A Izaak sẽn wa n tar yʋʋm 40, a paama paga. A yʋʋr la a Rebeka. A ra nong-a-la wʋsgo. B wa n paama kom-dibli a yiib sẽn yaa kinkirsi.

Pipi soabã yʋʋr la a Ezayu, tɩ yiib-n-soabã yʋʋr yaa a Zakoobe. A Ezayu ra nong n bee weoogẽ wã n tãoosd rũmsi. La a Zakoob ra nong n bee yiri.

Pĩnd wẽndẽ wã, rao sã n ki, b kõta a pipi bi-riblã ligd la pʋt wʋsg n yɩɩd kamb a taabã. B boonda rẽ tɩ rogem-pʋɩɩre. A Izaak zakẽ wã, biig ning sẽn da na n paam rogem-pʋɩɩrã ra na n paama bũmb ning a Zeova sẽn yeel t’a na n kõo a Abrahaamã me. A Ezayu toog ra pa be ne rẽ ye. La a Zakoob ra getame tɩ tara yõod wʋsgo.

Vugri, a Ezayu kẽnga weoogẽ n tɩ tãoos daarã tõr n lebg n wa. A ra yɛɛ wʋsgo. A wʋma rɩ-noog yũugu. A Zakoob n da segende, t’a yeele: ‘Yãk rɩɩbã n kõ-m tɩ kom n tar maam.’ La a Zakoob yeel-a lame yaa: ‘Kõ maam fo rogem-pʋɩɩrã, tɩ m yaool n yãk n kõ-fo.’ T’a Ezayu leoke: ‘Mam toog ka be ne rogem-pʋɩɩr ye. Talle. Rɩɩbã bal la m data.’ Fo tagsdame t’a Ezayu sẽn maanã yaa sõma sɩda? Pa sõma ye. Rɩɩbã kɩtame t’a ges a rogem-pʋɩɩrã wa bũmb sẽn ka tar yõodo.

A Izaak sẽn wa n kʋʋl wʋsgo, a yãka yam n na n togs a pipi biigã a rogem-pʋɩɩrã sẽn na n yɩ bũmb ninga. La a Rebeka sõnga a Zakoob t’a paam rogem-pʋɩɩrã. A Ezayu sẽn wa n bãngã, a sũurã yikame t’a rat n kʋ a kinkir-taagã. A Izaak ne a Rebeka sẽn da rat n sõng a Zakoobã, b yeel-a lame yaa: ‘Kẽng f yasb a Laban nengẽ. Zĩnd be hal t’a Ezayu sũurã sigi.’ A Zakoob kelga a baaba ne a ma, n zoe n looge.

A Zeova yeela a Zakoob t’a na n sõng-a lame, wa a sẽn sõng a Abrahaam ne a Izaakã. A Zakoob tɩ zĩnda tẽng b sẽn boond tɩ Haran. A paama pagba, n dog kamb wʋsgo, la a lebg rakãagre.

A Zeova wa n yeela a Zakoob yaa: ‘Yik n kuil f ba-yirã.’ A Zakoob ne a zakã rãmb yikame n dɩk sore. Zĩigã ra zãra wʋsgo. Sorã zugu, neb n wa n yeel-a yaa: ‘Fo kinkir-taag a Ezayu n paas neb kobs-naas n wate.’ A Zakoob yɛɛsame t’a Ezayu wat n na n zaba ne yẽ la ne a zakã rãmba. A pʋʋsa a Zeova n yeel yaa: ‘Zeova, m bõos tɩ f fãag-ma.’ Vẽkembeoogã, a Zakoob tʋma a tʋm-tʋmdb tɩ b tɩ kõ a Ezayu piisi, bʋʋse, niisi, yʋgma la bõense.

Baraar yʋngo, a Zakoob yãa malɛka. Yẽ ne malɛkã sɩnga maoore. B maoo ne taab hal tɩ beoogã vẽege. A Zakoob wa n poglame, la baa ne rẽ a kell n maoome. Malɛkã yeel-a lame yaa: ‘Bas maam tɩ m looge.’ T’a Zakoob yeel-a yaa: ‘Ayo. Fo sã n ka ning maam barka, m pa na n bas-f ye.’

Malɛkã sɩd ninga a Zakoob barka. Kɩtame t’a Zakoob bãng t’a Zeova pa na n bas t’a Ezayu wa zab ne-a ye.

A Zakoob wa n tool n nee a Ezayu ne neb kobs-naas sẽn wate. A Zakoob lʋɩɩ taoor t’a zakã rãmb pʋgda. A yĩgimda tẽng naoor a yopoe n yaool n ta a Ezayu taoore. A Ezayu wudgame n sɛg-a, n mobg-a. B fãa yãbame, la b kõ taab sugri. Fo pa tagsd t’a Zakoob sẽn maanã yɩɩ a Zeova noog sɩda?

A Ezayu wa n kuilame, t’a Zakoob me rɩk a ba-yir sore. A Zakoob kom-dibli wã yaa bãmb 12. Yaa a Rubɛn, a Sɩmeyõ, a Levi, a Zida, a Dan, a Naftali, a Gaad, a Asɛɛr, a Isakaar, a Zabulõ, a Zozɛf la a Bẽnzame. A Zeova wa n tũnuga ne a Zakoob bi-ribl a ye n fãag a nebã. Yaa a Zozɛfe. Fo mii sẽn yɩ to-to bɩ? D na n bãnga rẽ taoore.