la tɩ na n yɩɩ bõne.—Yel. 26:6.
D bʋgs Wẽnnaam Gomdã zug neere
it-1 846
Y sã n yaa sũ-bʋgsem soaba, y tara pãnga
18 Baa d sã n bilg yɛlã sõma tɩ yaa vẽenega, pa nebã fãa n na n sak n deeg d sẽn yetã ye. La d sã n gom ne gũusg la bʋgsem, tõe n sõngame. (Karm-y Kolos rãmb 4:6.) Gom f sẽn tẽedã yell ne nedã yaa wa f sẽn na n lob ball n dat t’a soabã koke. F tõe n maaga f yĩng lob ballã, wall f lob-a ne pãnga. F sã n maag f yĩng n lob ballã, na n yɩɩ nana tɩ f to wã koke, n le lob tɩ fo-me koke. Woto me, d sã n gomd ne gũusg la bʋgsem, neb a taabã na n dat n kelg-d lame, la b kell n sõs ne-do. La ned sã n dat n wẽ no-koɛɛma, wall a yaand tõndo, pa tɩlɛ tɩ d kell n sõs ne-a ye. (Yel. 26:4) La neb a woto pa wae ye. Wʋsgã na n dat n kelgame.
SA-SIK RASEM 18-24
D SẼN BÃNG BIIBLÃ KARENG PƲGẼ YEL-BŨNÃ 27
Zoa hakɩɩk sẽn nafd-d to-to
A Zeova nanda a nin-buiidã sẽn yaa sik-m-mens rãmbã
12 Sik-m-meng soab sakda remsgo, n pa yikd a sũur ye. D rɩk makr wa yãmb sẽn na n be d tigsg zĩigẽ. Y gilg n sõsa ne y tẽed-n-taas a wãna, la a yembr n bool yãmb kɛɛng n togs-y tɩ zẽ-vãad n tab y yẽnã. Yaa vẽeneg tɩ y sũur na n sãamame. La rẽ yĩnga, y sũur kõn yɩ noog y sẽn paam t’a togs-yã? Tõe meng tɩ y na n yeelame tɩ ned sã n da togs-y pĩnd n são. Woto me, bũmb sã n pa zemse, tɩ d tẽed-n-taag tall raood n wa yã-d n na n sõng-d tɩ d remse, d segd n sika d meng n sak la d maan sũ-noog ne rẽ. D pa get tɩ nin-kãng yaa d bɛ ye. A yaa d zoa.—Karm-y Yel-bũn 27:5, 6; Gal. 4:16.
it-2 669 s. a 7
F to wã
Yel-bũn sebrã sagend-d lame tɩ d bao zoa d sẽn tõe n teeg la d kɩs sɩd ne. Woto, d sã n wa be yel-pakr wakate, bɩ d bao ned a woto sõngre. B yeta be yaa: “Da raag f zoa wall f ba wã zoa n base, la f ra kẽ f ba-biig zakẽ f yel-beed wakat ye. F yak [sha·khenʹ] sẽn pẽ foo n são f ba-biig sẽn zãr ne foo.” (Yel. 27:10) Wõnda yel-bũn sebrã rat n wilg-d lame tɩ d zoa sẽn pẽ-d tara yõod tɩ d tõe n bao a sõngre, n yɩɩd d ba-biig sẽn zãr ne-do. Bala a sẽn zãr ne-dã, a tõeeme n wa ka tõog n sõng-do, d sẽn wat n dat sõngr sasa ye. La baa f ba-biig sẽn be yɩɩg sã n tõe n sõng foo, f zoa sẽn pẽ yambẽ n tõe n sõng-f n yɩɩda.
Kom-bɩɩse, y ratame tɩ y vɩɩmã yɩ wãn to?
7 Yam d sẽn tõe n dɩk a Zowas kibarã pʋgẽ yaa tɩ d segd n baoo zo-rãmb sẽn tõe n naf-do, rat n yeel tɩ zo-rãmb sẽn nong a Zeova la sẽn dat n noog a sũuri. D zo-rãmbã pa tog n yɩ d rog-taas bal ye. Tẽeg-y t’a Zowas zoa a Zehoyada yʋʋmã ra yɩɩd-a-la hal zĩig sẽn zãre. Y zo-rãmbã wɛɛngẽ, sok-y y meng yaa: ‘B sõngda maam tɩ m tẽebã pãng paasdẽ bɩ? B sagenda maam tɩ m tũud Wẽnnaam noyã bɩ? B nong n gomda a Zeova la sɩdã yell bɩ? B tũuda Wẽnnaam noyã bɩ? M sã n wa tudgi b remsd-m lame bɩ?’ (Yel. 27:5, 6, 17) Sɩd-sɩda y zo-rãmbã sã n pa nong a Zeova, pa zo-sõma ye. La y sã n tar zo-rãmb sẽn nong a Zeova, bɩ y modg tɩ y zoodã ra sãam ye. B na n sõngd-y-la wakat fãa.—Yel. 13:20.
D bʋgs Wẽnnaam Gomdã zug neere
Yelbũn sebrã tags-kãsemse
27:21. B sã n pẽg-do, tõe n kɩtame tɩ d wilg d sẽn yaa ned ninga. Pẽgrã sã n kɩt tɩ d sak n deeg tɩ d ket n tara a Zeova samd la sõng-d tɩ d ket n dat n maand a raabã, wilgdame tɩ d yaa sik-m-meng soaba. La pẽgr sã n kɩtdẽ tɩ d tẽed tɩ d yɩɩda d taabã, wilgdame tɩ d pa sik-m-meng soab ye.
