Wẽnnaam tʋma a Moyiiz ne a Aarõ tɩ b tɩ yeel a Farawõ yaa: ‘Fo sã n pa bas mam nebã tɩ b looge, m na n kɩtame tɩ kɛɛda wa kẽ Ezɩpti.’ Kɛɛda wʋsg n sɩd kẽ Ezɩpt nebã fãa rotẽ, rakã-rãmbã la naong rãmbã rotẽ. Tẽngã fãa ra pida ne kɛɛda. La b pa kẽ Gosɛn tẽngã, Israyɛll nebã sẽn da beẽ wã ye. Yel-beed a taabã me sẽn maan rẽ poorã namsa Ezɩpt nebã bala. A Farawõ yeela a Moyiiz yaa: ‘Kos a Zeova t’a kɩt tɩ kɛɛda wã looge, tɩ m na n basa Israyɛll nebã tɩ b looge.’ A Zeova sẽn kɩt tɩ kɛɛda wã loogã, a Farawõ le toeema yam. Dabʋr la a Farawõ na n sak n bas Israyɛll nebã tɩ b looge?

A Zeova yeelame: ‘A Farawõ sã n pa bas mam nebã tɩ b looge, m na n kɩtame tɩ Ezɩpt nebã rũmsã lʋɩ bãag n ki.’ Vẽkembeoogã, rũmsã sɩngame n kiidẽ. La Israyɛll nebã rũmsã ra pa kiid ye. La baa ne rẽ, a Farawõ pa sak n kelg a Zeova ye.

Rẽ, a Zeova yeela a Moyiiz t’a kẽng a Farawõ nengẽ, n tɩ yãk tompɛglem n lob yĩngri. Tompɛglmã lebga wubsg n sigd Ezɩpt nebã zugu. Wubsgã kɩtame tɩ Ezɩpt nebã la b rũmsã yĩns lebg noada. La a Farawõ kell n zãgsame t’a kõn bas Israyɛll nebã tɩ b loog ye.

A Zeova tʋma a Moyiiz t’a tɩ yeel a Farawõ yaa: ‘Fo zãgsame tɩ f pa na n bas mam nebã tɩ b looge? Beoogo, sapɩlem n na n ni tẽngã zugu.’ Vẽkembeoogã, a Zeova kɩtame tɩ sapɩlem ne bugum ni, tɩ saagã tãsdẽ. Ezɩpt nebã zɩ n yã rẽ ye. Tɩɩsã ne moodã fãa sãamame. La sapɩlmã pa ta Gosɛn tẽngã ye. A Farawõ yeela a Moyiiz yaa: ‘Kos a Zeova t’a kɩt tɩ sapɩlmã sa, tɩ m na n bas-y lame tɩ y looge.’ La sapɩlmã ne saagã sẽn sa wã bala, a Farawõ le toeema yam.

Rẽ, a Moyiiz yeelame: ‘Masã, yaa sʋy n na n wa wãb tɩɩsã la koodã sapɩlmã sẽn pa sãamã.’ Sʋy ka tɛk n sɩd wa n wãb tɩɩsã la bũmb nins fãa sẽn da ket pʋtẽ wã. A Farawõ yeelame: ‘Kos a Zeova t’a kɩt tɩ sʋyã looge.’ La baa a Zeova sẽn kɩt tɩ sʋyã loogã, a Farawõ pa kelg-a ye.

A Zeova yeela a Moyiiz yaa: ‘Tẽeg f nugã n tees saasã.’ A Moyiiz tẽega a nugã, la zĩigã lebga lik bida. Likã kaoosa rasem a tãabo, tɩ Ezɩpt nebã pa le ne baa fʋɩ. La Israyɛll nebã yẽ ra tara vẽenem.

A Farawõ yeela a Moyiiz yaa: ‘Foo ne f nebã tõe n loogame. La ra tall-y y rũmsã n loog ye.’ La a Moyiiz yeel-a lame yaa: ‘Tõnd tog n talla d rũmsã n looge, n paam n tɩ maan maoong n kõ tõnd Wẽnnaamã.’ A Farawõ sũurã yika wʋsgo, t’a tãs a Moyiiz n yeel-a yaa: ‘Loog n yi mam taoore. M sã n le yã-fo, m na n kʋ-f lame.’

A Moyiiz ra yeela a Farawõ t’a pa na n le wa a nengẽ ye. La nand t’a looge, a yeela a Farawõ yaa: ‘Yʋn-sʋk sã n ta, Ezɩpt zak fãa pʋgẽ, pipi bi-riblã na n kiime, sẽn sɩng ne a Farawõ pipi bi-riblã, n tãag a yembsã pipi kom-dibli wã.’

Baraarã, a Zeova wilga Israyɛll nebã rɩɩb b sẽn segd n segle. A yeel-b lame yaa: ‘Bɩ zak fãa neb yõk pesg bɩ bʋʋg sẽn zems yʋʋmde, n kʋ n yãk a zɩɩmã n bol zakã noore. Y segd n sẽe nemdã, n wãb-a ne bur sẽn pa ning rabɩlle. Yãmb tog n yeelga y futã, la y wid y neooda wã, loogrã yĩnga. Yʋn-kãngã bala, y na n paam n yii Ezɩpti.’ Tags n ges Israyɛll nebã sũ-noogã buudu!

Yʋn-sʋk sẽn ta, a Zeova malɛkã kẽnga zak fãa noore, la a sã n ta n mik tɩ zɩɩm pa bol zakã noore, zakã pipi bi-riblã kiidame. La a sã n yã zɩɩm, a longda zakã. Ezɩpt nebã zak fãa pʋgẽ, yaa rakãagr zak tɩ yaa naong soab zaka, pipi bi-riblã kiime. La bi-ribl baa a ye pa ki Israyɛll nebã zagsẽ ye.

Baa a Farawõ pipi bi-riblã kiime. Sãama a sũurã wʋsg t’a toeem yam. Zĩig pʋgẽ, a yeela a Moyiiz ne a Aarõ yaa: ‘Yik-y n loog-y-yã. Rɩk-y y rũmsã n tɩ maan maoong n kõ y Wẽnnaamã.’

Israyɛll nebã yii Ezɩpt ki-peel sasa, n tigim taab buud-buud n kẽnda. Israyɛll rapã ra taa tus kobs-yoobe, ne pagb la kamb wʋsgo. Neb a taab me sẽn pa Israyɛll neb n tũ n na n tɩ maan maand n kõ a Zeova. Israyɛll nebã yaa n paama b mense.

A Zeova yeel-b lame tɩ yʋʋmd fãa, b tog n segla rɩɩb ning yẽ sẽn wilg-bã, sẽn na yɩl n tẽeg a sẽn maan to-to n fãag-bã. B boonda rẽ tɩ Paka.