A Moyiiz zĩnda Madiyã yʋʋm 40, n paam pag la kamba. Daar a ye, a ra gũuda piis Sinayi tãngã sɛɛga, n wa yã bũmb n yɛɛse. A yãa tuug sẽn wit bugum, la tuugã vãadã la raadã ra pa yõogd ye. A Moyiiz kolgame n na n gese, la a wʋma koɛɛg sẽn yi tuugã pʋgẽ, n yeel-a yaa: ‘Moyiizi, ra kolg ye. Yãk f neoodã wã, bala zĩig ning fo sẽn yasã yaa zĩ-sõngo.’ Yaa a Zeova n tũnug ne malɛk n gom ne a Moyiiz.

A Moyiiz yɛɛsame, n pil a nengã. La a Zeova yeel-a lame yaa: ‘Mam yãa Israyɛll nebã sẽn namsdã. Mam na n fãag-b lame n yiis-b Ezɩpt n tall-b n kẽng tẽn-noog pʋgẽ. Yaa foom la m na n tʋm tɩ f tɩ yiis mam nebã Ezɩpti.’ Fo pa tagsd tɩ tʋʋmdã kẽesa a Moyiiz rabeem sɩda?

A Moyiiz sokame yaa: ‘Nebã sã n sok tɩ ãnd n tʋm maam, m na n yeelame tɩ bõe?’ Wẽnnaam leokame yaa: ‘Yeel-b t’a Zeova sẽn yaa a Abrahaam ne a Izaak la a Zakoob Wẽnnaamã n tʋm foo.’ T’a Moyiiz le sok Wẽnnaam yaa: ‘La nebã sã n pa kelg maam?’ A Zeova kɩtame t’a Moyiiz maan bũmbu, sẽn wilgd t’a na n sõng-a lame. A yeela a Moyiiz t’a lob a rasaarã tẽnga. A Moyiiz sẽn lobã, lebga waafo. A Moyiiz sẽn gãd waafã zʋʋrã, le lebga rasaar yɛsa. A Zeova yeelame: ‘Fo sã n maan woto, nebã na n bãngame tɩ maam n tʋm foo.’

La a Moyiiz yeelame: ‘Mam ka na n tõog n gom sõma ye.’ A Zeova yeel-a lame: ‘Mam na n togsa foo f sẽn segd n yeel bũmb ninga, la m kɩt tɩ f kẽem a Aarõ sõng foo.’ A Moyiiz sẽn bãng t’a Zeova bee ne yẽ wã, a talla a pagã ne a kambã tɩ b leb Ezɩpti.

Ezɩpt nebã kɩtame tɩ Israyɛll nebã lebg yembse, n tʋmd wʋsgo. A Zeova tʋma a Moyiiz ne a Aarõ a Farawõ nengẽ, tɩ b tɩ yeel-a yaa: ‘Bas mam nebã tɩ b kẽng weoogẽ wã n tɩ maan maand n kõ maam.’ La a Farawõ wuka a meng n yeel yaa: ‘Mam toog ka be ne a Zeova ye. M pa na n bas Israyɛll nebã tɩ b loog ye.’ A Farawõ kɩtame tɩ Israyɛll nebã tʋm wʋsg n yɩɩd pĩndã. Bũmb la a Zeova ra rat t’a Farawõ bãnge. Fo mii a Zeova sẽn maan bɩ? A kɩtame tɩ yel-beed piig paam Ezɩpt nebã. A Zeova yeela a Moyiiz yaa: ‘A Farawõ pa na n kelg maam ye. Beoog yibeoogo, a na n kẽnga Nill kʋɩlgẽ wã. Kẽng be n tɩ yeel-a t’a sẽn pa rat n bas m nebã tɩ b loogã, Nill kʋɩlgã koom fãa na n lebga zɩɩm.’ A Moyiiz sɩd kẽnga a Farawõ nengẽ. A Aarõ rɩka a rasaarã n wẽ Nill kʋɩlgã, tɩ koomã lebg zɩɩm. Zĩmã sẽn da be kʋɩlgẽ wã kiime tɩ lebg yũugu, tɩ ko-sõng ra kae n yũud ye. La baa ne rẽ, a Farawõ zãgsame t’a pa na n bas Israyɛll nebã tɩ b loog ye.

Rasem a yopoe poore, a Zeova le tʋma a Moyiiz a Farawõ nengẽ, t’a tɩ yeel-a yaa: ‘Fo sã n pa bas mam nebã tɩ b looge, m na n kɩtame tɩ loms wa pid Ezɩpti.’ La a Farawõ zãgsame. Dẽ, a Aarõ zẽka a rasaarã yĩngri, la lomsã sɩngame n pit Ezɩpti, n kẽed nebã rotẽ, b ro-gãasẽ la b laasẽ. B ra bee zĩig fãa. A Farawõ yeela a Moyiiz t’a kos a Zeova t’a kɩt tɩ lomsã looge, t’a na n basa Israyɛll nebã tɩ b looge. A Zeova sɩd kɩtame tɩ lomsã ki. Ezɩpt nebã wʋk-b lame n zame, tɩ tẽngã fãa lebg yũugu. La a Farawõ pa bas Israyɛll nebã tɩ b loog ye.

A Zeova le yeela a Moyiiz yaa: ‘Kɩt t’a Aarõ rɩk a rasaarã n wẽ tẽnga, tɩ tomã lebg rũm-bõones n dũmd nebã.’ Zĩig pʋgẽ tɩ rũmsã pida tẽngã. A Farawõ neb kẽer n yeel-a yaa: ‘Yaa Wẽnnaam n kɩt tɩ yel-beedã paamd tõndo.’ La a Farawõ zãgsame n pa bas Israyɛll nebã tɩ b loog ye.