A Zakoob ra tara kom-dibli 12. A Zozɛf n da yaa 11 soabã. A kẽem-dãmbã ra neeme tɩ b ba wã nong-a lame n yɩɩd bãmba. Fo mii rẽ sẽn kɩt tɩ b maan bɩ? B kisga a Zozɛfe. A Zozɛf wa n zãmsa zãmsdo, n tɩ togs a kẽem-dãmbã. Zãmsdã ra wilgdame tɩ daar n wat t’a kẽem-dãmbã na n yĩgimd n waoog yẽ. Rẽ kɩtame tɩ b kisg a Zozɛf n paase.

Daar a ye, a kẽem-dãmbã ra bee tẽng sẽn boond tɩ Sikɛm sẽnese, n gũud piisi. A Zakoob tʋma a Zozɛf t’a tɩ ges b sã n keemame. A kẽem-dãmbã sẽn wa n ne-a t’a be yɩɩg n watẽ, b yeela taab yaa: ‘Ad zãmsdã soab sẽn wate. Wa-y tɩ d kʋ-a!’ B yõk-a lame n lob bulg pʋga. La a Zida yeel-b lame yaa: ‘D ra kʋ-a ye. D rɩk-a n koose, t’a lebg yamba.’ B wa n yãa neb sẽn yi Madiyã n dabd Ezɩpt n na n tɩ koos teedo, tɩ b rɩk a Zozɛf n koos ne-ba, n deeg wanzuri ligd pisi.

Rẽ poore, a Zozɛf kẽem-dãmbã yõka bʋʋg n kʋ, n dɩk a fuugã n los zɩɩmã pʋgẽ, la b tɩ wilg b ba wã, n sok-a yaa: ‘Pa fo biigã fuug la woto?’ A Zakoob sẽn yã a Zozɛf fuugã, a tagsame tɩ we-rũng n wãb-a. A sũurã sãamame t’a yãbe, hal tɩ nebã bels-a n mak n konge.

Madiyã nebã sẽn ta Ezɩptã, b rɩka a Zozɛf n koos ne a Potifaar sẽn da yaa Ezɩpt nin-kãseng a ye wã. La a Zeova ra bee ne a Zozɛfe. A Potifaar yãame t’a Zozɛf tʋmda sõma, la tɩ b tõe n teeg-a lame. A kɩtame t’a Zozɛf get yẽ zakã bũmbã fãa yelle.

A Potifaar pagã yãame t’a Zozɛf yaa rasãnga, n tar pãnga. Daar fãa, a ra yeta a Zozɛf t’a gãand yẽ. A Zozɛf maana wãna? A zãgsame n yeele: ‘Mam sã n maan woto pa sõma ye. Bala, fo yaa a Potifaar paga. Sẽn paase, mam sã n gãand foo, mam na n maana sẽn pa noom Wẽnnaam.’

Daar a ye, a Potifaar pagã makame n na n modg a Zozɛf t’a gãand yẽ. A gãda a Zozɛf fuugã, la a Zozɛf wudgame. A Potifaar sẽn wa wã, a pagã yaga ziri, n yeel t’a Zozɛf ra rata yẽ. A Potifaar sũurã yika wʋsgo, t’a kɩt tɩ b kẽes a Zozɛf bãens roogo. La a Zeova pa tol n yĩm a Zozɛf yell ye.

A Zozɛf sẽn wa n be bãens roogẽ wã, Ezɩpt rĩm a Farawõ zãmsa zãmsdo, tɩ ned baa a ye pa tõog n wilg zãmsdã võor ye. La a Farawõ tʋm-tʋmd a ye n yeel-a t’a Zozɛf tõeeme. Zĩig pʋgẽ, a Farawõ kɩtame tɩ b tɩ tall a Zozɛf n wa.

A Farawõ sok-a lame yaa: ‘Fo tõe n wilga mam zãmsdã võor bɩ?’ T’a Zozɛf leok yaa: ‘N-ye. Rat n yeelame tɩ yʋʋm a yopoe wã sẽn watã, rɩɩbã na n yɩɩ wʋsg Ezɩpti. La yʋʋm a yopoe wã sẽn na n pʋglã, kom n na n zĩndi. Yãk ned sẽn tar yam, t’a bao rɩɩb wʋsg n bĩngi, tɩ komã ra wa kʋ Ezɩpt nebã ye.’ A Farawõ yeelame yaa: ‘Mam yãka foo. Ezɩpt ka, mam sã n yãk m toogo, foo n pʋgde.’ A Zozɛf maana wãn n tõog n wilg a Farawõ zãmsdã võore? Yaa a Zeova n sõng-a.

A Zozɛf sɩd baoo rɩɩb n bĩng yʋʋm a yopoe. Rẽ poore, kom n wa dũniyã gill zugu, wa a sẽn da yeelã. Nebã ra yita zĩig fãa n wat yẽ nengẽ n daad rɩɩbo. A ba a Zakoob wʋmame tɩ rɩɩb bee Ezɩpti, t’a tʋm a kom-dibli bãmb piiga, tɩ b na n tɩ ra rɩɩbo.

A Zakoob kom-dibli wã sẽn ta a Zozɛf nengẽ, zĩig pʋgẽ a bãng-b lame. La bãmb pa bãng-a ye. B yĩgimdame n waoog a Zozɛfe, wa a sẽn da zãms a zãmsdã pʋgẽ, a sẽn wa n yaa biigã. A ra rat n bãnga a kẽem-dãmbã sã n ket n kis-a lame. Rẽ n so t’a yeel-b yaa: ‘Yãmb waame n na n ges tẽngã, n paam n wa zab ne tõndo.’ Tɩ b yeel yaa: ‘Pa woto ye. Tõnd yaa tõnd 12, n yaa rao a ye kamba. A ye n ki, la tõnd yao-zʋʋgã paa d baaba nengẽ.’ La a Zozɛf yeel-b lame: ‘Yãmb sã n tall y yao-zʋʋgã n wa, m na n bãngame tɩ y sẽn yeelã yaa sɩda.’ Dẽ, b lebg n kuilame.

A Zakoob zakã rãmb rɩɩb wa n saame, t’a le tʋm a kambã Ezɩpti. So-kãnga, a Bẽnzame sẽn yaa b yao-zʋʋgã tũume. A Zozɛf sẽn da rat n bãng a kẽem-dãmbã sã n toeemame wã, a rɩka a wũmblã n solg a Bẽnzame korgẽ wã, la a yeel tɩ yaa a kẽem-dãmbã n zuki. A Zozɛf tʋm-tʋmdbã sẽn wa n yã wũmblã a Bẽnzame korgẽ wã, a kẽem-dãmbã sũur sãamame. B kosa a Zozɛf t’a sɩbg bãmba, la a bas a Bẽnzame.

A Zozɛf bãngame t’a kẽem-dãmbã toeemame. A pa tõog n yõk a meng ye. A sɩnga yãbre, n yeele: ‘Yaa maam la a Zozɛfe. M baaba ket n vɩɩme bɩ?’ A kẽem-dãmbã yɛɛsa wʋsgo. A Zozɛf yeel-b lame yaa: ‘Da sãam-y y sũuri, yãmb sẽn koos maamã ye. Bala yaa Wẽnnaam n tʋm maam ka, sẽn na yɩl tɩ m fãag yãmba. Zoe-y n kuil-y-yã, n tɩ tall m baaba n wa.’

B sɩd lebg n kuilame n tɩ togs b baaba koe-noogã, la b tall-a n wa Ezɩpti. Yʋʋm wʋsg la woto a Zozɛf ne a ba wã sẽn da pa yã taaba. La b le paama taaba.