SA-SIK RASEM 25-31
D SẼN BÃNG BIIBLÃ KARENG PƲGẼ YEL-BŨNÃ 28
Welgr ning sẽn be nin-wẽng ne nin-tɩrg sʋka
w93 15/5 26 s. a 2
Yãmb tũuda a Zeova ne y sũur fãa bɩ?
“Nin-tɩrsã pɛlg kɛgma wa gɩgem-polle.” (Yel-bũnã 28:1) B tara tẽebo, b teega sagls nins sẽn be Wẽnnãam Gomdã pʋgẽ wã, n kengd taoor ne a Zeova tʋʋmdã baa sẽn wa n yaa soaba.
Yãmb mii a Zeova sõma wa a Nowe ne a Dãniyɛll la a Zoob bɩ?
1 DŨNIYÃ sãoong sẽn tar kolgrã, ‘nin-wẽnsã tobda wa moodo.’ (Yɩɩn. 92:8) Rẽ n so tɩ nebã wʋsg toog sẽn kae ne Wẽnnaam noyã pa lingd tõnd ye. La d maanda wãn n ‘yɩ wa kamb wẽng maaneg wɛɛngẽ,’ la wa neb “sẽn bɩ, tagsgã wɛɛngẽ”?—1 Kor. 14:20.
2 Vɛrse ning zug tõnd sõsgã sẽn tikã leokda sokrã. Be, b yeelame tɩ sẽn baood-b Wẽnnaamã wʋmda a no-tũudsã fãa võore, rat n yeel tɩ bũmb nins fãa b sẽn tog n maan n ta a yamã. (Yel. 28:5) Yel-bũn sebrã yetame t’a Zeova sõngda nin-tɩrsã tɩ b lebgd yam dãmba, n tõe n bãng sẽn segde, la tɩ rẽ kɩtame tɩ b tõe n ‘bãng pʋ-peelem ne bʋʋd sẽn yaa sõma la tɩrlem ne bũmb nins fãa b sẽn tog n maanã.’—Yel. 2:7, 9, Wẽnnaam Sebre, 1983.
it-1 1195 s. a 4
Burkĩndi
Ned tõeeme n kell n kẽn burkĩnd pugẽ, la pa na n yɩ ne a meng pãng ye. La yaa ne tẽeb la a kɩs sɩd zãng-zãng t’a Zeova tara tõog n tõe n fãag-a. (Yɩɩn. 25:21) Wẽnnaam pʋlmame t’a na n yɩɩ gãoongo, soondg zĩiga, la t’a na n gũu neb nins sẽn maand burkĩndã sore. (Yel. 2:6-8; 10:29; Yɩɩn. 41:12) B sẽn baood wakat fãa n na n ta a Zeova yamã yĩnga, kɩtdame tɩ b vɩɩmã tar võore, la b maand bũmb fãa a Zeova raabã pidsg yĩnga. (Yɩɩn. 26:1-3; Yel. 11:5; 28:18) Yaa sɩd tɩ wa a Zoob sẽn yeelã, wakat ninga, ned sẽn yaa burkĩnd namsda nin-wẽng nugẽ, la a kiid wa yẽnda. La a Zeova wilgame tɩ yẽ mii ned sẽn yaa burkĩnd manesem sẽn yaa a soaba, n pʋlem t’a pʋɩɩrã na n paa wakat fãa, t’a beoog na n yɩɩ neere, la t’a na n paama sẽn sõmbe. (Zoob 9:20-22; Yɩɩn. 37:18, 19, 37; 84:11; Yel. 28:10) Wa sẽn yɩ to-to ne a zoobã, pa arzɛk n kɩtd tɩ ned tar yõodo, la a paam tɩ b waoogd-a ye. Yaa a sẽn kẽnd ne burkĩndã yĩnga. (Yel. 19:1; 28:6) D tõe n yeelame tɩ kamb nins sẽn paam tɩ b roagdbã kẽnd burkĩnd pʋgẽ wã yaa sũ-noog rãmba. (Yel. 20:7) Bala b paamdame tɩ mak-sõng ning b roagdbã sẽn kõ wã, yʋ-noog ning b sẽn paamdã la waoogrã yaa b rogem-pʋɩɩre.
D bʋgs Wẽnnaam Gomdã zug neere
w01 1/12 12 s. a 1
D sẽn tõe n maan tɩ d tẽebã kell n tall pãnga
Kɩs f meng sɩd tɩ loog noore. Neb wʋsg ra tagsdame tɩ b tara laafɩ tɩ tãnsiyõ tiig n lub-ba. Naoor wʋsgo, b ra getame tɩ pa tɩlɛ tɩ b maan ɛgzame-rãmba, la tɩ pʋd n pa tar yõod ye. Woto me, neb wʋsg tagsdame tɩ b sẽn sɩng n yaa kiris-neb hal sẽn kaoosã yĩnga, b pa tõe n wa bʋdg n bas tẽebã ye. Rẽ kɩtame tɩ b pa feesd b mens n na n ges b sã n tara laafɩ tẽebã wɛɛngẽ, hal tɩ yell wa tiig n paam-ba. Rẽnd tara yõod tɩ d ra yĩm saglg ning tẽn-tʋmd a Poll sẽn kõ kɩs f meng sɩd tɩ loog noorã wɛɛngẽ wã ye. A yeelame yaa: “Woto wã, bɩ ned ning sẽn tagsd t’a yasa yĩngr gũus n da wa lʋɩ ye.” Tara yõod tɩ d sak n deeg tɩ d pa zems zãnga, la tɩ d segd n feesda d meng wakat-wakat n get d sã n ket n kẽnda tẽebã pʋgẽ wa sẽn segdã.—1 Korẽnt rãmbã 10:12; Yel-bũnã 28:14.